Tushakamenu Neyi ‘Akwakwenda Mwambala’

“Nayilembeleli chimuneli enyi niakwakwenda mwambala, nami lekenu kufwila kwachisemwa chaheseki.”—1 PET. 2:11.

MUKWAKULA NENUDI?

Muloñadi awayishewa chayitenenañawu nawu akwakwenda mwambala?

Munjilanyi mwekalilawu “anyikoku acheñi” akwakwenda mwambala?

Yumanyi yimwatalilaña?

1, 2. Petulu wateneneñanyi hakuzatisha izu dakwila nawu ‘atondewa’ nawa muloñadi chayiteneneyi nindi ‘akwakwenda mwambala’?

 CHIMWAHITILI yaaka 30 kufuma hakandaminiyi Yesu mwiwulu, kapostolu Petulu wasonekeleli mukanda ‘atondewa ekalili enyi, apalañeneni muPontu, nimuÑalija, nimuKapadosiya, nimuAsiya, nimuBitiniya.’ (1 Pet. 1:1) Chakadi nikujina, hakuzatisha izu dakwila nawu ‘atondewa,’ Petulu wateneneña antu adiña neyi yena, awayishiluwu naspiritu yajila nawa ‘avwalikili chachiha nakukwata kukuchiñeja kwakuumi’ kwakuyuula hamu naKristu mwiwulu. (Tañenu 1 Petulu 1:3, 4.) Hanu dinu muloñadi Petulu chayiteneneniyi awayishewa nindi ‘enyi niakwakwenda mwambala’? (1 Pet. 2:11) Indi awa mazu atalisha mudihi makonu chineli hakachi kawaYinsahu 650 adikitaña mukaayi kejima mukuwana hohu muntu wumu waditenaña nindi wawayishewa?

² Awayishewa amuyaaka nkulakaji yakusambila diwu hohu ateleleli kutenawu nawu ‘akwakwenda mwambala.’ Neyi chochaduwu ashalahu amunidi izanvu dawayishewa achidi amomi makonu, nshakaminu yawu hanu hamaseki yadiña yakapinji kantesha. Kapostolu Pawulu, wadiña hakachi kawawayishewa “kamukanka kawanyikoku kantesha,” walumbulwili nindi: “Kwinza etu wenimbu wetu wudi mwiwulu, mwomutwatalilaña Chamwinu, yowu Mwanta Yesu Kristu.” (Luka 12:32; Fwil. 3:20) Chineli ‘wenimbu wawu wudi mwiwulu,’ chafwawu awayishewa afumaña heseki nawa atambwilaña chuma chabadika chakwikala nawumi wamwiwulu wakafwaña. (Tañenu Afwilipi 1:21-23.) Dichi tunateli kuyitena netu ‘hiyakwakwenda mwambala’ hadinu iseki dinakuyuulewa naSatana.

3. Lwihwinyi lutukuhanjekahu kutalisha hadi “anyikoku acheñi”?

 ³ Indochi “anyikoku acheñi”? (Yow. 10:16) Komana niwena hiyakweti kuchiñeja kwashimunawu muNsona kwakushakama haya nyaka hanu hamasekiku? Eñañi, akashakama hanu hamaseki haya nyaka. Niwena chayinu mpinji anateli kuyitena nawu akwakwenda mwambala. Munjilanyi?

“KULEÑA KWEJIMA KWAABAÑA NAKUFUNYISHA”

4. Yumanyi yinakañanyi kumanishawu anlomboli amukaayi?

⁴ Chineli ituña daSatana datama dichidi kutwalekahu, antu ejima kushilahu niakwaKristu akutwalekahu kumona yinzeñeli yaletayi Satana wadikañili naYehova. Twatañaña haAroma 8:22 nawu: “Tuneluki netu kuleña kwejima kwaabaña nakufunyisha hamu, nikulelu.” Hela chakwila anlomboli amukaayi, asayantisiti niantu akwashaña akwawu antu adi nanyichima yakukwashana, ilaña anakañanyi kumanisha iku kukala.

5. Kufuma mu 1914, yihita yawantu yinafuukuluhu kwiladi nawa muloñadi?

⁵ Kufuma mu 1914, yihita yawantu yinatonduhu kwovwahila Mwanta atondawu kudi Nzambi, Kristu Yesu. Hiyakweti mpwila yakwikala kukabadi ketuña daSatanaku. Akaanaña kwila yuma yamwituña daSatana. Ilaña azatishaña wumi wawu nimahetawu nakukwasha Wanta waNzambi.—Rom. 14:7, 8.

6. Muloñadi aYinsahu jaYehova chayitenenañawu nawu hiyenyi?

⁶ A Yinsahu jaYehova adi mumatuña akubadika ha 200 nawa ovwahilaña nshimbi jamumatuña mwashakamawu, hela chochu, ekala neyi enyi munawa matuña. Hiyadibombaña munsañu jamatuña jamapolitiki nimunsañu jikwawuku. Chayinu mpinji, eluka nawu hiyenyimbu amwituña dadiha dakaletayi Nzambi. Azañalalaña hakwiluka nawu mafuku awu akwikala akwakwenda mwambala mudinu ituña datama keña amani.

7. Indi ambuña aNzambi akekala ñahi enimbu ahaya nyaka nawa akakuulika kuyumanyi?

⁷ Katataka Kristu yajilumuni dinu ituña datama daSatana. Nfulumendi yaKristu  yawanina yakakuula antu kunshidi nikuchineñi. Yakajilumuna antu ejima itwamonaña niitwabulaña kumona adikañaña nachiyuulu chaYehova. Ambuña aNzambi ashinshika akekala enimbu ahaya nyaka muParadisa hamaseki. (Tañenu Chimwekeshu 21:1-5.) Dichi yileñaleña yejima ‘yakafuma muwuduñu wakutoka nakwiñila muwaana wawanyana kaNzambi wowu waana walema.’—Rom. 8:21.

YUMANYI YATELA KWILAWU AKWAKRISTU ALALA?

8, 9. Lumbululenu mwatalishiliyi Petulu hakuhosha nindi ‘lekenu kufwila yuma yakumujimba.’

⁸ Petulu walumbulwili yuma yatela kwilawu akwaKristu nindi: “Enu akwetu twakeña, nayilembeleli chimuneli enyi niakwakwenda mwambala, nami lekenu kufwila kwachisemwa chaheseki kwatama, kwalwishaña nawumi.” (1 Pet. 2:11) Awa mazu akundamini kudi akwaKristu awayishewa ilaña akundama cheñi kudi anyikoku acheñi aYesu.

⁹ Yuma yikwawu neyi muyila kwesekeja nankeñelu yaNleñi, yatama wanyi. Muloña yatuzañaleshaña. Chakutalilahu, twadiluñishaña yuma yikwawu yidi neyi kudya yakudya yayiwahi niyimpwita, kuhema yisela yayiwahi nikuzañalala hakudikunda nawamabwambu amawahi. Hela tuhu kwikala nampwila yakukama namwinikwenu kwakuwahi nawa kwetejewa. (1 Kor. 7:3-5) Petulu wahosheli ‘hakufwila yuma yakumujimba’ hampinji yayilejeleñayi nindi ‘kwalwishaña nawumi.’ Hakwila nawu tutiyishi mwatalishiliyi, maBayibolu amakwawu ahosha nawu “lwisu lwakumujimba” (King James Version) hela “kufwila yatama” (New International Version). Eñañi, mpwila yikwetiyi muntu yazuñishaña nkeñelu yaYehova nawa yatamishaña wubwambu wawuwahi wukwetiyi naNzambi watela kuyifumisha mumuchima windi. Neyi nehi, kuchiñeja kwamukwaKristu kwakwikala nawumi wakafwaña kukwikala hakatoña.

10. Nyihetwinyi yazatishañayi Satana kulonda yalawuli akwaKristu kwikala kukabadika ketuña dindi?

¹⁰ Satana wafwilaña kuzeyesha nkeñelu yawakwaKristu alala kulonda abuleña kudimona neyi ‘hiyakwakwenda mwambala’ mudinu ituña. Kufwila yuma yakumujimba, kudiñija muyililu yawuvumbi, kufwila yifulu, kukeña kwikala “watachi muyuma yejima” nikukeñesha ituña denu, iyi diyi nyihetu yinakuzatishayi Satana nawa twatela kuyiluka. Neyi tukwikala namuchima wakutondolwela iyi yuma yatama yakumujimba, tukumwekesha chikupu netu hitunakukeña kwikala kukabadi ketuña daSatana datamaku. Tukumwekesha nawu tunakushakama mudinu ituña hakapinji kantesha hohu. Tunakukeña nikufwila chikupu kushakama haya nyaka mwituña daNzambi dadiha daloña.

YILILU YAYIWAHI

11, 12. Indi antu akwacheñi mpinji yikwawu ayimonaña ñahi nawa aYinsahu jaYehova ayiluka nawu hiyantu amuchidinyi?

¹¹ Petulu natwalekuhu kulumbulula yuma yatela kwilawu akwaKristu ‘akwakwenda mwambala,’ muvasi 12 nindi: “Hela aJentili ayituñulaña nawu mwelaña chatama, shakamenu chalumbuluka mukachi kawu; kulonda chakumonawu nyidimu yenu yayiwahi akamulemeshi Nzambi mwifuku dakumona kukala.” Mpinji jikwawu, añinza niakwakwenda mwambala ashakamaña mumatuña acheñi ayikabishaña. Hamuloña wakwikala nayililu yambukaku nawantu amunodu ituña, anateli kuyimona nawu hiyayiluwañimbi. Nhoshelu yawu, yililu yawu, nvwalilu yawu hadaha  nimmwekenu yawu yinateli kwikala yambukaku. Ilaña neyi azataña nyidimu yayiwahi dikwila nawu neyi ekala nayililu yayiwahi, antu akuleka kuyitena nawu hiyantu atama.

¹² AkwaKristu alala niwena ambukaku chikupu nawantuñi nawu munjila yikwawu, munhoshelu hela muyisela yatondañawu. Nvwalilu nimmwekenu yawu yayambulaña chikupu kudi antu amuchituñilu. Chumichi chaleñelaña antu amakwawu kuyitena nawu hiyayiluwañimbi. Ilaña, antu amakwawu anateli kuyihameka hakwikala nayililu yayiwahi.

13, 14. Indi maana “alumbulukaña ñahi nanyidimu yawu”? Shimunenu chakutalilahu.

¹³ Eñañi, neyi twikala nayililu yayiwahi tukufwomona ndulu jawantu. NiYesu, iyala wadiña washinshika chikupu kumesu aNzambi, amutwambililili. Antu amakwawu amuteneneña nawu “muntu wafwa hakudya, wasweja kunwa walwa, ibwambu dawansonkeshi nawakwanshidi.” Ilaña yililu yindi yayiwahi yakumukalakela Nzambi yamwekesheli nawu wadiña muntu wamuwahi. Yesu nindi: “Maana alumbulukaña nanyidimu yawu.” (Mat. 11:19) Diyuma yinakumwekana makonu. Chakutalilahu, amana kwetu niahela azatilaña haBeteli muSelters, Germany, antuñinawu ayilaña nawu, chihandilu chawu chakala. Ilaña mukulumpi wamukala waSelters wayihakwililuku nindi: “A Yinsahu azatilaña hanidi iluña hiyantu amawahi nankashi, wena kwawu hiyayaña nakuvuloka akwawuku.”

¹⁴ A Yinsahu jaYehova ashakamaña mumusumba waMoscow muRussia niwena ayihakwililuku. Ayitwikili nyiloña yayivulu nankashi nawu hiyayiluwañimbi. Ilaña muJune 2010, chota chaEuropean Court of Human Rights chamumusumba waStrasbourg, France, chahakwili nawu: “Chota chinawani nawu ikañesha [dawakwaMoscow] daluwañesheli hakukañesha antu kwikala akasunuka munsañu jansakililu nikudikunda. Yota yanyanya hiyashimwini wunsahu ‘walumbuluka’ wunakumwekesha nawu awa antu” adi namuloña, chidi neyi muloña wakusanda yisaka, kukojeja antu kulonda adijaheña hela kukaana kuyuukaku. Dichi “mazu ashimwini yota yanyanya adiña akutwamba muloña chota chahimpili wanyi nawa adiwili yuma yejima yatanjikiluwu.”

KWOVWAHILA KWAKUWAHI

15. Kufumbanyi kwamuBayibolu kwalondelañawu akwaKristu alala mukaayi kejima?

¹⁵ A Yinsahu jaYehova amuMoscow niamukaayi kejima akoñaña chuma chikwawu chatela kwilawu akwaKristu chashimwiniyi Petulu. Wasonekeli nindi: “Ovwahilenu mawanta ejima akubuzawu antu, hansañu yaMwanta . . . ; hela mwanta walukanu, muloña diyi wabadika; hela anguvulu.” (1 Pet. 2:13, 14) Hela  chakwila hiyekala kabadi kadinu ituña datamaku, akwaKristu alala ovwahilaña chikupu nfulumendi ‘yekalaku’ neyi chochayilejeliyi Pawulu.—Tañenu Aroma 13:1, 5-7.

16, 17. (a) Yumanyi yinakumwekesha nawu hitwazuñishaña nfulumenduku? (b) Yumanyi yahoshañawu anlomboli amumapolitiki?

¹⁶ A Yinsahu jaYehova ekala neyi ‘akwakwenda mwambala’ mudinu ituña ilaña bayi neyi akeñaña kutadikisha nfulumendi mukuswamujokaku, nawa hiyakaanishaña antu adiñijaña munsañu jamapolitikiku. Kwambukaku namazanvu amakwawu ansakililu, aYinsahu jaYehova hiyadiñijaña mujamapolitikiku. Hiyakakejaña alomboli jamapolitiki nawu ahimpi njila mwayuulilañawu antuku. Dichi antu atoñojokaña nawu aYinsahu afwilaña kuluwañesha antu hela kudiwula nfulumendi adidimbaña!

¹⁷ Kuhitila mukwovwahila anlomboli kwesekeja nakufumba kwaPetulu kwakwila nawu ‘tulemeshi anyanta,’ akwaKristu alemeshaña nankashi akwanshimbi. (1 Pet. 2:17) Mpinji yikwawu akulumpi janfulumendi ahoshaña nawu aYinsahu jaYehova hiyantu amawahi. Chakutalilahu, politishani wumu wamuGerman wejina daSteffen Reiche, wadiña chilolu muneni muBrandenburg nawa wenjili kwikala membala wamwitala danshimbi muGerman, wahosheli nindi: “Yililu yamwekesheluwu aYinsahu jaYehova muyilombu nimutuleya yadiña yayiwahi nawa iyi yililu yinatwalekuhu kukwasha nankashi matuña adimena, amwekesheli chililu chakuhamuka hampinji yayikabishileñawu kudi aSS nawa niwushona wamwekesheluwu kudi akwawu atuyili. Chineli añinza niakwajipolitiki niakwakudikaña anakuyikabisha nankashi, iyi yililu yinakukwasha nankashi enimbu ejima amwituña detu.”

AKEÑAÑANA

18. (a) Muloñadi chitwatela kudikeñela nawamana kwetu amukaayi kejima? (b) Indi antu abula kwikala aYinsahu ahoshaña nawudi?

¹⁸ Kapostolu Petulu wasonekeli nindi: “Keñenu ana kwenu. Mutiyenu Nzambi woma.” (1 Pet. 2:17) A Yinsahu jaYehova achinaña kumuneñesha Nzambi nawa chumichi chayileñelaña asweji kwila nkeñelu yindi. Azañalalaña kuzatila hamu nawamana kwetu niahela mukaayi kejima akweti nkeñelu yoyimu. Dichaleñelaña ‘akeñañani nawana kwawu.’ Kukeñañana kwamuchidiwu kwayihayamishaña antu abula kwikala aYinsahu muloña hikwamwekanaña mudi antu ejimaku. Chakutalilahu, mukwakulombola enyi wumu wazataña kukampani yakuAmerica yatalaña hañendelu, wahayamini hakumona kukeña niwukwashu wamwekesheluwu aYinsahu kudi enyi enjili kukupompa kwanyuza kwamuGermany mu 2009. Wahosheli nindi yaaka yejima yinazatiyi mudimu wakulombola enyi kanda yamoneñahu dehi kukeña kwamuchidiwuku. Nkumininaku, Chinsahu wumu wahosheli nindi: “Nsañu yejima yahosheliyi yatuzañalesheli nikututiyisha kuwaha.” Hakupompa kweneni kumwapompeli, mwatiyiluhu antu anakuhosha mazu amuchidiwu hakumona yililu yayiwahi yawaYinsahu?

19. Chumanyi chitwatela kufwila kwila nawa muloñadi?

¹⁹ Muyuma yejima yinashimunuwu hewulu, nimuyuma yikwawu, aYinsahu jaYehova amwekeshaña chikupu nawu ‘hiyakwakwenda mwambala’ mudinu ituña daSatana. Nawa anakufwila kutwalekahu neyi akwakwenda mwambala. Akuhwelela chikupu nawu katataka ashakami haya nyaka mwituña daNzambi dadiha daloña. Komana himunakutalila mpinji yamuchidiwuku?

[Malwihu aKuzatisha haKudiza]

[Mwevulu wudi hefu 20]

Hitwafwilaña kwikala kukabadika ketuña daSatanaku

[Mwevulu wudi hefu 20]

Twatiyakeshaña ituña dadiha daNzambi

[Mwevulu wudi hefu 22]

Chalala chamuBayibolu chinanuñañeshi ichi chisaka chamuRussia