Antu Amukeña Yehova, “Hiyakweti Hakudimbukilaku”

“Akeña nshimbi jeyi amonaña kumwena zo-o nankashi; hiyakweti hakudimbukilaku.”—MAS. 119:165.

MUKWAKULA NENUDI?

Indi akwaKristu atemukaña lufuchi lwamuchidinyi, nawa akatambwila wulokwinyi?

Yumanyi yinateli kudimbwisha mukwaKristu?

Munjilanyi antu akeña nshimbi jaYehova mwabulilawu hakudimbukila?

1. Indi mukwakutemuka wumu wamwekesheli ñahi nindi hakaleka kutemuka lufuchuku?

 KUFUMA tuhu kuwansi windi, Mary Decker amwilukili mukaayi nawu watemukaña nankashi. Mu 1984 hampinji yikwadiña yisela yaOlympic, antu amavulu akuhweleleli nawu diyi wukutambula lupasa lwawuru mulufuchi lwakutemuka jimita 3,000. Ilaña wakañenyi kushika hamufunda. Wahukeni mumwendu wamukwawu mwatemukilileñawu nawa wadimbukili. Wadikatishili nikudila nankashi nawa amufumishili hamukanka wawakwakutemuka lufuchi. Hela chochu, Mary halekeli kutemuka lufuchuku. Chimwahitili tukweji, watachikili kutemuka lufuchi nawa mu 1985 watemukili nankashi nakushiyamu ambanda ejima.

2. Munjilanyi akwaKristu alala mwekalilawu akwakutemuka lufuchi, nawa twatela kusha maana hachumanyi?

² Etu akwaKristu chidi neyi tunakutemuka lufuchi lwachifwikija. Twatela kutemuka kulonda tutambuli nfwetu. Lufuchi lwetu hiludi lwakutemuka neyi kachinchi kulonda tutambuli nfwetuku. Nawa hiludi lwakutemuka neyi mbachuku. Ilaña, tunateli kulufwanisha kulufuchi lwakutemuka chintampu chachilehi chakwila chakeñekaña kuumika hakwila nawu mushiki kumufunda. Kapostolu Pawulu wazatishili nhoshelu yankinji yamukwakutemuka mumukanda windi wasonekeleliyi akwaKristu akuKorinda, musumba welukiluwu nawu mwadiña antu akeñeli kutemuka nankashi. Wasonekeli nindi: ‘Muneluki nenu antu adesekaña lufuchi lwawu atemukaña wejima wawu, kwinza kusomwena, akusomwena wumu hohu. Ninenu temukenu kulonda akayisomweni.’—1 Kor. 9:24.

3. Indi akwakutemuka lufuchi ejima anateli kutambwila ñahi wumi wahaya nyaka?

³ Bayibolu yatulejaña kutemuka lufuchi muchifwikija. (Tañenu 1 Akorinda 9:25-27.) Wumi wahaya nyaka diyi nfwetu yitwakatambwila, chili akwaKristu awayishewa akweti kuchiñeja kwakuya mwiwulu hela etu tukweti kuchiñeja kwakushakama hanu hamaseki. Kwambukaku nawakwakutemuka lufuchi lwakudibecha, antu ejima  atemukaña munilu lufuchi nikuumika nakushika kunsa diwu akatambwila nfwetu yawumi wahaya nyaka. (Mat. 24:13) Akwakutemuka lufuchi akañanyaña neyi abula kulondela nshimbi hela akañanya kushika kunsa. Kubombelahu, ilu dilufuchi mwatambwilañawu hohu wumi wahaya nyaka.

4. Yumanyi yaleñelaña lufuchi lwetu lwakuheta wumi wahaya nyaka kwikala lwakala?

⁴ Kushika kunsa yamufunda hichuma chakala nankashi. Chakeñekaña kudifumba nikushaku muchima. Yesu Kristu hohu diyi washikili kunsa yamufunda chakadi kudimbuka. Ilaña kambanji Yakoba wasonekeli nindi atumbanji twaKristu “wejima wetu twaluwaña muyuma yayivulu.” (Yak. 3:2) Awa mazu alala! Yiluwa yetu niyiluwa yawakwetu yatudimbwishaña wejima wetu. Dichi, mpinji jikwawu tunateli kuhukana nikutedañila. Hadaha tunateli nikudimbuka ilaña tunyamuka cheñi nakutwalekahu kutemuka lufuchi. Amakwawu adimbukili chatama chakwila ayikwashili kunyamuka nakutachika cheñi kutemuka lufuchi lwakushika kumufunda. Dichi, tunateli kuhukana hela kudimbuka hakapinji kantesha hela kufuntila-funtilahu.—1 Anya. 8:46.

NEYI MUDIMBUKA, NYAMUKENU MUTACHIKI KUTEMUKA CHEÑI

5, 6. (a) Indi mukwaKristu wekalaña ñahi ‘wakadi hakudimbukilaku,’ nawa chumanyi chikumukwashaku kwimana? (b) Muloñadi antu amakwawu chabulilañawu kwimana neyi adimbuka?

⁵ Hadaha mwazatishahu dehi awa mazu, “kuhukana” “nikudimbuka” munjila yashiyashana hakulumbulula wuspiritu wamuntu. Awa mazu amuBayibolu anateli kutalisha kuchuma chochimu, ilaña bayi neyi mpinji yejimaku. Chakutalilahu, talenu mazu ekala haYishimu 24:16: “Muntu waloña wadimbukaña mapampa katanu nakayedi chanyamukayi hohu; ilaña antu atama afwaña kwawu puchi nayuma yakala.”

⁶ Yehova haketeja antu amukuhwelela kuhukana hela kudimbuka, dikwila nawu kumona kukala hela kufunta hanyima mukudifukula kwawu, chakwila anateli kukañanya kunyamuka. Tuneluki netu Yehova wukutukwasha ‘kunyamuka’ kulonda tutwalekuhu kumukalakela namuchima wejima. Awa mazu akundejaña antu ejima amukeña Yehova chakufuma hamuchima. Antu atama hiyekalaña namuchima wakunyamuka neyi adimbukaku. Hiyakeñaña  wukwashu waspiritu yaNzambi yajila niantu jinduku, hela akanaña wukwashu weniwu neyi anayikwashi. Kwambukaku, antu ‘akeña nshimbi jaYehova,’ kwosi chuma chinateli kuyihukesha nakuyifumisha mulufuchi lwakuwumi haya nyakaku.—Tañenu Masamu 119:165.

7, 8. Indi muntu nateli ‘kudimbuka’ ñahi nakwikala cheñi nawuselewa waNzambi?

⁷ Antu amakwawu adimbukaña nakukoña tuyiluwa twanyanya, hadaha nikufuntila-funtilahu hamuloña wakuzeya-zeya. Hela chochu, achidi aloña kumesu aYehova neyi atwalekahu ‘kunyamuka,’ dikwila nawu neyi abalumuka mumuchima nikufwila kutachika kumukalakela nakashinshi. Chumichi chamwekenaña kuyuma yeliliyi Nzambi kudi aIsarela akushankulu. (Isa. 41:9, 10) Mukanda waYishimu 24:16 wutwatena hakusambila, hiwakonkomwenaña hayuma yatamaku, dikwila nawu ‘hakudimbukaku,’ ilaña wakonkomwenaña hayuma yayiwahi, dikwila nawu ‘hakunyamuka’ kuhitila muwukwashu waNzambi yetu wukweti luwi. (Tañenu Isaiah 55:7.) Hakumwekesha nawu atukuhwelela, Yehova Nzambi niYesu Kristu atukolesha ‘kunyamuka.’—Mas. 86:5; Yow. 5:19.

⁸ Neyi mukwakutemuka yahukana hela yadimbuka hakutemuka lufuchi lwachintampu chachilehi, nateli kukola cheñi nikushika kumufunda neyi yanyamuka swayi-swayi. Mulufuchi lwetu lwakuwumi wahaya nyaka, hitweluka ‘ifuku hela mpinji’ hamba kakuma lufuchi lwetuku. (Mat. 24:36) Neyi tuzata nañovu kulonda tubuleña kudimbuka, tukutwalekahu kutemuka lufuchi nawa tukushika kumufunda chachiwahi. Hanu dinu tunateli kutondolwela ñahi yuma yinateli kutudimbwisha?

YUMA YINATELI KUTUDIMBWISHA

9. Yumanyi yinateli kutudimbwisha yitukuhanjekahu?

⁹ Tushinshikenu hayuma yitanu yinateli kutudimbwisha, kuzeyazeya kwetu, yuma yafwilaña muchima, kutuheñeshela wuñanji kudi akwetu akakwitiya, yihuñu hela makabi niyiluwa yawakwetu. Twatela kwanuka netu neyi twadimbukahu dehi, Yehova wekala wadiwujinka nankashi. Hashikenaña dakututena nindi hitwashinshikaku.

10, 11. Indi Davidi wadiña nakuzeyazeya kwamuchidinyi?

¹⁰ Kuzeyazeya kwetu kunateli kwikala neyi malola anashuwu munjila mwakutemukila lufuchi. Neyi tushinshika hayuma yamumwekeneni Mwanta Davidi nikapostolu Petulu, tunateli kwiluka kuzeyazeya kuyedi kwadiñawu naku, kubula kudihemba nikutiya antu woma.

¹¹ Mwanta Davidi wamwekesheli kuzeya hakubula kudihemba neyi chichamwekeni hanshidi yakoñeliyi naBatisheba. Nawa hatachikiluwu kumutukola kudi Nabali, Davidi wakeñeleña kumwila chuma chatama. Eñañi, wakañenyi kudihemba, ilaña halekeli kufwila kumuzañalesha Yehovaku. Wakoleli cheñi kuspiritu hamuloña wakumukwasha kudi akwawu.—1 Sam. 25:5-13, 32, 33; 2 Sam. 12:1-13.

12. Indi Petulu watwalekeluhu ñahi kutemuka lufuchi hela chakwila wadimbukili?

¹² Petulu wadiña nawoma wawantu nawa mpinji jikwawu wadimbukileña chatama, ilaña watwalekeluhu kwikala washinshika kudi Yesu nikudi Yehova. Chakutalilahu, wamukanini Mwanta windi hatooka mapampa kasatu. (Luka 22:54-62) Nkumininaku, Petulu wakañenyi kumwekesha yililu yawakwaKristu, watachikili kusekesha akwawu aJentili akwakwitiya neyi kwiji hiyadiña alema kubadika aYudeya akwaKristu alamishiluwuku. Hela chochu, kapostolu Pawulu washinshikili chikupu haniyi nsañu, hiyateleleli kuleta chaambu muchipompeluku. Yililu yamwekesheliyi Petulu yadiña yaheña. Henohu yililu yaPetulu kanda yihuñumuni amana kwawu, Pawulu wamufumbili chikupu Petulu mesu namesu. (Ŋal. 2:11-14) Komana Petulu watiyili kutama nansañu yamufumbiluwu nakuleka kutemuka lufuchi lwakuwumi? Inehi. Washinshikili chikupu hakufumba kwaPawulu, wakuzatishili nawa watwelekeluhu kutemuka lufuchi lwakuwumi.

13. Indi kuzeyazeya kunateli kutudimbwisha ñahi?

¹³ Mpinji jikwawu kukatakata kunateli kwikala kuzeyazeya kwetu. Kukatakata nikwena  kunateli kwikala chuma chakutudimbwisha. Kunateli kuluwañesha wuspiritu wetu nikutuleñela tutachiki kutedañila nikuzeya chikupu. Chakutalilahu, muhela wakuJapani wakatili nankashi chimwahitili yaaka 17 kufuma hamupapatishiluwu. Watachikili kusha maana chikupu kuyikatu chakwila wazeyeli kuspiritu. Chimwahitili mpinji, wekalili mukwakushimwina wazeya. Aeluda ayedi amuhempwili. Hamuloña wakumukolesha, watachikili kupompa cheñi. Wahosheli nindi, “nadilili muloña amana kwami añimushili namuzañalu nankashi.” Muheletu chayinu mpinji watachika kutemuka cheñi lufuchi lwakuwumi.

14, 15. Chumanyi chitwatela kwila neyi tutachika kutoñojoka hayuma yatama? Lumbululenu.

¹⁴ Yuma yafwilaña muchima yadimbwisha antu amavulu nankashi. Neyi tuholokela mukweseka kwamuchidiwu, twatela kuzata nañovu kulonda twikali akadi majilu muyitoñojoka, muyililu nikuspiritu. Twatela kwanuka kufumba kwaYesu ‘kwakunata’ muchifwikija chuma chidi chejima chinateli kutudimbwisha, chili disu hela chikasa chetu. Yumiyi yinabombelumu yitoñojoka yatama niyililu yinakojeji antu amavulu aleki kutemuka lufuchi lwakuwumi.—Tañenu Matewu 5:29, 30.

¹⁵ Mana kwetu wumu wakulilili muchisaka chawakwaKristu wasonekeli nindi wazatili nañovu chikupu hadi yaaka yayivulu hakwila yaleki chaaku chawutumwa. Wahosheli nindi: “Mpinji yejima natiyileña nsonyi. Chidi neyi nambukiluku nawantu amakwawu.” Chashikijiliyi yaaka 20 yakusemuka, wekalili payiniya wampinji yejima nawa wadiña nkoñi wakuzatila muchipompelu. Kuhiñahu wadimbukili chatama, amufumbili kuspiritu nawa watambwilili wukwashu wawaeluda. Kuhitila mukulomba, kudiza Izu daNzambi nikushinshika hakukwasha antu amakwawu, wanyamukili yomweni nakutachika kutemuka lufuchi lwakuspiritu. Chimwahitili yaaka yayivulu, wetejeli nindi: “Mpinji jikwawu nekalaña nayitoñojoka yeniyi, ilaña nayitondolwelaña. Neluki nami Yehova hanateli kwiteja ayeseki chakubadika muñovu jenuku. Dichi nakuhweleli nami Nzambi weluka nindi nateli kushinda.” Iwu mana kwetu wakunkulwili nindi: “Makabi ejima inomiki akamana mwituña dadiha. Inakukeña chumichi chikamwekani. Nukutwalekahu kulwisha sampu iyi mpinji yinashiki dehi.” Iwu mana kwetu nakufwila kutwalekahu kutemuka lufuchi lwakuspiritu.

16, 17. (a) Chumanyi chakwashili mana kwetu watoñojokeleña nindi amuheñesheleli wuñanji? (b) Chumanyi chitwatela kwila hakwila nawu tubuli kudimbuka?

¹⁶ Kumuheñeshela mana kwetu wuñanji kunateli kwikala chuma chakudimbwisha. Mana kwetu wadiña eluda muFrance, wakuhweleli nindi amuheñesheleli wuñanji nawa wahilili nankashi. Chafuminimu walekeli kudikunda nachipompelu nawa wekalili mukwakushimwina wazeya. Aeluda ayedi amwendeleli nawa atiyililili nakanañachima, chakubula kumuketwisha halumbulwileñayi yuma yelukiliyi nindi diyamwekeni. Amukolesheli kunatila chiteli chindi hadi Yehova nawa alumbulwili nawu chuma chalema hikumuzañalesha Nzambi. Watambwilili wukwashu chiwahi nawa watachikili kutemuka lufuchi lwakuwumi, wazatileña cheñi nañovu nyidimu yachipompelu.

¹⁷ AkwaKristu ejima atela kushinshika hadi Yesu Kristu watondawu kwikala mutu wachipompelu bayi antu abula kuwaninaku. Yesu, wekala namesu “neyi muzuzu wakesi,” wamonaña yuma yejima chachiwahi nawa welukaña chikupu kutubadika. (Chim. 1:13-16) Chakutalilahu, welukaña nindi chuma chinateli kumwekana neyi hikutuheñeshela wuñanji hadaha chinateli kwikala hikubula kutiyishisha hohu chidi nsañu. Yesu wakazatilahu chiwahi hanyiloña yachipompelu nawa hampinji yatelela. Dichi, bayi twiteja yililu hela kufuukulahu kudi kwejima kwawakwetu akwaKristu kwikali chakutudimbwisha nachuku.

18. Tunateli kuumika ñahi kweseka hela kukala?

¹⁸ Yuma yikwawu yiyedi yinateli kutudimbwisha diyi yeniyi, lukadi hela ikabisha nikubula kuwanina kwawamana kwetu muchipompelu. Muchishimu chindi chamukwakukuwa mbutu, Yesu wahosheli nindi “lukadi hela ikabisha” hamuloña wansañu yezu dikaletesha antu  amakwawu kudimbuka. Hichikweti muloña nakunateli kufumina lukaduku, chili kuchisaka, kudi antuñinetu hela kudi akwanfulumendi, lunateli kuzeyesha muntu ‘wabula muji mudi yomweninduku,’ muntu wabula kupama kuspiritu. (Mat. 13:21) Ilaña, neyi twikala namuchima woloka, mbutu yaWanta yikutukwasha kwikala nanyiji yashimata chikupu yachikuhwelelu chetu. Dichi neyi tunaholokeli mukweseka, twatela kutoñojokaña hayuma yahamekañawu. (Tañenu Afwilipi 4:6-9.) Yehova wakatwinka ñovu yakwikala ashinshika mumpinji yakweseka kulonda tubuli kudimbuka nakufuma mulufuchi.

19. Tunateli kukañesha ñahi yiluwa yawakwetu yibuli kwikala yakutuhukesha nachu?

¹⁹ Chawushona, hadi yaaka yayivulu yinahituhu antu amakwawu eteja kuzeyazeya kwawantu amakwawu kuyifumishi mulufuchi lwakuspiritu. Antu amakwawu adimbukaña hamuloña wakwambuka kwayuma yafuukulaña chinleji chawu. (1 Kor. 8:12, 13) Neyi muntu yatuneñesha, komana tukwiteja chumichi chikali kukala kweneni? Bayibolu yakonkomwenaña akwaKristu kuleka kusompesha, kwanakena amakwawu nikutondolwela chaaku chakukolelaña hayuma yinakukeñawu hohu. (Luka 6:37) Neyi muholokela muchuma chakuhukesha, dihulenu nenu: ‘Komana inakusompesha antu amakwawu kushindamena hayuma yinakukeña hohu? Chineli neluka nami amana kwami hiyawaninaku, komana nukwiteja muntu wabula kuwanina kunfumisha mulufuchi lwakuwumi?’ Kukeña Yehova kunateli kutukwasha tudikasi mumuchima kulonda tubuli kwiteja chuma chidi chejima chinateli kwilayi muntu chituleñeli tuleki kutemuka nakushika kumufunda.

TEMUKENU NAKUUMIKA NAWA TONDOLWELENU YUMA YINATELI KUYIDIMBWISHA

20, 21. Chumanyi chimunafuukuluhu kwila mulufuchi lwakuwumi?

²⁰ Komana munakufwila ‘kumanisha njila yakutemukila’? (2 Tim. 4:7, 8) Mwatela kudizaña Bayibolu. Zatishenu Bayibolu ninyikanda yetu yamukuloñesha kulonda yiyikwashi hakusandujola, kutoñojokahu chikupu nikwiluka yuma yinateli kuyihukesha. Lombenu spiritu yajila kulonda yiyikoleshi kuspiritu. Anukenu nenu kwosi mukwakutemuka wunateli kukañanya kutemuka lufuchi lwakuwumi hamuloña wakuhukana hela kudimbukaku. Nateli kunyamuka nakutachika kutemuka cheñi. Hadaha tunateli nikudizila kuyiluwa yetu kulonda tutachiki kutemuka lufuchi lwetu chachiwahi.

²¹ Bayibolu yahosha nawu hakwila tukatambwili wumi wahaya nyaka twatela kutemuka lufuchi kushika nikunsa. Lufuchi lwenilu hiludi neyi kukandama basi yinasendi antu anakuya nakushindaku. Twatela kutemuka lufuchi lwakuwumi etu aweni. Neyi twila mwenimu, ‘kumwena kwasweja nankashi’ kwakufuma kudi Yehova kukekala neyi mpepela yinakuhita kunyima yetu. (Mas. 119:165) Yehova wukutwalekahu kutwinka nkisu hayinu mpinji nawa wakatwinka nkisu jahaya nyaka neyi tumanisha lufuchi lwetu lwakuspiritu.—Yak. 1:12.

[Malwihu aKuzatisha haKudiza]

[Mwevulu wudi hefu 4]

Neyi mudimbuka, tambwilenu wukwashu nawa nyamukenu!

[Mwevulu wudi hefu 7]

Bayi mwiteja chuma chidi chejima chiyileñeli mubuli kumanisha lufuchi lwenuku!