Adihanini Namuchima Wumu muNorway

YAAKA yantesha yinahituhu, Roald niElsebeth, adisumbula adiña muyaaka yakukumisha yamuma 40, ashakamineña chachiwahi muBergen, musumba wamuchiyedi kutoha muNorway. Azatileña hamu nakashinshi nyidimu yamuchipompelu namwanawu wamumbanda Isabel niweyala Fabian. Roald wadiña eluda nawa ñodindi Elsebeth wadiña payiniya, Isabel naFabian wena adiña akwakushimwina adikita.

Hela chochu, muSeptember 2009, chisaka chafuukwiluhu kwila chuma chambukaku, kuya nakushimwina hadi mulungu wumu kwiluña dakwakulehi. Dichi Roald naElsebeth niFabian wadiña nayaaka 18 hayina mpinji, ayili nakuzatila kuNordkyn, kachitutu kanyanya kekala kuFinnmark, kwishinadi daArctic Circle. Muniwu mukala waKjøllefjord, azatilileña hamu nawamana kwetu niahela ayili kunidi iluña nakushimwina. Roald nindi: “Ifuku datachi muwuna mulungu, nazañaleli nankashi hakwiluka nami naloñesheli chiwahi nyidimu yami hakwila nawu nitweshi kuzataku iwu mudimu walema nankashi mulungu wejima.” Ilaña muwowuna mulungu, Roald watachikili kwakamena. Chumanyi chamwekeni?

 LWIHU LUTWABULILI KUKUHWELELA

Roald wahosheli nindi: “Chakubula nikukuhwelela, Mario payiniya wazatilileña muFinnmark, watwihwili neyi chakwila tunateli kwiteja namuchima wumu kubuukila kumbaka yaLakselv kulonda tukwashi chipompelu chadiña nawakwakushimwina 23.” Ilu lwihu lwamuhayamishili chikupu Roald. Walumbulwili nindi: “Ami niñodami Elsebeth twatoñojokeleña kuya nakuzatila kwadiñi kukankila kweneni, ilaña twakeñeleña kuya neyi anyanetu anakuli dehi.” Hela chochu, hamafuku antesha ashimwininiyi munidi iluña dakwakulehi, Roald wamweni nindi antu adiña nampwila yakudiza hadi Yehova. Awa antu akeñeleña kuyikwasha hayoyina mpinji bayi kumpinji yakumbiduku. Wanukaña nindi, “Natachikili kutoñojoka nankashi haniyi nsañu nawa nakañenyeña kukaama hadi mafuku amavulu.” Kuhiñahu, Mario wamutwalili Roald nichisaka chindi kuLakselv, hadiña makilomita 240 kukabeta kambwela kaKjøllefjord. Mario wakeñeleña nindi awa enyi adimweni awenawu ichi chipompelu chanyanya.

Chashikiluwu mumbaka yaLakselv, Andreas, eluda wumu hadi aeluda ayedi amunichi chipompelu wayilejeli enyi iluña dejima niItala daWanta. Antu amuchipompelu ayitambwilili namuzañalu nawa ayilejeli aRoald naElsebeth nawu, akutiya kuwaha neyi chisaka chawu chejima chibuukila kunidi iluña nakuyikwashaku mudimu waWanta. Andreas wahosheli namuzañalu nindi wayikeñela dehi aRoald niFabian mudimu! Chumanyi cheliluwu awa enyi?

CHUMANYI CHITUKUFUUKULAHU?

Fabian washikeneni dakuhosha nindi: “Ami kwami hinidi nampwila yakubuukila kunuku.” Chamukalilili nankashi kushiya amabwambu jindi mwakulililuwu muchipompelu chochimu nakuya nakushakama mumbaka yanyanya. Nawa hamanishili mudimu wadizileñayi wakuloñesha yuma yazatikaña nakesi kawuneñuku. Ilaña chamwihwiluwu Isabel (hayina mpinji wadiña nayaaka 21) kutalisha hansañu yakubuuka, wahosheli namuzañalu nindi: “Ichi dichuma chinafwilaña mpinji yejima!” Ilaña Isabel wahosheli nindi: “Chinatoñojokeluhu nakanañachima, natachikili kujinooka nami, ‘Komana iyi hiyitoñojoka yayiwahi? Komana amabwambu jami nakayanukaña? Komana kwila nishakama hohu muchipompelu chetu chakwila yuma yinakwenda chiwahi nawa hiyahimpa-himpañaku?’” Indi Elsebeth welili ñahi chamulejeluwu? Wahosheli nindi: “Natiyili neyi Yehova nenki chisaka chetu mudimu, ilaña natachikili kutoñojoka hetala detu dadiha niyuma yejima yitwalandili hadi yaaka 25 yinahituhu.”

Chamanini mulungu wadimena, Roald nichisaka chindi afuntili kuBergen, ilaña atwalekeluhu kutoñojoka hadi amana kwawu niahela akwaKristu akuLakselv, hadiña makilomita 2,100. Elsebeth nindi, “Nalombeli kakavulu kudi Yehova nawa natwalekeluhu kuhanjeka nawamabwambu inadikwatili nawu nawa twaditemesheleleña nyevulu nikudileja yuma yitwamweneña.” Roald nindi: “Nakeñeleña nami hahiti mpinji yeneni kulonda niteji namuchima wumu kubuukila kunidi iluña. Cheñi, natoñojokeleña nami nateli kwiluka neyi chakwila tukatwesha kudihemba chiwahi. Twakahandaña ñahi? Nalombeleña nankashi kudi Yehova nawa nahanjekeli nachisaka chami niamana kwetu akuluka yitembi.” Fabian wanukaña nindi: “Chinaswejeli kutoñojoka haniyi nsañu, dihinelukili nami kwosi chuma chikunleñela nikaani. Nalombeli nankashi kudi Yehova nawa natachikili kwikala nampwila yakubuuka.” Chumanyi cheliliyi Isabel? Hakwila nawu yadiloñeshi haniyi nsañu yakubuuka, watachikili kuzata wupayiniya mumbaka mwashakamineñawu. Hanyima yakuzata wupayiniya hadi tukweji tutanu nakamu nawa wadizileña nankashi Bayibolu munitu tukweji, wafuukwiluhu kubuuka.

KUPELESHA CHIHANDILU KULONDA ASHIKIJI CHIKONKWANYI CHAWU

Chelili mpwila yakuya nakuzatila kudi kukaankila kwawakwakushimwina yisweji, chisaka chakoñeluhu yuma yayikwashili kushikija chikonkwanyi chawu. Roald wazatileña mudimu wamwinkeleñawu nfwetu yeneni, ilaña walombeli nindi amwinki mpinji yakunooka hadi chaaka chamukuma. Ilaña mukulumpi wamwiñijili mudimu wamulejeli nindi yazateña nyilungu yiyedi nawa yanookeña hadi nyilungu yitanu nawumu. Roald nindi: “Nfwetu yami yakeheli nankashi ilaña yatukwashileña nankashi.”

Elsebeth nindi: “Nfumwami wanlejeli nindi nikeñi itala muLakselv nawa mwitala detu dekala kuBergen tushimu muntu kulonda yafweteña mali. Chumichi chasendeli mpinji yeneni ilaña yuma yatwendeleli chiwahi. Wahosheli cheñi nindi, “Chimwahitili mpinji, anyanetu awanini nyidimu nawa atukwashileñaku kulanda yakudya nimali akwendela.”

Isabel nindi: “Chineli mbaka kutwabuukilili yanyanya, chankalilili nankashi kuwana mudimu wakudikwasha nachu mumudimu wami wawupayiniya. Mpinji yikwawu  natoñojokeleña nami hinukutwesha kuwana mudimuku.” Hela chochu, kuhitila mukuzata tunyidimu twanyanya twawanineñayi, muchaaka chatachi wazatili tunyidimu twanyanya tutanu natuwana, Isabel watwesheli kudikwasha tuhu chiwahi. Indi yuma yendeli ñahi kudi Fabian? “Hakwila nawu nimanishi shikola yami yakuloñesha yuma yazatikaña nakesi kawuneñu, nateleleli kuzata neyi kadizi. Natwalekeluhu kuzata mumbaka yaLakselv. Nkumininaku, nahitili kweseka kutwasonekeli nawa nawanini mudimu wakuzataku hohu maora antesha wakuloñesha yuma yazatikaña nakesi kawuneñu.”

ANTU AMAKWAWU CHAKALAKELUWU NANKASHI MUMUDIMU WAWU

Marelius niñodindi Kesia, niwena akeñeleña kuya nakuzatila kwadiñi kukaankila kweneni kwawakwakushimwina. Marelius wudi nayaaka 29 nindi: “Mpanji nikwihujola kwahosheleña hamudimu wawupayiniya hakupompa kwankambi kwanleñeleli nitachiki kutoñojoka nami natela kudikita nankashi mumudimu wakushimwina.” Ilaña Kesia, wudi nayaaka 26, chamukalilili kubuukila kwacheñi nakushiya chisaka chindi. Wahosheli nindi, “Wachinineña kushiya antu akeñayi nakuya kwacheñi.” Kubombelahu, Marelius wazatileña mudimu kulonda yafweteña loni yetala dawu. Wahosheli nindi: “Hamuloña wawukwashu waYehova nikulomba nankashi kulonda yatukwashi kuhimpa chihandilu chetu, twatwesheli kubuuka.” Chatachi, adizileña nankashi Bayibolu. Kuhiñahu, awa adisumbula alandishili itala dawu, alekeli nyidimu nawa muAugust 2011 abuukili nakuya kumusumba waAlta, wekala kukabeta kaluwunda muNorway. Hakwila nawu awani mwakuhandila namudimu wawu wawupayiniya, Marelius wazataña mudimu wakuchinda mali nawa Kesia wazataña musitolu.

Knut niLisbeth, adisumbula adi muyaaka yamuma 30, azañaleli nankashi nansañu yatañiluwu muYearbook yahosheleña hadi antu ayaña nakuzatila kudi kukaankila kweneni kwawakwakushimwina aWanta. Lisbeth wahosheli nindi: “Iyi nsañu yitwatañili yatuleñeli tutachiki kutoñojoka hakuya nakuzatila kwituña dacheñi, ilaña nashintajalili muloña nelukili nami iwu himudimu wapela wunatela kuzata.” Hela chochu, apelesheluku chihandilu chawu kulonda ashikiji chikonkwanyi chawu. Knut nindi: “Twalandishili itala detu nikuhemba mali nawa twabuukili hamu nawamama. Nkumininaku, hakwila nawu twiluki chichatiyakanaña kuzatila mwiluña dacheñi, twayili kuchipompelu chazatishaña idimi dawundeli hadi chaaka chamukuma muBergen nawa twashakamineña nawamama yaLisbeth.” Hashimbwili wanyi Knut niLisbeth adiloñesheli nawa abuukilili kwiluña dakwakulehi dakuUganda. Afuntileña nakuzata kuNorway hadi tukweji tuyedi muchaaka. Dichi atwesheli kwikala namali akudihembelamu nikushimwina mpinji yejima muUganda hadi chaaka chamukuma.

“TOMPENU MUTIYI CHAWAHAYI YEHOVA”

Yumanyi yafumini mukudihana kwawu namuchima wumu? Roald nindi: “Twavulileña kwikala hamu nachisaka kunidi iluña dakwakulehi kubadika chichadiña kuBergen. Chisaka chetu chinekali chanuñañana. Nkisu yikwawu yitunatambwili yakumona anyanetu chinakupamawu kuspiritu.” Wabombeleluhu nindi:  “Hitwaswejaña kusha maana kuyuma yakumujimbaku. Hiyalema nankashi neyi chiyatoñojokeleñaku.”

Elsebeth watoñojokeli nindi watela kudiza idimi dikwawu. Muloñadi? Munidi iluña daChipompelu chaLakselv mwadiña cheñi mukala waKarasjok, mukachi kaSami mwadiña antu akukabeta kaluwunda kakuNorway, Sweden, Finland niRussia. Hakwila nawu yashimwini kudi awa antu, Elsebeth watachikili kudiza idimi dachiSami. Chayinu mpinji nakuhanjeka nawantu chovu chovu mwidimi dachiSami. Komana nakudiluñisha kushimwina munidi iluña dadiha? Wahosheli namuzañalu nindi: “Nalombolaña atudizi atanu nawumu. Nakudiluñisha nankashi kudinu iluña!”

Fabian, wunakuzata wupayiniya nawa hinkoñi wakuzatila, nashimuni nindi yena niIsabel akwashili atwansi asatu muchipompelu chawu akeñeleña wakuyikolesha kulonda azateña chikupu nyidimu yamuchipompelu. Awa atwansi asatu chayinu mpinji anakudikita chikupu mumudimu wakushimwina. Ayedi apapatishewa nawa azatiluku wupayiniya wakukwasha muMarch 2012. Kansi wumu wasenukileña muchalala wayisakilili aFabian niIsabel hakumukwasha “kutwalekahu kwikala muchalala.” Fabian nindi: “Natiyili kuwaha nankashi chahosheliyi awa mazu. Mukukwasha muntu mwafumaña muzañalu weneni nankashi!” Isabel nindi: “Muniwu mudimu, ‘namutompi Yehova nawa namoni chawahayi.’” (Mas. 34:8) Wahosheli cheñi nindi: “Kuzatila kudinu iluña kwatuzañaleshaña!”

Marelius niKesia akweti chihandilu chapela ilaña chachiwahi nankashi. Chipompelu chaAlta, kwayili nakuzatilawu chayinu mpinji chidi nawakwakushimwina 41. Marelius nindi: “Neyi nanuka chihandilu chetu chakunyima, nakoleshewaña nankashi hakumona chihandilu chetu chichinahimpiki. Twamuhamekaña Yehova hakutwinka iku kukooleka kwakumuzatila neyi apayiniya kudinu iluña. Kwosi chuma chabadika kulema chikwesekana namudimu wutunakuzataku.” Kesia wabombeleluhu nindi: “Namukuhwelela Yehova chikupu nawa watwakamenaña nankashi. Neluki cheñi nami kushakama kwakulehi nawantaña jami kwankwashaña kulemesha nankashi mpinji yitwekalaña hamu. Hinaditoñeshañaku.”

Indi Knut niLisbeth anakuzata ñahi muUganda? Knut nashimuni nindi: “Hashimbwili nankashi hakwila nawu twinjilili kunidi iluña nichisemwa chawu. Twamonaña kukala kudi neyi, kukala kwamenji, kesi kawuneñu, kukata mwivumu, ilaña twalombolaña atudizi aBayibolu amavulu chikupu!” Lisbeth nindi: “Kwenda chintampu hakwenda jiminiti 30 kufuma kutwashakamaña, kwekala maluña achidi kanda ashimwineñaku dehi nsañu yayiwahi. Ilaña, neyi tunayuku, twawanaña antu anakutaña Bayibolu nawa atwilaña nawu tuyidizisheña. Kudizisha antu amuchidiwu adizoza nsañu yamuBayibolu kwatuzañaleshaña nankashi!”

Nlomboli yetu, Yesu Kristu watela wazañalalaña nankashi hakumona mudimu wakushimwina watachikiliyi chiwunakushika kumaluña amavulu nankashi mwahita iseki dejima! Eñañi, antu jaNzambi ejima azañalalaña hakudihana namuchima wumu kulonda azati mudimu watushililiyi Yesu ‘wakwilisha atumbanji akunyunza yejima.’—Mat. 28:19, 20.

[Chikasha chidi hefu 6]

Kuzatisha nshimbi jamuBayibolu kukuyikwasha kudiloñesha kulonda muyi nakuzatila kudi kukaankila kwawakwakushimwina aWanta:

• Lombenu kudi Yehova kulonda mwikali nampwila yakuzata ‘nimaana alala.’—Yish. 3:21; Fwi. 2:13; Yak. 1:5.

• Lombenu wukwashu kudi akwenu akwakwitiya amaana. “Endaku nawakwamaana nineyi wakekala mukwamaana.”—Yish. 12:15; 13:20.

• Fuukulenu yuma yimwatela kwila. “Yitoñojoka yamukwakudikita yatwala kwamukuvulisha hohu.”—Yish. 21:5.

• Yilenuku hambidi nawa zatilenu hachuma chimunafuukuli. “Ilaku chachiwahi.”—Mas. 37:3.

Neyi mulondela iji njila, Yehova wakayikiswila!—Yish. 16:3.

[Mapu yidi hefu 3]

(Neyi munakukeña kumona ntanjikilu yejima talenu mumukanda)

Kjøllefjord

Lakselv

Alta

Karasjok

Arctic Circle

OSLO

Bergen

[Mwevulu wudi hefu 3]

(Kuchimunswa) Roald niFabian

[Mwevulu wudi hefu 3]

(Hewulu) Elsebeth niIsabel

[Mwevulu wudi hefu 5]

(Kuchimunswa) Knut niLisbeth anakudiza nachisaka chamuUganda

[Mwevulu wudi hefu 5]

(Hewulu) Marelius niKesia anakushimwina kudi mumbanda wahoshaña idimi dachiSami muNorway

[Mwevulu wudi hefu 6]

“Chisaka chetu chinekali chanuñañana.”—Roald