Babalenu Nayuma Yafuukulaña Muchima

Bayibolu yahosha nawu: “Muchima wasweja kudimbana, wadimbana chakubadika yuma yejima, wasweja nikukata.” (Yere. 17:9) Neyi muchima wetu wunakukeñesha chikupu chuma, komana hiwatuleñelaña twili chuma chinakukeña muchima wetuku?

Bayibolu yatusoñamishaña nawu: “Kumuchima diku kwafumaña yitoñojoka yatama, niwubanji, niwuvumbi, nikubajama, niwukombi, niwunsahu wakutwamba, nikutukana.” (Mat. 15:19) Muchima wetu wachifwikija wunateli kutuhuñumuna nikutuleñela tutachiki kudiyiñisha nakukoña chuma chabula kwesekana nankeñelu yaNzambi. Nawa hitunateli kwiluka chuma chinamwekani hanoyu mpinjuku sampu tunakoñi dehi yuma yaheña. Chumanyi chinateli kutukwasha kwiluka yuma yafuukulaña muchima wetu henohu kanda tuyi munjila yaheña?

MUNATELI KWILUKA ÑAHI YUMA YIMUNAKUFUUKULA?

Tañenuña Bayibolu ifuku niifuku nawa toñojokenuña nakanañachima hayuma yimunatañi. Kapostolu Pawulu wasonekeli nindi: “Mazu aNzambi amomi, akweti ñovu, atwa chakubadika mpoku yakabali yikweti wumwemu kuyedi, apwikaña nakwambula wumi naspiritu.” Nsañu yaNzambi yekala muBayibolu ‘yinateli kushinshika yitoñojoka niyafuukulaña muchima.’ (Heb. 4:12) Neyi tuzatisha nsañu yitwatañaña muNsona yinateli kutukwasha nankashi kwiluka yuma yafuukulaña muchima. Dichi chalema nankashi kutaña Izu daNzambi ifuku niifuku nikutoñojokahu nakanañachima hayuma yitunatañi, neyi twila mwenimu tukwikala nayitoñojoka yaYehova nikumona yuma neyi chayimonañayi.

Neyi twiteja kufumba kwamuNsona nikuzatisha nshimbi jamuBayibolu chikutuleñela kwikala nachinleji chachiwahi, dikwila nawu muntu wamukachi ‘wekala chinsahu.’ (Rom. 9:1) Chinleji chetu chinateli kutuleñela  tubuli kudiyiñisha hanjila yetu yatama. Kubombelahu, muBayibolu mwekala yakutalilahu yinateli ‘kutusoñamisha.’ (1 Kor. 10:11) Neyi tudizila kuniyi yakutalilahu hitunateli kuya munjila yaheñaku. Chumanyi chitwatela kwila wejima wetu?

Lombenu kudi Nzambi kulonda yayinki maana akwiluka yuma yafuukulaña muchima wenu. Yehova diyi ‘washinshikaña muchima.’ (1 Kushi. 29:17) Nzambi “wabadika nyichima yetu; weluka yuma yejima.” (1 Yow. 3:20) Hitunateli kumudimba Nzambuku. Neyi tumuleja Yehova mukulomba yuma yitwakamenaña, yitoñojoka yetu niyuma yitunakufwila, nateli kutukwasha kwiluka yuma yafuukulaña muchima wetu. Tunateli nikumuleja Nzambi kulonda ‘yatuleñelumu muchima wutooka.’ (Mas. 51:10) Dichi twatela kulombaña hakwila nawu twiluki yuma yidi mumuchima wetu.

Tiyililenuña nakanañachima hakupompa kwawakwaKristu. Neyi tutiyilila nakanañachima kunsañu yinakutañishawu hakupompa kwawakwaKristu kunateli kutukwasha kudishinshika chikupu mukachi kamuntu wetu wamukachi, dikwila nawu muchima wetu. Hela chakwila hitunateli kutambwila nsañu yayiha hakupompa kudi kwejimaku, neyi tuya nakupompa tukwiluka chikupu nshimbi jamuBayibolu nikufumba kukwawu kwakuwahi kwatukwashaña kwiluka yafuukulaña muchima wetu. Mazu ahoshañawu amana kwetu niahela niwena anateli kutukwasha kutookesha muntu wetu wamukachi. (Yish. 27:17) Neyi tudambulaña kwakanka wetu chatela tudiluñisheña hamu nawakwetu akwaKristu, tukudisha muwubanji. Tunateli kutachika ‘kufwila yuma yitwakeñaña hohu.’ (Yish. 18:1) Dichi twatela kudihula netu, ‘Komana nekala nachaaku chakuwanika kukupompa kwejima nikuhetelamu?’—Heb. 10:24, 25.

INDI MUCHIMA WETU WUNATELI KUTULOMBOLA KUYUMANYI?

Muchima wetu wadimbanaña wunateli kutusenuna kuyuma yayivulu yamuchihandilu. Tushinshikenu hayikuma yiwana: kufwila yuma yakumujimba, chakuzatisha walwa, kutonda amabwambu, niyuma yitwelaña hampinji yakunooka.

Kufwila yuma yakumujimba. Kufwila yuma yakumujimba kwatama wanyi. Hela chochu, Yesu washimwini chakutalilahu chakutusoñamisha kutalisha hakusweja kukeña yuma yakumujimba. Muchishimu chidi chimu, Yesu watuleja kushinshika hadi iyala samaheta wenzesheli nkalaña yindi natidiku. Dichi, hadiña neluña dikwawu hakusha yakudya yikwawu yañwiliyuku. Wafuukwiluhu kusanda nkalaña yindi kulonda yatuñi jamaneni. Watoñojokeli nindi: “Nakaswekumu tidiku yami yejima nimahetami. Nili wumi wami nami, Eyi wumi wami, wunalumbiki dehi maheteyi amavulu anyaka yayivulu; nookaku kweyi; dyaña, nwaña, luñaña.” Hela chochu, iwu samaheta wakañenyi kwiluka chikuma chalema chakwila nawu: Nateli kufwa wowuna wufuku.—Luka 12:16-20.

Hampinji yitunakushinakaja, tunateli kutachika kusha maana kuyuma yakumujimba yakuzatisha muwushinakaji wetu chakwila tutachika kuzata maora amavulu hefuku dakupompa hela kudiwula nyidimu yawakwaKristu yatwinkawu. Komana kwila tutondolwela yitoñojoka yamuchidiwu nehi? Hadaha tuchidi  atwansi nawa tuneluki netu mudimu wampinji yejima diwutwatela kuzata muchihandilu chetu. Hela chochu, komana twalekaña wupayiniya, nakutoñojoka netu tusambili kuheta? Komana kwila tuzata nañovu kulonda twikali aheta kumesu aNzambi nehi? Muneluki ñahi nenu kumadiki mwakekala amomi?

Kunwa walwa. HaYishimu 23:20 hahosha nawu: “Bayi wikalaña hamu nawakwakunwa walwaku.” Neyi muntu hichinwa walwa, nateli kutachika kuwana mwakuleyela kulonda yanweña mpinji yejima. Nateli kuhosha nindi wanwaña hohu kulonda yanookeshi mujimba bayi neyi wanwinaña kushetaku. Neyi mwanwaña walwa nenu munookesheña mujimba, hadaha ayinu diyi mpinji yayiwahi yakushinshika hayuma yafuukulaña muchima wenu.

Kutonda antu akudikunda nawu. Hela chochu, hitunateli kutondolwela kudikunda nawantu abula kwitiya, chidi neyi akashikola, akanyidimu, niantu itwawanaña mumudimu wakushimwinaku. Ilaña tukuluwañesha neyi tuzatishaña mpinji yeneni nakudikunda nawu nikudikwata nawu wubwambu. Komana twawanaña mwakuleyela nakuhosha netu akweti yililu yayivulu yayiwahi? Bayibolu yatusoñamishaña nawu: “Bayi ayidimbaku; kudikunda nawantu atama kwatamishaña maana amawahi.” (1 Kor. 15:33) Neyi chochatamaña menji atooka namajilu antesha, kudikunda nawantu abulaña kumutiya Nzambi woma kunateli kutamisha wuspiritu wetu nawa tukutachika kwikala nayitoñojoka yamukaayi kutalisha hanvwalilu, nhoshelu niyililu.

Yuma yitwelaña hampinji yakunooka. Yozelu yayiha yinakutuñawu yinenzali nayisela yayivulu nankashi yashiyashana, yisela yeniyi yatama nankashi chakwila mukwaKristu hanateli kuyitalaku. Pawulu wasonekeli nindi: ‘Yuma yawuzondu yejima bayi muyitenaña hakachi kenuku.’ (Efwes. 5:3) Indi neyi muchima wetu wateñuka dehi nakutalaña hela kutiyilila kuyuma yawuzondu? Tunateli kutachika kutoñojoka netu muntu wejima wakeñekaña kunookaku chantesha hela kuhema nawa muntu nateli kufuukulahu yomwenindi. Ilaña twatela kulondela kufumba kwaPawulu nawa bayi tutala hela kutiyilila kuyuma yawuzonduku.

TUNATELI KUHIMPA

Neyi tufwa mumuhetu wakushindamena hamuchima wadimbanaña nawa tukweti chaaku chakudiyiñisha nayililu yaheña, tunateli kuhimpa. (Efwes. 4:22-24) Shinshikenu hayakutalilahu yamakonu yiyedi.

Miguel * wahimpili yitoñojoka yindi kutalisha hayuma yakumujimba. Wahosheli nindi: “Ami niñodami nimwanetu weyala twafuma mwituña mwalemeshawu nankashi kwikala nayuma yayiha niyinakutuñatuñawu yakatataka nichihandilu chachiwahi. Mpinji yimu, nazatili nañovu nami nikali nayuma yamukaayi yinadi kutwesha kulanda, nakutoñojoka nami nateli kwikala naniyi yuma chakadi kwikala namuchima wakukeñesha maheta. Chimwahitili kapinji kantesha nelukili nami kufwila yuma yakumujimba hikwamanañaku. Nalombeli kudi Yehova kulonda nihimpi yitoñojoka yami niyuma yafwilileña muchima wami. Namulejeli nami ami nichisaka chami tunakukeña kukukalakela chikupu. Twafuukwiluhu kwikala nachihandilu chapela nawa twabuukilili kwiluña kwadiña kukankila kweneni. Chimwahitili kapinji kantesha twatachikili wupayiniya. Ichi tuneluki netu hitwatela kwikala namaheta amavulu hakwila nawu twikali nachihandilu chamuzañaluku.

Chuma chamumwekeneni Lee chinakumwekesha kudishinshika chikupu chikwamukwashili kuleka kudikunda nawantu atama. Lee wahosheli nindi: “Kwesekeja namudimu wunazatileña, nadikundileña nawantu alandishileña yuma inabulili kwiluka. Nelukili nami kuniku kubulakana antu akunwaña walwa nankashi, ilaña natiyileña kuwaha kuyaku. Kakavulu kwashalileña tuhu kwanti nakusheta, nkumininaku naditoñesheleña. Nafuukwiluhu kudishinshika chikupu mumuchima wami. Kufumba kwaMwiizu daNzambi niwukwashu wawaeluda wankwashili nankashi kwiluka nami nafwilileña kudikunda nankashi nawantu abula kumukeña Yehova. Chayinu mpinji nazataña mudimu wami kuhitila mukuzatisha nshiña nawa hinaswejaña kudikunda nanawa antu atulandishaña yumaku.”

Twatela kudishinshika chikupu kulonda twiluki yuma yafuukulaña nyichima yetu. Hampinji yitunakukoña mwenimu, twatela kulomba kudi Yehova kulonda yatukwashi nikwanuka netu “yena weluka yuma yajindañawu antu munyichima.” (Mas. 44:21) Nzambi watwinka cheñi Izu dindi, dekala neyi chibanjilu. (Yak. 1:22-25) Cheñi nawa atwanukishaña nikutufumba kuhitila munyikanda yawakwaKristu nikupompa kwetu. Neyi tuzatisha iyi yuma yatuloñeshelañawu, tunateli kuhemba muchima wetu nikutwalekahu kwenda munjila jakuloña.

[Tumazu twaheshina]

[Mwevulu wudi hefu 23]

Indi kutaña Bayibolu mpinji yejima kwakwashaña ñahi muchima wetu wachifwikija?

[Mwevulu wudi hefu 23]

Kulomba kwatukwashaña kwiluka muntu wetu wamukachi

[Mwevulu wudi hefu 23]

Kupompa kwawakwaKristu kwatukwashaña kwiluka yuma yafuukulaña muchima wetu