Komana Mukweti ‘Muchima Wakumwiluka’ Yehova?

“Nakayinka muchima wakuñiluka, nawu yami Yehova. Akekala antu ami.”—YERE. 24:7.

MUKWAKULA NENUDI?

Indi aYudeya amavulu amumafuku aYeremiya adiña ñahi ‘ayidima munyichima yawu’?

Muloñadi ejima wetu chitwatela kushinshikila nyichima yetu yachifwikija?

Tunateli kwikala ñahi ‘namuchima wakumwiluka’ Yehova?

1, 2. Muloñadi antu amakwawu chinateli kukeñelawu nyikabu yayikuyu?

 KOMANA mwadiluñishaña kudya yikuyu yoma hela yituuta? Amavulu adiluñishaña, dichi yikuyu ayidimaña nankashi mumatuña amavulu. A Yudeya akushankulu alemesheli nankashi nyikabu yakunyitondu yanyikuyu. (Nahu. 3:12; Luka 13:6-9) Yikuyu hiyakudya yayiwahi yakoleshaña mujimba nawa antu amakwawu ahoshaña nawu yakwashaña muchima.

² Mpinji yimu Yehova wesekejeli yikuyu nanyichima. Nzambi hahosheleña hakuwaha kwekala mukudya yikuyuku. Wahosheleña muchifwikija. Yuma yahosheliyi kuhitila mudi kaprofwetu Yeremiya yinateli kukwasha muchima wenu ninyichima yawantu imwakeña. Chitukushinshikaña hayuma yahosheliyi, toñojokenuña hayuma yitunateli kudizilaku etu akwaKristu.

3. Indi yikuyu yateneniyi Yeremiya mukapetulu 24 yemenañaku yumanyi?

³ Tusambilenu ntahi kushinshika hachahosheliyi Nzambi mumafuku aYeremiya kutalisha hayikuyu. Mu 617 B.C.E., muza wawaYuda wadiña mukukala chikupu kuspiritu. Nzambi waheni chimwenu kutalisha hayuma yadiña kumbidi, walumbulwili ichi chimwenu kuhitila mukuzatisha nyichidi yiyedi yayikuyu, yikuyu “yasweja kuwaha” niyikuyu “yasweja kutama.” (Tañenu Yeremiya 24:1-3.) Yikuyu yatama yatalishili hadi Mwanta Zedekiya niantu amakwawu adiña neyi yena amwesheluwu ikezeñi kudi Mwanta Nebukaneza nimashidika indi. Ilaña antu adi neyi Ezekeli, Danyeli niamabwambu jidi asatu adiña dehi muBabiloni, niaYudeya amakwawu adiña kwakwihi nakuyitwala muwuduñu muBabiloni, adiña neyi yikuyu yayiwahi. Ashaliluhu ateleleli kufunta nakutuñulula Yerusalema nitembeli yachu. Nawa chimwahitili mpinji chumichi chamwekeni.—Yere. 24:8-10; 25:11, 12; 29:10.

4. Indi mazu ahosheliyi Nzambi kutalisha hayikuyu yayiwahi anateli kutukolesha ñahi?

⁴ Yehova wahosheli hadawa antu emenañaku yikuyu yayiwahi  nindi: “Nakayinka muchima wakuñiluka, nawu yami Yehova. Akekala antu ami.” (Yere. 24:7) Iyi diyi nsona hanashindameni mutu wachinu chibaaba, nawa yinakutukolesha nankashi! Nzambi wakeñeshaña kwinka antu ‘nyichima yakumwiluka’. Dikwila nawu “muchima” wunakwimenaku yililu yamuntu. Chakadi nikujina, munakufwila kwikala namuchima wamuchidiwu nikwikala hakachi kawantu jindi. Hakwila nawu mwikali namuchima wamuchidiwu, mwatela kudiza, kuzatisha yuma yimunakudiza Mwiizu dindi, kubalumuka mumuchima, kuhana wumi wenu kudi Nzambi nikupapatishewa mwijina daTata nidaMwana nidaspiritu yajila. (Mat. 28:19, 20; Yil. 3:19) Hadaha mwela dehi mwenimu, indi kwiji mwapompaña mpinji yejima nawaYinsahu jaYehova nawa munakufwila kulondela iji njila.

5. Indi Yeremiya wasonekeli kutalisha hamuchima wawanyi?

⁵ Hela chakwila twalondela dehi iji njila jejima, twatela kutwalekahu kwikala nayililu yayiwahi nikwikala ashinshika. Mazu asonekeli Yeremiya kutalisha hamuchima akutukwasha kwiluka muloña wutwatelela kwilila mwenimu. Tupetulu tukwawu twamumukanda waYeremiya twahoshaña hanyuza yadiñaku hayina mpinji, ilaña sweje-e hamuza wawaYuda hampinji yayuulileña anyanta atanu. (Yere. 1:15, 16) Yeremiya wasonekeli sweje-e hadi amayala, ambanda, nianyana adihanini kudi Yehova. Ankakulula jawu adiheni namuchima wumu kwikala muza wadihana kudi Yehova. (Kwid. 19:3-8) Nawa mumafuku aYeremiya, antu aditejeleli nawu adihanini kudi Nzambi. Ahosheli nawu: “Tiya, tunenzi dehi kudeyi; muloña eyi yeyi Yehova Nzambi yetu.” (Yere. 3:22) Hela chochu, munakutoñojoka nenu adiña namuchima wamuchidinyi?

KOMANA ATELELELI KULADIKA MUCHIMA MUCHIFWIKIJA?

6. Muloñadi chitwatela kufwila kwilukila mwatalishiliyi Nzambi hakuhosha hamuchima?

⁶ Andotolu amakonu anateli kuzatisha makina anakutuñatuñawu kulonda amoni chidi muchima nichiwunakuzata. Ilaña Yehova nateli kwila yuma yabadika, neyi chakoñeliyi mumafuku aYeremiya. Nzambi weluka chikupu kwesekeja namazu indi akwila nawu: ‘Muchima wasweja kudimbana, wadimbana chakubadika yuma yejima, wasweja nikukata, wukutwesha kuwiluka hinyi? Ami Yehova yami nasandujolaña mumuchima kulonda niyinki antu ejima yashikila muyuma yakoñañawu yashikila munyikabu yayuma yelañawu.’ (Yere. 17:9, 10) ‘Kusandujola mumuchima’ hikwabombelamu kushinshika muchima wawenuku, wetaña hadi mabiliyoni asatu neyi chakwila muntu nashikiji yaaka yakusemuka 70 hela 80. Ilaña Yehova wahosheleña hamuchima wachifwikija. Iwu “muchima” watalisha hachekalayi muntu mukachi, kubombelahu yuma yafwilañayi, yitoñojoka yindi, yililu niyikonkwanyi. Mukweti muchima wamuchidiwu. Nzambi nateli kuwushinshika nawa ninenu munateli kuwushinshika chikupu.

7. Indi Yeremiya walumbulwili ñahi chadiña nyichima yawaYudeya amavulu amumafuku indi?

⁷ Hakwila nawu tudishinshiki chachiwahi twatela kudihula netu, ‘Indi aYudeya adiñaku mumafuku aYeremiya adiña namuchima wamuchidinyi wachifwikija?’ Hakwila nawu twakuli, tushinshikenu hamazu azatishiliyi Yeremiya akwila nawu: “niakwamutaña waIsarela nawa hiyayidima munyichima yawu.” Hateneneña amayala amuYudeya alamishiluwuku, muloña wahosheli nindi: “Yehova nindi, Tiyenu, mafuku akenza inakababesha antu ejima aalamishawu dehi, iku saña aduwu nawudima wawu.” Dikwila nawu niamayala aYudeya aalamishiluwu adiña ‘ayidima munyichima.’ (Yere. 9:25, 26) Indi chumichi chatalishili mudihi?

8, 9. Chumanyi chateleleli kwilawu aYudeya amavulu kutalisha hanyichima yawu?

⁸ Twawanaña nsañu yatukwashaña kwiluka mwatalisha mazu akwila nawu ‘ayidima munyichima’ mumazu ayikonkomwenenuwu aYudeya kudi Nzambi nawu: “Fumishenu nyivumbu yawudima wakunyichima yenu; kuchina kuzuwa kwami kuyilendumukila . . . nanoyu  yatama yimwelaña.” Hanu dinu yililu yawu yatama yafumineña kudihi? Yafumineña mukachi kanyichima yawu. (Tañenu Maku 7:20-23.) Eña, kuhitila mudi Yeremiya, Nzambi welukili kwafumineña kutama kwawaYudeya. Nyichima yawu yachinchikili. Yuma yafwilileñawu niyitoñojoka yawu yamuneñesheleña Nzambi. (Tañenu Yeremiya 5:23, 24; 7:24-26.) Nzambi wayilejeli nindi: “Dadikenu mwikali aYehova, fumishenu nyivumbu yawudima wakunyichima yenu.”—Yere. 4:4; 18:11, 12.

⁹ Dichi, aYudeya amumafuku aYeremiya ateleleli kuladika nyichima yawu muchifwikija, dikwila nawu ‘kwalamisha muchima’ neyi cheliluwu antu amumafuku aMosi. (Kuhit. 10:16; 30:6) ‘Kufumisha nyivumbu yakunyichima yawu’ kwatalishili mukuleka yuma yejima yachinchikishili nyichima yawu, dikwila nawu yitoñojoka yawu, yuma yakeñeleñawu hela yafwilileñawu yamutiyishileña Nzambi kutama.—Yil. 7:51.

‘MUCHIMA WAKUMWILUKA’ NZAMBI MAKONU

10. Kwesekeja nachakutalilahu chaDavidi, chumanyi chitwatela kwila?

¹⁰ Twatela kusakilila nankashi kudi Nzambi watukwashaña kwiluka muchima wachifwikija. Hakwikala aYinsahu jaYehova komana twatela kwakamena muchima wetu? Bayi neyi akwaKristu anakwenda munjila yatama hela kwikala ‘yikuyu yatamaku,’ neyi chadiñawu aYudeya amavulu kushankulu. Kwambukaku, ambuña aNzambi makonu ekala antu awunyonji nawa adihana chikupu. Hela chochu, toñojokenu hakulomba kwalombeliyi Davidi kudi Yehova nindi: “Ntali chachiwahi, eyi Nzambi, wiluki muchima wami; ñeseki, wiluki yitoñojoka yami; wumoni neyi mudami mwekala kwenda kwakuluwa.”—Mas. 17:3; 139:23, 24.

11, 12. (a) Muloñadi wejima wetu chitwatela kushinshikila nyichima yetu? (b) Chumanyi chikabula kwilayi Nzambi?

¹¹ Yehova nakukeña nindi wejima wetu tumwiluki nikwikala nachihandilu chesekana nankeñelu yindi. Kutalisha hadi muntu waloña, Yeremiya wahosheli nindi: “Eyi Yehova wamazaza, wesekaña aloña, wamonaña niyitoñojoka ninyichima yawantu.” (Yere. 20:12) Neyi chakwila Wabadika Ñovu washinshikaña nyichima yawantu aloña, komana kwila tudishinshika etu aweni nehi? (Tañenu Masamu 11:5.) Hakudishinshika, hadaha tunateli kumona yililu, yuma yitunakufwila hela yuma yitunakutoñojoka yitwatela kuzatilahu swayi-swayi. Tunateli kwiluka chuma chinaleñeli muchima wetu wuzeyi, ‘nyivumbu yakunyichima yetu,’ yitwatela kufumishaku. Kwila mwenimu kukwikala kuladika muchima muchifwikija. Neyi mwiteja nenu chikuwaha kushinshika muchima wenu wachifwikija, yumanyi yimwatela kushinshikahu? Nawa munateli kuzatilahu ñahi?—Yere. 4:4.

¹² Chuma chitwatela kwiluka dichiche: Bayi tukuhwelela netu Yehova wukutukanjikija kuhimpaku. Wahosheli ‘hayikuyu yayiwahi’ nindi ‘wakayinka muchima wakumwiluka.’ Hahosheli nindi wakayikanjikija kuhimpa nyichima yawuku. Ateleleli kufwila muchima wawuwahi wadi kumwekesha nawu amwiluka Nzambi. Anetu nawa twatela kufwila muchima wamuchidiwu.

13, 14. Munjilanyi muchima wamukwaKristu muwatela kumukatishila?

¹³ Yesu wahosheli nindi: “Kumuchima diku kwafumaña yitoñojoka yatama, niwubanji, niwuvumbi,  nikubajama, niwukombi, niwunsahu wakutwamba, nikutukana.” (Mat. 15:19) Chakutalilahu, neyi mana kwetu yela wuvumbi nawa yabula kubalumuka mumuchima, nateli kujimbesha wuselewa waNzambi haya nyaka. Hela chochu, muntu wunabuli kukoña chiluwa chamuchidiwu niyena nateli kwiteja yitoñojoka yatama kukula mumuchima windi. (Tañenu Matewu 5:27, 28.) Kushinshika yuma yidi mumuchima wetu kunateli kutukwasha. Neyi mushinshika mumuchima wenu, komana mukuwanamu yitoñojoka yatama kutalisha hadi muntu wamumbanda hela weyala, yinateli kumuneñesha Nzambi nawa yimwatela kufumisha mumuchima wenu?

¹⁴ Hela twili netu mana kwetu ‘hajahañanañaku’ ilaña wudi nandulu mumuchima windi chakwila wahela mukwawu mukwaKristu. (Lev. 19:17) Komana wukuzata nañovu kulonda yafumishi yitoñojoka yamuchidiwu yinateli kuleñela muchima windi wuchinchiki?—Mat. 5:21, 22.

15, 16. (a) Shimunenu chakutalilahu chinakumwekesha mukwaKristu chatela kwikalayi ‘chidima mumuchima.’ (b) Muloñadi chimukuhoshela nenu kwikala ‘chidima mumuchima’ kwamuneñeshaña Yehova?

¹⁵ Chamuzañalu, akwaKristu amavulu hiyekala ‘nakukala kwamuchima’ kwamuchidiwuku. Ilaña, Yesu wahosheli ‘hayitoñojoka yatama.’ Iyi hiyitoñojoka hela yililu yinateli kutamisha chihandilu chejima. Chakutalilahu, tunateli kutoñojoka netu kwovwahila antaña jetu kwalema nankashi kubadika chuma chidi chejima. Eña, akwaKristu afwilaña “kukeñañana mwasemwakenawu,” hiyadi neyi antu amavulu abulaña kukeñañana munanu ‘mafuku akukumininaku.’ (2 Tim. 3:1, 3) Hela chochu, tunateli kubadisha nzovu iyoña. Antu amavulu atoñojokaña nawu “mashi alema kubadika menji.” Dichi, anateli kuhakwilaku hela kukundama kudi antaña chikupu, nakusweja kwiñilamu chikupu neyi ntaña yawu anamuneñeshi. Toñojokenu hayuma yeliluwu amana kwaDina hamuloña wakusweja kuhila. (Kutach. 34:13, 25-30) Nawa toñojokenu hayuma yadiña mumuchima waAbisalomi yamuletesheli yajahi mana kwindi wakuwanamu Amoni. (2 Sam. 13:1-30) “Yitoñojoka yatama” diyi yaletesheli awa antu akoñi iyi yuma yatama.

¹⁶ Eñañi, akwaKristu alala hiyajahañanañaku. Hela chochu, komana atela kuhembela nkunyi mana kwetu hela muhela waneñesheli ntaña yawu hela wunakufwikijilawu nawu diyi welili mwenimu? Neyi mukwawu mukwakwitiya wunakufwikijilawu nawu diyi wakabishili ntaña yawu yayimwekeshela chisambu, anateli kukaana hela anateli kuleka kumumwekeshela chisambu. (Heb. 13:1, 2) Yitoñojoka yamuchidiwu yatama nikubula chisambu yakeñekaña kuzatilahu swayi-swayi, muloña  yamwekeshaña nawu hitukweti kukeñaku. Eñañi, Mukwakushinshika nyichima nateli kwiluka nindi ‘hinyichima yawudima.’ (Yere. 9:25, 26) Anukenu antu akonkomwenenuwu kudi Yehova nawu: “Fumishenu nyivumbu yawudima wakunyichima yenu.”—Yere. 4:4.

CHAKWIKALA ‘NAMUCHIMA WAKUMWILUKA’ NZAMBI NIKUWUHEMBA

17. Kumutiya Yehova woma kunateli kutukwasha ñahi kwikala namuchima wakutiyilila?

¹⁷ Indi neyi mushinshika muchima wenu wachifwikija nawa muwana nenu hiwunakutiyilila nankashi kufumba kwaYehova nawa wunashiki hachipimu chakwikala ‘wawudima’? Hadaha mumuchima mwawenumu woma wawantu, kufwila kuya mpuhu hela chihandilu chachiwahi indi kwiji chililu chakudikaña hela kudimena. Bayi mutoñojoka nenu yenu atachi kutiya mwenimuku. (Yere. 7:24; 11:8) Yeremiya wasonekeli nindi aYudeya abulili kwikala ashinshika mumafuku indi adiña ‘namuchima wawinyi nikudikaña.’ Wabombeleluhu nindi: ‘Hiyelaña munyichima yawu nawu Yehova Nzambi yetu watwinkaña nvula, niyakusambila, tumutiyenu womaku.’ (Yere. 5:23, 24) Chumichi chinakutuleja nawu hakwila tufumishi ‘muvumbu wawudima wakumuchima,’ twatela kumutiya Yehova woma nankashi nikumuhameka. Kwikala nawoma wamuchidiwu kunateli kutukwasha kwikala namuchima wakutiyilila yuma yinakukeñayi Nzambi nindi twili.

18. Chikaninwinyi chakaniniyi Yehova antu amuchitiyañenu chachiha?

¹⁸ Nawa tunateli kuzatila hamu naYehova hampinji yinakutwinkayi ‘muchima wakumwiluka.’ Mwamweni, ichi dichuma chakanayi kwilila awayishewa muchitiyañenu chachiha nindi: “Nakasha nshimbi jami muyitoñojoka yawu, nakajisoneka munyichima yawu. Nakekala Nzambi yawu, niwena akekala antu ami.” Indi hakumwiluka chikupu wahosheli nindidi? Wabombeleluhu nindi: “Hiyakadilejaleja nawa cheñi, iwu nakuleja mukwawu, iwu nakuleja mana kwindi, nindi Ilukaku Yehovaku. Muloña akañiluka wejima wawu, kufumisha kudi wakadi kulema ndo nikudi wasweja kulema. Muloña ami nakayanakena kuluwa kwawu, ninshidi yawu hinakayanuka nawa cheñuku.”—Yere. 31:31-34. *

19. Yumanyi yayiwahi yatalilañawu akwaKristu alala?

¹⁹ Hela chakwila mwatalilaña kuhetelamu munichi chitiyañenu chachiha mwiwulu hela hamaseki, mwatela kumwiluka Yehova nikwikala hakachi kawantu jindi. Chuma chatachi chimwatela kwila hakwila nawu mukahetelumu chiña ayanakena nshidi jenu kuhitila mwifutu danyiloña daKristu. Chikuma chakwila nawu anateli kuyanakena chatela kuyileñela mwanakeneña akwenu, kubombelahu niantu imwahela nankashi. Hakwila nawu mwikali namuchima wawuwahi mwatela kufumisha yikatu yejima yimukweti mumuchima wenu. Bayi neyi mwakamwekesha hohu nenu mwamukeña Yehovaku, ilaña mwakamwekesha cheñi nawu mwamwiluka chiwahi nankashi. Mwakekala neyi ana antu alejeliyi Yehova kuhitila mudi Yeremiya nindi: “Mwamba kankeñakeña, mwamba kanwana neyi mwakankeñakeña nanyichima yenu yejima. Ninami akanwanaña kudenu.”—Yere. 29:13, 14.

[Tumazu twaheshina]

[Malwihu aKuzatisha haKudiza]

[Mwevulu wudi hefu 11]

Kushinshika muchima wetu nikuleka kufwila yuma yatama kukaleta nkisu