Yesu Watushila Chakutalilahu Chakudizoza

“Muloña ami nayileji chuma chakwimbujola, kulonda ninenu nawa mwilaña neyi munayilenu.”—YOW. 13:15.

MUKWAKULA NENUDI?

Indi Mwana kaNzambi wadizozeli ñahi henohu wuchidi mwiwulu?

Yesu wadizozeli ñahi hadiñayi namujimba wawuntu?

Nkiswinyi yinafumi mukudizoza kwaYesu?

1, 2. Hawufuku wakukumishaku Yesu kwikala hamaseki, chumanyi chayidizishiliyi apostolu indi?

 HIWUFUKU wakukumishaku Yesu kwikala hamaseki, nawa wadiña nawapostolu idi mukapeka kahewulu mwitala damuYerusalema. Hampinji yadileñawu, Yesu hakwimana nakutenteka chikwowelu chindi chahewulu hambadi. Hakudikumbakesha ditwayi. Hakuhuñunwina menji mumbashila nakutachika kuwelesha nyendu yawatumbaji nawa hakuyikombwela naditwayi. Yavwala nikuvwala cheñi chikwowelu chindi chahewulu. Muloñadi Yesu chayiwelesheleliyi kunyendu?—Yow. 13:3-5.

² Yesu yomweni walumbulwili nindi: “Ichi chinayili munachiluki, tahindi? . . . Ami niMwanta wenu niNkuluñaña nawa, naweleshi nyendu yenu, dichi ninenu nawa mwadi kuweleshañana nyendu yenu. Muloña ami nayileji chuma chakwimbujola, kulonda ninenu nawa mwilaña neyi munayilenu.” (Yow. 13:12-15) Kuhitila mukuzata mudimu wakehelamu namuchima wejima, Yesu wayilejeli apostolu indi chuma chakanukañawu nawa chakayikwasha kwikala adizoza kumbidi.

3. (a) Yesu wamwekesheli ñahi mapampa kayedi nindi kudizoza kwalema? (b) Yumanyi yitukuhanjekahu muchinu chibaaba?

³ Mpinji yawelesheliyi Yesu nyendu yawapostolu indi, hidiyi yadiña mpinji yatachi yamwekesheliyi chililu chakudizozaku. Mpinji yimu apostolu indi amakwawu amwekesheli yililu yakufwila yifulu, Yesu wanoneli mwana wanyanya nakumwimika kwakwihi nachikasa chindi hakuyila nindi: “Muntu wukutambula mwana wanyanyiwu mwijina dami nantambulami; wukuntambulami natambuli niyena wantemesheli; muntu nakehi mukachi kenwenu ejima, diyi muneni.” (Luka 9:46-48) Chimwahitili mpinji Yesu wahosheli awa mazu hadiñayi nakushimwina  muloña welukili nindi Afwarisi afwilaña kutuumbakana, nindi: “Muloña muntu wukuditohesha akamukehesha; nimuntu wukudikehesha akamutohesha.” (Luka 14:11) Eñañi, Yesu wakeñaña atumbanji twindi ekali adikehesha, dikwila nawu kwikala adizoza chakadi kudivwimba. Hakwila nawu tumwimbujoli, tusambilenu kushinshika hachakutalilahu chindi chakudizoza. Tukumona cheñi wuloku watambwilaña muntu wamwekeshaña ichi chililu niantu amakwawu.

“HINAFUNTILI HANYIMAKU”

4. Indi Mwana kaNzambi wumu hohu wamwekesheli ñahi kudizoza henohu kanda yenzi hamaseki?

⁴ Mwana kaNzambi wumu hohu wadizozeli henohu kanda yenzi hamaseki. Henohu wuchidi mwiwulu, Yesu washakamini naTata yindi wamwiwulu hadi yaaka yayivulu. Mukanda wamuBayibolu waIsaya wahosha hawubwambu wadiña hakachi kaMwana naTata yindi, nawu: “Mwanta Nzambi nanyinki idimi dawalejewaña, kulonda niiluki kuhosha mazu akukolesha nachu muntu nazeyi. Wanhindwishaña habudidi habudidi, wahindwishaña itu dami mutulu kulonda nitiyaña neyi alejewaña. Mwanta Nzambi najikuli itu dami ami hinadikañiluku hinafuntili hanyimaku.” (Isa. 50:4, 5) Mwana kaNzambi wamwekesheli chililu chakudizoza nawa washili maana kuyuma yamudizishileñawu kudi Yehova. Wakeñeleña chikupu nindi Nzambi walala yamudizishi. Yesu watela wamweni chakutalilahu chaYehova chakudizoza hakumwekesha wushona kudi antu akwanshidi.

5. Hakwikala Mikeli mukulumpi wawañelu, Yesu wamwekesheli ñahi kudizoza nikudikehesha hampinji yatadikileñayi naDiyabolu?

⁵ Añelu ejima hiyadiña nachililu chadiña naMwana kaNzambi wumu hohuku. Chatela yeteji Yehova kumudizisha, kañelu wekalili Satana Diyabolu watachikili kumwekesha yaaku yakubula kudizoza, yakudeta hebwambu nikudivwimba nawa wadikañili naYehova. Ilaña Yesu walemesheli chifulu chindi chamwinkeluwu mwiwulu nawa wazatishileña wuswa windi chiwahi. Hakwikala Mikeli mukulumpi wawañelu, Yesu hamotokeli mwakumina ñovu jindi hampinji ‘yatadikileñayi naDiyabolu kufwila mujimba waMosuku.’ Ilaña Mwana kaNzambi wadizozeli nikudikehesha. Wakeñeli nindi Yehova, Nsompeshi Muneni wakuleña kwejima, yakamanishi iku kukala hampinji Yindi yatelela.—Tañenu Yuda 9.

6. Indi Yesu wamwekesheli ñahi kudizoza hakwiteja mudimu wamwinkeluwu wakukalakala neyi Mesiya?

⁶ Hakachi kayuma yadiziliyi Yesu henohu wuchidi mwiwulu wadizili nihawuprofwetu wahosheleña hachihandilu chindi chahamaseki chawuMesiya. Dichi, watela welukili nindi wakamona yihuñu. Hela chochu, Yesu wetejeli mudimu wakwinza hamaseki nikufwa neyi Mesiya wakaninuwu. Muloñadi? Kapostolu Pawulu wasonekeli hansañu yakudizoza kwaMwana kaNzambi wumu hohu nindi: “Yena wekala mwomwekalilayi Nzambi, watoñojokeli nindi kubwambuka naNzambi hichuma chakuhukulaku, ilaña wadibalumwini kwikala wakadi kulema, hakwikala mwekalila nduñu, hakwikala chaduwu antu.”—Fwi. 2:6, 7.

CHADIÑAYI MUMUJIMBA WAWUNTU ‘WADIZOZELI’

7, 8. Indi Yesu wadizozeli ñahi muwansi windi nimumudimu windi hamaseki?

⁷ Pawulu wasonekeli nindi: ‘Chamumwenuwu [Yesu] himuntu, hakudizoza, hakwovwahilaña ho-o, ndo nikukufwa, eña kwokufwa kwahamutondu wakuyandishila.’ (Fwi. 2:8) Kufuma kuwansi windi, Yesu watushila chakutalilahu chakudizoza. Hela amukulishili kudi anvwali  abula kuwanina, aYosefu niMariya, ‘watwalekeluhu kuyovwahila.’ (Luka 2:51) Eñañi, Yesu hichakutalilahu chachiwahi kudi atwansi akakiswilawu kudi Nzambi hamuloña wakutiyilila chikupu anvwali jawu.

⁸ Chakuliliyi, Yesu wadizozeli kuhitila mukusha muchima hakwila nkeñelu yaYehova, bayi yindiku. (Yow. 4:34) Hakushimwina, Yesu Kristu wazatishileña ijina daNzambi nawa wakwashili antu ashinshika kwiluka yililu yaYehova nankashi ninkeñelu Yindi kutalisha hadi antu. Yesu welileña cheñi yuma yatañishileñayi antu hadi Yehova. Mukulomba kwachitalilu, Yesu washimwini chuma chatachi nindi: ‘Tata yetu wekala mwiwulu, ijina deyi dijili.’ (Mat. 6:9) Dihafumini Yesu kuleja atumbanji twindi nindi ajilikeña ijina daYehova nankashi. Niyena wadijilikileña. Kukamwihi nakumanisha mudimu windi hamaseki, Yesu walombeli kudi Yehova nindi: ‘Nayileji [apostolu] ijina deyi kulonda adiluki niwena akaditiyakeshi.’ (Yow. 17:26) Mumudimu windi wejima, Yesu wamulemesheleña Yehova muyuma yakoñeliyi hamaseki.—Yow. 5:19.

9. Zekariya waprofweteli nindidi hadi Mesiya nawa washikijeweli ñahi hadi Yesu?

⁹ Zekariya wasonekeli nsañu yawuprofwetu kutalisha hadi Mesiya nindi: “Eyi mwana kaZiyona wamumbanda, zañalalaku chacheni; eyi mwana kaYerusalema wamumbanda, Dikuwi. Tala, Mwanta weyi hakwinza kudeyi. Waloña, wukweti wamwinu; wadizoza, wudi nakwendela hachimbulu, hamwana kachimbulu.” (Zek. 9:9) Iwu wuprofwetu washikijeweli hampinji yeñililiyi Yesu muYerusalema henohu Paseka yamuchaaka cha 33 C.E. kanda yishiki. Izaza dawantu dalili mahinawu ninyitayi yanyitondu munjila. Eñañi, antu ejima mumusumba azañaleli hampinji yeñilileñayi. Hela chamwililiwu kudi antu nawu yekali Mwanta, Yesu wadizozeli.—Mat. 21:4-11.

10. Chumanyi chamwekesheliyi Yesu chelili yovwahili kushika nikukufwa?

¹⁰ Kudizoza nikwovwahila kwaYesu Kristu hamaseki kwamanini hampinji yafwiliyi hamutondu  wakuyandishila. Dichi wamwekesheli chikupu nawu antu anateli kutwalekahu nakashinshi kudi Yehova hela chakwila anayeseki chamuchidinyi. Yesu wamwekesheli cheñi nindi Satana watwambili hakuhosha nindi antu amuzatilaña Yehova hamuloña wayuma yayinkañawu. (Yoba 1:9-11; 2:4) Kashinshi kamwekesheliyi Kristu kayiñishili chiyuulu chaYehova chakuleña kwejima nawu chaloña nawa choloka. Yehova wazañaleli nankashi hakumona kashinshi kamwekesheliyi Mwanindi wadizoza.—Tañenu Yishimu 27:11.

11. Ifutu danyiloña daYesu Kristu dayinka antu akuhwelela kukooleka kwamuchidinyi?

¹¹ Chineli wafwilili hamutondu wakuyandishila, Yesu wakuulili antu nefutu danyiloña. (Mat. 20:28) Hamuloña wamulambu waYesu, Yehova nateli kutwanakena nshidi jetu kwesekeja nanshimbi jindi jaloña nikuyinka antu kukooleka kwakushakama haya nyaka. Pawulu wasonekeli nindi: “Mudimu wumu wakuloña hiwukuleta kuloña kwawumi kudi antu ejima.” (Rom. 5:18) Kufwa kwaYesu kwayinka akwaKristu awayishewa naspiritu kukooleka kwakutambwila wumi wabulaña kufwa mwiwulu ‘nianyikoku acheñi’ akatambwila wumi wahaya nyaka hamaseki.—Yow. 10:16; Rom. 8:16, 17.

AMI “NADIZOZA MUMUCHIMA”

12. Yesu wamwekesheli ñahi kudiwunjika nikudizoza hakudikunda nawantu abula kuwanina?

¹² Yesu watambikili antu ejima ‘akabakeneña niasendeli yalema’ kwinza kudi yena. Wahosheli nindi: “Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu.” (Mat. 11:28, 29) Yililu yakudizoza nikudiwunjika yamuleñeleli Yesu kwikala naluwi nikubula kumwekesha chaambu kudi antu abula kuwanina. Welukili yuma yateleleli kuzatawu atumbanji twindi. Yesu wayihamekeleña nikuyikolesha. Helileña yuma yayineñesheleña atumbanji twinduku. Yesu hayizondojolileña hela kuyikabishaku. Ilaña walejeli atumbanji twindi nindi neyi akundama kudi yena nikuzatisha yuma yayilejeleñayi, akunooka, muloña mpanda yindi yaswayi nichisenda chindi chapepela. Amayala niambanda, akulumpi niatwansi adiña akasunuka kwinza kudi Yesu.—Mat. 11:30.

13. Yesu wamwekesheli ñahi wushona kudi antu akabakeneña?

¹³ Hakudikunda nawantu amuIsarela akabakeneña, Yesu wayitiyilileña wushona muloña wayihuñu yamweneñawu, wayakameneneña nankashi. Chashikiliyi kwakwihi naYeriku, waweni mputamesu mukwakulombalomba wejina daBaratimewu nimukwawu mputamesu wabula kutenawu ijina. Atwalekeluhu nakumulembelela Yesu nawu yayikwashi, ilaña  izaza dawantu dayilejeli awa amayala kumwenahu. Yesu kachi wayidiwili ana amputamesu. Ilaña Yesu wayilejeli nindi ayileti kwadiñayi nawa hamuloña waluwi, wayitonesheli. Eñañi, Yesu wamwimbujoleli Tata yindi, Yehova, kuhitila mukudizoza nikutiyila akwanshidi luwi.—Mat. 20:29-34; Maku 10:46-52.

“MUNTU WUKUDIKEHESHA AKAMUTOHESHA”

14. Nkiswinyi yafuma mukudizoza kwaYesu?

¹⁴ Chihandilu chaYesu Kristu chakudizoza chaletaña muzañalu nawa antu ahetelañamu chikupu. Yehova wazañaleli chamweniyi Mwanindi wakeñayi yeteji kwila nkeñelu yindi namuchima wumu. Apostolu niatumbanji ahetelelumu hakumona kuwunda nikudiwunjika kwaYesu. Chakutalilahu chindi, ntañishilu nichayihamekeleñayi nankashi kwayileñeleli apaminiku kuspiritu. Antu akabakeneña aheteleli mukudizoza kwaYesu muloña wayikwashileña, wayitañishileña nawa wayikolesheleña. Hela chochu, antu ejima amukuhwelela akahetelamu chikupu mwifutu damulambu waYesu.

15. Indi Yesu wahetelelumu ñahi mukudizoza?

¹⁵ Indochi Yesu? Komana kudizoza kwindi kwamuhetesheli? Eña, muloña Yesu walejeli atumbanji twindi nindi: “Muntu wukudikehesha akamutohesha.” (Mat. 23:12) Awa mazu ashikijeweli hadi Yesu. Pawulu walumbulwili nindi: “Nzambi nawa namutuumbakeshi [Yesu] chakubadika, namwinki ijina dabadika majina ejima; kulonda mwijina daYesu manuñu ejima akafukami, niamwiwulu, niahamaseki, niamwishina damaseki; nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.” Hamuloña wakudizoza nikashinshi kamwekesheliyi Yesu hamaseki, Yehova Nzambi wamutuumbakesheli Mwanindi, wamwinkeli chifulu cheneni hayileñaleña yamwiwulu niyahamaseki.—Fwi. 2:9-11.

YESU ‘WAKENDA MUCHALALA NIKUDIZOZA’

16. Chumanyi chinakumwekesha nawu Mwana kaNzambi wakatwalekahu kuzata nyidimu nakudizoza?

¹⁶ Mwana kaNzambi wakatwalekahu kuzata nyidimu nakudizoza. Hakushimwina chadimu chakayibabeshayi Yesu ayilumbu jindi henohu wudi hetanda dawanta mwiwulu, ñimbi wamasamu wembili nindi: ‘Kandamaku mwikalu deyi, wendi chachiwahi muchalala nakudizoza nikuloña.’ (Mas. 45:4) Hamuloña wakwenda muchalala nimukuloña, Yesu Kristu wakenda mwikalu dakudizoza haAmagedoni. Hanu dinu chumanyi chakamwekana kukumana kwaChiyuulu Chayaaka Ikombakaji hampinji yakela Mwanta wawuMesiya ‘nanoñeshi dehi kuyuula kwejima, niwanta wejima, niñovu yejima’? Wamba kadizoza? Eña, muloña ‘wakahana wanta kudi Nzambi yindi, yowu Tata.’—Tañenu 1 Akorinda 15:24-28.

17, 18. (a) Muloñadi antu jaYehova chatela kwimbujolilawu chakutalilahu chaYesu chakudizoza? (b) Yumanyi yitukahanjekahu muchibaaba chinalondeluhu?

¹⁷ Indi etu? Komana tukulondela chakutalilahu chaYesu nikwikala namuchima wakudizoza? Komana tukapuluka neyi Mwanta Yesu Kristu nenzi nakujilumuna ayiluwañimbi haAmagedoni? Ikalu dinakwendelayi dinakumwekesha nawu wukapulwisha hohu antu adizoza nialoña. Dichi neyi tunakukeña kupuluka twatela kudizoza. Eñañi, hamuloña wakudizoza kwindi Yesu Kristu niantu amakwawu ahetelelumu, ninetu nawa neyi tukudizoza tukahetelamu chikupu.

¹⁸ Chumanyi chikutukwasha kulondela chakutalilahu chaYesu chakudizoza? Tunateli kwikala ñahi adizoza hela tunakumona kukala? Awa malwihu tukayihanjeka muchibaaba chinalondeluhu.

[Malwihu aKuzatisha haKudiza]

[Nyevulu yidi hefu 12]

Indi kudizoza kwaYesu kwatuheteshaña ñahi?

[Mwevulu wudi hefu 13]

Yesu wamwekesheleña wushona