Mudi Ñamba Wakuhwelelawu!
Mudi Ñamba Wakuhwelelawu!
“Himwadiheta enu awenuku.”—1 KOR. 6:19, NW.
MUKWAKULA NENUDI?
Mudimwinyi wazatileñawu añamba akushankulu?
Nyidimwinyi yazatañawu añamba jaNzambi ejima?
Indi mudimu wawuñamba twatela kuwumona ñahi?
1. Indi izu dawuduñu dakojejaña antu kutoñojoka nawudi?
YAAKA 2,500 yinahituhu, nsoneki wayisela wumu wakaGriki wasonekeli nindi: “Kwosi muntu wunateli kwiteja namuchima wumu kwikala nduñu.” Antu amavulu makonu etejaña awa mazu. Izu dawuduñu dakojejaña antu kutoñojoka hadi antu akabishañawu, akasawu nawa mudimu wazatañawu waheteshaña antu ayikwata wuduñu bayi awenuku.
2, 3. (a) Yifulwinyi yikwetuwu anduñu hela ambuña aKristu adihana? (b) Malwihwinyi itukuhanjekahu anakuhosha hadi añamba?
2 Yesu wahosheli nindi atumbanji twindi akekala ambuña hela anduñu adizoza. Dichi akwaKristu alala hiyaneñaña hela kusawuka hakuyitena nawu anduñuku. Awa anduñu ayinka chifulu cheneni, ayikuhwelela nikuyilemesha nankashi. Chakutalilahu, talenu mazu ahosheliyi Yesu henohu wudi kwakwihi nakufwa hadi “nduñu” wumu. Kristu washimwini nindi wakamwinka ‘nduñu wamaana nikashinshi’ nyidimu.—Mat. 24:45-47.
3 Mumukanda wukwawu iwu nduñu amutena cheñi nawu ‘ñamba.’ (Tañenu Luka 12:42-44.) AkwaKristu ashinshika amavulu achidi amomi hiyekala mwizanvu dañamba washinshikaku. Ilaña, Nsona yatulejaña nawu antu ejima amuzatilaña Nzambi hiyañamba. Nyidimwinyi yazatañawu? Twatela kuyimona ñahi? Tusambilenu kuhanjeka hamudimu wazatileñawu añamba kunyima.
MUDIMU WAZATAÑAWU AÑAMBA
4, 5. Nyidimwinyi yazatileñawu añamba kushankulu? Shimunenu yakutalilahu.
4 Kushankulu, ñamba wadiña nduñu wakuhwelelawu wenkeluwu mudimu wakutala akwawu mwitala hela mudimu wankaka yindi. Añamba adiña nachifulu cheneni hama nawa ayinkeleña mudimu wakuhemba yuma yamwitala, mali nikutala akwawu ambuña. Dimudimu wazatileñayi Eliyeza enkeluwu mudimu wakuhemba maheta Abarahama. Hadaha Eliyeza diyi atemesheluwu kudi Abarahama kuMesopotamiya nakumukeñela mwanindi Isaka mumbanda. Iwu wadiña mudimu weneni nawa walema nankashi.—Kutach. 13:2; 15:2; 24:2-4.
5 Mwana kamwijikulwa Abarahama Yosefu amwinkeli mudimu wakuhemba itala daPotifwari. (Kutach. 39:1, 2) Chimwahitili mpinji, Yosefu wekalili nañamba yindi nawa amutondeli kwikala ñamba ‘mwitala daYosefu.’ Iwu ñamba diyi wayitambwilili amana kwaYosefu ikumi. Nawa Yosefu watuñili kafuta kutalisha halupasa lwasiliva ‘lweyiluwu.’ Chakadi nikujina, añamba ayikuhweleleli nankashi kudi ankaka jawu.—Kutach. 43:19-25; 44:1-12.
6. Nyidimwinyi yawuñamba yashiyashana yikwetuwu aeluda akwaKristu?
6 Chimwahitili yaaka, kapostolu Pawulu wasonekeli nindi ankoñi akwaKristu ateleleli kwikala ‘añamba jaNzambi.’ (Tit. 1:7) Chineli ayinka mudimu wakubiña ‘nyikoku yaNzambi,’ ankoñi alombolaña muyipompelu. (1 Pet. 5:1, 2) Hela chochu, aeluda azataña nyidimu yashiyashana. Chakutalilahu, ankoñi akwaKristu amavulu makonu azatilaña hohu chipompelu chimu. Ankoñi akwakwenda azatilaña yipompelu yayivulu. Mamembala aMukomiti yaMutayi atalaña yipompelu yejima mumatuña. Hela chochu, wejima wawu atela kuzata nyidimu yayinkawu nakashinshi, muloña wejima wawu ‘amba kashimunamu’ kudi Nzambi.—Heb. 13:17.
7. Tuneluki ñahi netu akwaKristu ejima hiyañamba?
7 Indi akwaKristu ashinshika amavulu abula kwikala ankoñi? Kapostolu Petulu wasonekeleli akwaKristu ejima mukanda nindi: “Wejima wenu kalakelenu akwenu mwaya chamukunkulu chimunatambuli, neyi atulama amawahi aluwi lwaNzambi lweñi nalweñi.” (1 Pet. 1:1; 4:10) Nzambi naluwi lwindi lwasweja watwinka wejima wetu yawana, maheta, ñovu niyuma yikwawu yitweluka yitwatela kuzatisha kulonda tukwasheña nachu akwetu akakwitiya. Kubombelahu, antu ejima amukalakelaña Nzambi hiyañamba nawa hamuloña wakwikala añamba ayilemeshaña nikuyikuhwelela nawa twatela kuzatisha chiwahi yuma yatwinkayi.
TUDI AMBALA ANZAMBI
8. Lushimbinyi lwalema lutukwanukaña?
8 Ichi tukutala hanshimbi jisatu jitwatela kulondela etu añamba. Chatachi: Wejima wetu tudi ambala aNzambi nawa twamba kalumbulula kudi Nzambi. Pawulu wasonekeli nindi: “Himwadiheta enu awenuku, ayilandili dehi nawuseya,” wamulambu amashi aKristu. (1 Kor. 6:19, 20, NW) Chineli tudi ambala aYehova, twatela kwovwahila nshimbi jindi nawa hijakalaku. (Rom. 14:8; 1 Yow. 5:3) Twekala cheñi anduñu jaKristu. Kufwana añamba akushankulu, twekala akasunuka ilaña tukweti hakukumina. Twatela kuzata nyidimu kwesekeja nanshimbi jinatulejuwu. Hela chakwila tukweti kukooleka kwakuvulu, tudi ambuña aNzambi niKristu.
9. Indi Yesu walumbulwili nindidi hawubwambu wudi hadi nkaka yawantu nañamba?
9 Yesu watukwashaña kwiluka wubwambu wudi hakachi kankaka yamuntu nanduñu. Mpinji yimu wahosheli nawatumbanji twindi hadi nduñu wenjili kwitala hanyima yakujikumwina itañwa kumudimu. Komana nkaka yindi wamwilili nindi: “Inzaña swayi wushakami nakudya?” Inehi. Wahosheli nindi: ‘Loñeshaku yakudya nidyi, vwalaku chachiwahi wuñimeni, nidyi, ninwi. Neyi wunakumishi dehi, nineyi aweni wukudya nikunwa.’ Indi Yesu wazatishili ñahi ichi chakutalilahu? “Dimu mukwila ninenu nawa, neyi muneli yuma yayilejawu yejima, mukuhosha nenu, Tuyañamba amukunkulwayi; tunakumini dakwila kwanyidimu yetu hohu.”—Luka 17:7-10.
10. Chumanyi chamwekeshaña nawu Yehova wahamekaña hakumukalakela hakumina ñovu jetu?
10 Hela chochu, Yehova wazañalalaña hakumukalakela hakumina ñovu jetu. Bayibolu yatuleja nawu: “Nzambi waloña hakavulamena mudimu wenu hela kukeña kumwakeñeli ijina dinduku.” (Heb. 6:10) Yehova hakeñaña nindi twili yuma yitunateli kukañanyaku. Kubombelahu, watwilaña kukoña yuma yinateli kutukwasha nawa hiyakalaku. Dichi kwesekeja nachishimu chaYesu, ñamba hadizañaleshaña yomweni kuhitila mukutwamijaku yuma yakeñayiku. Munjila yoyimu, kufuma mpinji yitwadihanini kudi Nzambi, twafuukwiluhu kutwamijaku kwila nkeñelu yindi muchihandilu chetu. Komana dimu wanyi?
YUMA YAKEÑAÑAYI YEHOVA KUDI ETU EJIMA
11, 12. Hakwikala añamba, twatela kumwekesha chililu chamuchidinyi nawa yumanyi yitwatela kutondolwela?
11 Nshimbi yamuchiyedi yidi nawu: Chineli tudi añamba, wejima wetu twalondelaña nshimbi yoyimu. Mwamweni, nyidimu yikwawu ayizataña kudi akwaKristu antesha hohu muchipompelu. Hela chochu, nyidimu yayivulu ayizataña kudi ejima muchipompelu. Chakutalilahu, hakwikala atumbanji twaKristu nawa aYinsahu jaYehova, twatela kukeñañana. Yesu wahosheli nindi kukeña dichinjikijilu chakwilukilaku akwaKristu alala. (Yow. 13:35) Dichi hitwakeñaña hohu amana kwetuku. Twafwilaña kumwekesha kukeña kudi antu abula kwikala aYinsahu. Ichi dichuma chitwatela kwila wejima wetu.
12 Twatela cheñi kwikala nayililu yayiwahi. Twatela kutondolwela yililu ninshakaminu yahishawu Mwizu daNzambi. Pawulu wasonekeli nindi: “Hela ayivumbi, hela akwakupesha, hela akwawusenji, hela amayala adilisha neyi ambanda, hela aditamishaña nawakwawu amayala, hela amakombi, hela akwalwisu, hela akwakusheta walwa, hela akwakutukana, hela akwanyilami, hiyamba kaswana wanta waNzambuku.” (1 Kor. 6:9, 10) Eña, twatela kudishaku chikupu hakwila tulondeleña nshimbi jaNzambi jaloña. Kudikita chikupu kwakuwahi nawa kwatuheteshaña hama, twekalaña nachihandilu chachiwahi chatuleñelaña kwikala akola kumujimba, wubwambu wawuwahi nawakwetu niNzambi.—Tañenu Isaya 48:17, 18.
13, 14. Mudimwinyi wayinkawu akwaKristu ejima nawa twatela kuwumona ñahi?
13 Anukenu cheñi nenu ñamba amwinkeli mudimu. Anetu nawa atwinka mudimu. Tukweti chawana chabadika kulema, dikwila nawu kwiluka chalala. Nzambi nakukeña nindi tulejeña antu chalala. (Mat. 28:19, 20) Pawulu wasonekeli nindi: ‘Antu atwiluka nawu tuyakwakukalakela aKristu, tuyatulama ansañu jaNzambi yakujinda.’ (1 Kor. 4:1) Pawulu welukili nindi kwikala ñamba kwatalisha mukulondela nankashi nsañu yamunsona ‘yajila nawa yakujinda’ nikuleja chikupu amakwawu neyi chashimwiniyi Mwanta, Yesu Kristu.—1 Kor. 9:16.
14 Kuleja antu chalala dichuma chitwatela kwila. Hela chochu, chihandilu chawakwaKristu chenda kushiyashana. Bayi neyi ejima azataña maora wowamu mwihaku. Yehova weluka chumichi. Wonsu wetu twatela kuzata kushika hanakumini ñovu jetu. Neyi twila mwenimu tukumwekesha netu twamukeña Nzambi nankashi niantuñi netu.
CHICHALEMENA KWIKALA ASHINSHIKA
15-17. (a) Muloñadi ñamba chatela kwikalilayi washinshika? (b) Indi Yesu walumbulwili ñahi yuma yafumaña mukubula kashinshi?
15 Lushimbi lwamuchisatu lunesekani nanshimbi jiyedi jinashimunuwu dehi nawu: Twatela kwikala antu ashinshika, atela kukuhwelelawu chikupu. Ñamba nateli kwikala nayililu yayiwahi yayivulu niwuswa ilaña neyi wakatala nikubula kashinshi kudi nkaka yindi, yililu yindi yikwikala yamukunkulwayi. Dichi hakwila yekali ñamba walumbuluka chikupu, chiña yekala washinshika. Anukenu nenu Pawulu wasonekeli nindi: ‘Antu akuhwelelaña añamba nawu chiña ayimoni kushinshika.’—1 Kor. 4:2.
16 Neyi twikala ashinshika, tuneluki chikupu netu akatwinka wuloku. Ilaña neyi tubula kwikala ashinshika, twakamona yinzeñeli. Ilu dilushimbi lwashimwiniyi Yesu muchishimu chantalenta. Anduñu ‘alandujoleli’ chachiwahi mali ankaka yawu ayihamekeli nankashi nawa ayikiswilili. Ilaña nduñu wakañenyi kuhimpujola ntalenta yamwinkeluwu kudi nkaka yindi amuteneni nawu “watama,” “wakatala” nawa “wamukunkulwayi.” Ntalenta yamwinkeluwu amutambwiliyi nawa amuumbilili hanzi.—Tañenu Matewu 25:14-18, 23, 26, 28-30.
17 Hampinji yikwawu, Yesu wahosheli hayuma yatama yafumaña mukubula kashinshi. Nindi: “Kwadiñi muntu waheta wumu, wadiñi [nañamba yindi]; yena [ñamba] hiyakumushimuna kudi akwawu, nawu wudi nakukisañana yuma yambala yamwanta windi. Yena hakumutambika, hakumwila nindi, Iyi nsañu yeyi yinidi nakutiya yanka? Lumbululaku mwahita [wuñamba] weyi; muloña [wuñamba] weyi wunakumi dehi.” (Luka 16:1, 2) Hamuloña wakwila ñamba wavumbikili ntalenta yankaka yindi, nkaka yindi wamuhañili. Twatela kudizilaku chikupu. Twatela kwikala ashinshika neyi anatwinki mudimu.
KOMANA CHACHIWAHI KUDESEKEJA NAWAKWETU?
18. Muloñadi chichatamina kudesekeja nawakwetu?
18 Wejima wetu twatela kudihula netu, ‘Indi wuñamba wami nawumonaña ñahi?’ Tunateli kumona kukala neyi tutachika kudesekeja nawakwetu. Bayibolu yatufumbaña nawu: “Antu ejima ashinshiki nyidimu yawu, muntu himuntu. Muntu wukwila mwenomu, diyi wukumona hakudisambila namudimu windi yomwenindi, bayi kudisamba namudimu wawacheñuku.” (Ŋal. 6:4) Chatela twesekejaña mudimu wetu nanyidimu yawakwetu, twatela kusha muchima hamudimu wutunakuzata. Chumichi chikutukwasha kutondolwela chaaku chakudeta hebwambu nichineñi. Hampinji yitunakushinshika hanzatilu yetu, twatela kwiluka netu yuma yahimpikaña. Hadaha hitunateli kuzata neyi chitwazatileñaku hamuloña wakuyekela nayikatu, wushinakaji ninyidimu yikwawu. Mpinji yikwawu, tunateli kuzata chikupu kubadika chitunakuzata chayinu mpinji. Neyi tunamoni netu tunateli kuzata nañovu, komana kwila tuswejesha nehi?
19. Neyi hiyanatwinki kukoolekaku, muloñadi chitukubulila kuneña?
19 Twatela cheñi kushinshika hamudimu wutukweti hela wutunakufwila. Chakutalilahu, mana kwetu nateli kwikala nampwila yakuzata neyi eluda muchipompelu hela kumwinka mpanji hakupompa kwanyanya nikwamaneni. Mwatela kuzata nañovu kulonda mwikali naniku kukooleka, ilaña bayi tuneñaku neyi abula kutwinka iku kukooleka hampinji yitunakuhweleli netu akutwinka. Chineli yuma yikwawu twayiluka wanyi, kukooleka kukwawu anateli kutwinka hampinji yitunabuli kukuhwelela. Anukenu nenu Mosi wadiloñesheli kwidisha aIsarela muEjipitu, ilaña henohu kanda yayidishi, watalilili hadi yaaka 40. Chumichi chamukwashili kwikala nampinji yakuhimpa yililu yamukwashili kulombola antu achinchika nawa abulileña kwovwahila.—Yil. 7:22-25, 30-34.
20. Chumanyi chitukudizila kudi Jonatani?
20 Mpinji yikwawu hiyanateli kutwinka kukooleka kudi kwejimaku. Dichuma chamumwekeneni Jonatani. Wadiña mwana kaSawulu nawa wateleleli kuswana wanta waIsarela. Ilaña Nzambi wamutondeli Davidi, kansi weyala kwikala mwanta. Indi Jonatani welili ñahi? Wetejeli nawa wamukwashili Davidi chakwila washili niwumi windi hakatoña. Wamulejeli Davidi nindi: “Eyi wakekala mwanta waIsarela, ami nakakukuma munyima.” (1 Sam. 23:17) Munamoni chikuma chacheni? Jonatani wetejeli nawa kwambukaku natata yindi, hamutiyilili Davidi ichimaku. Chatela tutiyileña ichima amana kwetu anenkuwu nyidimu, wejima wetu twatela kusha muchima hamudimu wunatwinkuwu kuzata. Twatela kwiluka netu mwituña dadiha, Yehova wakayinka ambuñindi ejima yuma yafwilañawu.
21. Twatela kumona ñahi mudimu wetu wawuñamba?
21 Twatela kwiluka netu hakwikala añamba akuhwelelawu, hitwamonaña yihuñu niyinzeñeli yamonañawu anduñuku. Etu hitwamonaña yuma yamuchidiwuku. Tukweti chifulu cheneni nankashi nimudimu wutwakabula kuzata cheñi wakushimwina nsañu yayiwahi munanu mafuku akukuminina adinu ituña. Hampinji yitunakuzata iwu mudimu, twekalaña akasunuka nankashi nawa chatukwashaña kuzata chiwahi nyidimu yetu. Dichi twikalenu añamba ashinshika. Nawa tulemeshenu kukooleka kutukweti kwakuzatila Mukwakubadika mukuleña kwejima.
[Malwihu aKuzatisha haKudiza]
[Nyevulu yidi hefu 12]
Twatela kuzata mudimu wunatwinkuwu nakashinshi
