Bayi Muzatisha Bayibolu Munjila Yakupeshaku

“MAZU aNzambi amomi, akweti ñovu.” (Heb. 4:12) Awa mazu anakumwekesha nawu kapostolu Pawulu wakonkomweneni nindi izu daNzambi dikweti ñovu yakushika hanyichima nikuhimpa yililu yawantu.

Yitoñojoka yakwila nawu Bayibolu yikweti mazu añovu yaluwankeni chelili akwakusekesha atenenuwu muNsona avuli hanyima yakufwa kwawapostolu. (2 Pet. 2:1-3) Chimwahitili mpinji, anlomboli jamachechi atachikili kuzatisha nsañu jawaña Mwizu daNzambi. Mukulumpi Harry Y. Gamble wasonekeli hansañu “jakupesha jazatishileñawu munyikanda yawakwaKristu.” Wahosheli nindi muyaaka nkulakaji yamuchisatu, Mukulumpi waNsakililu Origen wahosheli nindi “nhoshelu yakwila nawu mazu ajila yakwashanaña nankashi: neyi chakwila mazu akweti ñovu mukupesha kwawasenji, dikwila nawu mazu aNzambi amunsona asweja ñovu.” John Chrysostom wamuyaaka nkulakaji yamuchiwana wasonekeli nindi “diyabolu hakutwesha kwiñila mwitala mudi Nsañu Yayiwahuku.” Wahosheli cheñi nindi antu amakwawu akasilileña munshiñu yawu nyikanda Yansañu Yayiwahi nakumwekesha neyi diyi yitumbu yinateli kuyikiña. Mukulumpi Gamble watwalekeluhu nindi mukwansakililu yaKatolika Augustine wachimweni nindi “neyi mutu wunakukata mwatela kusha nyikanda Yansañu Yayiwahi yaYowanu mumusawu nakusachilaku.” Dichi Bayibolu ayizatishileña munjila yakupesha. Komana Bayibolu mwayimwonaña neyi hiyitumbu hela neyi himutookela wunateli kuyikiña kuyuma yatama?

Antu amavulu azatishaña Bayibolu munjila yikwawu yaheña. Elaña ñahi? Abakulaña mukanda swayi, chidi neyi Bayibolu nikutaña nsañu yatachi yikushikena kumonawu nakukuhwelela nawu yikuyikwasha nankashi. Chakutalilahu, kwesekeja nachahosheli Mukulumpi Gamble, chelili Augustine yatiyi izu damwana wanyanya wadiña mwitala dikwawu nindi: “Nonaku wutañi, nonaku wutañi,” Augustine watoñojokeli nindi iyi nshimbi yafumini kudi Nzambi yakubakula Bayibolu nakutaña nsona yatachi yamweniyi.

Mwatiyahu dehi antu alombaña kudi Nzambi neyi adi mukukala nawa ashikenaña dakubakula Bayibolu nakukuhwelela nawu vasi yikusambila kumonawu yikuyikwasha kuumika kukala kunakumonawu? Hela afuukwili mwamuwahi, akwaKristu hiyatela kukeña wukwashu muNsona muniyi njilaku.

Yesu walejeli atumbanji twindi nindi wakatemesha ‘nkwashi, diyi spiritu yajila.’ Watwalekeluhu nindi: ‘Diyi wakayileja yuma yejima, wakayanukisha yinayileji yejima.’ (Yow. 14:26) Ilaña, antu azatishaña Bayibolu munjila yakupesha hiyafwilaña kwiluka nsañu yamuNsonaku.

Ichi chaaku ninjila jikwawu jakupeshelamu hakuzatisha Bayibolu jinasweji. Izu daNzambi dahisha kuhoña. (Lev. 19:26; Kuhit. 18:9-12; Yil. 19:19) “Mazu aNzambi amomi, akweti ñovu,” ilaña twatela kwiluka chakuyizatisha. Chihandilu chawantu chikuwaha neyi tukuzatishaña nsañu yamuBayibolu chiwahi bayi munjila yakupeshaku. Kwiluka nsañu yamuBayibolu kunakwashi antu amavulu kwikala nayililu yayiwahi, kuleka yililu yatama, kukolesha yisaka yawu nikukolesha wubwambu wawu naNsoneki waBayibolu.