Bayi Mwiteja Chuma Chidi Chejima Chiyikañeshi Kutambwila Kulemaku

“Muntu wadizoza mumuchima diyi wakamona kulema.”—YISH. 29:23.

MUKWAKULA NENUDI?

Kulemanyi kutunateli kutambwila kudi Nzambi?

Chumanyi chinateli kutukañesha kutambwila kulema?

Indi kuumika kwetu kunateli kuleñela ñahi antu amakwawu kudisamba?

1, 2. (a) Indi izu damwidimi datachi ‘dakulema’ datalisha mudihi? (b) Tukuhanjeka hamalwihwinyi muchinu chibaaba?

 NEYI mutiya izu dakwila nawu “kulema,” chumanyi chimwatoñojokaña? Mwatoñojokaña hawukeleñi wayileñaleña? (Mas. 19:1) Ntahindi mwatoñojokaña hakalemesha kenkañawu asamaheta, antu asweja maana hela yuma yalema yakoñawu muchihandilu? MuNsona, mwidimi datachi, izu dakwila nawu “kulema” datalisha kuchuma chalema. Kushankulu, mali ayituñileña nayikuñu, nawa neyi iwaya-waya dimu disweja kulema, dikwila nawu niwuseya watoheleña. Mazu azatishileñawu hakutena chuma chalema ayilukila muchifwikija nawu atalishili kuchuma chalema nankashi hela chazañaleshaña.

² Hela chakwila tunateli kuzañalala nañovu jitukweti, chifulu hela ijina dadiwahi ditukweti nawakwetu, chumanyi chamonañayi Nzambi mudi antu? Nsona jahosha hakulema kwamwekeshañayi Nzambi kudi antu. Chakutalilahu, Yishimu 22:4 yahosha nawu: “Wuloku wakudizoza niwakumwakama Yehova himaheta nikulema niwumi.” Kambanji Yakoba niyena wasonekeli nindi: “Dizozenu kumesu aMwanta, niyena wukuyitohesha.” (Yak. 4:10) Kulemanyi kwamwekeshañayi Yehova kudi antu? Chumanyi chinateli kutukañesha kubula kumwekesha kulema kweniku? Tunateli kukwasha ñahi amakwawu kulonda amwekesheña iku kulema?

3-5. Indi Yehova nateli kutulombola kukulema kwamuchidinyi?

³ Ñimbi yamasamu wakuhweleleli nindi Yehova wakamukwata kuchikasa chindi chachidilu nikumulombola kukulema kwalala. (Tañenu Masamu 73:23, 24.) Indi Yehova welaña ñahi mwenimu? Yehova walombolaña ambuñindi adizoza kukulema kuhitila mukuyilemesha munjila jamboka-mboka. Wayikwashaña kulonda eluka nkeñelu yindi. (1 Kor. 2:7) Walemeshaña antu atiyililaña izu dindi nikumwovwahila kuhitila mukwikala amabwambu jindi.—Yak. 4:8

⁴ Yehova walemeshaña cheñi ambuñindi kuhitila  mukuyinka mudimu wawakwaKristu wakushimwina walema nankashi. (2 Kor. 4: 1, 7) Iwu mudimu walombolaña kukulema. Antu ejima azatishaña kukooleka kwamudimu kukwetuwu kulonda amushimeki Nzambi nikukwashaku amakwawu, Yehova wayikana nindi: “Akunlemesha diwu nukulemesha.” (1 Sam. 2: 30) Antu amuchidiwu ayilemeshaña kuhitila mukwikala nejina dadiwahi naYehova, nawa ambuña aNzambi amakwawu akuhoshaña mazu amawahi hadi wena.—Yish. 11:16; 22:1.

⁵ Chumanyi chikamwekena antu ‘amuchiñejaña Yehova nikulama njila yindi’? Ayikana nawu: ‘Yehova wakakutohesha kulonda wakaswani ituña. Chiyakayifumishamu antu atama, wakachimona.’ (Mas. 37:34) Atalilaña kulema kwabadika kwakutambwila wumi wahaya nyaka.—Mas. 37:29.

“AMI HINETEJAÑA KUNLEMESHA KUDI ANTUKU”

6, 7. Muloñadi antu amavulu chakaanininuwu kumukuhwelela Yesu?

⁶ Yumanyi yikutukañesha kutambwila kulema kunateli kutwinkayi Yehova? Kusweja kutiyilila yitoñojoka yawantu abula kumwiluka Nzambi kunateli kutukañesha. Talenu chasonekeliyi kapostolu Yowanu hadi akulumpi adiñaku mumafuku aYesu nindi: “Anyuli amavulu amwitiyili; ilaña abulili kumwiteja nawoma wawaFwarisi, akenda kayihaña mushikola yawu. Akeñeli kuyilemesha kudi antu; kuyilemesha kudi Nzambi hiyachikeñeli chalalaku.” (Yow. 12:42, 43) Neyi awa anyuuli abulili kutiyilila nankashi kuyitoñojoka yawaFwarisi, kachi yuma yayendeleli chiwahi nankashi.

⁷ Hampinji yatachikili mudimu windi wakushimwina, Yesu washimwini jiika muloña wakaleñela antu amavulu akabuli kumutiyilila nikumukuhwelela. (Tañenu Yowanu 5:39-44.) Muza wawaIsarela wadiña nakutalila kwinza kwaMesiya hadi yaaka yayivulu. Hampinji yatachikiliyi Yesu kutañisha, antu amakwawu atela elukilili kuwuprofwetu waDanyeli nawu mpinji yakumwekana kwaKristu yashikili. Henohu kuchidi tukweji nakwinza kwaKristu, chelili Yowanu Mpapatishu yatachiki kushimwina, antu amavulu ahosheleña nawu: “Kwiji diyi Kristu.” (Luka 3:15) Haniyi mpinji Mesiya watalililuwu hadi mpinji yayilehi wadiña nakutañisha mukachi kawu. Ilaña antu elukili Nshimbi amukaanini. Hakushimuna chuma chaleñeleli, Yesu wayihwili nindi: “Enu mwetejaña kuyilemesha kudi akwenu, ilaña kuyilemesha kudi Nzambi wumu hohu himwachikeñañaku, mukutwesha kwitiya ñahi?”

8, 9. Kuzatisha chakutalilahu chachejeji, lumbululenu kulema kwawantu chikunateli kwikalila kwalema kubadika kulema kwaNzambi.

⁸ Neyi twesekeja kulema nachejeji chikutukwasha kwiluka kulema kwawantu chikunateli kwikalila kwalema kubadika kulema kwaNzambi. Mwiwulu mwenzala yuma yaletaña chejeji. Munakwanuka ifuku dimwatalili mwiwulu mwabulili mavu nampinji yawufuku chakwila mwamweni tutumbwa twatuvulu? ‘Kuwaha kwatutumbwa’ kwabadika kulema. (1 Kor. 15:40, 41) Neyi mutala tutumbwa mwiwulu henohu mudi mumusumba mudi chejeji chakesi kawuneñu, mwiwulu mwamwekanaña ñahi? Chejeji chakesi kawuneñu chatuleñela tubuleña kumona chiwahi chejeji chatutumbwa tudi hahalehi. Komana ichi chinayi mukwila nawu chejeji chamalayiti amunyikwakwa, chamumabulu angunja nimumatala chikweti ñovu nankashi indi kwiji chasweja lubanji kubadika chejeji chatutumbwa? Inehi! Chumichi chamwekanaña muloña chejeji chamalayiti amumusumba chekala kwakwihi nanetu nawa chatuleñelaña tubuleña kumona chiwahi yuma yaleñayi Yehova. Hakwila nawu tumoni chiwahi yileñaleña yamwiwulu nawufuku, twatela kwimana heluña hanabuli chejeji chakesi kawuneñu.

⁹ Chochimu, neyi tusha muchima hakulema kwabula kushikilamu, tukukañanya kuhameka nikufwila kulema kwabadika kwatela kutwinkayi Yehova. Antu amavulu  akanaña kutambwila nsañu yaWanta muloña achinaña nawu antaña niamabwambu jawu akuyitoñojokela yuma yacheñi. Komana kufwila kuyilemesha kudi antu kunateli kuluwañesha niambuña aNzambi? Indi neyi mukwenzi weyala anamuleji kushimwina mwiluña mwamwilukawu nankashi ilaña kanda amwiluki nawu hiChinsahu chaYehova. Komana wukutiya woma nakuleka kushimwina? Indi neyi muntu mukwawu anakumufukishila hayikonkwanyi yakuspiritu yinakufwilayi? Komana wukwiteja antu abula yikonkwanyi yakuspiritu kumuluwañesha hayuma yinafuukuliyi? Indi kwiji mukwaKristu navulumuni nshidi yahamesu bwi-i. Komana wukusweka nshidi jindi muloña nakuchina nindi akumutambula nyidimu yikwetiyi muchipompelu hela wukuneñesha antu akeñayi? Halwihu lwakukumishaku, neyi nakufwila kuwahisha wubwambu windi naYehova, ‘wukutambika akulumpi amuchipompelu’ kulonda amukwashi.—Tañenu Yakoba 5:14-16.

10. (a) Chumanyi chinateli kumwekana neyi tusweja kwakama nankashi hayuma yinakututoñojokelawu antu amakwawu? (b) Chumanyi chitwatela kukuhwelela neyi tudizoza?

¹⁰ Twili netu tunakuzata nañovu kulonda twikali akwaKristu apama, ilaña mukwetu mukwakwitiya hakutufumba. Yuma yinamoniyi mudetu hakutufumbilayi yikutukwasha neyi tubula kudijikilila hamuloña wakudinka wanta, kudifumisha mumuloña, hela kudiyiñisha. Fwikijenu munakuzatila hamu mudimu namukwenu mukwakwitiya. Komana mukwakama nakukeña kwiluka muntu watela kuhamekawu hayitoñojoka yenu yayiwahi nihamudimu wumunadikiti? Neyi mwikala mukukala kwamuchidiwu, mwatela kukuhwelela chikupu nenu “muntu wadizoza mumuchima diyi wakamona kulema.”—Yish. 29:23.

11. Twatela kutiya ñahi munyichima yetu neyi antu atuhameka, nawa muloñadi?

¹¹ Ankoñi niantu ‘anakukeña mudimu’ wamuchidiwu atela kubabala kulonda abuli kutambwila kulema kufuma kudi antu. (1 Tim. 3:1; 1 Tesa. 2:6) Chumanyi chatela kwilayi mana kwetu neyi amuhameka nankashi hamudimu wunakoñiyi? Hatela kudeta hebwambu neyi cheliliyi Mwanta Sawuluku. (1 Sam. 15:12) Hela chochu, komana neluki nindi chinaleteshi yazati chiwahi himuloña waluwi lwaYehova lwabadika nawa nindi mudimu wudi wejima wakatwesha kuzatayi kumbidi wakashindamena hankisu yaNzambi nihawukwashu windi? (1 Pet. 4:11) Chitwatiyaña mumuchima neyi antu atuhameka chamwekeshaña kulema kutunakukeña.—Yish. 27:21.

“MWAKEÑAÑA KWILA MWAFWILAÑAYI TATA YENU”

12. Yumanyi yaletesheli aYudeya amakwawu abuli kutiyilila kunsañu yaYesu?

¹² Chuma chikwawu chikutuleñela tubuli kutambwila kulema kwaNzambi, hiyuma yitwafwilaña. Kufwila yuma yaheña kunateli kutukañesha kutiyilila kuchalala. (Tañenu Yowanu 8:43-47.) Yesu walejeli aYudeya amakwawu nindi hiyakeñeli kutiya kunsañu yinduku, muloña ‘akeñeleña kwila mwafwilañayi tata yawu Diyabolu.’

13, 14. (a) Indi akwakusandujola ahoshahu nawudi kutalisha hawoñu wetu chiwazatikaña neyi antu anakuhosha? (b) Chumanyi chaleñelaña twiluki muntu itunakukeña kutiyililaku?

¹³ Mpinji yikwawu twakeñaña hohu kutiya yuma yitunakukeña. (2 Pet. 3:5) Yehova watuleñeli nawuswa wakutondolwela kutiya yuma yabula kushikila. Hudikilenu chantesha nawa teñelekenu itu denu kulonda mutiyi mapumba amboka-mboka anakutiyakana hayinu mpinji. Hadaha hampinji yinahiti himwatiya awa mapumba ejimaku. Muloña woñu wenu wayikwashaña kusha maana hachuma chimu hampinji yoyimu mwatiyaña mapumba amboka-mboka. Ilaña akwakusandujola awana kwila nawu kutiyilila kumapumba awantu amavulu hampinji yimu hichuma chakala nankashi. Ichi chinayi mukwila nawu, neyi mutiya antu ayedi anakuhosha hampinji yoyimu, mwatela kutondahu kutiyilila kudi muntu wumu. Mukutonda kwesekeja namuntu  imunakukeña kutiyililaku. A Yudeya akeñeleña kwila mwaya muchima watata yawu Diyabolu, akaanini kumutiyilila Yesu.

¹⁴ Twatambwilaña nsañu kufuma ‘mwitala damaana’ ‘nimwitala dawusupi.’ (Yish. 9:1-5, 13-17) Maana niwusupi jatwalekañahu kutudilila nawa twatela kutondahu chuma chimu. Tukutiyilila kudi wumu yodihi? Ñakwilu yinashindameni hadi muntu itunakukeña kuzañalesha. Nyikoku yaYesu yatiyililaña izu dindi nawa yamulondaña. (Yow. 10:16, 27) Ekala “akwansañu yalala.” (Yow. 18:37) “Hiyeluka izu dawantu acheñuku.” (Yow. 10:5) Antu amuchidiwu adizoza atambwilaña kulema.—Yish. 3:13, 16; 8:1, 18.

“HICHUMA CHENU CHAKUDISAMBA NACHU”

15. Indi yihuñu yamweniyi Pawulu yaleñeleli ñahi antu amakwawu ‘kudisamba’?

¹⁵ Neyi tutwalekahu kwila nkeñelu yaYehova chakwashaña antu amakwawu kutambwila kulema. Pawulu wasonekeleli chipompelu chakuEfwesesa nindi: “Nalembi nami bayi muzeya nayihuñu yami yinamonaña hansañu yenuku; hichuma chenu chakudisamba nachu.” (Efwes. 3:13) Indi yihuñu yamweniyi Pawulu yaleñeleli akwaEfwesesa ‘kudisamba’ munjilanyi? Chineli Pawulu watwalekeluhu kuyikalakela hela chakwila wamweni yihuñu, chamwekesheli kudi Aefwesesa nawu kukooleka kwadiñawu naku kwakwikala akwaKristu kwaswejeli kubadika nawa kwadiña kwalema chikupu. Neyi chakwila Pawulu wazeyeli hamuloña wayihuñu yamweneñayi, chadi kumwekesha nawu wubwambu wawu naYehova, mudimu wawu wakushimwina nikuchiñeja hijadiña jalemaku. Kuumika kwaPawulu kwaleñeleli wuKristu kwikala walema nawa kwamwekesheli nawu kwikala kambanji kwabadika mulambu wudi wejima.

16. Yihuñwinyi yamweniyi Pawulu muLisitira?

¹⁶ Toñojokenu hayuma yafumini mukudikita kwaPawulu nikuumika. HaYililu 14:19, 20 hahosha nawu: “Kwenoku hikukwinza aYudeya anafumi dehi kuAntiyoki nakuIkoniyumu, wena chanakanjikijuwu mazaza awantu, hiyakumwasola Pawulu malola. Chanatoñojokuwu nawu wafwa dehi, hiyakumukokela kunsa yañanda [yaLisitira]. Chadiñi nakwimanawu atumbanji kwakwihi nayena kwi-ndo, hakunyamuka, hakwiñila cheñi muñandoyu. Chikunachi hakufumamu naBaranaba, hiyakuya kuDeribi.” Fwikijenu chichamukalilili Pawulu kwenda lwendu lwamakilomita 100 heseki ifuku dahiñiluhu hanyima yakumwasa malola kwakwihi nakumujaha.

17, 18. (a) Munjilanyi mwelukililiyi Timotewu yihuñu yaPawulu muLisitira? (b) Indi kuumika kwaPawulu kwamukwashili ñahi Timotewu?

¹⁷ Komana Timotewu wadiña hakachi ‘kawatumbanji’ amukwashiluku Pawulu? Nsañu yitwatañaña mumukanda waYililu hiyashimuna jiikaku, ilaña watela wamukwashiluku.  Talenu mazu asonekeliyi Pawulu mumukanda windi wamuchiyedi wamusonekeleliyi Timotewu: ‘Eyi Timotewu, weluka dehi kuleja kwami, nikwenda kwami, niyuma yinamweni kuAntiyoki kunhaña mumusumba, kuIkoniyumu akeñeleña kuñasola malola, kuLisitira añasili malola; awa dimakabisha inamweni. Ilaña Mwanta wampulwishili muyuma yejimiyi.’—2 Tim. 3:10, 11; Yil. 13:50; 14:5, 19.

¹⁸ Timotewu ‘welukili chikupu’ iyi yuma yamwekeni nawa welukili chikupu nindi Pawulu womikili nankashi. Chumichi chamushikili chikupu hamuchima Timotewu. Chelili Pawulu yahempuli akaLisitira, waweni Timotewu himukwaKristu wadiña nayililu yayiwahi nawa ‘amuhamekeleña kudi ana kwindi adiñi kuLisitira nakuIkoniyumu.’ (Yil. 16:1, 2) Chimwahitili mpinji, Timotewu washikili hakukalakala nyidimu yamaneni.—Fwi. 2:19, 20; 1 Tim. 1:3.

19. Indi kuumika kwetu kunateli kukwasha ñahi antu amakwawu?

¹⁹ Neyi tutwalekahu kwila nkeñelu yaNzambi tunateli kukwasha antu amakwawu sweje-e atwansi, amavulu akakula nakwikala ambuña aNzambi akazatishawu chikupu munyidimu yashiyashana. Atumbanji atwansi bayi neyi atushinshikaña hohu nikudizila kunhoshelu yetu niyuma yitweluka kutalisha hamudimu wakushimwinaku, ilaña ahetelañamu cheñi neyi amona chitwamanishaña kukala kwatumwekenaña muchihandilu. Pawulu ‘watwalekeluhu kuumika yihuñu yejima’ kulonda antu ejima akwikala ashinshika ‘akahandi nikutambwila kulema kwahaya nyaka.’—2 Tim. 2:10.

20. Muloñadi chitwatela kutwalekelahu kukeña kulema kwafumaña kudi Nzambi?

²⁰ Komana kwila tutwalekahu ‘kukeña kulema kwafumaña kudi Nzambi wumu hohu’ nehi? (Yow. 5:44; 7:18) Eñañi twatela kwila mwenimu. (Tañenu Aroma 2:6, 7.) Yehova wenkaña ‘wumi wahaya nyaka antu akabilaña kulema.’ Kubombelahu, neyi ‘tutatakena munyidimu yayiwahi’ twakwashaña antu amakwawu kwikala nachikuhwelelu chakola nakutalila nkisu jahaya nyaka jidi kumbidi. Dichi, bayi mwiteja chuma chidi chejima chiyikañeshi kutambwila kulema kwahanañayi Nzambuku.

[Malwihu aKuzatisha haKudiza]

[Mwevulu wudi hefu 29]

Atwansi ahamekaña kuumika kwawakwaKristu ashinakaja dehi