Chineli ‘Tunamwiluki Dehi Nzambi’—chumanyi Chitwatela Kwila?

‘Munamwiluki dehi Nzambi.’—ŊAL. 4:9.

MUKWAKULA NENUDI?

Muloñadi chichawahila kuhitulukaña mundandanda yakuspiritu mumpinji mumpinji?

Muloñadi mukwaKristu wapama chatela kutwalekelayi kupaminaku kuspiritu?

Muloñadi chitwatela kutoñojokela hachikuhwelelu nikudihana kwetu kudi Yehova?

1. Muloñadi mukwakwendesha ndeki chalondelelañayi iyi ndandanda henohu kanda yatuuki?

 AKWAKWENDESHA ndeki endeshaña ndeki yakuhwelelawu kudi antu nankashi neyi anakukeña kutuuka, akweti ndandanda yayuma yabadika ha 80 yashinshikañawu nakanañachima henohu kanda atuuki. Neyi abula kulondela nakanañachima iyi ndandanda mpinji yejima yikutuukawu, dikwila nawu akwakwendesha ndeki anateli kukojeja maposu. Munamwiluki ntahi mukwakwendesha ndeki wakonkomwenañawu chikupu kulondela iyi ndandanda mpinji yejima? Mukwakwendesha ndeki wakuluka yitembi. Muloña nateli kudiwula nikukañanya kulondela iyi ndandanda mpinji yejima.

2. Ndandanda yamuchidinyi yatela kuzatishawu akwaKristu?

² Kufwana mukwakwendesha ndeki walondelaña nshimbi jakumukiña kumaposu, munateli kuzatisha ndandanda kulonda mwiluki chikupu nenu chikuhwelelu chenu hichinateli kuzeya mumpinji yamakabuku. Chili mwapapatishewa katataka hela munamuzatili Nzambi hadi yaaka yayivulu, chalema nankashi mpinji yejima kushinshika hakukola kwachikuhwelelu chenu nikudihana kwenu kudi Yehova Nzambi. Neyi mukañanya kushinshika nakashinshi haniyi yuma mpinji yejima, munateli kuzeya kuspiritu. Bayibolu yatusoñamishaña nawu: “Dichi yowu natoñojoki nindi nemani, ababali kuchina kudimbuka.”—1 Kor. 10:12.

3. Chumanyi chateleli kwilawu akwaKristu muÑalija?

³ AkwaKristu akuÑalija ateleleli kushinshika chikupu hakukola kwachikuhwelelu chawu nikuhameka hakwikala akasunuka kuspiritu. Kuhitila mumulambu windi, Yesu washinkwili njila kulonda antu ejima amukuhwelela amwiluki Nzambi chikupu nawa ekali anyana kaNzambi. (Ŋal. 4:9) Hakwila nawu atwalekuhu kwikala naniwu wubwambu wawuwahi, akaÑalija ateleli kukaana ntañishilu  yawaYudeya ahosheleña nawu adiña nakuhemba Nshimbi Jamwinkeluwu Mosi. Muyipompelu mwadiña aJentili abulili kulondela Nshimbi Jamwinkeluwu Mosi. A Yudeya niaJentili ateleleli kuyilaku hambidi kuspiritu. Dikwila nawu ateleli kwiluka nawu hiyanateli kuditena kuloña aweni kuhitila muntanjikilu yaNshimbi Jamwinkeluwu Mosuku.

NJILA JATACHI JITWATELA KULONDELA HAKUMWILUKA NZAMBI

4, 5. Kufumbanyi kwayinkeluwu akwaÑalija, nawa kwalema ñahi kudetu?

⁴ Kufumba kwakapostolu Pawulu kwafumbiliyi akwaÑalija akwisonekeli muloña kwadiña nankeñelu: kukiña akwaKristu alala mpinji yejima kulonda abuli kushiya maheta achalala chamuBayibolu nakufunta kuyuma yashiyawu dehi kunyima. Yehova wamoneneni kapostolu kukolesha antu adiña muyipompelu yamuÑalija niakwakudifukula Indi ejima kulonda emani chakola mbe-e.

⁵ Wejima wetu twatela kwanukaña mpinji yatukuliluwu muwuduñu wakuspiritu nakwikala Chinsahu chaYehova. Hakwila nawu mwili mwenimu, shinshikenu hanawa malwihu ayedi: Komana mwanukaña njila jimwalondeleli hakwila nawu mushikuhu hakupapatishewa? Komana munakwanuka chimwamwilukili Nzambi nawa nichayilukiliyi nakutachika kudiluñisha kukasunuka kwakweni kwakuspiritu?

6. Ndandanda yamuchidinyi yitukushinshikahu?

⁶ Chakadi nikujina, wejima wetu twalondeleli njila jitanu najiwana. Iji njila jidi neyi ndandanda yayuma yakuspiritu, anajisoneki muchikasha chinakuhosha nawu “Njila Jalombolaña kuKupapatishewa niKutwalekahu Kupaminaku Kuspiritu.” Mpinji yejima neyi tudanukishaña iji njila jitanu najiwana jikutukolesha kulonda tubuli kufuntila kuyuma yamukaayi. Neyi chochatwalekañayi kutuuka chiwahi mukwakwendesha ndeki wakuluka yitembi nawa wababala kuhitila mukulondela yuma yidi handandanda, anenu nawa chikuyikwasha nankashi kuzata mudimu nakashinshi neyi muhituluka mundandanda yayuma yakuspiritu.

ANTU ELUKAWU KUDI NZAMBI ATWALEKAÑAHU KUPAMINAKU KUSPIRITU

7. Njilanyi yitwatela kulondela, nawa muloñadi?

⁷ Ndandanda yalondelañayi mukwakwendesha ndeki yamwanukishaña nawu kudi yuma yatela kulondelayi henohu kanda yatuuki. Anetu nawa twatela kudishinshika nikutala ndandanda yitwalondelaña kufuma hampinji yitwapapatisheweli. Pawulu wamusonekeleli Timotewu nindi: “Ikalaku namazu akukolesha iwatiyili kudami, mwayawu mwayawu, mukukuhwelela nikukeña kwekala mudi Kristu Yesu.” (2 Tim. 1:13) Awa ‘mazu alala’ ekala Mwiizu daNzambi. (1 Tim. 6:3) Neyi chochatukwashañayi mukwakuleñaleña kwiluka chuma chejima, ‘nsañu yalala’ yatukwashaña kwiluka chikupu yuma yakeñañayi Yehova kudi etu. Dichi chayinu mpinji tuhanjekenu hanjila jatulombweli kukupapatishewa kulonda tumoni chitunakulondela nsañu yalala.

8, 9. (a) Muloñadi chitwatela kutwalekelahu kumwiluka Nzambi nikukolesha chikuhwelelu? (b) Lumbululenu chichawahila kupaminaku kuspiritu nimuloña wutwatela kutwalekahu.

⁸ Chuma chatachi handandanda yetu hikwiluka. Kuhiñahu tunateli kwikala nachikuhwelelu. Ilaña twatela kutwalekahu kupaminaku muyuma yejimiyi yiyedi. (2 Tesa. 1:3) Kukula kwabombelamu kuhimpa. “Kukula” kwatalisha mukutohelaku. Dichi, neyi tunapapatishewi dehi, twatela kutwalekahu nakukolesha wuspiritu wetu kulonda tutwalekuhu kupaminaku.

⁹ Tunateli kwesekeja kukula kwetu kwakuspiritu nachakulaña mutondu. Mutondu wunateli kukula nankashi, sweje-e neyi nyiji yinajiyami chikupu. Chakutalilahu, nyitondu yikwawu yanyisida yaLebanoni yinateli kuleha jimita 37 nawa yikweti nyiji yakola nawa yatohaña mamita 12. (Kam. 5:15) Hakusambila mutondu wakulaña lufuchi nankashi. Ilaña nyiji chiyajiyama nankashi watachikaña  kukulila mumbavu. Chaaka nichaaka, mutondu watohelañaku mumbavu nawa nyiji yajiyaminañaku nakutanda nankashi, nakuleñela mutondu wushimati chikupu. Hohamu nakukula kwakuspiritu kwamukwaKristu. Tunateli kukula swayi-swayi kuspiritu hampinji yitunatachiki kudiza Bayibolu kuhiñahu hitukupapatishewa. Antu amuchipompelu anateli kumona nawu tunakuyilaku hambidi. Hadaha tunateli kushikahu kwikala payiniya hela kutambwila nyidimu yikwawu. Chimukuhita yaaka, antu hiyanateli kumona nawu tunakukulilaku kuspirituku. Hela chochu, twatela kukolesha chikuhwelelu chetu nikwiluka chalala chikupu kulonda “twakashiki mwiyala walala chikupu, mwashika chiminu chakwinzala kwaKristu.” (Efwes. 4:13) Neyi etu akwaKristu tuyilaku hambidi, tudi neyi kwiji kalubutu kanyanya kakulaña nakwikala mutondu weneni.

10. Muloñadi akwaKristu apama dehi niwena chatela kutwalekelahu kuyilaku hambidi?

¹⁰ Hitwatela kuleka kuyilaku hambiduku. Twatela kusweja kumwiluka Nzambi nikukolesha chikupu chikuhwelelu chetu. Dichi tukushimata chikupu Mwiizu daNzambi. (Yish. 12:3) Muchipompelu chawakwaKristu, mwekala amana kwetu niahela amavulu akoña dehi mwenimu. Chakutalilahu, mana kwetu wumu wunazati wueluda hadi yaaka kubadika 30 wahosheli nindi wuchidi kupaminaku kuspiritu. Wahosheli nindi: “Naswejaña nankashi kuhameka nsañu yamuBayibolu. Mpinji yejima nawanaña njila jajiha jakuzatishilamu yishina yamuBayibolu ninshimbi munjila jambokamboka. Naswejelañaku kuhameka mudimu wakushimwina.”

KOLESHENU WUBWAMBU WENU NANZAMBI

11. Tunateli kumwiluka ñahi Yehova chiwahi mukuhita kwampinji?

¹¹ Kupaminaku kwetu kwabombelamu cheñi kukundama kwakwihi naYehova wekala Ibwambu nawa Tata yetu. Wakeñaña tutiyeña nindi watwiluka. Wakeñaña twiluki netu watukeña nawa twakiñewa neyi chatiyañayi mwana anakatuwu kudi nvwali yindi wamwakamenaña hela neyi chitwatiyaña neyi tudi hamu nebwambu detu watukeña nawa washinshika. Neyi chimuneluki, kwikala nawubwambu wawuwahi naYehova hiwenzaña hohu mukukasumwishaku. Hakwila nawu tumwiluki nikumukeña hatela kuhita mpinji. Hakwila nawu twiluki chiwahi chekalayi Yehova, twatela kufwila kuwanaku mpinji yakudiza Izu dindi hefuku hefuku. Tañenuña Kaposhi Kakutalila niAwake! yejima yedikaña kubombelahu ninyikanda yashindamena haBayibolu.

12. Chumanyi chitwatela kwila hakwila Yehova yatwiluki?

¹² Amabwambu jaNzambi akulaña kuspiritu kuhitila mukulomba nikudikunda  nawamabwambu amawahi. (Tañenu Malaki 3:16.) ‘Matu aYehova atiyililaña chakulembelelawu.’ (1 Pet. 3:12) Kufwana nvwali wukweti kukeña, Yehova watiyaña nyaambu yetu. Dichi twatela ‘kukakela mukulomba chakadi kuzeya.’ (Rom. 12:12) Hitunateli kutwalekahu kwikala mukwaKristu wapama kuspiritu chakadi kutukwasha kudi Nzambuku. Ikakeja dakanu kaayi dasweja ñovu chakwila hitukutwesha kushinda halwetuku. Neyi tuleka kukakela mukulomba, tukudikañesha etu aweni kutambwila ñovu yaNzambi yinakukeñayi nawa yatela kutwinkayi. Komana mwalombaña kudi Yehova neyi chimunateli kuhanjeka nebwambu wumwakuhwelela chikupu? Tahindi kuduhu njila mumwatela kuwahishila kulomba kwenu?—Yere. 16:19.

13. Muloñadi kudikunda nawakwetu akwaKristu chikunateli kutukwashila kupaminaku kuspiritu?

¹³ Yehova watiyaña kuwaha nawantu “abatamaña mudi yena”; dichi, nihanyima yakumwiluka Nzambi, twatela kutwalekahu kudikunda nawantu amakwawu amwiluka amuchipompelu. (Nahu. 1:7) Chineli mwituña munenzali antu ahoshaña yuma yakudimbulula, twatela kudikundaña nawamana kwetu niahela atela kutukolesha. Yumanyi yitukuhetelamu? Muchipompelu munateli kuwanamu antu anateli kuyisañumuna kulonda ‘mukeñañani nakwila nyidimu yayiwahi.’ (Heb. 10:24, 25) Kukeña kwakweni kwasonekeleliyi Pawulu aHeberu kwahosheleña hadi amana kwetu, niakwakudifukula amuchituñilu nihachipompelu. Hakwila nawu tumwekeshi kukeña kwamuchidiwu chakeñekaña kudikundaña nawakwetu akwaKristu. Dichi mpinji yejima muyeña kukupompa nawa mwakuleñahu.

14. Indi kubalumuka mumuchima nikufutumuka kwatwalekañahu munjilanyi?

¹⁴ Hampinji yitwekalili akwaKristu, twasambilili kubalumuka mumuchima nikufutumuka hela kuleka nshidi jejima jitwelileña. Hela chochu, kubalumuka mumuchima kwatwalekañahu hohu. Hakwikala antu abula kuwanina, tukweti nshidi yaswama mudetu neyi kapela wunadivuñi wunakukeña kusumana. (Rom. 3:9, 10; 6:12-14) Twikalenu atona, bayi tudiwuleña yiluwa yetuku. Chamuzañalu, Yehova wadiwunjikaña nanetu hampinji yitwalwishaña nakuzeyazeya kwetu nikuhimpa hanakukeñeka. (Fwi. 2:12; 2 Pet. 3:9) Zatishenu mpinji niñovu jenu kumudimu waYehova bayi kuyuma yamukunkulwayuku. Muhela wumu wasonekeli nindi: “Nakulilili muchalala, ilaña chinakulileña nadiña nayitoñojoka yashiyashana hadi Yehova kubadika chatoñojokeleñawu amakwawu. Namutiyileña Yehova woma nankashi nawa natoñojokeleña nami hinamba kamuzañaleshaku.” Chimwahitili mpinji, muhela wakasumukili “nadimbuki dehi kuspiritu” muloña wayiluwa yakoñeleñayi. Watwalekeluhu nindi “chuma chaletesheli bayi neyi himuloña wakubula kumukeña Yehovaku, ilaña hamuloña wakubula kumwiluka chikupu. Hela chochu, hanyima yakulomba nankashi, nafutumukili mumuchima.” Wabombeleluhu nindi: “Neluki nami Yehova wanlombweli neyi mwana wanyanya, wankwashili kushinda kukala kwejima kunamweneña, munjila yayiwahi nawa wanlejeleña yuma yinateleli kwila.”

15. Yumanyi yamonañayi Yesu niTata yindi?

¹⁵ ‘Twalekenuhu kuleja antu mazu’ ansañu yayiwahi. Kañelu kaNzambi kalejeli Petulu niapostolu amakwawu awa mazu hanyima yakuyifumisha mukaleya muchihayamisha. (Yil. 5:19-21) Eñañi, kushimwinaña mulungu nimulungu hichuma chikwawu chekala handandanda yetu. Yesu niTata yindi amonaña chikuhwelelu nimudimu wetu wakushimwina. (Chim. 2:19) Neyi chashimuna eluda wumu watenawu mumaparakalafu atachi nindi: “Mudimu wakushimwina dimudimu wutwatela kulemesha nankashi muchihandilu chetu.”

16. Muloñadi chichalemena kutoñojoka hakudihana kwetu kudi Yehova?

¹⁶ Toñojokenu hakudihana kwenu. Wubwambu wetu naYehova dichuma chabadika kulema nankashi chitukweti. Weluka antu jindi. (Tañenu Isaya 44:5.) Lombelenuhu chikupu hampinji yimunakushinshika hakukola kwawubwambu  wenu naYehova. Toñojokenu cheñi hachipapatishu chenu nawa bayi mwakajimbala ifuku dimwapapatisheweluku. Chumichi chikuyanukishaña nawu chipapatishu chamwekeshaña nawu chuma chimwafuukwiluhu muchihandilu chenu chalema nankashi.

TWALEKENUHU KUKUNDAMA KWAKWIHI NAYEHOVA KUHITILA MUKUUMIKA

17. Muloñadi chitwatela kuumikila hakwila nawu tukundami kwakwihi naYehova?

¹⁷ Pawulu hakusonekela akaÑalija, wayikonkomweneni nindi atela kuumika. (Ŋal. 6:9) Chumichi chalema nikudi mukwaKristu makonu. Mukumonaña kweseka, ilaña Yehova wukuyikwashaña. Twalekenuhu kulomba spiritu yajila. Mukukundejewa muloña Yehova wukuyifumisha muchineñi nakuyinka muzañalu nawa wukuyinka muchima wakuwunda. (Mat. 7:7-11) Toñojokenu hachumichi: Neyi Yehova wakamenaña atujila, komana kwila yayakamena enu mwamukeña nawa mwadihana kudi yena nehi? (Mat. 10:29-31) Hela chakwila ikakeja disweja, bayi mufunta hanyima hela kulekaku. Tukweti maheta amawahi nankashi muloña twamwiluka Yehova!

18. Chineli “munamwiluki dehi Nzambi,” chumanyi chimunakukeña kwila?

¹⁸ Dichi, neyi Nzambi munamwiluki katataka nawa mwapapatishewa, chumanyi chimwatela kwila? Twalekenuhu kumwiluka Yehova chiwahi, nakupama kuspiritu. Nawa neyi hanahiti yaaka yayivulu kufuma himwapapatisheweli, chumanyi chimwatela kwila? Anenu nawa mwatela kutwalekahu kumwiluka Yehova chikupu. Bayi tutoñojokaña netu twamwiluka Nzambi chikupu nakutoñojoka netu hitwatela kukolesha wubwambu wetu nayenaku. Ilaña, twatela kuhituluka mundandanda yetu yakuspiritu mumpinji mumpinji kulonda twiluki chikupu neyi chakwila tunakutwalekahu kukolesha wubwambu wetu naTata yetu wakukeña, Ibwambu detu, nawa Yehova Nzambi yetu.—Tañenu 2 Akorinda 13:5, 6.

[Malwihu aKuzatisha haKudiza]

[Mwevulu wudi hefu 15]

Mutondu watwalekañahu kukula. AkwaKristu niwena atela kutwalekahu kukula

[Chikasha chidi hefu 17]

NJILA JALOMBOLAÑA KUKUPAPATISHEWA NIKUTWALEKAHU KUPAMINAKU KUSPIRITU

1 Twasambilaña ‘kumwiluka’ Yehova nimwanindi, Yesu Kristu.—Yow. 17:3

2 Chikuhwelelu chetu chatohelañaku neyi tutwalekahu kudizalahu yuma yayivulu.—Yow. 3:16

3 Mpinji yejima twamutambikaña Yehova mukulomba.—Yil. 2:21

4 Twelukaña kulema kwakudikunda hamu nawantu amakwawu mpinji yejima akweti chikuhwelelu chochimu.—Heb. 10:24, 25

5 Twabalumukaña mumuchima nakuleka nshidi jetu.—Yil. 17:30

6 Twafutumukaña, nakuleka yaaku yatama.—Yil. 3:19

7 Chikuhwelelu chetu chatusañumunaña kuhosha hatooka nawantu.—2 Kor. 4:13

8 Twadihanaña kudi Yehova kulonda tumulondeleña Yesu chachiwahi.—1 Pet. 4:2

9 Twamwekeshaña kudihana kwetu kuhitila mukupapatishewa mumenji.—1 Pet. 3:21