Shakamenu Muchinekineki Chayehova Mwakiñilañayi Antu

“Yehova wakedika nakulwa nanyuzoyu, neyi chalwiliyi hefuku danjita.”—ZEK. 14:3.

MUNATELI KULUMBULULA?

Chumanyi chinakwimenaku kubaluka ‘kwampidi yaoliveta’?

Indi ‘chinekineki cheneni nankashi’ chinakwimenaku chumanyi, nawa tunateli kushakama ñahi munichi chinekineki?

Indi “meji amomi” hiyumanyi, nawa anyi akahetela mukunwa awa meji?

1, 2. Njitanyi yayeni yidi kwakwihi nakumwekana, nawa chumanyi chakabula kwilawu ambuña aNzambi muniyi njita?

 HAOCTOBER 30, 1938, yihita yawantu amuUnited States atiyilileña kuprogiramu hachisanji yahosheleña hayisela. Chisela chahemeneñawu hanidi ifuku nampinji yawufuku chafumini mumukanda wasayansi mwadiña nsañu yakulumbisha yahosheleña nawu Njita yaKaayi. Antu adiña nakuhema neyi akwakutaña nsañu abidikili hakuwila kwamashidika afumini kukaayi katenañawu nawu Mars adi kujilumuna Iseki dejima. Hela chakwila abidikili hachisanji nawu chadiña hichisela, antiyilili amavulu atoñojokeli nawu iku kulukuka kwadiña kwalala nawa atiyili woma. Amakwawu atachikili kudiloñesha kulonda adikiñi kuniyi yileñaleña yakufwikija.

² Njita yayeni keña yishiki. Ilaña antu anakudiloñesha wanyi. Iyi njita ayishimwineñawu dehi Mwizu daNzambi donenewa, Bayibolu, bayi mumukanda wasayansi mwekala nsañu yakulumbishaku. Hinjita yaAmagedoni, njita yaNzambi yakujilumuna kanu kaayi katama. (Chim. 16:14-16) Muniyi njita, ambuña Nzambi hamaseki hiyakazuña muniyi njitaku. Ilaña Nzambi wakazatisha ñovu yindi yabadika nikutukiña muchihayamisha.

3. Wuprofwetwinyi wutukushinshikahu, nawa muloñadi chiwalemena kudetu?

³ Wuprofwetu wamuBayibolu wasonekawu mumukanda waZekariya kapetulu 14 watulejaña nsañu yayivulu kutalisha hanjita yaAmagedoni. Hela chakwila awusonekeli dehi hayaaka 2,500 yinahituhu, iwu wuprofwetu watukwashaña nankashi muchihandilu chetu. (Rom. 15:4) Nsañu yayivulu yasonekawu yahoshaña hayuma yakundama kudi antu jaNzambi kufuma hatachikili chiyuulu chaWanta wawuMesiya mwiwulu mu 1914 niyuma yayiwahi yakamwekana kumpinji yakumbidi. Muniwu wuprofwetu mwekala nsañu  yahosha hakutuñewa ‘kwachinekineki cheneni nankashi’ ‘nikufuma kwameji amomi.’ (Zek. 14:4, 8) Ichi chinekineki chazataña mudimu weneni nankashi hakukiña akwakudifukula aYehova. Neyi twiluka mwatalisha menji amomi, tukwiluka netu twatela kuyisenda nikuyinwa. Dichi, tukuhetelamu nankashi neyi tusha maana kuniwu wuprofwetu.—2 Pet. 1:19, 20.

“IFUKU DAYEHOVA” DINATACHIKI

4. (a) Indi ‘ifuku daYehova’ datachikili mpinjinyi? (b) Hayaaka yahituluhu henohu 1914 kanda, nsañwinyi yashimwinineñawu akwakudifukula aYehova, nawa anlomboli amukaayi ahosheli nawudi?

⁴ Zekariya kapetulu 14 katachika namazu akwila nawu “ifuku daYehova.” (Tañenu Zekariya 14:1, 2.) Hifukwinyi denidi? ‘Hifuku daMwanta,’ datachikili chelili “wanta wampata yamunu mwishina” wikali “wanta waMwanta wetu, niwaKristu.” (Chim. 1:10; 11:15) Idi ifuku datachikili mu 1914 chelili Wanta wawuMesiya wutachiki kuyuula mwiwulu. Hayaaka yayivulu yahitiluhu henohu 1914 kanda, akwakudifukula aYehova ashimwinini kunyuza nawu kukuma ‘kwanyaka yawaJentili’ kwakashika munichi chaaka nawa kaayi kakeñila mumpinji yakala. (Luka 21:24) Indi nyuza yelilidi? Chatela ashi maana kuniyi nsañu yakusoñamisha, akajipolitiki nianlomboli amunsakililu akaanaña nikukabisha awayishewa adikitaña chikupu. Dichi muniyi njila, awa anlomboli amukaayi adiwulaña Nzambi Wabadika, muloña awayishewa ahakwilañaku Wanta emenañaku “Yerusalema yamwiwulu,” Wanta wawuMesiya nawa niwena ekalamu nambadi.—Heb. 12:22, 28.

5, 6. (a) Yumanyi yashimwini muza kutalisha ‘hamusumba’ nihadi ‘enimbu amuwanta’? (b) Indi ‘antu ashaliluhu’ adiña anyi?

⁵ Zekariya washimwini chuma chakela nyuza nindi: “Mukala [waYerusalema] akawutambula.” ‘Iwu mukala’ wunakwimenaku Wanta waNzambi wawuMesiya. Hanu hamaseki wunakwimenaku ‘enimbu’ amuniwu Wanta, dikwila nawu akwaKristu awayishewa. (Fwi. 3:20) Hampinji yaNjita yatachi Yakaayi, akulumpi amukuloñesha kwaYehova kwaheseki, ‘ayitambwili’ hela netu ayikwatili, nawa ayishili mukaleya muAtlanta, Georgia, U.S.A. Chidi neyi kwiji ‘abuwili matalawu’ nikuyilumbikila nyiloña hanyitu yawu nihanyitu yawantu amakwawu adiña ashinshika. Awa akwakulukuka abuwili maheta nakuluwañesha ashalahu kuhitila mukuyilekesha kuzatisha nyikanda nikukañesha mudimu wawu wakwikala akwakushimwina aWanta.

⁶ Hela chakwila antu jaNzambi akeheli, ayitwambilili nikuyikabisha kudi ayilumbu jawu, akañenyi kujiyisha kudifukula kwalala. Kwadiña ‘antu ashaliluhu,’ dikwila nawu awayishewa ashaliluhu akaanini chikupu ‘kuyijiyisha mumusumba.’

7. Chihandilu chahitilumu aYinsahu jaYehova awayishewa chakwashaña ñahi akwakudifukula alala ejima makonu?

⁷ Komana iwu wuprofwetu washikijeweli hakumana kwaNjita Yakaayi Yatachi? Inehi. Akwakulukuka amunyuza enjileña nakulukuka awayishewa ashalahu niakwawu ashinshika achiñejaña kushakama hamaseki. (Chim. 12:17) Njita Yakaayi Yatachi yamwekesheli ichi chinjikijilu. Kashinshi kamwekesheluwu aYinsahu jaNzambi ashinshika awayishewa kakwashaña ambuña aNzambi makonu kwikala namuchima wakuumika kweseka kudi kwejima kushilahu ikabisha dafumaña kudi antaña abula kwitiya, akanyidimu hela akwawu akashikola adimbululaña yuma yakuhwelelawu. (1 Pet. 1:6, 7) Hichikweti muloña nakwiluña kwashakamañawuku, akwakudifukula alala anakufwila ‘kwimana mbe namuchima wumu,’ bayi neyi ‘atiyaña woma  wawantu ayilekeshañaku.’ (Fwi. 1:27, 28) Hela chochu, kudihi kwatela kuswamawu antu jaYehova mukanu kaayi kayihela?—Yow. 15:17-19.

YEHOVA WATUÑILI “CHINEKINEKI CHENENI NANKASHI”

8. (a) Kwesekeja naBayibolu mpidi jemenañaku yumanyi? (b) Indi “mpidi yaOliveta” yemenañaku chumanyi?

⁸ Chineli ‘musumba’ waYerusalema wunakwimenaku Yerusalema yamwiwulu, dikwila nawu ‘mpidi yaOliveta, yekala kumesu aYerusalema,’ niyena yekala yachifwikija. Indi iyi mpidi yemenañaku chumanyi? Indi mpidi yeniyi ‘yakabaluka ñahi hakachi’ nakwikala mpidi jiyedi? Muloñadi Yehova chajitenenayi nindi ‘mpidi jami’? (Tañenu Zekariya 14:3-5.) MuBayibolu, mpinji jinateli kwimenaku mawanta hela jinfulumendi. Bayibolu yahosha cheñi nawu nkisu nikukiñewa jafumaña kumpidi yaNzambi. (Mas. 72:3; Isa. 25:6, 7) Dichi, mpidi yaoliveta hemanayi Nzambi kumusela waYerusalema waheseki yemenañaku chiyuulu chaYehova chabadika mukuleña kwejima.

9. Munjilanyi mwabalukila ‘mpidi yaoliveta’ hakachi?

⁹ Chumanyi chinakwimenaku kubaluka kwampidi yaoliveta? Mpidi yakumusela waYerusalema, yabalukili hakachi munjila yakwila nawu Yehova watuñili chiyuulu chikwawu chalema nankashi. Ichi chiyuulu chamuchiyedi hiWanta wawuMesiya wunakuyuulewa naYesu Kristu. Dihafuma Yehova kuhosha ‘hampidi jiyedi jaoliveta’ jabalukili hakachi nindi ‘mpidi jami.’ (Zek. 14:4) Mpidi jejima jiyedi jindi.

10. Indi ‘chinekineki cheneni nankashi’ chekala hakachi kampidi jiyedi chemenañaku chumanyi?

¹⁰ Hampinji yabalukili mpidi yachifwikija hakachi, yimu kukabeta kaluwunda yikwawu kukabeta kambwela, nyendu yaYehova yashalili haniji mpidi jiyedi. Hakachi kanyendu yaYehova hadi ‘chinekineki cheneni.’ Ichi chinekineki chachifwikija chinakwimenaku kukiñewa naNzambi, nawa ambuña aYehova aswamaña munichi chinekineki dikwila nawu muchiyuulu chindi nichaWanta wawuMesiya wudi mumakasa aMwanindi. Yehova haketeja antu kujiyisha kudifukula kwalalaku. Mpinjinyi yabalukili iyi mpidi yaoliveta? Yabalukili hatachikili kuyuula Wanta wawuMesiya hakumana kwampinji yawaJentili mu 1914. Indi akwakudifukula alala atachikili mpinjinyi lwendu lwakuya muchinekineki chachifwikija?

MPINJI YATACHIKILI LWENDU LWAKUYA MUCHINEKINEKI

11, 12. (a) Indi lwendu lwakuya muchinekineki chachifwikija lwatachikili mpinjinyi? (b) Chumanyi chinakumwekesha nawu chikasa chaYehova chidi nawantu jindi?

¹¹ Yesu wasoñamishili atumbanji twindi nindi: “Akayihela kudi nyuza yejima kukoola ijina dami.” (Mat. 24:9) Mumafuku akukuminina akanu kaayi, kutachika mu 1914, iku kuhelañana kunasweji nankashi. Munjita Yatachi Yakaayi, awayishewa ashalahu ayikabishili kudi ayilumbu jawu, amakwawu ayikasili mukaleya. Hela chochu, akañenyi kujiyisha kudifukula kwalala. Mu 1919 ayifumishili mukaleya. Kuhiñahu, antu jaNzambi asubukili kunsakililu yakutwamba, dikwila nawu Babiloni Muneni, wanta wamukaayi wansakililu yakutwamba. (Chim. 11:11, 12) * Iyi diyi mpinji yatachikili lwendu lwakuya muchinekineki champidi yaYehova.

¹² Kufuma tuhu mu 1919, chinekineki chaNzambi chatwalekahu kukiña akwakudifukula alala mwahita iseki dejima. Hadi yaaka yayivulu, antu jaNzambi mwahita kaayi kejima, ayilekeshaña nikuyikaanisha kushimwina nikuzatisha  nyikanda yashindamena haBayibolu yawaYinsahu jaYehova. Ikañesha damuchidiwu dichidi kutwalekahu nimumatuña amakwawu. Hela chakwila nyuza yinakuzata nañovu kulonda yikañeshi mudimu wetu, hiyamba katwesha kujiyisha kudifukula kwalalaku. Chikasa chaYehova chabadika ñovu chakakiña antu jindi.—Kuhit. 11:2.

13. Tunateli kushakama ñahi muchinekineki chaYehova mwakiñilañayi antu, nawa muloñadi chitwatela kwilila mwenimu hayinu mpinji?

¹³ Neyi tukakela kudi Yehova nikukolela kuchalala, yena niMwanindi Yesu Kristu akatukiña nawa Nzambi haketeja muntu wudi wejima hela chuma chidi chejima ‘kutuhukula muchikasa Chinduku.’ (Yow. 10:28, 29) Yehova wukweti muchima wakutukwasha chikupu hadi mpinji yejima kulonda tumwovwahileña yena Mwanta Wakuleña kwejima nikwikala ashinshika kuWanta wawuMesiya. Dichi twatela kushakama muchinekineki chaYehova mwakiñilañayi antu, muloña ichi chinekineki chakakiña chikupu akwakudifukula alala hampinji yalukadi lweneni ludi kwakwihi nakushika.

‘IFUKU DAKUZUÑA NJITA’ DINASHIKI DEHI

14, 15. ‘Hefuku daNzambi dakuzuña njita’ nawayilumbu jindi, chumanyi chakamwekena antu akekala hanzi yachinekineki?

¹⁴ Chineli kukuma kwadinu ituña hikukuswila kwakwihi, Satana wukusweja nankashi kulukuka ambuña aYehova. Kuhiñahu, ‘ifuku dakuzuña njita’ nawayilumbu jindi dikashika. Yehova wakeluka chikupu nindi kulukuka kwaSatana kumu kwakekala dikwakukumishaku. Hanidi ifuku, Mwanta wakuleña kwejima wakadimwekesha nindi Himukwakushinda njita wabadika kubadika chashindileñayi kunyima ‘hefuku dakuzuña njita.’—Zek. 14:3.

¹⁵ Hefuku daNzambi dakuzuña njita, chumanyi chakamwekena antu akekala hanzi ‘yachinekineki cheneni’ mwakiñilañayi Yehova antu? Hiyakekala ‘nachejeji’ chakufuma kudi Nzambi chakatoñeka hadi wenaku. Hanidi ifuku dakuzuña njita “atuwalu, nawayingongavalu, nawangameli, nawayimbulu, nawanyama ejima,” yinjikijilu yinakumwekesha nawu nyuza yinadiloñeshi kuzuña njita akayijilumuna. Iyi yuma yejima ‘hiyakekala nañovuku,’ yakaleka kuzatika neyi kwiji yinomi namashika. Yehova wakazatisha chipupu hela yikatu. Hela chakwila chakufwikija hela nehi, ichi chipupu chakafwomona akwakumuzuñisha Nzambi. Hefuku denidi, ‘mesu awu nimadimi awu akanoñela mutunwa twawu,’ dikwila nawu akwakulukuka akasaña neyi amputa mesu nawa hiyakatwesha kuhosha mazu atamaku. (Zek. 14:6, 7, 12, 15) Kwosi chibalu nichimu chaheseki chakabula kujilumunawu. Akwakulwa njita akekala kukabadi kaSatana akavula nankashi. (Chim. 19:19-21) “Akajahawu kudi Yehova ifuku odu akekala heseki dejima, kufumisha kunsa yeseki yimu ndo nikunsa yeseki yikwawu.”—Yere. 25:32, 33.

16. Chineli ifuku daNzambi dakuzuña njita didi kwakwihi, malwihwinyi itwatela kushinshikahu, nawa chumanyi chitwatela kwila?

¹⁶ Kakavulu njita yaletaña makabi nikudi antu anashindi. Njita yinateli kuleta nzala. Maheta anateli kukisika. Chihandilu chinateli kutama. Antu hiyanateli kwikala akasunuka chikupuku. Neyi kukala kwamuchidiwu kutumwekena, tunateli kwila ñahi? Komana tukutachika kwakamena chikupu? Komana chikuhwelelu chetu chikuzeya hamuloña wekakeja? Komana tukuneña nakuleka kuchiñeja yuma yakumbidi? Chikawaha nankashi neyi chakwila halukadi lweneni tukakuhwelela muñovu jaYehova jakupulwisha nikutwalekahu kuswama muchinekineki chaYehova mwakiñilañayi antu.—Tañenu Habakuki 3:17, 18.

 “MEJI AMOMI AKAFUMA”

17, 18. (a) Indi “meji amomi” hiyumanyi? (b) Indi ‘kaluñalwiji kakumusela’ ‘nikaluñalwiji kakumujika’ jemenañaku yumanyi? (c) Hampinji yimunakutalila yuma yakumbidi, chumanyi chimunafuukuluhu kwila?

¹⁷ Hanyima yaAmagedoni, “meji amomi” akatwalekahu kufumina kwitanda daWanta wawuMesiya. Awa “meji amomi” hiwumi watuloñeshelayi Yehova. ‘Kaluñalwiji kakumusela’ katalisha kuKaluñalwiji Kafwa, nawa ‘kaluñalwiji kakumujika’ katalisha kuKaluñalwiji kaMediterranean. Itu tuluñalwiji twejima tuyedi atuzatishaña hakutena antu. Kaluñalwiji Kafwa kanateli kwimenaku antu ejima ekala mumajamu. Chineli Kaluñalwiji kaMediterranean kenzala wumi, kemenañaku “izaza deneni” dawantu akapuluka haAmagedoni. (Tañenu Zekariya 14:8, 9; Chim. 7:9-15) Dichi, mazanvu ejima ayedi akahetelamu kuhitila mukuyamuna kukufwa kwaswaninuwu kudi Adama hampinji yinakutwalekawu kumanisha mpwila yawu nameji achifwikija, hela “kaloña kameji awumi.”—Chim. 22: 1, 2.

¹⁸ Chineli Yehova wakatukiña, twakapuluka hakumana kwadinu ituña datama nakwiñila mwituña daNzambi dadiha nawa daloña. Hela chakwila nyuza yejima yatuhela, tudikasenu munyichima yetu kutwalekahu kwikala antu ashinshika aWanta waNzambi, nakufwila chikupu kwikala muchinekineki chaYehova mwakiñilañayi antu.

[Tumazu twaheshina]

[Malwihu aKuzatisha haKudiza]

[Mwevulu wudi hefu 21]

Fwilenu chikupu kushakama muchinekineki chaYehova mwakiñilañayi antu