Kuzata Chakadi Kuditoñesha

“Navulamenaña yuma yamunyima, nafwilaña nami nakashiki kuyuma yakumbidi.”—FWI. 3:13.

TOÑOJOKENU HANAWA MALWIHU ALEMA:

Chumanyi chamukwashili kapostolu Pawulu kuvulamena yuma yakoñeliyi kunyima?

Njilanyi yayiwahi yikutukwasha kwikala nayitoñojoka yakuwunda?

Nshimbinyi yatela kutukwasha kumuzatila Nzambi chakadi kuditoñesha?

1-3. (a) Kuditoñesha hichumanyi, nawa kuditoñesha kukutuleñela twilidi? (b) Chumanyi chitunateli kudizila kudi Pawulu kutalisha hakumuzatila Nzambi chakadi kuditoñesha?

 MUKWAKUSONEKA nkumbu wasonekeli nindi: “Mazu awushona nawa akutiyisha kutama ahoshañawu antu diwu awa: ‘Chiña nelili chikanaña!’” Mukwakusoneka nkumbu diyi J. G. Whittier, nawa wateneneña yuma yitwaditoñeshaña, netu chiña nayizata munjila yambukaku. “Kuditoñesha” hikuneña muyitoñojoka, hamuloña wachuma chinamwekani hela chinabuli kuzatika nawa chinateli kuleñela muntu “kudila cheñi.” Wejima wetu twakoñahu dehi yuma yitwaditoñeshaña. Yumanyi yimwaditoñeshaña?

² Antu amakwawu akoñeli yiluwa yomisha mbaña muchihandilu chawu nikukoña nshidi jahamesu bwi-i. Amakwawu kwosi chuma chatama chakoñawu, ilaña ajinokaña neyi chakwila afuukwiluhu chachiwahi hela nehi muchihandilu chawu. Antu amakwawu avulamenaña yuma yakoñeluwu kunyima nikutwalekahu nachihandilu chawu. Amakwawu niwena atwalekañahu kutoñojoka hayuma yakoñeluwu kunyima nawu “chiña tuhu nabulili kuchila.” (Mas. 51:3) Indi enu mwatiyaña ñahi? Komana munakukeña kumuzatila Nzambi chakadi kuditoñesha kufuma hefuku dalelu? Kuduhu chakutalilahu chachiwahi chamuntu chikutukwasha kumuzatila Nzambi chakadi kuditoñesha? Eña, kapostolu Pawulu.

³ Muchihandilu chindi chejima, Pawulu wakoñeli yiluwa yamaneni nawa wafuukwileñahu chachiwahi. Waditoñesheli nankashi hayuma yakoñeliyi kunyima, ilaña washili cheñi muchima hakuzata mudimu waNzambi nakashinshi. Tushinshikenu hachakutalilahu chindi chichatela kutukwasha kuzata chakadi kuditoñesha.

YUMA YADITOÑESHELIYI PAWULU YAKUNYIMA

4. Yumanyi yakoñeliyi Pawulu kunyima yaditoñesheliyi?

⁴ Hakwikala kaFwarisi wakansi, Pawulu wakoñeli yuma yaditoñesheliyi. Chakutalilahu, watuñili kampeni  kakukabisha chikupu atumbanji twaKristu. Bayibolu yahosha nawu hanyima yakumujaha Setefwanu, hohenohu ‘Sawulu [watachikili kutenawu nawu Pawulu] watachikili kukisañana chipompelu; hakwiñila mumatala ejima nakukokakoka niamayala niambanda, hakuyisha mukaleya.’ (Yil. 8:3) Muntu wadiza chikupu wejina daAlbert Barnes wahosheli nindi izu dachiGriki dakwila nawu ‘kukisañana’ “hizu dabadika kulema damwekeshaña iyena nikuhila kwamwekesheliyi [Sawulu] hakukabisha antu.” Barnes nindi, “Sawulu wazuwili nankashi neyi kanyama hakukabisha akwaKristu.” Chineli wadiña kaYudeya wadihana, Sawulu wakuhweleleli nindi Nzambi diyi wamwinkeli mudimu wakujiyisha akwaKristu. Dichi watachikili kumwesha akwaKristu ikezeñi ‘nakuyonashanina nikuyifunyina . . . amayala niambanda,’ wakeñeleña kuyijilumuna.—Yil. 9:1, 2; 22:4. *

5. Lumbululenu Sawulu chalekeliyi kukabisha atumbanji twaYesu nakutachika kushimwina hadi Kristu.

⁵ Sawulu wakeñeleña kuya kuDamakasa nakufumisha atumbanji twaYesu munyikala yawu, nakuyitwala kuYerusalema kulonda akayi kuchota chaSanihedilini. Hela chochu wakañenyi muloña wazuñishileña Mutu wachipompelu chawakwaKristu. (Efwes. 5:23) Hampinji yayileñayi Sawulu kuDamakasa, Yesu wadibulakeni naSawulu nawa wapuutili mesu hamuloña wachejeji chamwekeni muchihayamisha. Kuhiñahu, Yesu wamutemesheli Sawulu kuDamakasa kulonda akamulejeluku nshimbi jikwawu. Tweluka yuma yejima yamwekeni.—Yil. 9:3-22.

6, 7. Chumanyi chinakumwekesha nawu Pawulu welukili yuma yatama yakosomweniyi kunyima?

⁶ Pawulu chekaliliyi mukwaKristu, wahimpili yililu yindi. Chatela yekali chilumbu chawakwaKristu, wekalili mukwakushimwina wadikita. Hela chochu, wasonekeli hadi yamweni nindi: “Enu aweni mwatiya dehi munashakamini hamwaka nakulonda yijila yawaYudeya, ninichi chinaswejelaña nankashi kukabisha chipompelu chaNzambi nikuchikisañana.” (Ŋal. 1:13) Nkumininaku, washimwini yuma yakoñeliyi kunyima yaditoñesheliyi hakusonekela akaKorinda, Afwilipi niTimotewu. (Tañenu 1 Akorinda 15:9; Fwi. 3:6; 1 Tim. 1:13) Pawulu hadeteleña hebwambu hakusoneka nsañu yamuchidiwuku, nawa hamwekeneña neyi kwiji hakoñeli yuma yamuchidiwuku. Welukili nindi waluwañesheli nankashi.—Yil. 26:9-11.

⁷ Muntu wadiza jaBayibolu chikupu wejina daFrederic W. Farrar, wahosheli hachuma chakoñeliyi Sawulu “chomisha mbaña chakukabisha akwaKristu.” Farrar wabombeleluhu nindi “tukwiluka chichamukatileña kumuchima nichamutwikileñawu nyiloña kudi ayilumbu jindi” neyi tutoñojoka hachineñi chatiyiliyi Pawulu muchihandilu chindi. Hadaha mpinji jikwawu, Pawulu amuwanineña kudi amana kwetu amuyipompelu yamboka-mboka yendeleliyi, amana kwetu adibulakeniyi nawu katachi ahosheleña nawu, ‘Yeyi Pawulu, yeyi watukabishileña!’—Yil. 9:21.

8. Indi Pawulu watiyili ñahi haluwi nikukeña kwamumwekesheleluwu kudi Yehova niYesu, nawa chumanyi chitunadiziluku?

⁸ Hela chochu, Pawulu welukili nindi luwi lwaNzambi lwabadika dilwamukwashili kutwalekahu kuzata mudimu wakushimwina. Wateneni chililu chaluwi lwaNzambi mapampa 90 munyikanda 14 yasonekeliyi kubadika ansoneki ejima aBayibolu. (Tañenu 1 Akorinda 15:10.) Pawulu wahamekeli chikupu luwi lwamumwekesheleluwu nawa wakeñeleña kuzatisha chiwahi luwi lwaNzambi lwabadika lwamumwekesheleluwu. Dichi, ‘wadikitili nañovu’ kubadika apostolu amakwawu. Chakutalilahu chaPawulu chamwekeshaña nawu neyi tushimuna nshidi jetu nikuhimpa yililu yetu, Yehova nateli kutwanakena nshidi jetu jamaneni kushindamena hamulambu wefutu danyiloña daYesu.  Ichi hichakutalilahu chachiwahi nankashi kudi antu atoñojokaña nawu hiyanateli kuhetela mwifutu damuloña daKristuku! (Tañenu 1 Timotewu 1:15, 16.) Hela chakwila Pawulu wakabishili nankashi Kristu, wasonekeli nindi: ‘Mwana kaNzambi, wankeñeli, wadiheni kunkoolami.’ (Ŋal. 2:20; Yil. 9:5.) Eñañi, Pawulu welukili nindi wateleleli kuzata chakadi kusweja kuditoñesha. Komana dichuma chimunadizi ninenu?

KOMANA KUDI YUMA YIMWADITOÑESHAÑA?

9, 10. (a) Muloñadi antu jaYehova amakwawu chaditoñeshelañawu? (b) Muloñadi chichatamina kutwalekahu kuneña hayuma yimwakoñeli kunyima?

⁹ Komana mwakoñahu dehi yuma yimwaditoñeshaña? Komana mwamanishilahu dehi ñovu nimpinji hayuma yamukunkulwayi? Komana mwakoñeluhu chuma chaneñesheli antu amakwawu? Indi kwiji kudi yuma yimwaditoñeshaña yimwatoñojokaña nenu kachi mwayikoñeli munjila yacheñi. Lwihu ludi nawu, Chumanyi chimwatela kwila?

¹⁰ Antu amavulu endaña tuhu nachineña. Kutwalekahu nachineñi hikudikabisha, nikudiyandisha hohu. Kwaleñelaña kwakama nankashi. Komana kuneña kwamanishaña kukala kudi kwejima? Inehi! Kuneña kwamanishaña hohu mpinji niñovu. Chatela mwendeña hohu nachineñi, mwatela kuzata nañovu kulonda mumanishi kukala kumukweti. Mwatela kudanakena kudi muntu imwavulumuna kulonda mutwalekuhu nawubwambu wenu. Mwatela kutondolwela yuma yejima yaleñeleli mumuvulumuni mukwenu kulonda kumbidi mwakabuli kujileta cheñi. Mpinji yikwawu, mwatela hohu kuumika kukala kumunakuhitamu. Kuneña hikwakwashanañaku, ilaña kwaleñelaña mukañanyi kumukalakela Nzambi chikupu. Kwosi chuma chachiwahi chafumaña mukuneñaku!

11. (a) Tunateli kutambwila ñahi luwi lwaYehova lwabadika? (b) Kwesekeja nachahosha Bayibolu, chumanyi chitwatela kwila kulonda tuleki kuditoñesha hayiluwa yitwakoñeli kunyima?

¹¹ Antu amakwawu ekalaña nachaaku chakwiteja yiluwa yakoñeluwu kunyima yiyileñeli  adimoneña nawu hiyalema kumesu aNzambuku. Anateli kutoñojoka nawu Nzambi hakuyanakenaku muloña wakwila ahuñumukila hela avulumwini kakavulu. Dichi, hela chakwila akoñeli nshidi jamaneni kunyima anateli kubalumuka mumuchima, kuhimpa nikulomba kulonda ayanakeni. (Yil. 3:19) Yehova nateli kuyimwekeshela luwi nikukeña kwindi kwabadika neyi chamwekeshelañayi antu amavulu. Yehova wanakenaña muntu wadizoza, washinshika nawa wunabalumuki chikupu mumuchima windi. Ichi dicheliliyi Nzambi kudi Yoba, wahosheli nindi: “Nabalumuki dehi mumuchima mulunkuñu namawuti.” (Yoba 42:6) Wejima wetu twatela kulondela kufumba kwabadika kuwaha kukutuleñela twikali nayitoñojoka yakuwunda, kwakwila nawu: “Muntu wabutaña nyiloña yindi hakamona kuwahaku; ilaña muntu wukwitija nindi navulumunaña, hakuyileka, wakamona kwanakena.” (Yish. 28:13; Yak. 5:14-16) Dichi twatela kushimuna yiluwa yetu kudi Nzambi, kulomba kwanakena nikulondela njila yikutukwasha kuwahisha yiluwa yetu. (2 Kor. 7:10, 11) Neyi twila mwenimu, tunateli kutambwila luwi lwaNzambi ‘wanakenaña nankashi.’—Isa. 55:7.

12. (a) Indi chakutalilahu chaDavidi chatudizishaña njilanyi yalema yakumanishilamu chineñi? (b) Munjilanyi mwaditoñeshelañayi Yehova, nawa chumichi chatukwashaña ñahi? (Talenu chikasha.)

¹² Kulomba hinjila yayiwahi nankashi mwatukwashilañayi Nzambi. Davidi wamwekesheli chikuhwelelu muMasamu nindi Yehova wakwili kulomba kwindi. (Tañenu Masamu 32:1-5.) Henohu Davidi kanda yamulejumu Nzambi nshidi jindi, chinleji chindi chamukabishileña nankashi. Hadaha wayandili chikupu muyitoñojoka nikumujimba nawa muzañalu wamanini hamuloña wakukañanya kushimuna yiluwa yindi. Chumanyi chaleñeleli Davidi amwanakeni nakwikala wakasunuka? Muloña wamulejelumu Nzambi yiluwa yidi yejima. Yehova wakwili kulomba kwaDavidi nawa wamukolesheli kutwalekahu kukoña mwaloña nikuzata mudimu walema. Chochimu, neyi mulomba chakufuma hamuchima, mwatela kukuhwelela nenu Yehova wukwakula kulomba kwenu. Neyi yiluwa yimwakoñeli kunyima yinakuyikabisha, zatenu hanakumini ñovu jenu kulonda muhimpi nawa kuhwelelenu nenu Yehova nayanakeni.—Mas. 86:5.

TOÑOJOKENUÑA HAYUMA YAKUMBIDI

13, 14. (a) Yumanyi yitwatela kushaku muchima chayinu mpinji? (b) Malwihwinyi akutukwasha kushinshika hachihandilu chetu?

¹³ Antu ahoshaña nawu twadizilaña kuyuma yakunyima ilaña twatela kutoñojokaña hayuma yakumbidi. Dichi, chatela twakameneña hayuma yakunyima, twatela kusha muchima hayuma yakatataka niyakumbidi. Yumanyi yitunakwila hayinu mpinji hela yitunakukañanyi kwila, chakwila neyi munahiti dehi yaaka twakatachiki kuditoñesha netu chiña nelilumu wanyi hela netu chiña nelili  munjila yacheñi? Komana tunakumuzatila Nzambi nakashinshi kulonda twakabuli kuditoñesha kumpinji yakumbidi?

¹⁴ Chineli lukadi lweneni ludi kwakwihi, hitunakukeña twakaditoñeshi netu: ‘Muloñadi chinabulilili kuzata chikupu mumudimu waNzambi? Muloñadi chinabulilili kuzataku wupayiniya hinadiña nampinji? Chumanyi chaletesheli nibuli kwikala nkoñi wakuzatila? Komana nazatili nañovu kulonda nivwali muntu wamuha? Komana nikweti yililu yikaleñela Yehova yakañiteji kwiñila mwituña dindi dadiha?’ Chatela twakameneña hayuma yamuchidiwu, twatela kuzatisha awa malwihu hakudishinshika etu aweni nikuzata hakumina ñovu jetu mumudimu waYehova. Neyi tubula kubabala, tukutwalekahu kwikala nachihandilu chakatuleñela twakaditoñeshi nankashi.—2 Tim. 2:15.

BAYI MUDITOÑESHA MUDIMU WENU WAJILAKU

15, 16. (a) Indi antu amavulu adihana ñahi hakwila atwamijuku mudimu waNzambi muchihandilu chawu? (b) Muloñadi chitwatela kubulilila kuditoñesha hakudihana kwejima kutwadihanaña hakutwamijaku mudimu waWanta?

¹⁵ Indochi enu mwadihana kumukalakela Yehova mumudimu wampinji yejima? Hadaha mwalekeli mudimu wawuwahi hela mudimu wakuselujola nakupelesha chihandilu chenu kulonda mwikaleña nampinji yeneni yakuzata mudimu waWanta. Hadaha mwatondeluhu kushakama wujiki hela neyi mudi mumaluwi, mwatondeluhu kubula kuvwala anyana kulonda mwikali akasunuka kuzata mudimu wudi wejima wampinji yejima chidi neyi, kuzatila haBeteli, mudimu wakutuñatuña wamukaayi kejima, mudimu wamuñinza hela mudimu wawumishonali. Komana mwatela kuditoñesha hakufuukula kwenu hayinu mpinji yimunakushinakajila mumudimu waYehova? Komana mwatela kutoñojoka nenu mwafuukwili mwaheña hela nenu mwafuukwili hampinji yatama? Inehi.

¹⁶ Mwafuukwili muniyi njila hamuloña wakumukeña nankashi Yehova nimpwila yenu yakukeña kukwasha antu amakwawu anakukeña kumuzatila. Bayi mutoñojokaña nenu chihandilu chenu chadi kuwaha neyi mwafuukwiluhu kwila yuma yacheñi. Mwatela kuzañalala nankashi hakwiluka nenu mwakoñeli chuma chimwamweni nenu chachiwahi. Munateli kuzañalala hakwiluka nenu munazati hakumina ñovu jenu hakumukalakela Yehova. Hakavulamena kudihana kwenuku. Muwumi walala wudi kumbidi, Yehova wakayikiswila chikupu kubadika yuma yejima yimunakutoñojoka hayinu mpinji.—Mas. 145:16; 1 Tim. 6:19.

CHITWATELA KUKALAKALA CHAKADI KUDITOÑESHA

17, 18. (a) Nshimbinyi yamukwashili Pawulu kuzata chakadi kuditoñesha? (b) Chumanyi chimunafuukuluhu kwila hayuma yimwakoñeli kunyima, hayinu mpinji nikumbidi kutalisha hamudimu waYehova?

¹⁷ Nshimbinyi yadiziliyi Pawulu yamukwashili kumukalakela Nzambi chakadi kusweja kuditoñesha? Neyi chabalumunawu mu J. B. Phillips, Pawulu wasonekeli nindi: “Navulamenaña yuma yakunyima, nawa nafwilaña nami nakashiki kuyuma yakumbidi, nakabilaña chuma chinafwilaña.” (Tañenu Afwilipi 3:13, 14.) Pawulu hashili muchima hayuma yatama yadiziliyi kudi aYudeyaku. Ilaña washili muchima hakuzata nañovu kulonda yakaheti wumi wahaya nyaka.

¹⁸ Wejima wetu twatela kwimbujola chakutalilahu chaPawulu. Chatela tutoñojokeña nankashi hayuma yitwakoñeli kunyima, kusha maana kuyuma yitukubula kuhimpa, twatela kusha muchima kuyuma yakumbidi. Hitunateli kujimbala chikupu yiluwa yitwakoñeli kunyimaku, ilaña bayi tuswejaña kuditoñesha hayuma yeniyuku. Twatela kuzata nañovu kulonda tubuleña kutoñojoka hayuma yakunyima, kumuzatila Nzambi hakumina ñovu jetu chayinu mpinji nikutalila yuma yayiwahi yidi kumbidi.

[Tumazu twaheshina]

[Malwihu aKuzatisha haKudiza]

[Chikasha chidi hefu 25]

MULOÑADI BAYIBOLU CHIYAHOSHELA NAWU ‘YEHOVA WADITOÑESHELI’?

Bayibolu yashimuna kapampa kakavulu nawu Yehova ‘waditoñesheli.’ (Yona 3:10; Kutach. 6:6, 7; Ansomp. 2:18; 1 Sam. 15:11) Chineli yuma yejima yelañayi Nzambi yawanina, haditoñeshaña hamuloña wakuluwañeshaku. (Kuchi. 23:19; Kuhit. 32:4) Ilaña muchiHeberu, kuditoñesha kwatalisha mukwila nawu muntu nahimpi yitoñojoka yindi hela yuma yakeñaña kwilayi. Chakutalilahu, hamuloña wakwila Yehova watoñojokelañaku antu, wahimpaña nawa wukweti luwi, wahimpaña kufuukula kwindi kutalisha hadi antu aluwañeshaña neyi abalumuka mumuchima niyuma yahimpawu muchihandilu chawu.—Yere. 18:7-10.

[Mwevulu wudi hefu 24]

Pawulu wadizili chakumukalakela Nzambi chakadi kuditoñesha