Yehova—diyi Iluña Detu Mwakushakama

“Eyi Mwanta, yeyi wunekali mwetu mwakushakama, kumakiñu ejima mwamba kavwalikilañawu antu.”—MAS. 90:1.

MUKWAKULA NENUDI?

Indi Yehova wekalili ñahi “mwakushakama” amayala ashinshika akushankulu?

Chumanyi chitunateli kudizila kukashinshi kaAbarahama?

Tunateli kumwekesha ñahi netu Yehova diyi mwetu “mwakushakama”?

1, 2. Indi ambuña aNzambi atiyaña ñahi kutalisha hakanu kaayi, nawa munjilanyi mwekalilawu namwakushakama?

  KOMANA mwekala akasunuka mukanu kaayi kamakonu? Neyi nehi, dikwila nawu mwatiyaña neyi chatiyaña ambuña aYehova amakwawu. Hadi yaaka yayivulu yinahitihu, antu ejima amukeña Yehova atiyaña neyi enyi mukanu kaayi. Chakutalilahu, hiyadiña nakubuuka-buukawu mwituña daKenani, akwakudifukula aNzambi ashinshika ‘etejeli hatooka nawu adiña enyi nawa akwakwenda mwambala.’—Heb. 11:13.

² Chochimu, atumbanji twaKristu awayishewa, akweti ‘wenimbu wawu wamwiwulu,’ adimonaña nawu ‘hiyenyi nawa akwakwenda mwambala’ mukanu kaayi. (Fwi. 3:20; 1 Pet. 2:11) ‘Nyikoku yacheñi’ yaKristu niyena “hiyampata yamunu mwishinaku, neyi [Yesu chabulili kwikalayi] wampata yamunu mwishinaku.” (Yow. 10:16; 17:16) Hela chochu, antu jaNzambi akweti “mwakushakama.” Dichi, twadiluñishaña kwikala mwiluña dachifwikija mwekala kukiñewa nikukeña, nawa iluña denidi twadimonaña kuhitila muchikuhwelelu. Mosi wasonekeli nindi: “Eyi Mwanta, yeyi wunekali mwetu mwakushakama, kumakiñu ejima mwamba kavwalikilañawu antu.” (Mas. 90:1) Indi Yehova wekalili ñahi “mwakushakama” ambuñindi ashinshika kushankulu? Wekala ñahi “mwakushakama” antu atumbawu ijina dindi makonu? Nawa wakekala ñahi iluña dakiñewa mwakushakama kumpinji yakumbidi?

YEHOVA WADIÑA “MWAKUSHAKAMA” AMBUÑINDI AKUNYIMA

3. Indi Yehova anamufwanisha kuyumanyi haMasamu 90:1, nawa muloñadi?

³ Neyi chochalumbulula mazu amavulu muBayibolu, haMasamu 90:1 hekala mutu wansañu, wachifwikija nichikuma chadifwana. Mutu wansañu hiYehova. Chifwikija dimwakushakama, hela iluña mwakushakama.  Yehova wukweti yuma yayivulu yadifwana nanidi iluña. Chakutalilahu, Yehova wakiñaña antu jindi. Chumichi chadifwana nachikuma chakwila nawu hikukeña. (1 Yow. 4:8) Wekala cheñi Nzambi wakuwunda, waleñelaña antu jindi ashinshika ‘kushakama chakadi kutiya woma.’ (Mas. 4:8) Chakutalilahu, shinshikenu hachazatiliyi nawambuñindi ashinshika, kutachikilahu naAbarahama.

4, 5. Indi Nzambi wekalili ñahi “mwakushakama” mwaAbarahama?

⁴ Tunateli kufwikija chatiyiliyi Abarahama, henohu achidi kumutena nawu Abarama, hamulejeluwu kudi Yehova nawu: “Nyamukaku mwituña denu, nikudi antaña jeyi . . . wuyi mwituña dinakakuleja.” Neyi Abarama watiyili woma, chakadi nikujina wakoleli namazu amakwawu aYehova akwila nawu: “Nakakwila muza weneni, nakakukiswila nkisu, ijina deyi nakaditohesha . . . Ana akakukiswila nkisu, ami nakayikiswila nkisu; ona wakakushiña, ami nakamushiña.”—Kutach. 12:2-3.

⁵ Kwesekeja nanawa mazu, Yehova wadilishili yomwenidi kwikala mwakushakama Abarahama nianyanindi. (Kutach. 26:1-6) Yehova wakoñeli mwakaniniyi. Chakutalilahu, wamukañesheli Fwaro wakuEjipitu niMwanta Abimeleki wakuGerari kubula kumwila Sara katama nikumujaha Abarahama. Wakiñili Isaka niRebeka munjila yoyimu. (Kutach. 12:14-20; 20:1-14; 26:6-11) Twatañaña nawu: “[Yehova] hetejeli muntu kuyila chatamaku; mwalala hela anyanta ankanu wayihosholeli hanyijimba yawu; Nakuyila nindi, Bayi mukwataña chikasa hadi antu ami akuwayisha dehi manjuku, hela atuprofwetu twami bayi muyilaña chuma chatamaku.”—Mas. 105:14, 15.

6. Indi Isaka wamulejeli Yakoba kwiladi, nawa watela watiyili ñahi?

⁶ Hakachi kanawa atuprofwetu hadiña Yakoba mwizukulu waAbarahama. Chiyashikili mpinji yakwila nawu Yakoba yasumbuli, tata yindi Isaka wamulejeli nindi: “Bayi wakasumbula mumbanda wamunu muKenanuku. Nyamukaku, wuyi kuPadani Arama, kwaBetuweli, nkaka yeyi wavweli mama yeyi, wusumbwiluku mwana kamandumi yeyi Labani.” (Kutach. 28:1, 2) Yakoba wamwovwahilili Isaka. Yakoba washili chisaka chindi, chashakamineña muKenani, nakwenda nkawindi lwendu lwamakilomita amavulu nakuya kuHarana. (Kutach. 28:10) Hadaha wajinokeleña nindi: ‘Nakashakamaku nakushika mpinjinyi? Komana amandumi akatambwila chiwahi nakunyika mumbanda wamwakamaña Nzambi?’ Neyi chakwila Yakoba wakamini, chakadi nikujina walekeli kwakama chashikiliyi kuLuzi hadiña makilomita 100 kufuma kuBerisheba. Chumanyi chamwekeni kuLuzi?

7. Indi Nzambi wamukolesheli ñahi Yakoba kuhitila muchilota?

⁷ Hadiñayi kuLuzi, Yehova wamwekeni  kudi Yakoba muchilota nakumuleja nindi: “Tala, ami nidi neyi, nakakuhembaña kwejima kuwakaya, nakakufuntisha cheñi mwituñidi; hinamba kakushiyaku, chiña nakela mwejima munakuleji to-o.” (Kutach. 28:15) Awa mazu amawahi atela amukolesheli nankashi Yakoba. Hanyima yakumuleja awa mazu, Yakoba watela wadikasili mumuchima windi kulonda yamona chikashikijayi Yehova yuma yamukaniniyi. Neyi mwashiya itala, hadaha hamuloña wakuya nakuzatila mwituña dacheñi, mwatela muneluki chatiyiliyi Yakoba. Hela chochu, chakadi nikujina munamoni Yehova chayakamenañayi.

8, 9. Munjilanyi Yehova mwekalililiyi “mwakushakama” Yakoba, nawa chumanyi chitunateli kudizilaku?

⁸ Yakoba chashikiliyi kuHarana, mandumi yindi Labani wamutambwilili chiwahi nawa wamwinkeli Leya niRacheli kwikala añodi jindi. Hela chochu, mukuhita kwampinji, Labani wesekeli kumudila Yakoba mabula hamutu kuhitila mukuhimpa nfwetu yindi mapampa ikumi. (Kutach. 31:41, 42) Ilaña, Yakoba womikili yuma yejimiyi, nakukuhwelela nindi Yehova wukutwalekahu kumwakamena, nawa Wamwakameneni. Mwamweni, Nzambi chamulejeleñayi Yakoba kufunta kuKenani, iwu nkakulula waheteli ‘nyikanka yayeni yawayimuna, nianduñu awambanda nianduñu awamayala, niangameli, niayimbulu.’ (Kutach. 30:43) Hakusakilila nankashi, Yakoba walombeli nindi: “Luwi lweyi lwejima ninsañu yeyi yalala yejima yiwunanmwekesheli ami kambuñeyi, ami hinateluku kushikilamu nehi; ami nazambukili Yodana iwu kwanamutondu wami, hakwila ichi nela dehi niyendu yiyedi.”—Kutach. 32:10.

⁹ Eñañi, kulomba kwalombeliyi Mosi kwadiña kwalala, nindi: “Eyi Mwanta, yeyi wunekali mwetu mwakushakama, kumakiñu ejima mwamba kavwalikilañawu antu.” (Mas. 90:1) Awa mazu azatikaña nimakonu, muloña kudi Yehova “hikwekala kubalumuka, hela mwevulu wakushetumukaku,” watwalekañahu kwikala wamuwahi nawa mwakiñewa mwakushakama antu jindi ashinshika. (Yak. 1:17) Tushinshikenu hadi Yehova chekalayi mwakushakama makonu.

YEHOVA WEKALA MWETU “MWAKUSHAKAMA” MAKONU

10. Muloñadi chitunateli kukuhwelela netu Yehova wukutwalekahu kwikala mwakushakama ambuñindi mwakiñewa?

¹⁰ Fwikijenu chumichi: Twili netu munakuhana wunsahu muchota chanyiloña kutalisha hadi iyala wababala nankashi nawa wukweti ñovu. Hisakutwamba wababala nawa mbanji, nawa wukweti antu amuzatilaña mukaayi kejima. Mukutiya ñahi neyi mwidika hanji yachota hanyima yakusompa? Komana mukwikala akasunuka? Kwakulehi! Chakadi nikujina mukukeña nenu ayikiñi. Chumichi chinakulumbulula chihandilu chikwetuwu ambuña aYehova, amwimenañaku Yehova nawa amusawulaña chilumbu muneni, Satana. (Tañenu Chimwekeshu 12:17.) Komana Satana watwesha kumwenesha antu jaNzambi? Inehi! Twatwalekañahu kukola kuspiritu, muloña: Yehova diyi chiswamu chetu, mwetu “mwakushakama,” sweje-e munanu mafuku akukuminina. (Tañenu Isaya 54:14, 17.) Hela chochu, Yehova hanateli kwikala mwetu mwakushakama neyi tumwiteja Satana kutuhuñumuna nakutufumisha mwiluña detu mwakushakamaku.

11. Chumanyi chitunateli kudizilaku kudi ankakulula?

¹¹ Tudizenu cheñi chikuma chikwawu kudi ankakulula. Hela chakwila ashakamineña mwituña daKenani, ambukiluku nawantu adiña munidi ituña, adiña nayililu yatama yaheleluwu. (Kutach. 27:46) Adiña amayala alondeleleña nshimbi chakwila hiyakeñekeleña kwikala nandandanda yanshimbi hakwiluka chaloña nichatamaku. Elukili yuma yakeñayi Yehova niyuma yahelayi. Chineli Yehova wadiña mwawu  mwakushakama, hiyakeñeleña kukundama kwakwihi nankashi netuñaku. Ilaña, adambwiluku chikupu. Atwimikila chakutalilahu chachiwahi nankashi! Komana mwafwilaña kwimbujola ankakulula ashinshika hakutonda antu akudikunda nawu niyisela? Chawushona, amakwawu mukachi kachipompelu chawakwaKristu amwekeshaña nawu adiluñishaña mukaayi kaSatana. Neyi chakwila mpinji yikwawu dichimwatiyaña, mwatela kulombelahu. Anukenu nenu, kanu kaayi kaSatana. Kaayi kamwekeshaña yililu yindi yatama, yakudikeña.—2 Kor. 4:4; Efwes. 2:1, 2.

12. (a) Indi Yehova waloñeshelaña ñahi aketala dindi dakuspiritu? (b) Mwatiyaña ñahi hayuma yeniyi yaloñeshañayi Nzambi?

¹² Hakwila nawu tudikañi natufuta twaSatana, twatela kuzatisha chikupu yuma yakuspiritu yaloñeshelañayi Yehova aketala dindi achikuhwelelu, antu ashakamaña mudi yena. Yumiyi yabombelamu kupompa kwawakwaKristu, kudifukula kwachisaka, ‘niyamukunkulu mudi antu,’ atubiña atondawu kudi Nzambi kulonda atukundejeña nikutukwasha hampinji yitunakumona kukala kwamuchihandilu. (Efwes. 4:8-12) Mana kwetu George Gangas wadiña membala waMwizaza Dalombolaña wazatili hadi yaaka yayivulu, wasonekeli nindi: “Neyi nidi hakachi [kawantu jaNzambi] nekalaña wakasunuka nachisaka chami, muparadisa yakuspiritu.” Anenu nawa dichimwatiyaña?

13. Chumanyi chalema chitunateli kudizila kumazu ekala haAheberu 11:13?

¹³ Chililu chikwawu chitwatela kudizila kudi ankakulula hikudihana kwawu kwakwikala ambukaku nawantu adiña muchituñilu chawu. Neyi chitwadiza  muparakalafu 1, ‘etejeli hatooka nawu adiña enyi nawa akwakwenda mwambala.’ (Heb. 11:13) Komana munadikasi mumuchima nakwikala ambukaku nawantu amuchituñilu chenu? Hela chochu, kwila mwenimu hichapelaku. Ilaña tunateli kwila mwenimu kuhitila muwukwashu waNzambi niakwetu akwaKristu. Anukenu nenu, himudi nkawenuku. Antu ejima anakukeña kumuzatila Yehova azuñaña naSatana nikaayi kindi. (Efwes. 6:12) Hela chochu, tunateli kushinda iyi njita neyi tumukuhwelela Yehova nawa yekala mwetu mwakushakama mwakiñewa.

14. Indi ambuña aYehova adiñi nakutalila ‘ñandanyi’?

¹⁴ Chuma chikwawu chalema dichenichi: Imbujolenu Abarahama kuhitila mukushinshika hawuloku wakumbidi. (2 Kor. 4:18) Kapostolu Pawulu wasonekeli nindi Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Heb. 11:10) Iyi “ñanda” yadiña hiWanta wawuMesiya. Hela chochu, Abarahama wateleleli kutalila iyi “ñanda.”  Munjila yitwabula kwiluka. Chayinu mpinji, iwu Wanta wunakuyuula mwiwulu. Chuma chabadika chakwila nawu, wunsahu wawuvulu wunakumwekesha nawu iwu Wanta keña wutachiki kuyuula iseki dejima. Komana chihandilu chenu chamwekeshaña nawu mwakuhwelela mudi iwu Wanta? Komana mwatwamijañaku iwu Wanta muchihandilu chenu nikwikala ambukaku nakanu kaayi?—Tañenu 2 Petulu 3:11, 12.

YEHOVA WAKATWALEKAHU KWIKALA MWETU “MWAKUSHAKAMA”

15. Chumanyi chakamwekena antu kumbidi akuhwelela mukanu kaayi?

¹⁵ Chineli kaayi kaSatana kadi kwakwihi nakumana, “yihuñu” yakanu kaayi yikuswejelaku. (Mat. 24:7, 8) Chakadi nikujina yuma yakaswejelaku kutama hampinji yalukadi lweneni. Yuma yamukaayi yakakisika nawa antu akakeña kupulwisha wumi wawu. (Hab. 3:16, 17) Hamuloña wakuyumbwañila, antu akakeñakeña ‘mwakubatama mumayeñu nimumalola akumapidi.’ (Chim. 6:15-17) Ilaña kwosi iyeñu dakayikiña indi kwiji mutayi weneni wawakwakuselujola hela mutayi wajipolitikuku.

16. Twatela kumona ñahi chipompelu chawakwaKristu, nawa muloñadi?

¹⁶ Hela chochu, antu jaYehova akatwalekahu kudiluñisha kukiñewa hamuloña ‘wakushakama’ mudi Yehova Nzambi. Kufwana kaprofwetu Habakuki ‘akaluñila mudi Yehova. Akatiya kuwaha mudi Nzambi yawamwinu wawu.’ (Hab. 3:18) Indi Yehova wakekala ñahi “mwakushakama” haniyi mpinji yakala? Twatela kutalila kulonda twakadimweni. Ilaña kutalisha hachumichi twatela kukuhwelela netu: Kufwana aIsarela hampinji yedikileñawu, “izaza deneni” dakatwalekahu kwikala dadiloñesha nawa dasoñama nakutalila wunlomboli waNzambi. (Chim. 7:9; tañenu Kwidika 13:18.) Iwu wunlomboli wakenjila mukuloñesha, hadaha kuhitila muntanjikilu yachipompelu. Mwamweni, yipompelu yayivulu yamukaayi kejima yakundama ‘tupeka twamukachi’ twakiñewa twashimunawu haIsaya 26:20. (Tañenu.) Komana mwalemeshaña kupompa kwachipompelu? Komana mwanyakalaña kuzatisha kufumba kwaYehova kwatufumbañayi kuhitila muntanjikilu yachipompelu?—Heb. 13:17.

17. Munjilanyi Yehova mwekalilayi “mwakushakama” ambuñindi ashinshika afwa dehi?

¹⁷ Hela niantu anateli kufwa ashinshika henohu lukadi lwasweja kanda lutachiki akiñewa kudi Yehova, wekala mwawu “mwakushakama.” Munjilanyi? Chelili hanahiti dehi yaaka yayivulu kufuma hafwiluwu ankakulula ashinshika, Yehova wamulejeli Mosi nindi: “Yami Nzambi . . . yaAbarahama, Nzambi yaIsaka, Nzambi yaYakoba.” (Kwid. 3:6) Hanyima yakufuntuluka mumazu ahosheliyi Mosi, Yesu wabombeleluhu nindi: “Yena hiNzambi yawafuku, hiNzambi yawamomi; muloña ejima amuhandilaña yena.” (Luka 20:38) Mwalala, Yehova wamonaña antu jindi afwili ashinshika nindi achidi amomi, chakadi nikujina wena akasañuka.—Mukwa. 7:1.

18. Indi Yehova wakekala ñahi “mwakushakama” antu jindi munjila yadimena mwituña dadiha?

¹⁸ Mwituña dadiha didi hambidi, Yehova wakekala “mwakushakama” antu jindi munjila yikwawu. Mukanda waChimwekeshu 21:3 wahosha nawu: “Tiya, tabanaka yaNzambi hiyidi nawantu; yena wakashakama nawu.” Chatachi, Yehova wakashakama nawantu jindi ahamaseki kuhitila mudi Kristu Yesu. Hakumana kwayaaka ikombakaji, Yesu wakalubula Wanta kudi Tata yindi, hanyima yakumanisha kwila nkeñelu yaNzambi hanu hamaseki. (1 Kor. 15:28) Kuhiñahu, antu awanina hiyakakeña Yesu kwikala ihaku dawu; muloña Nzambi wakekala nawu. Tunakutalila yuma yayiwahi nankashi kumbidi. Dichi, chayinu mpinji tufwilenu kwimbujola ankakulula ashinshika akushankulu kuhitila mukumwiteja Yehova yekali mwetu “mwakushakama.”

[Malwihu aKuzatisha haKudiza]

[Mwevulu wudi hefu 20]

“Hinamba kakushiyaku”

[Mwevulu wudi hefu 22]

Añelu jaNzambi akwashaña nikukiña ambuñindi