Kaposhi Kakutalila Mwidimi Dinapeleshuwu Dawundeli Muloñadi Chinakukisonekelawu?

HADI yaaka yayivulu amayala niambanda anakuhameka nikuhetela munsañu yashindamena haBayibolu yasonekañawu muKaposhi Kakutalila. MuJuly 2011, magazini yatachi yamwidimi dinapeleshuwu atachikili kuyisoneka muEnglish. Iyi magazini yalumbulwili nawu: “Iyi magazini yayiha akweseka kuyizatisha hadi chaaka chimu, neyi yikukwasha antu, akatwalekahu nakuyipulinta.”

Chayinu mpinji tudi amuzañalu hakuyileja netu tunafuukuluhu kutwalekahu kusoneka iyi magazini. Cheñi nawa, kumbidi magazini yamwidimi dinapeleshuwu akatachika kuyisoneka muchiFrench, Portuguese, nimuSpanish.

CHINAKUKIHAMEKELAWU

Chatambwiluwu magazini yamwidimi dinapeleshuwu, antu amavulu akuSouth Pacific ahosheli nawu: “Ichi dinu amana kwetu anakutiyisha chikupu nsañu yidi muKaposhi Kakutalila.” Mukanda wukwawu wahosheli nawu: “Mpinji yitwamanishileña nakutala mwatalisha mazu akola nikulumbulula nhoshelu yikwawu, ichi tunakuyizatisha hakutaña kulonda tuheteli munsona jinatenuwu nikwiluka chiyinanuñañani nansañu yitunakudiza.”

Mumbanda wumu wamanishili shikola yamusukula muUnited States nindi: “Namanishili yaaka 18 nakutaña shikola yahewulu nakuhosha nikusoneka munjila yakala. Nekalili nachaaku chakuhosha nikutoñojoka munjila yakala kutiyisha. Nelukili nami nateleleli kuhimpa chikupu mukutoñojoka kwami nimunhoshelu.” Chineli chayinu mpinji himukwakushimwina wakuluka yitembi, wasonekeli nindi: “Kaposhi Kakutalila  kanakusonekawu mwidimu dinapeleshuwu kanakunkwasha nankashi. Mazu adimu anakunkwasha kwiluka chakuhosha munjila yapela.”

Muhela wamuEngland wapapatisheweli mu 1972 wasonekeli kutalisha haKaposhi Kakutalila kadi mwidimi dinapeleshuwu nindi: “Chinatañili magazini yatachi, natiyili neyi kwiji Yehova wadiña nanami nankumbati kumafwiji nawa tunakutañila hamu. Natiyili neyi kwiji tata yawantu wunakutañila mwaninindi nsañu yayiwahi henohu kanda yakami.”

Muhela wahaBeteli muUnited States wapapatishiluwu yaaka yakubadika ha 40 yinahituhu wahosheli nindi magazini yinapeleshuwu yinakumukwasha kwiluka nsañu yayiha. Chakutalilahu, kachikasha kanakuhosha nawu “Mazu Amakwawu Anayilumbululi” mumagazini yaSeptember 15, 2011, alumbulwili nhoshelu yakwila nawu “izaza dawaYinsahu” ashimunawu haAheberu 12:1 nawu: “Adiña amavulu chakwila akañenyi nikuyichinda.” Nindi: “Chumichi chankwashili kwiluka mwatalisha iyi vasi.” Kutalisha hakupompa kwamumulungu, wahosheli nindi: “Hela chakwila mwana wanyanya yakula mumagazini yinapeleshuwu, mazu anakuliyi hiyesekanaña namazu adi muKaposhi Kakutalila kawundeli kitwazatishaña mpinji yejimaku. Dichi neyi mwana wanyanya yakulahu akulumpi atiyaña kuwaha.”

Muhela mukwawu wahaBeteli nindi: “Natalilaña chikupu mpinji yakuya nakupompa muloña natiyaña kuwaha neyi atwansi anakwakulahu. Kaposhi Kakutalila kadi mwidimi dinapeleshuwu kanakuyikwasha kuhosha chakufuma  hamuchima. Mazu ahoshañawu ankoleshaña nankashi.”

Muhela wapapatisheweli mu 1984 wahamekeli magazini yidi mwidimi dinapeleshuwu nindi: “Inakutiya neyi iyi magazini ansonekeleli ami hohu. Yinankwashi kwiluka yuma yinnakutaña. Ichi nekala wakasunuka kwakulahu haKaposhi Kakutalila Kakudizamu.”

CHITWA CHINAKUKWASHA ANVWALI

Mama yawantu wudi namwana wayaaka yitanu nayiyedi nindi: “Nazeyeleña nawa hahitileña mpinji yeneni hakwila nawu tulumbululi nyikuku yamazu yayivulu yamuKaposhi Kakutalila Kakudizamu.” Indi magazini yidi mwidimi dinapeleshuwu yayikwashili ñahi? Wasonekeli nindi: “Nazañalalaña hakumona mwanami nakutaña maparakalafu nikutiyisha nsañu yinatañiyi. Chineli mazu adimu akola wanyi nawa nyikuku yamazu yayihi, watiyaña woma wanyi. Watachika kuloñesha nsañu yakakulayi hakupompa chakadi ami kumukwasha nawa watalaña mumagazini hampinji yakudiza.”

Mama yawantu wudi namwana wayaaka 9 wasonekeli nindi: “Henohu iyi magazini kanda ayisoneki twamulejeleña mazu atela kuhoshayi. Ilaña ichi wadiloñeshelaña. Hitwavula kumba mpinji yeneni nakumulumbulwila nsañu yidi mumagazinuku. Chineli magazini yapela, ichi dinu watiyaña kuwaha kwakulahu hampinji yakudiza Kaposhi Kakutalila Kakudizamu.”

INDI ANYANA ANAKUTIYA ÑAHI?

Atwansi amavulu ahoshaña nawu Kaposhi Kakutalila kadi mwidimi dinapeleshuwu anakisonekeli wena. Rebecca wudi nayaaka 12 walombeli nindi: “Mwani twalekenuhu kusoneka iyi magazini.” Wabombelelu nindi: “Nakeña nankashi chibalu chahoshaña nawu ‘Mazu Amakwawu Anayilumbululi.’ Iyi magazini yinapeleli nankashi atwansi.”

Nicolette wudi nayaaka 7 niyena wahosheli nindi: “Chankalilileña nankashi kutiya nsañu yamuKaposhi Kakutalila. Ichi inakwakulahu nankashi chakadi kunleja.” Emma wudi nayaaka 9 wasonekeli nindi: “Iyi magazini yinakunkwasha nankashi nimwanyikami wudi nayaaka 6. Nsañu yayivulu tunakuyitiya nankashi. Kusakililaku mwani!”

Eñañi, antu amavulu anakuhetela mumagazini yaKaposhi Kakutalila mudi mazu apela munyikuku yamazu. Kanakukwasha antu nankashi nawa tukutwalekahu kukisoneka hamu namagazini yedikaña dikalu kufuma tuhu mu 1879.

[Mazu ekoku adi hefu 30]

“Mpinji yitwamanishileña nakutala mwatalisha mazu akola nikulumbulula nhoshelu yikwawu, ichi tunakuyizatisha hakutaña kulonda tuheteli munsona jinatenuwu nikwiluka chiyinanuñañani nansañu yitunakudiza”

[Mazu ekoku adi hefu 31]

“Nazañalalaña hakumona mwanami nakutaña maparakalafu nikutiyisha nsañu yinatañiyi”