Kampeni Yaloñeshañawu Chachiwahi Mwedikaña Nyikabu Yayiwahi

María Isabel hikansi mukwakushimwina wadikitaña chikupu mumusumba waSan Bernardo wekala muSouth America mwituña daChile. Yena niantaña jindi ahoshaña idimi daMapuche. Chisaka chejima chazatileña nañovu kulonda atachiki chipompelu chachiha mwidimi daMapuche, chatenañawu cheñi nawu Mapudungun.

Chabidikiluwu nawu Chanukishu chakufwa kwaKristu chakekala mwidimi daMapudungun nawa apulintili yipapilu 2,000 yakutambika nachu antu kuChanukishu munidi idimi, María Isabel watachikili kutoñojoka. Chumanyi cheliliyi kulonda yazatiku? Wanukili yuma yadiluñishiluwu atwansi aYinsahu azañaleleña kushimwina kudi akwawu akashikola niantañishi. Wayilejeli anvwali jindi hansañu yakushimwina, wonsu wawu afuukwiluhu nawu María Isabel wukutoñojokahu njila yakuhaninamu iyi yipapilu hashikola. Njilanyi yawaniniyi?

Chatachi, María Isabel wehwili akulumpi jashikola nindi amwiteji kulonda yalamiki chipapilu chakutambika nachu antu hachinsu heñililaña akashikola amavulu. Amwitejeli nawa amuhamekeli hachuma chafuukwiliyi. Ifuku dimu nantetemena hakutambika majina, mukulumpi washikola wabidikili hachihoshelu kutalisha hachipapilu chakutambika nachu antu.

Kuhiñahu, María Isabel walombeli nindi yahiti mutupeka twejima mwadizilaña akashikola. Hanyima yakutambula lusesa kudi antañishi, wehwili akashikola ejima neyi chakwila hakachi kawu hadiña weluka kuhosha idimi daMapuche. Nindi: “Natoñojokeleña nami hadaha hashikola yejima hakwikala akashikola 10 hela 15 ahoshaña idimi daMapuche ilaña adiña amavulu nawa natambikili akashikola 150!”

“WAKUHWELELELI NINDI KUNAKWINZA MUKULUMPI”

Mumbanda wumu wamweni chinjikijilu halamikiluwu chipapilu chakutambika nachu antu hachinsu chashikola wehwili muntu watela kuhoshayi nindi kutalisha hachanukishu. Wahayamini nankashi chamulejeluwu nawu yadimoni nakansi wamumbanda wayaaka ikumi. María Isabel wahosheli nachimwemweta nindi: “Wakuhweleleli nindi kunakwinza mukulumpi.” Hanyima yakumwinka chipapilu nikumulumbulwila chantesha, María Isabel wamwihwili keyala yindi kulonda yena nianvwali jindi akamwendeli nakuhanjeka hansañu yaWanta waNzambi. Akwakushimwina 20 azatilaña munidi iluña daMapudungun mwahoshañawu idimi daMapuche azañaleli nankashi hakumona iwu mumbanda niantu amakwawu 26 ahoshaña idimi daMapuche enjili kuChanukishu. Idi izanvu chayinu mpinji hichipompelu chakola nankashi!

Hela chakwila muchidi anyiki hela akulumpi, kwila mutambika akwenu akashikola hela akwanyidimu kulonda akenzi kuChanukishu, kumpanji yawantu amavulu hela kukupompa kwankambi nehi? Kwila musandujola munyikanda yetu kulonda muwanumu yakutalilahu yinateli kuyikwasha kwiluka chakuhosha nawantu amuchidiwu nehi? Lombenu cheñi spiritu yajila yaYehova kulonda mubuli woma hakuleja antu nsañu yaYehova. (Luka 11:13) Neyi mwila mwenimu, ninenu mukadihayamina nankashi nawa mwakakola hakumona yuma yafumaña mukuloñesha chachiwahi.