Tambwilenu Kukundeja Kulonda Ninenu Mukundeji Amakwawu

Hakwikala antu abula kuwanina, wonsu wetu twaholokelaña muyikatu, amakwawu aholokela mukankati kahamesu bwi-i. Neyi tuholokela mukukala kwamuchidiwu, twomikaña ñahi?

Chuma chalema chatukwashaña kuumika hikukundeja kwatukundejañawu antaña, amabwambu niakwetu akakwitiya.

Mazu amawahi, anateli kuhoshayi ibwambu detu adi neyi manji amawahi okaña nawa anunkila. (Yish. 16:24; 18:24; 25:11) Ilaña akwaKristu alala hiyatoñojokaña hakuyikundeja hohuku. Afwilaña ‘kukundeja akwawu adi mulukadi nakukundeja kwanayikundejuwu nachu kudi Nzambi.’ (2 Kor. 1:4; Luka 6:31) Chuma chamuchidiwu chamumwekeneni Antonio, nkoñi wankambi muMexico.

Chamukwatiluwu nachikatu chalymphoma, chikatu chakansa yamumashi, Antonio waneñeli chikupu. Hela chochu, wazatili nañovu hakwila yabuleña kuneña nankashi. Munjilanyi? Wanukileña tumina twaWanta nawa wembilaña kulonda yatiyi mazu adi mukamina nikutoñojokahu. Kulomba nezu datiyakana nikutaña Bayibolu nikwena kwamukundejeli nankashi.

Hela chochu, Antonio weluka nindi, wukwashu weneni wafumini kudi akwawu akwakwitiya. Wahosheli nindi: “Ami niñodami hampinji yitwaswejeleña kwakama, twatambikileña ntaña yetu wekala eluda muchipompelu netu yenzi kulonda tulombeli hamu. Ichi chatukundejeleña nikutuletela kuwunda.” Watwalekeluhu nindi, “Kusakililaku hama hawukwashu wachisaka chetu niakwetu akwakwitiya, twatwesheli kutondolwela yitoñojoka yatama mumpinji yantesha.” Wahamekeli nankashi hakwikala nawamabwambu amawahi nawa akamenaña!

Wukwashu wukwawu wutwawanaña mumpinji yamakabi hispiritu yajila yatukanawu. Kapostolu Petulu wahosheli nindi spiritu yaNzambi yajila ‘hichamukunkulu.’ (Yil. 2:38) Chumichi chamwekeni hampinji yawayishiluwu antu amavulu haPentekosta 33 C.E. Hela chakwila Petulu wahosheleña hadi awayishewa, wonsu wetu tunateli kutambwila spiritu yajila. Ichi chawana hichamanañaku, komana kwila tutwalekahu nakulomba spiritu yajila kulonda tutambwileña chikupu nehi?—Isa. 40:28-31.

SWEJENU KWAKAMENA ANTU ANAKUKABAKANA

Kapostolu Pawulu womikili makabi amavulu, mpinji yikwawu akeñeleña nikumujaha. (2 Kor. 1:8-10) Ilaña, Pawulu haswejeli kwakama hakufwaku. Chelukiliyi nindi Nzambi wamwakameneneña chamukundejeli. Wasonekeli nindi: “Amukiswili Nzambi yaMwanta wetu Yesu Kristu, yowu Tata yindi, diyi Tata wavulishaña luwi, Nzambi wakukundeja kwejima, watukundejaña mulukadi lwetu lwejima.” (2 Kor. 1:3, 4) Pawulu hetejeli kukala kwamweneñayi kumuzeyeshuku. Ilaña, kweseka kwomikiliyi kwamukwashili kwikala naluwi, kulonda yatweshi kukundeja amakwawu mumpinji yamakabi.

Antonio chakoleliyi watachikili cheñi kuzata mudimu wakwenda. Mpinji yejima watiyileña kuwaha kukundeja akwawu akakwitiya, ilaña yena niñodindi azatili nañovu kulonda ahempuleña nikukolesha antu akata. Chakutalilahu, hanyima yakuhempula mukwaKristu wadiña nakukabakana nakankati keneni, Antonio welukili nindi iwu manakwetu hakeñeleña kuya nakupompaku. Antonio walumbulwili nindi, “Bayi neyi hamukeñeli Yehova hela amana kwinduku, ilaña chikatu chamuneñesheleña hama chakwila wadimweneña neyi wamukunkulwayi.”

Chuma cheliliyi Antonio hakukolesha mana kwetu wakata wamulejeli nindi yalombi hachidika chaloñesheluwu katataka. Hela chakwila mana kwetu watiyili nindi hanateleluku, wetejeli nindi wukulomba. Antonio washimwini nindi: “Walombeli chachiwahi nankashi, nawa hanyima yakulomba yitoñojoka yindi yahimpili. Watachikili kudimona nindi walema.”

Eñañi, wonsu wetu tweluka chichatiyakanaña hakwila wuumiki neyi wunakuhita mumakabi asweja hela amweseka. Ilaña kwesekeja nachahosheliyi Pawulu, kuhita mumakabi kwatwinkaña ñovu yakukundeja amakwawu adi mukukala. Dichi, twatela kusha maana kumakabi anakumonawu akwetu akwaKristu nikumwimbujola Nzambi yetu, Yehova, kuhitila mukwikala akwakukundeja amakwawu.