Munakwanuka?

Komana mwatañili nakanañachima magazini yaKaposhi Kakutalila kakatataka? Talenu neyi mukwakula awa malwihu adi heshina:

Tunateli kujima ñahi kesi kanhoshelu yatama?

Twatela kudishinshika mumuchima. Chatela tumujinokeña mana kwetu, komana kwila tusambila kutoñojoka hachuma chinaleñeli yahoshi mazu atama nehi? Komana tunakuwana nyiloña mudi mana kwetu kulonda tumwekani neyi etu twaloña? Neyi tukuwanaña nyiloña mudi akweti, chidi neyi tunakusha nsonsu hamulañi wakesi.—8/15, ifu 21.

Nzambi chanakenayi muntu, wavulamenaña?

Yehova wakana antu ekala nawuselewa windi nindi: “Ninshidi yawu hinakayanuka nawa cheñuku.” (Yere. 31:34) Yehova wanakenaña nshidi jawantu kushindamena hefutu damuloña. Neyi yanakena, Nzambi wavulamenaña munjila yakwila hakanuka cheñi nshidi yakoñeliyi muntu kulonda yamubabeshi cheñuku.—10/1, ifu 32.

Chineli ifuku daYehova didi kwakwihi, yumanyi yakamwekana?

Antu akahoshaña nawu kudi ‘kuwunda nikumwena.’ Nyuza yakalukuka nikumukisañana Babiloni Muneni. Antu jaNzambi niwena akayilukuka. Hakahiña njita yaAmagedoni nawa Satana niandemoni jindi akayumbila mwikela.—9/15, Ifu 4.

Twahetelañamu ñahi mukubula kwiluka ifuku damba kenza kukuma?

Hamuloña wakubula kwiluka ifuku hela mpinji, kwatukwashaña kwiluka yuma yekala mumuchima wetu. Kwatwinkaña kukooleka kwakuzañalesha muchima waNzambi. Kwatukoleshaña kwikala nachihandilu chakudihana nikushindamena chikupu hadi Nzambi niHezu dindi. Twadizilaña kuyihuñu yitunakumona nikukolesha chikuhwelelu chetu.—9/15, mafu 23-25.

Indi Nzambi wakafumishahu ñahi makabi aletawu antu?

Nzambi keña yaleti ituña dadiha daloña mwakekala antu akeña akwawu antu niNzambi. (2 Pet. 3:13) Hakwikala Mwanta wamwiwulu atondawu kudi Nzambi, Yesu wakafumishahu kutama. (Isa. 33:24; Chim. 21:4)—10/1, ifu 7.

Anyi anakwimenaku “tutumbwa tutanu natuyedi” tudi muchikasa chachidiilu chaYesu ashimunawu haChimwekeshu 1:16, 20?

Twemenañaku ankoñi awayishewa naspiritu amuyipompelu, kushilahu niankoñi ejima.—10/15, ifu 14.

Nshimbinyi yamuBayibolu yatukwashaña kwiluka chamonañayi Nzambi hansañu yakunwa makanya?

Nzambi wakeñaña nindi tulemesheña wumi. (Kuhit. 5:17) Wakeñaña nindi tumukeñi nikukeña antuñi netu. (Maku 12:28-31) Wakeñaña nindi tutondolweli yaaku yatama. (2 Kor. 7:1)—10/1, Ifu 15.

Indi Yesu wamwekesheli ñahi chililu chakudizoza chinashimunuwu haIsaya 50:4, 5?

Awa mavasi ahosha nawu muntu wukweti “idimi dawalejewaña” ‘hafuntaña hanyimaku.’ Yesu wamwekesheli chililu chakudizoza nawa washili maana kuyuma yamudizishileñawu kudi Tata yindi. Yesu wafwilileña kudizila kudi Yehova, wamweni chakutalilahu chaNzambi chakudizoza hakumwekesha wushona kudi antu akwanshidi.—11/15, ifu 11.

Twahetelañamu ñahi neyi tumwekesha muchima wawuwahi kudi antu?

Neyi tumwekesha muchima wawuwahi kudi akwetu, dikwila nawu twamwiluka Nzambi chikupu nawa chumichi chatuzañaleshaña. (1 Yow. 4:7; Mat. 5:7, 8) Kubombelahu, Yehova watiyaña kuwaha neyi tumwekeshaña muchima wamuchidiwu kudi akwetu. (Yish. 19:17)—10/1, ifu 20.