KOMANA MWELUKA?
KOMANA MWELUKA?
Komana tembeli yamuYerusalema ayituñulwili hanyima ya 70 C.E.?
YESU wahosheli nindi kwosi ilola nidimu damutembeli yaYehova dakashala danañamana helola dikwawuku, iwu wuprofwetu washikijeweli hampinji yelili amashidika awaRoma alombweleñawu kudi Titusa ajilumuni Yerusalema mu 70 C.E. (Mat. 24:2) Chimwahitili yaaka, Mwanta Julian wafuukwiluhu kutuñulula tembeli.
Julian amutena nawu diyi mwanta wakukumishaku wawasenji muRoma. Iwu mwihwa kaConstantine Muneni amudizishili shikola yatenañawu nawu shikola yawakwaKristu. Ilaña, hanyima yakumutena nawu himwanta mu 361 C.E., wakanini shikola hatooka niwuKristu watama wadiña mumafuku indi nakulondela ntañishilu yawasenji. Munyikanda yansañu yakunyaka amutenaña nawu “Mukwakusekesha.”
Julian waheleli nankashi wuKristu. Chuma chimu chaleñeleli chakwila nawu hadiñayi nayaaka yakusemuka yitanu nachimu, añimenu jawakwaKristu ajahili atata yindi niantaña jindi awamayala. Kwesekeja nawakwakusoneka nsañu yakunyaka yamachechi, ahosheli nawu Julian wakolesheli aYudeya kutuñulula tembeli yawu, nakukuhwelela nawu kwila mwenimu kukumwekesha nawu Yesu wadina hikaprofwetu wakutwamba. *
Hitunateli kujinooka netu Julian wakeñeleña nindi yatuñululi tembeluku. Akwakusoneka nsañu yakunyaka ajinokaña neyi chakwila mwalala watachikili mudimu wakutuñulula nawa neyi dimu, chumanyi chaleñeleli mudimu wakutuñulula awulekeleli hakachi. Hela chochu, kudi chuma chimu chaleñeleli. Julian amujahili chimwahitili chaaka chimu natukweji kufuma hamudyishiluwu wanta, nawa dihakuminini mudimu windi.
[Tumazu twaheshina]
^ Yesu hahosheli nindi tembeli hiyamba kayituñululaku, ilaña akayijilumuna, nawa ayijilumwini mu 70 C.E.
[Mwevulu wudi hefu 32]
Iluña datembeli nimwevulu wunakumwekesha tembeli chiyateleli kumwekana mumafuku aYesu
[Dayagiramu]
Musoña Welola Danjiñumuki dashala hampidi yatembeli
[Mazu aKusakilila]
Mwevulu: Todd Bolen/BiblePlaces.com
