‘Akwakwenda Mwambala’ Anuñañana Mukudifukula Kwalala

“Antu akumpata jacheñi [añinza] diwu akayidiminaña diwu akayiloñeshelaña nyivinyu yenu. Hakwila enu akayitumba ijina nawu Yenu atupristu twaYehova.”—ISA. 61:5, 6.

MUKWAKULA NENUDI?

Indi antu amakwawu ayimonaña ñahi añinza nawa Bayibolu yahosha nawudi?

Mutambinyi wunakutambikawu antu akunyuza yejima?

Munjilanyi mutukuhoshela netu tudi mwituña mwabula añinza?

1. Indi antu amakwawu amonaña ñahi añinza nawa muloñadi chichatamina?

 NEYI chitwadizili muchibaaba chinafumuhu, antu azatishaña izu ‘dañinza’ munjila yatama, yamwekeshaña kasekesha nikasawuntu. Neyi tukumonaña antu afuma kwacheñi netu amukunkulwayi kubadika antu adi mwituña detu, dikwila nawu tudi nakasawuntu. Nawa yililu yamuchidiwu yamwekeshaña nawu owu muntu kwosi jelukayi. Mukanda waThe Races of Mankind wahosha nawu: “Bayibolu yatenaña nyichidi yawantu nawu hiyanyana evumu dimu.” Amana kwetu ekala ambuka chikupu, ilaña hiyanyana evumu dimu.

2, 3. Indi Yehova wayimonaña ñahi añinza?

² Hela chochu, añinza twashakamaña nawu kwejima kutwekala. Dichadiña nikudi aIsarela akushankulu, adiña nawubwambu wawuwahi naYehova Nzambi kuhitila muLushimbi lwachikaninu. Antu abulili kwikala aIsarela hiyadiña nawuswa wakwila yuma yejimaku ilaña aIsarela ayilejeli nawu ayilemesheña nikuyihemba chiwahi. Hichakutalilahu chachiwahi chitwatela kwimbujola! AkwaKristu alala hiyatela kumwekesha chaambuku. Muloñadi? Kapostolu Petulu nindi: “Mwalala, namoni komana Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.”—Yil. 10:34, 35.

³ Añinza amuIsarela wakushankulu ahetelelumu mukudikunda nankashi nawaIsarela aweni. Chumichi chamwekesheli chatoñojokañayi Yehova kutalisha hadi añinza kwesekeja nachehwiliyi kapostolu Pawulu hadi Yehova chimwahitili yaaka, nindi: ‘HiNzambi wawaYudeya hohu, tahindi? HiNzambi yanyuza nawaku? Nehi, hiNzambi yanyuza yejima.’—Rom. 3:29; Yoweli 2:32.

4. Muloñadi chitukuhoshela netu mudi “aIsarela ambala aNzambi” himwekala añinzaku?

 ⁴ Kuhitila muchikaninu chachiha, chipompelu chawakwaKristu awayishewa chasinsili hadi muza wawaIsarela akumujimba ekalili nawubwambu wawuwahi nankashi naNzambi. Iwu muza awutenaña nawu “aIsarela ambala aNzambi.” (Ŋal. 6:16) Kwesekeja nachashimwiniyi Pawulu, muniwu muza wawuha, “himwekala kaHeleni nakaYudeya, hela kwalama nakubula kwalamaku. Himwekala hela mukwetuña dacheñi, hela kaSikita, hela nduñu hela mwanaku; ilaña Kristu diyi hohu kanka windi chikupu mwejima.” (Kol. 3:11) Dikwila nawu, muchipompelu chawakwaKristu himwadi kwikala añinzaku.

5, 6. (a) Muloñadi antu amakwawu chahayaminañawu hakutaña nsañu yidi haIsaya 61:5, 6? (b) Indi “atupristu ambala aYehova” ‘niañinza’ ashimunawu kudi Isaya anyi? (c) Mudimwinyi wazatañawu awa mazanvu ayedi?

⁵ Mpinji yikwawu, antu ahayamaña hakutaña nsañu yidi mumukanda waIsaya kapetulu 61, mudi wuprofwetu wunakushikijewa muchipompelu chawakwaKristu. Vasi 6 yanaka kapetulu yahosha hadi antu akekala “atupristu aYehova.” Ilaña vasi 5, yashimuna ‘añinza’ akwovwahilaña nikuzatila hamu nanawa “atupristu.” Indi iyi nsañu yinatalishi mudihi?

⁶ Tuneluki netu awa “atupristu ambala aYehova” hiyakwaKristu awayishewa akatambwila “kusañuka kwakusambila” nawa ‘akekala atupristu ambala aNzambi niaKristu, akayuulila hamu nindi neyi anyanta hadi ikombakaji danyaka.’ (Chim. 20:6) Kubombelahu, kudi akwaKristu ashinshika amavulu akweti kuchiñeja kwakushakama hamaseki. Hela chakwila anakuzatila hamu nikudikunda nawantu akweti kuchiñeja kwakuya mwiwulu, tunateli kuhosha muchifwikija netu niwena hiyañinza. Atiyaña kuwaha hakukwasha nikuzatila hamu ‘nawatupristu ambala aYehova,’ anakuzata neyi ‘andimi’ awu nawa neyi ‘akwakuyiloñeshela nyivinyu.’ Akwashaña antu kulonda asoñeña mukabu waspiritu wakumuhameka Nzambi, nakudizisha nikuleta antu muchalala. Eñañi, wejima wawu awayishewa “nianyikoku acheñi” akeñaña nikubiña antu ashinshika akweti mpwila yakumuzatila Nzambi haya nyaka.—Yow. 10:16.

 “AKWAKWENDA MWAMBALA” ADI NEYI ABARAHAMA

7. Indi akwaKristu makonu amwimbujolaña ñahi Abarahama niantu adiña ashinshika akunyima?

⁷ Neyi chashimunawu muchibaaba chinafumuhu, akwaKristu alala adi neyi añinza hela akwakwenda mwambala mukanu kaayi katama kaSatana. Dichi, adi neyi antu akunyaka adiña ashinshika, kushilahu Abarahama, ashimunawu nawu “adiña enyi niakwakwenda mwambala hanu hamaseki.” (Heb. 11:13) Chili tukweti kuchiñeja kwakuya mwiwulu hela kwahamaseki, tukweti kukooleka kwakudiluñisha wubwambu wawuwahi naYehova neyi chadiluñishiliyi Abarahama. Yakoba walumbulwili nindi, “Abarahama wamwitiyili Nzambi, amufuukwililichu nawu hikuloña, hiyakumutena nawu ibwambu daNzambi.”—Yak. 2:23.

8. Chikaninwinyi chamukaninuwu Abarahama nawa watiyili ñahi kutalisha hakushikijewa kwanichi chikaninu?

⁸ Nzambi wakanini nindi kuhitila mudi Abarahama nianyanindi, yisaka yejima yahamaseki, bayi muza wumu hohuku akayikiswila. (Tañenu Kutachika 22:15-18.) Hela chakwila kushikijewa kwanichi chikaninu chaNzambi kwachidiña kumbidi nankashi, Abarahama wakuhweleleli chikupu nindi chikashikijewa. Kwakwihi nachihandilu chindi chejima, Abarahama nichisaka chindi adiña akwakwenda. Hela chochu, Abarahama watwalekeluhu kwikala nawubwambu wawuwahi naYehova.

9, 10. (a) Munjilanyi mutunateli kumwimbujolila Abarahama? (b) Mutambinyi wutwatela kulejaku antu?

⁹ Hela chakwila welukili wanyi yaaka yakatalilayi hakwila yakamoni kushikijewa kwanichi chikaninu, Abarahama watwalekeluhu kumukeña Yehova nikudihana chikupu. Wazanzili mesu indi hayuma yakumbidi, hakeñeleña kwikala mwenyimbu munyuza yikwawuku. (Heb. 11:14, 15) Dichi chikuwaha neyi twimbujola chakutalilahu chaAbarahama chakwikala nachihandilu chapela nakubula kukeñesha maheta akumujimba, kufwila yifulu hela yuma yitwafwilaña kwilaku. Muloñadi chitwatela kukeñela yuma yetuña dinu henohu dinu ituña didi kwakwihi nakukuma? Muloñadi chitwatela kukakela kuyuma yakapinji kantesha? Neyi chichadiña kudi Abarahama, tunakutalila yuma yayiwahi chikupu yidi hambidi. Twamwekeshaña muchima wakudiwunjika nikuchiñilila, kushika nimpinji yakashikijewa yikaninu yatukanawu.—Tañenu Aroma 8:25.

¹⁰ Yehova wuchidi kutambika antu akunyuza yejima kulonda atambwili nkisu kuhitila mulubutu lwaAbarahama. Nawa awayishewa “atupristu ambala aYehova” kubombelahu nianyikoku acheñi ‘añinza,’ anakutambika antu mwahita kaayi kejima kubadika hamadimi 600.

KUMANISHA CHAAMBU CHANYUZA

11. Solomoni watambikili aIsarela ejima nindi enzi nakwiladi?

¹¹ Hakuhana tembeli mu 1026 B.C.E., nawa kwesekeja nachikaninu chamukaniniyi Yehova Abarahama, Solomoni wahosheli nindi antu akunyuza yejima akenza nakumushimeka Yehova. Mukulomba kwakufuma hamuchima, wahosheli nindi: ‘Hela mwenyi wakubula kwikala muntu weyi kaIsarela neyi wakafuma kwituña dakwakulehi nansañu yejina deyi; muloña wena akatiya ijina deyi deneni, nichikasa cheyi chañovu, chakwolola; chakenzayi nakulomba nakutalisha kwitalidi; eyi omu mwiwulu muwashakama wakatiyaña, wakelaña yejima yakakutambikilayi mwenyi; kulonda nyuza yahamaseki yejima yakeluki ijina deyi, akakutiyi woma, neyi chatiyañawu antu eyi aIsarela.’—1 Anya. 8:41-43.

12. Muloñadi antu amakwawu chayimwenañawu aYinsahu jaYehova nawu hiyenyi hela nawu ‘añinza’?

¹² Ñinza himuntu wudi mwituña dambala  hela himuntu wenzaña muchituñilu hela hezanvu kufuma kwacheñi. A Yinsahu jaYehova niwena hiyañinza. Ovwahilaña chikupu nfulumendi yamwiwulu, Wanta waNzambi wunakuyuulewa naKristu. Dichi, hiyadiñijaña munsañu jamapolitikiku, hela chakwila antu amakwawu ayimonaña neyi hiyantu ashalilamu nankashi mudinu ituña damakonu.

13. (a) Chumanyi chikutukwasha kutondolwela chaaku chakumona muntu netu ‘hiñinza?’ (b) Komana nkeñelu yaYehova yakusambila yadiña yakwila nawu kwikali añinza? Lumbululenu.

¹³ Añinza ayilukilaña kuyaaku yamwekeshañawu. Ayilukilaña kwidimi dahoshañawu, tushidikilu, yililu yawu, mmwekenu ninvwalilu yawu. Hela chochu, yililu yikwetuwu yadifwana nayililu yawantu ejima yalema nankashi kubadika iyi yaaku yejima. Dichamwilukañawu ñinza muloña wukweti yililu yambukaku. Neyi tukuleka kusha muchima hayililu yashiyashana yikwetuwu antu afuma kwacheñi, izu dakwila nawu “ñinza” dinateli kujiya. Neyi antu ejima heseki adiña munfulumendi yimu hela ituña dimu hohu, mutenowu hikwadi kwikala añinzaku. Nawa nkeñelu yaYehova yatachi yadiña yakwila nawu antu ekali anuñañana neyi chisaka chimu muchiyuulu chimu, dikwila nawu chiyuulu chindi. Komana antu anateli kuleka kutena akwawu nawu añinza?

14, 15. Chumanyi chinadizi izanvu dawaYinsahu jaYehova?

¹⁴ Mudinu ituña munenzali antu akweti lwisu nichaambu chanyuza, chatuzañaleshaña hakuwana antu anateli kumanisha chaambu chanyuza. Hela chochu, kumanisha chaambu kwakala. Ted Turner watachikili chikuzulemba chaTV chaCNN, wahosheli hamudimu windi wazatañayi nawantu akweti yililu yashiyashana akumatuña amboka-mboka nindi: “Kuzatila hamu nanawantu kwanzañelesheli nankashi. Natachikili kumona antu afuma kumatuña acheñi nami hiyakwetu enyimbu hadinu iseki, bayi neyi ‘añinzaku.’ Natachikili kumona izu dakwila nawu ‘ñinza’ nami dakasawuntu nawa natuñili nshimbi yamuchikuzulemba chaCNN nami kwosi watela kuzatisha idi izu hampepela hela hakuhanjeka mutusanji. Ilaña, ankoñi ateleleli kuzatisha izu dakwila nawu ‘matuña.’”

¹⁵ Mukaayi kejima, izanvu dawaYinsahu jaYehova hohu diwu anakutoñojoka neyi chatoñojokañayi Nzambi. Kuhitila mukumona yuma neyi chayimonañayi Yehova, hiyatoñojokaña hayililu yaletaña chaambuku. Chatela ayijinookeña antu akumatuña acheñi nikuyifwikijila nikuyihela nankashi, anadizi kulemesha yililu yayiwahi niwuswa wukwetuwu awa antu nawu hiyantu amawahi. Komana mwatoñojokahu dehi hanichi chuma nikumona chichinayikwashi hakuzata chiwahi nawakwenu?

 ITUÑA MWAKABULA AÑINZA

16, 17. Indi kushikijewa kwaChimwekeshu 16:16 niDanyeli 2:44 kukuyileñela kwiladi?

¹⁶ Katataka nyuza yejima ayibabeshi kudi Yesu Kristu niañelu jindi hanjita yakukumishaku yakuzuñisha chiyuulu chaNzambi, iyi njita ‘ayitenaña muchiHeberu nawu Amagedoni.’ (Chim. 16:14, 16; 19:11-16) Kubadika hadi yaaka 2,500 yinahitihu, kaprofwetu Danyeli amoneneni kushimuna yuma yikamwekena nfulumendi yawantu yazuñishaña nkeñelu yaNzambi, wasonekeli nindi: ‘Hamafuku amba kekala anyantowu Nzambi wamwiwulu wamba kaloñesha wanta wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaka.’—Dan. 2:44.

¹⁷ Komana kushikijewa kwaniwu wuprofwetu kwamba kayizañalesha? Ñinza japulawu antu jinakojeji antu ejima makonu kwikala añinza, jakekalaku wanyi. Chaambu chitukamonaña mummwekenu hela muyililu yamboka-mboka chakamwekeshaña kuwaha kwayileñaleña yejima yaleñayi Nzambi. Iyi yuma yayiwahi yitunakuchiñeja yatela kutusañumuna wejima wetu kutwalekahu kushimeka nikulemesha Nleñi yetu, Yehova Nzambi, kushika hakumina ñovu jetu.

18. Yumanyi yinakumwekana yinakumwekesha nawu izu dakwila nawu ‘ñinza’ dinateli kujiya?

¹⁸ Komana antu mukaayi anateli kuhimpa yitoñojoka yawu yakumona akwawu nawu hiyañinza? Eña, chikutwesheka. Dichi, twatela kukuhwelela chikupu netu chumichi chakamwekana. Izu dakwila nawu ‘ñinza’ adimonaña nawu damukunkulwayi hohu kudi aYinsahu jaYehova, muloña hiyekala nachaambu chanyuza mukachi kawuku. Chakutalilahu, katataka, tusanji twawu twanyitayi yanyanya atubomba kulonda apeleshuku mudimu wakulombola chiwahi niwakushimwina nsañu yayiwahi yaWanta. (Mat. 24:14) Hiyafuukwili kubomba nyitayi kushindamena hajiñinza jamatuñaku, chiña hohu neyi ituña didi nateli kuyitena nawu hiyañinza. Iwu hiwunsahu wukwawu wunakumwekesha nawu Yesu Kristu Nyuuli wambala waYehova waswanyikawu hetanda, nakumanisha chaambu hakachi kawantu nawa katataka ‘yemiki mushindu ho-o’!—Chim. 6:2.

19. Chumanyi chinafumi mukuhosha idimi ditooka dachalala?

¹⁹ Hela chakwila aYinsahu jaYehova afuma kunyuza yamboka-mboka nawa ahoshaña madimi ashiyashana, afwilaña chikupu kuhosha idimi ditooka dachalala. Chumichi chaleñelaña ekali mumpanda yimu yakola chikupu. (Tañenu Zefwaniya 3:9.) Ichi hichisaka chawantu amumatuña ejima chidi mudinu ituña datama ilaña chaambukaku chikupu. Ichi chisaka chanuñañana chinakumwekesha kunuñañana kwakekala mwituña dadiha, ituña mwakabula añinza. Dichi ejima akekala amomi aketeja awa mazu adi mumukanda itwashimuna hakusambila akwila nawu: “Bayibolu yatenaña nyichidi yawantu nawu hiyanyana evumu dimu.”—The Races of Mankind.

[Malwihu aKuzatisha haKudiza]

[Mazu ekoku adi hefu 28]

Komana mwachiñejaña mpinji yakumbidi yikwakabula ñinza japulawu antu, chikela izu dakwila nawu “añinza” anadifumishihu dehi?

[Mwevulu wudi hefu 25]

Komana mukutwalekahu kuhembelela yikaninu yakanayi Nzambi neyi cheliliyi Abarahama?

[Mwevulu wudi hefu 27]

Kudi Yehova kwosi añinza