Yuma Yawu, Yakwashili Akwawu Mwonsu Mwabuliluwu

MWADIÑA muchaaka cha 49 C.E. Petulu, Yakoba niYowanu, “amwekeni neyi yishimi” ayinkeli aPawulu nimukwawu nkoñi Baranaba mudimu. Ateleleli kwanuka akwaKristu atuzweñi hampinji yadiña nakushimwinawu kunyuza. (Ŋal. 2:9, 10) Azatili ñahi iwu mudimu?

Nyikanda yasonekeliyi Pawulu yamwekeshaña nawu wazatili chiwahi iwu mudimu. Chakutalilahu, wayisonekeleli akwaKristu amuKorinda nindi: “Nsañu yakupompesha yamukunkulu yakukwasha nachu akwakujila. Munalejeleli yipompelu yamuÑaliliya, dimu mumukwila ninenu nawa. Ifuku damulungu damuchimu didu dimukutentekela hambadi mali wejima wenu, iwu mwanaheteliyi, iwu mwanaheteliyi, kulonda chinakenza nakawani yakupompesha dehi. Chinakashika nakatemesha antu imukwiteja munyikanda yenu, akatwali yamukunkulu yenu kuYerusalema.”—1 Kor. 16:1-3.

Mumukanda windi wamuchiyedi wasonekeleliyi Akorinda, Pawulu walumbulwili cheñi chakeñeleleñawu mali apompesheluwu. Akeñeleña nawu ‘esekeji yuma yenu yayivulu yakatataka, yikwashi akwenu mwonsu mwanabuluwu.’—2 Kor. 8:12-15.

Hampinji yasonekeleliyi Pawulu akwaKristu muRoma kwakwihi na 56 C.E., kwashalili chanti nakumanisha mudimu wakupompesha yawana. Wahosheli nindi: “Katataka nidi nanjila yakuya kuYerusalema nayuma yakukwashaku akwakujila. Muloña akwaMasidoniya niakwaAkaya atiyili kuwaha kupompesha yuma yakukwasha nachu atuzweñi ahadi akwakujila ekala kuYerusalema.” (Rom. 15:25, 26) Nkumininaku, Pawulu wakoñeli mudimu windi, muloña chafuntiliyi kuYerusalema ashikeneni dakumukwata, wamulejeli Nguvulu wawaRoma Felisi nindi: “Chinadiñi nakuletela akwetu akwamuza wami yamukunkulu, nikulambula Nzambi.”—Yil. 24:17.

Yililu yamwekesheli akwaKristu amuyaaka nkulakaji yakusambila yamwekenaña mumazu ahosheliyi Pawulu hadi akwaMasidoniya. Wahosheli nindi, ‘atulembeleleli nakulembelela kwakweni nawu ahani yawana.’ Kapostolu walejeli akwaKorinda kwimbujola chakutalilahu chawu. Wahosheli nindi: “Antu ejima atoñojoki chachiwahi munyichima yawu hamuntu hamuntu, ahani chakadi kuneña hela kumukanjikija; muloña Nzambi wakeña muntu wahanaña nakuseha.” Chumanyi chaleñeleli yipompelu kwikala namuchima wakuhana? Bayi neyi akeñeleña ‘kuwanisha mwabuliluwu akwakujila hohuku ilaña akeñeleña kumusakilila Nzambi nankashi.’ (2 Kor. 8:4; 9:7, 12) Anetu nawa twatela kwila neyi cheliluwu amana kwetu. Yehova Nzambi wakakiswila muntu wamwekeshaña yililu yamuchidiwu yakuhana nawa nkisu yindi yaheteshaña muntu.—Yish. 10:22.

 [Chikasha chidi hefu 9]

NJILA MWAHANINAÑAWU AMAKWAWU YAWAANA YAKUKWASHA MUDIMU WAMUKAAYI KEJIMA

Neyi chichadiña mumafuku akapostolu Pawulu, antu amavulu makonu ‘atentekaña hambadi mali,’ hela kuhemba mali akusha mutuyikasha twamuchipompelu hakusoneka nawu “Mudimu Wamukaayi Kejima.” (1 Kor. 16:2) Kakweji nikakweji, yipompelu yatemeshaña iyi yawaana kukasanji kawaYinsahu jaYehova kamwituña dawu. Munateli cheñi kutemesha yawana yamali kuhitila mukuzatisha mutayi wetejawu munshimbi wazatishañawu aYinsahu jaYehova mwituña denu. Hakwila mwiluki mutayi wetejawu munshimbi wazatishañawu aYinsahu jaYehova mwituña denu, mwani ihulenu kasanji kamutayi kamwituña denu. Munateli kuwana keyala yakasanji kamutayi wenu hawebu sayiti yawww.pr418.com. Yawana yimunateli kutemesha kukasanji diyi iyi:

YAWANA YAKUDIKEÑELA

• Munateli kuhana mali, yingelingeli hela yuma yikwawu.

• Mwatela kusoneka mukanda nakuwutemeshela hamu namali hela yawana yidi yejima yimunatemeshi.

NJILA YAKUHANINA MALI AKUSONDAMISHA

• Mwatela kuhana mali kulonda ayizatishi kumudimu wamukaayi kejima nawa neyi himukukeña mali enu akuyifuntishila.

• Mwani sambilenu kwihula kasanji kamutayi kamwituña denu.

KUFUUKWILA CHADIMU KUHANA WUKWASHU

Kubombela hayawaana yamali imwatela kuhana, kudi njila jikwawu mutwatela kukwashila mudimu waWanta wamukaayi kejima. Njila jeniji anajishimuni heshina. Njila yidi yejima yimunakukeña kuzatisha, mwani sambilenu kwihula kasanji kamutayi kamwituña denu kulonda mwiluki njila jazatishañawu mwituña denu. Chineli nshimbi ninyisonku yashiyashana, mwatela kwihula antu akuluka yitembi munsañu janyisonku ninshimbi henohu kanda muwani njila yayiwahi yakuhaninamu yawana.

Inshuwalansi: Mwatela kusoneka nenu aWatch Tower Bible and Tract Society of Pennsylvania diwu atela kutambula mali akukiñilamu wumi wenu hela apeshoni.

Mali Akunyambawulu: Mali akunyambawulu, yipapilu yimwaswekejelañahu mali, hela mali apeshoni mwatela kuyihana kudi aWatch Tower Bible and Tract Society of Pennsylvania neyi enu mwiluña mwosi, kwesekeja nanshimbi yanyambawulu yamwituña denu.

Mali Asompokañamu: Antu amakwawu ekala namakampani nawa mali asompokañamu ayihanaña chawana kuWatch Tower Bible and Tract Society of Pennsylvania hela anateli kusoneka nawu neyi wena mwiluña mwosi aWatch Tower Bible and Tract Society of Pennsylvania diwu akatambula mali.

Mpata Hela Matala: Mwatela kuhana itala hela mpata yatela kulandishawu neyi chawana, neyi mudi netala, mwatela kusonekesha nenu mukashila aWatch Tower Society of Pennsylvania, enu aweni mukutwalekahu nakushakamamu.

Chawana Chahachaaka: Iyi hinjila yimu yakuhaninamu mali hela njila yikwawu yakuhembelamu mali kumutayi wazatishañawu aYinsahu jaYehova. Mukwakuhana niyena hela muntu mukwawu anenkuwu iwu mudimu kudi mukwakuhana, wukutambulaña nfwetu hachaaka hachaaka muchihandilu chindi.

Mawilu niYikumba: Yikumba hela mali mwatela kusonekesha nenu yikashali mumakasa aWatch Tower Bible and Tract Society of Pennsylvania kuhitila mukusoneka wilu, munateli kusoneka nenu aWatch Tower Bible and Tract Society of Pennsylvania diwu akatambula yikumba. Neyi muhana yikumba yenu kulonda yikwasheña mutayi wansakililu yikuyileñela mubuleña kufweta nyisonku.

Kwesekeja namwatalisha mazu akwila nawu “kufuukwila chadimu kuhana wukwashu,” iyi yawana yakeñekaña wunakuhana kufuukwila chadimu. Dichi mwatela kwihula ihaku wenu hela antu eluka nsañu janyisonku. Kuhitila mukuzatisha iyi njila yakufuukwila chadimu kuhana wukwashu, antu amavulu anakukwasha nankashi nsakililu yetu ninyidimu yakukwasha antu mukaayi kejima nawa ahanaña musonku wantesha.

Neyi munakukeña kwiluka nsañu jajivulu, munateli kwihula akatilejali, munateli kuyisonekela hela kuyitemeshela nshiña, kuzatisha keyala yidi heshina hela kwihula kasanji kamutayi kamwituña denu.

Treasury

Watch Tower Bible and Tract Society of Pennsylvania

P.O. Box 33459,

Lusaka 10101

Telefoni: +260 211 272062