Dikwatishenu Muloña Yehova Wudi Nanenu!

‘Dikwatishi nawa kolaku, Yehova Nzambi yeyi wudi naneyi.’—YOSH. 1:9.

MUNATELI KWAKULA NENUDI?

Chumanyi chateleleli kwilayi Yoshuwa hakwila nawu yekali nachikuhwelelu chakola nikuhamuka?

Yakutalilahwinyi yakuhamuka yinayizañaleshi?

Antu amuchidinyi adiña nachikuhwelelu nikuhamuka anateli kuyikwasha kuzata mudimu wakushimwina?

1, 2. (a) Yililu yamuchidinyi yikutukwasha kuumika kweseka? (b) Indi chikuhwelelu hichumanyi? Lumbululenu.

 MUDIMU waYehova watuzañaleshaña nankashi. Hela chochu, twamonaña kukala kwamonañawu antu ejima nawa tunateli kumona yihuñu ‘hamuloña wansañu yakuloña.’ (1 Pet. 3:14; 5:8, 9; 1 Kor. 10:13) Hakwila nawu tuumiki chachiwahi iyi yihuñu, twatela kwikala nachikuhwelelu nikuhamuka.

² Indi chikuhwelelu hichumanyi? Kapostolu Pawulu wasonekeli nindi: “Kukuhwelela yowu kwiluka chalala netu yuma yitwachiñejaña yidi kwoku, yowu kwesekesha yuma yakadi kumonewa.” (Heb. 11:1) Bayibolu yikwawu yabalumuna nawu: “Chikuhwelelu hitayito didi yayuma yitwachiñejaña. Chikuhwelelu hikukuhwelela chikupu yuma yitunabuli kumona.” (The Simple English Bible) ‘Tayito didi’ hichipapilu chamwekeshaña nawu chuma chitukweti chetu. Chineli twakuhwelela netu Nzambi washikijaña mwakanañayi, chidi neyi tukweti chipapilu chalema nankashi. Chikuhwelelu chatuleñelaña twiluki chikupu netu twakamona kushikijewa kwayikaninu yashindamena haBayibolu yitwachiñejaña nawa twakuhwelela chikupu netu yuma yejima yatulejañayi yakuspiritu yalala hela chakwila hitwayimonañaku.

3, 4. Indi kudikwatisha kwatalisha mudihi? (b) Njilanyi yimu mutwatela kukoleshela chikuhwelelu chetu nikwikala ahamuka?

³ Kudikwatisha hikwikala wahamuka hakuhosha nikwila yuma chakadi woma neyi tunaholokeli mukukala nimuwubanji. Neyi tudikwatisha, dikwila nawu twakola, tukweti wulobu nikubula woma.—Maku 6:49, 50; 2 Tim. 1:7.

⁴ Chikuhwelelu nikudikwatisha hiyililu yayiwahi nankashi. Twili netu tuneluki netu tukuholokela mukukala nawa chinakukeñeka kwikala nachikuhwelelu ilaña tunafwi mutentu. Antu amavulu asonekawu muBayibolu atushila chakutalilahu chachiwahi chakumwekesha iyi yililu. Dichi njila yimu yakukoleshelamu chikuhwelelu chetu nikwikala  ahamuka yidi yakushinshika haniyi yakutalilahu.

YEHOVA WADIÑA NAYOSHUWA

5. Chumanyi chateleleli kwilayi Yoshuwa hakwila nawu yazati chiwahi mudimu windi?

⁵ Tutalenu hayuma yamwekeni hayaaka 3,500 yinahituhu. Mwahitili yaaka 40 kufuma hayipulwishiluwu aIsarela amavulu muwunduñu muEjipitu kudi Yehova. Kaprofwetu Mosi diyi wayilombweleña. Chashikijiliyi yaaka 120, Ituña daChikaninu wadimweneni hahalehi nawa wafwilili hewulu Dampidi yaNebo. Yoshuwa iyala “wenzeli spiritu yamaana” diyi wamuswanini. (Kuhit. 34:1-9) A Isarela adiña kwakwihi nakuswana ituña daKenani. Hakwila nawu yazati chiwahi mudimu wakwikala nlomboli yawu, Yoshuwa wateleleli kwikala namaana akufuma kudi Nzambi. Wateleleli cheñi kumukuhwelela Yehova nikwikala wahamuka nawa wakola.—Kuhit. 31:22, 23.

6. (a) Mukanda waYoshuwa 23:6 watulejaña kwikala ahamuka kulonda twilidi? (b) Yumanyi yitukudizila kumazu ekala haYililu 4:18-20 nihaYililu 5:29?

⁶ Maana, kuhamuka nichikuhwelelu chamwekesheliyi Yoshuwa hampinji yayilehi yashindiluwu aKenani jatela jayikolesheli aIsarela. Kubombela hakwikala ahamuka munjita, ateleleli kwikala cheñi ahamuka chikupu hakwila nawu akoñi mwejima mwayilejeluwu kudi Yoshuwa. Hakufwa kwindi, wahosheli mazu akushika nindi: “Dichi umikenu nankashi, muhembi mwili yejima yinasonekewi mumukanda wanshimbi jaMosi, kulonda mubuli kuteñulukamu nakuya hela kuchikasa chachidiilu hela kuchikasa chachimunswa.” (Yosh. 23:6) Anetu nawa twatela kwikala ahamuka hakwila nawu tumwovwahileña Yehova mpinji yejima. Chumichi chinabombelumu kutwalekahu kumwovwahila Yehova neyi antu atwila nawu tukoñi yuma yinabuli kwesekana nankeñelu yaNzambi. (Tañenu Yililu 4:18-20; 5:29.) Neyi tulomba chikupu nakushindamena hadi Yehova, wakatukwasha kwikala ahamuka.

CHITUNATELI KWIKALA NAKUKOOLEKA MUNJILA JETU

7. Yoshuwa wateleleli kwiladi hakwila nawu yekali wahamuka nikukooleka munjila yindi?

⁷ Hakwila nawu twikali ahamuka kulonda twileña nkeñelu yaNzambi, twatela kudiza nikuzatisha jitunakudiza Mwizu dindi. Ichi dichuma chamulejeluwu Yoshuwa kwila hampinji yamuswaniniyi Mosi nawu: “Wakadikwatishaña, wakomikaña chacheni, wakashuku muchima wakwila mwaya nshimbi jakulejeliyi kambuñami Mosi mwejima. . . . Weniwu mukanda wanshimbi bayi wakafuma mukanwa keyuku, chiña wakatoñojokañamu nimwaana niwufuku, kulonda wakashuku muchima wakwila mwejima mwanasonekuwu dichi wakakooleka munjila yeyi, dichi wakamona kuwaha.” (Yosh. 1:7, 8) Yoshuwa walondeleli iku kufumba nawa ‘wakoolekeli munjila yindi.’ Neyi twila chochimu, tukwikala ahamuka chikupu nikukooleka mumudimu waNzambi.

8. Indi nsona yachaaka chamu 2013 yinafumi hamukandanyi, nawa munakutiya ñahi hakwiluka nenu awa mazu akuyikwasha?

⁸ Yoshuwa watela wakolesheweli nankashi chelili yatiyi mazu aYehova akwila nawu: ‘Dikwatishi nawa kolaku, bayi wutiya woma hela kwakaamaku; muloña Yehova Nzambi yeyi wudi naneyi mwejima muwukuya.’ (Yosh. 1:9) Anetu nawa Yehova wudi nanetu. Dichi bayi ‘tutiya woma hela kwakaama’ neyi tuholokela mukweseka kudi kwejimaku. Sweje-e dinu  mazu alema nankashi itwatela kwiluka akwila nawu: ‘Dikwatishi nawa kolaku. . . . Yehova Nzambi yeyi wudi naneyi.’ Awa mazu adi haYoshuwa 1:9 diwu anatonduwu kwikala nsona yachaaka cha 2013. Awa mazu akutukolesha nankashi hatukweji tudi hambidi, neyi chitwakakoleshewa namazu niyililu yawantu adiña nachikuhwelelu nawa ahamuka.

EMIKILI MUSHINDU CHAKANDI WOMA

9. Munjilanyi mwamwekesheleliyi Rahaba chikuhwelelu nikuhamuka?

⁹ Chelili Yoshuwa yatemeshi akwakwendesha ituña ayedi muKenani, chivumbi Rahaba wayiswekeli nawa walejeli ayilumbu janawa akwakwendesha ituña kuya nakuyikeñela kwacheñi. Hamuloña wachikuhwelelu chindi nikuhamuka, yena nichisaka chindi ayipulwishili hampinji yajilumwinuwu musumba waYeriku kudi aIsarela. (Heb. 11:30, 31; Yak. 2:25) Rahaba walekeli yililu yindi yatama kulonda yamuzañalesheña Yehova. Antu amakwawu anekali akwaKristu adiña nachikuhwelelu, kuhamuka niyililu yayiwahi hakwila nawu ahimpi chihandilu chawu kulonda amuzañalesheña Nzambi.

10. Indi Luti wamwekesheli ñahi kuhamuka hakudifukula kwalala nawa nkiswinyi yatambwililiyi?

¹⁰ Hanyima yakufwa kwaYoshuwa, Luti wakuMowabi wemikili mushindu chakadi woma kukudifukula kwalala. Hakwikala ntuluwa wakaIsarela, watela welukili nsañu yikwawu hadi Yehova. Mukuwindi Nyawomi nawa ntuluwa, washakamineña kuMowabi, ilaña wafuukwiluhu kufunta kumbaka yawaIsarela yaBetelemi. Hayileñawu, Nyawomi wamulejeli Luti nindi yafunti kudi antaña jindi, ilaña iwu mumbanda kaMowabi wamwakwili nindi: “Bayi wunkakeja kukushiya, mwaka nifuntumu nibuli kuya naneyuku. . . . Antu eyi akwila antu ami. Nzambi yeyi wukwila Nzambi yami.” (Luti 1:16) Luti wakoñeli mwejima mwahosheliyi. Chimwahitili mpinji, ntaña yaNyawomi Bowazi wasumbwili Luti wamuvweleli mwana weyala wekalili nkakulula yaDavidi niYesu. Eñañi, Yehova wakiswilaña antu amwekeshaña chikuhwelelu nikuhamuka.—Luti 2:12; 4:17-22; Mat. 1:1-6.

ANTU AMAVULU ASHILI WUMI WAWU HAKATOÑA

11. Indi Yehoyada niYehosheba amwekesheli ñahi kuhamuka, nawa chumanyi chafuminumu?

¹¹ Twaswejaña kuhamuka nikwikala nachikuhwelelu chakola neyi tumona netu Nzambi wudi nawantu atwamijañaku mudimu windi nikukiña akwawu akakwitiya kubadika aweni. Chakutalilahu, talenu chuma chakoñeliyi Kapristu Muneni Yehoyada nañodindi Yehosheba. Chafwiliyi Mwanta Ahaziya, mama yindi Ataliya wajahili anyana kamwanta ejima kushiya hohu Yowashi nawa wahukwili itanda. Yehoyada niYehosheba ashili wumi wawu hakatoña kuhitila mukupulwisha Yowashi mwana kaAhaziya nawa wamuswekeli hadi yaaka yitanu nachimu. Muchaaka chamuchitanu nachiyedi, Yehoyada wamushili Yowashi hetanda dawanta nawa wamujahili Ataliya. (2 Anya. 11:1-16) Nkumininaku Yehoyada wamukwashili Mwanta Yowashi hakuwahisha tembeli. Chafwiliyi Yehoyada nayaaka 130, amujikili kwajikilileñawu anyanta “muloña welilaña yayiwahi muIsarela nikudi Nzambi nikwitala dindi.” (2 Kushi. 24:15, 16) Kubombelahu, yililu yamwekesheliyi Yehoyada niñodindi yakuhamuka yakiñili chitachi chaDavidi nakushika kudi Mesiya.

12. Ebedi-meleki wamwekesheli ñahi kuhamuka?

¹² Ebedi-meleki ñamba wamwitala daMwanta Zedekiya, washili wumi windi hakatoña kukoola Yeremiya. Mwanta wamuhanini Yeremiya kudi anyanawuta amuYuda, amutwambilili nawu walejeleña antu nawu adimbululeña wanta nawa amumbilili muwina wamalowa kulonda yafwilumu. (Yere. 38:4-6) Hela chakwila wadiña muwubanji weneni nankashi muloña antu amuheleli Yeremiya, Ebedi-meleki wayili kudi Zedekiya nakumuhoshelaku iwu kaprofwetu. Zedekiya wetejeli nawa wamwinkeli Ebedi-meleki amayala 30 kulonda ayili hamu nakumupulwisha Yeremiya. Nzambi wamulejeli Ebedi-meleki kuhitila mudi kaprofwetu nindi wakapuluka hampinji yakakuchikawu Yerusalema  kudi akaBabiloni. (Yere. 39:15-18) Nzambi wakiswilaña antu amwekeshaña kuhamuka hakwila nkeñelu yindi.

13. Indi Aheberu asatu amwekesheli ñahi kuhamuka chakadi woma, nawa tunateli kuhetelamu ñahi muchuma chayimwekeneni?

¹³ Muyaaka nkulakaji yamuchitanu nayiyedi B.C.E., Aheberu asatu ambuña aYehova ayilejeli jiika nawu Nzambi wakiswilaña antu amwekeshaña chikuhwelelu nikuhamuka. Mwanta Nebukaneza wapompesheli antu adiña nayifulu yahewulu muBabiloni nawa wayilejeli nindi adifukuli kumukishi wawuru watuñiliyi. Muntu wejima wadi kukaana kudifukula kuniwu mukishi ateleleli kumumbila muluteñi lwakesi. Awa Aheberu asatu amulejeli Nebukaneza nakalemesha nawu: ‘Nzambi yetu twakalakelaña natweshi kutupulwisha muluteñi ludi nakubidima kesi, ninochu wukutupulwisha kudeyi, eyi mwanta. Hela neyi nehi, ilukaku chachiwahi, eyi mwanta, etu kwetu kwonti kwetu kukalakela akishi eyi, hela kudifukula kudi nkishi weyi wawuru wuwunemiki.’ (Dan. 3:16-18) Mukanda waDanyeli 3:19-30 washimuna chayipulwishiluwu awa Aheberu asatu muchihayamisha. Hela chakwila hiyanateli kutuchinisha nawu akutujaha kuhitila mukutuumbila muluteñi lwakesuku, twamonaña yuma yesekaña kashinshi ketu nawa twatela kwiluka netu Nzambi wakatukiswila neyi tumwekeshaña chikuhwelelu nikuhamuka.

14. Kwesekeja naDanyeli kapetulu 6, Danyeli wamwekesheli ñahi kuhamuka, nawa chumanyi chafuminumu?

¹⁴ Danyeli wamwekesheli chikuhwelelu nikuhamuka chelili ayilumbu jindi ayi nakumushinjila Mwanta Dariyusa nawu yashi nshimbi yakwila nawu “chimwakahita mafuku makumi asatu, antu kulomba chuma chiña akalomba kudeyi mwanta hohu, yowu wakalomba chuma kudi Nzambi hela kudi mukwawu muntu akamuumbila muwina wanyitupa.” Chelukiliyi Danyeli nindi anafwachikiku dehi kumukanda wanshimbi, ‘weñilili mwitala dindi. Kwitala dindi dahewulu kwadiñi njanina jachasi jatala mesu kuYerusalema. Hakufukamaña hamanuñu, ifuku dimu mapampa kasatu, ifuku dimu mapampa kasatu, hakusakililaña kumesu aNzambi yindi, neyi chelilañayi hakusambila.’ (Dan. 6:6-10) Danyeli wadiña wahamuka amumbilili muwina wawanyitupa, ilaña Yehova wamupulwishili.—Dan. 6:16-23.

15. (a) Indi Akwili niPirisila emikili chakutalilahu chamuchidinyi chakwikala nachikuhwelelu nikuhamuka? (b) Indi mazu aYesu adi haYowanu 13:34 atalisha mudihi, nawa akwaKristu amavulu amwekeshaña ñahi kukeña kwamuchidiwu?

¹⁵ Kwesekeja nansañu yabula kushimunawu muBayibolu, Akwila niPirisila ‘akeñeli kufwa kukoola wumi waPawulu.’ (Yil. 18:2; Rom. 16:3, 4) Azatili mukuhamuka kwesekeja namazu aYesu akwila nawu: “Tiyenu, nukuyileja lushimbi lwalwiha nami, Mukeñañani. Chinayikeñami, ninenu nawa keñañanenu.” (Yow.  13:34) Nshimbi yaMosi yashimwini nawu muntu watela kukeña mukwawu neyi chadikeñayi yomweni. (Lev. 19:18) Ilaña nshimbi yaYesu yadiña ‘yayiha’ hakulumbulula kukeña kwabadika kwakuhana wumi wetu kukoola akwetu neyi cheliliyi yena. AkwaKristu amavulu amwekeshaña kukeña kuhitila ‘mukusha wumi wawu hakatoña’ kulonda asweki akwawu akakwitiya kudi antu anakukeña kuyikabisha chikupu hela kuyijaha kudi ayilumbu jawu.—Tañenu 1 Yowanu 3:16.

16, 17. Kwesekanyi kwachikuhwelelu kwamwenuwu atumbanji twaYesu akusambila, nawa chumichi chinesekani ñahi nayuma yamonañawu akwaKristu makonu?

¹⁶ Kufwana Yesu, akwaKristu akusambila amavulu amwekesheli kuhamuka kuhitila mukudifukula kudi Yehova hohu. (Mat. 4:8-10) Akaanini kwocha insensi yakulemesha nachu mwanta wawaRoma. (Talenu mwevulu.) Mumukanda waThose About to Die, Daniel P. Mannix wasonekeli nindi: “AkwaKristu antesha nankashi diwu etejeli kwocha insensi, nawa kameña hakwochela insensi kadiña hatooka kulonda antu chiyipeleleña kwocha insensi. Nkoli wejima wadiña nakusamwina insensi yantesha hakesi, neyi neli dehi mwenimu amwinkeleña Chipapilu Chakulambwilahu nawa amuumbileñaku. Amulejeleña jiika cheñi nawu hadifukwileña kudi mwantaku; ilaña kusamwina insensi mukesi chamwekesheleña nawu neteji nindi mwanta diwabadika nawa diyi mutu wawanta wawaRoma. Hela chochu, akwaKristu antesha hohu diwu etejeli hakwila nawu ayuumbuku.

¹⁷ AkwaKristu amakonu ashiluwu muyilombu yawaNazi akeñeleña kujahawu ayilejeli nawu afwachiki hachipapilu chamwekesheleña nawu analeki kudifukula kudi Yehova kulonda ayuumbuku. Antu antesha hohu diwu afwachikili. Hampinji yikwadiña njita yakujilumuna muza wumu kuRwanda muyaaka yantesha yinahituhu, aYinsahu aTutsi niaHutu ashili wumi wawu hakatoña kulonda adikiñi wumu namukwawu. Hakwila nawu tuumiki kweseka kwamuchidiwu chakeñekaña kwikala nachikuhwelelu nikuhamuka.

ANUKENU NENU YEHOVA WUDI NANETU!

18, 19. Yakutalilahwinyi yamuBayibolu yawantu adiña nachikuhwelelu nikuhamuka yinateli kutukwasha kutwalekahu namudimu wetu wakushimwina?

¹⁸ Tukweti kukooleka kwakuzata mudimu weneni nankashi wenkawu ambuña aNzambi, mudimu wakushimwina nsañu yaWanta nikwilisha atumbanji. (Mat. 24:14; 28:19, 20) Twazañalalaña nankashi hachakutalilahu chachiwahi chaYesu. Yesu ‘wayili nakuhitahita nimunyikala yamaneni nimunyikala yanyanya, nakuyishimwina nikuyitwela nsañu yawanta waNzambi yayiwahi.’ (Luka 8:1) Kufwana Yesu, twatela kwikala nachikuhwelelu nikuhamuka hakwila nawu tushimwini nsañu yaWanta. Nawukwashu waNzambi, tunateli kwikala ahamuka neyi Nowa ‘mukwakushimwina kuloña mumpata yawantu asekesheleña Nzambi’ adiña kwakwihi nakujilumuka nadibaji.—2 Pet. 2:4, 5.

¹⁹ Kulomba kwatukwashaña kutwalekahu kuzata mudimu wakushimwina. Chelili atumbanji twaKristu akabishileñawu alombi nawu ayinki ñovu ‘yakushimwina mazu aNzambi chakadi woma,’ Nzambi wakwili kulomba kwawu. (Tañenu Yililu 4:29-31.) Neyi mwatiyaña woma wakuya nakushimwina kwitala nikwitala, Yehova wakaakula kulomba kwenu nawa wakakolesha chikuhwelelu chenu nikuyileñela mwikali ahamuka.—Tañenu Masamu 66:19, 20. *

20. Wukwashinyi wutukweti etu ambuña aYehova?

²⁰ Chakala nankashi kwila mwaya muchima waNzambi neyi tunakumona kukala mukanu kaayi katama. Hela chochu, tudi nkawetu wanyi. Nzambi wudi nanetu. Nimwanindi wekala Mutu wachipompelu niyena wudi nanetu. Tudi cheñi nawakwetu aYinsahu jaYehova akubadika ha 7,000,000 mukaayi kejima. Dichi tutwalekenuhu hamu nawu kumwekesha chikuhwelelu nikushimwina nsañu yayiwahi hampinji yitukwanukaña nsona yachaaka cha 2013 yinakwila nawu: ‘Dikwatishi nawa kolaku, Yehova Nzambi yeyi wudi naneyi.’—Yosh. 1:9.

[Tumazu twaheshina]

[Malwihu aKuzatisha haKudiza]

[Mazu ekoku adi hefu 8]

Nsona yetu yachaaka cha 2013 yinakuhosha nawu: ‘Dikwatishi nawa kolaku, Yehova Nzambi yeyi wudi naneyi.’—Yosh. 1:9

[Mwevulu wudi hefu 10]

AkwaKristu akusambila akaanini kudifukula kuwanta wawaRoma