NSAÑU YACHIHANDILU

Twazatili Yaaka 50 muMudimu Wampinji Yejima Kwakwihi naArctic Circle

Ashimwini aili ni Annikki Mattila

Twalejeli ibwambu detu wazatileña mudimu wakushimwina wampinji yejima netu: “Wunatweshi kuzata mudimu wawupayiniya. Anvwali jeyi ejima adi muchalala, nawa anateli kukukwasha.” Wakwili nindi: “Tiyaña, wonsu wetu tukweti Tata yetu wumu.” Kudi chikuma chalema chitwatela kudizila kumazu ahosheliyi chakwila nawu: Tata yetu wamwiwulu wakamenaña ambuñindi nawa wayikoleshaña. Eñañi, yuma yatumwekenaña muchihandilu yamwekeshaña nawu awa mazu alala.

 TWASEMUKILILI hafamu yachisaka chawanyana ikumi kukabeta kaluwunda kaOstrobothnia, muFinland. Chihandilu chetu chakuwansi chaluwankeni naNjita Yakaayi Yamuchiyedi. Hela chakwila twashakamineña kwakulehi nankashi nakwasilileñawu njita, twelukili netu antu adiña nakukabakana. Chiyasiluwu nyitendanzumbu hanyisumba yiyedi yadiña kwakwihi, twamweni muzuzu wakesi mwiwulu nawufuku. Anvwali jetu atulejeli kuswama etu anyana neyi tumona ndeki jinakutuuka mwiwulu. Dichi, yayetu weyala, Tauno chatulejeliyi haparadisa yahanu hamaseki mwakabula wuñanji waheña, twazañaleli nankashi.

Tauno wadizili chalala chamuBayibolu hadiñayi nayaaka 14 yakusemuka munyikanda Yawatudizi aBayibolu. Njita Yakaayi Yamuchiyedi chiyatachikili, wakaanini kwiñila mudimu wawushidika muloña wachinleji chindi chadizishewa naBayibolu nawa amukasili mukaleya. Amuyandishili chikupu mukaleya. Chumichi chamuleñeleli yafuukuluhu kumukalakela Yehova, nawa hanyima yakumufumisha mukaleya watwalekeluhu kudikita chikupu mumudimu wakushimwina. Chakutalilahu chachiwahi chamana kwetu chatukolesheli kuya kukupompa kwawaYinsahu mumukala wadiña kukamwihi. Twayileña cheñi nikupompa kwamaneni, hela chakwila twazatileña nañovu kulonda tuwani mali akwendela hakuya kukupompa kwamaneni. Twachimineña yakuvwala yawantuñi netu, twadimineña sapoli nawa twakumwineña nyikabu yatenañawu nawu berries. Chineli twadiña nanyidimu yayivulu hafamu, kakavulu hitwapompeleleña hamuku, twadihimpashanineña.

Chalala chitwadizili hadi Yehova ninkeñelu yindi chatuleñelaña kumukeña chikupu nawa twafuukwiluhu kudihana kudi yena. Mu 1947 wonsu wetu twamwekesheli kudihana kwetu kuhitila mukupapatishewa, Annikki wadiña nayaaka 15 nawa Aili wadiña nayaaka 17. Muheletu wamumbanda Saimi niyena wapapatisheweli muchaaka chochimu. Twadizileña cheñi Bayibolu namuheletu Linnea, wadiña wasumbuka. Yena nichisaka chindi ekalili aYinsahu jaYehova. Hanyima yakupapatishewa, twemikili chikonkwanyi chakuzata mudimu wawupayiniya, kuzataku (wupayiniya wakukwasha) hakapinji kantesha hela mumpinji mumpinji.

KUTACHIKA MUDIMU WAMPINJI YEJIMA

Mu 1955, twabuukilili kumusumba waKemi wadiña kukabeta kaluwunda. Hela chakwila wonsu wetu twazatileña nyidimu yakumujimba, twadiña nampwila yakwikala apayiniya ilaña twachinineña netu hitukutwesha kuwana yuma yakudikwasha nachuku. Twatoñojokeli netu twatela kusambila kuhemba mali. Iyi diyi mpinji yitwahanjekeli namuhela wazatileña wupayiniya itwatena hewulu. Ichi chatukwashili kwiluka netu kumukalakela Yehova mumudimu wampinji yejima hikwashindamena hohu hakwikala namali hela hawukwashu wafumaña kuchisaka chetuku. Chuma chabadika kulema hikushindamena hadi Tata yetu wamwiwulu.

Hayina mpinji twadiña namali amavulu akudikwasha nachu hadi tukweji tuyedi. Dichi muMay 1957, iku tudi nawoma munyichima twasonekesheli kuya nakuzatila wupayiniya kuPello, mbaka yamuLapland, kukabeta kaluwunda kaFinland. Hanyima yatukweji tuyedi, twachidiña namali etu ejima, dichi twasonekesheli  netu tuzatuku cheñi wupayiniya hadi tukweji tuyedi. Chimwahitili tukweji tuyedi, mali ejima twachidiña nawu. Dichi twelukili chikupu netu Yehova nateli kutwakamena. Chimwahitili yaaka 50 yitwazatili mudimu wawupayiniya, mali itwahembeli twachidiña nawu! Chitwanuka yuma yakunyima, twatiyaña neyi kwiji Yehova natukwati kumakasa nakutuleja nindi: “Bayi wutiya womaku, nukukukwashañaku.”—Isa. 41:13.

Mu 1958, nkoñi wetu wañinza watuhamekeli nindi tuyi nakuzata neyi apayiniya adimena muSodankylä, muLapland. Hayina mpinji, kudina iluña kwadiña hohu Chinsahu wumu, muhela. Wadizili chalala munjila yakuhayamisha. Mwanindi weyala wayili nawakwawu akashikola nakuhempula kuHelsinki, mumusumba waFinland. Idi izanvu dawakashikola chidendeleña muniwu musumba, muhela wakashinakaji wamwinkeli kansi yeniwu wadiña hanyima yezanvu Kaposhi Kakutalila, nawa wamulejeli kwinka amama yindi. Iwu kansi weyala welili mwenimu, nawa amama yindi chamanishiluwu kutaña Kaposhi, elukili nawu ichi dichalala.

Twadiña nakufwetela itala dadiña hewulu dekina daketwilileñaku mbawu. Twapompeleleña mwitala denidi. Hakusambila, antu apompeleña twadiña etu ayedi nimuhela wadiñaku nimwanindi wamumbanda. Twatañilileña hamu nsañu yakudiza mumulungu wudi wejima. Chimwahitili mpinji, iyala wadizileña Bayibolu nawaYinsahu wenjili nakuzata hekina daketwilileñaku mbawu. Yena nichisaka chindi atachikila kudikunda nezanvu detu. Chimwahitili mpinji, yena niñodindi apapatisheweli. Iwu mana kwetu watachikili kulombola kupompa kwetu. Kubombelahu, amayala amakwawu azatileña hekina denidi atachikili kupompa nawa etejeli chalala chamuBayibolu. Chimwahitili yaaka yayivulu, izanvu detu datoheli chakwila twatwesheli kutuña chipompelu.

KUKALA KUTWAMWENEÑA

Kwenda yintampu yayilehi kwaleteli kukala hamudimu wakushimwina. Muchilaaka channoña, twendeleña, kuvuwa makinga nikuzatisha matu hakwila tuwani antu mwiluña detu dakushimwina. Makinga etu atukwashileña hama. Twayizatishileña cheñi hakuya kukupompa kwamaneni nikuhempula nachu anvwali ashakamineña kwakulehi. Muchilaaka chachishika, twazatishileña basi nabudidi hakuya kumukala kwadiña antu nawa twayileña kwitala nikwitala. Neyi tunamanishi kushimwina mukala wumu, twayileña hamukala wukwawu. Mpinji jikwawu, nvula yachishika yitooka yaswejeleña chakwila yajikileña mumukwakwa. Kakavulu twalondeleleña mumahaji awatuwalu ashalileña neyi chakwila anahiti munvula yachishika yitooka. Mpinji jikwawu nvula yeniyi yachishika yitooka yajikileña mumahaji awantu atwaminineñaku, nawa kukutachika kwachilaaka chanvula yeniyi, iyi nvula  yachishika yadiña yayovu nawa yasenena chakwila hakuhitamu twakokeleña nyendu.

Hamuloña wakusweja kutuuta ninvula yachishika yatwileñeleleña kuvwala yuma yamashika. Twavwalileña nsokoshi jawuvuji nawa twashileñahu ninsokoshi jisatu ninsapatu jajilehi jashikileña mumanuñu. Hela chochu, munsapatu jetu jajilehi mwenzeleña nvula yachishika yitooka. Chitwashika kwitala damasitepusi, twasubwileña nsapatu jetu jajilehi nakutotomonaku nvula yachishika. Cheñi, kunsa yanyinkukumba yitwavwalileña kwazoweleña chitwahitileña munvula yachishika. Neyi kunatuuti nankashi, kunsa yanyinkukumba kwomineña neyi ilata. Mama yawantu wumu wahosheli nindi, “Mwatela mudi nachikuhwelelu chakola nankashi, chineli munadihani kuzata muniyi mpinji yatama.” Twendeli lwendu lwamakilomita 11 hakwila tushiki hanidi itala.

Hamuloña wakuleha kwayintampu, kakavulu twakaamineña kumatala awantu amumaluña mutwashimwinineña. Neyi kunatachiki kwiyila, twalombeleña kudi eni matala kulonda tukaamuku. Matala adiña amweseka ilaña antu adiña chiwahi nawa akasunuka. Kakavulu twakaamineña hachitembi chakanyama katenañawu nawu reindeer, moose hela bera. Mpinji jikwawu twakamineña hakadidi kakawahi. Chakutalilahu, mumbanda wumu wadiña netala deneni watutwalili mukapeka kahewulu mwashikenaña enyi mwatwalililiyi kadidi kakawahi nawa hadiña nyemba yayiwahi yitooka. Kakavulu twahanjekeleña naweni matala kushika nihakachi kawufuku. Heluña dimu, eyala namumbanda eni itala akaamini kukabadi kamu kakapeka, etu nawa twakaamini kabadi kakwawu. Twelili hanjeke-e hansañu yamuNsona kushika nikumacha. Awa eyala namumbanda enhwileña malwihu amavulu, adiña nakudihimpashana hakwihula malwihu.

YUMA YAYIWAHI YAFUMINI MUMUDIMU WAKUSHIMWINA

Lapland hituña dabula wushi ilaña dadiwahi, nawa kuwaha kwadu kwashiyashana kwesekana nachilaaka. Hela chochu, antu adizili chalala diwu adiña alubanji chikupu. Hakachi kawantu adiña nanyichima yayiwahi itwashimwinini hadiña antu atemeneña nyitondu atekeleli yimba muLapland. Mpinji yikwawu, etu ahela ayedi anyanya tweñilileña mukaditala kanyanya mwashakamineña amayala amavulu. Awa amayala ataluka etejeli nsañu yamuBayibolu nawa atiyili kuwaha hakutambula nyikanda.

Kwadiña yuma yayivulu yakuzañalesha yamwekeni. Ifuku dimu, nkoloku yamuchitesheni chabasi yatwamininuku namaminiti atanu, dichi basi yitwakandamineña yatushiyili. Twafuukwiluhu kukandama basi yayileña kumukala wacheñi. Twadiña kanda tuzatileñahu dehi munidi iluña. Hetala datachi, twawanini kansi wamumbanda wahosheli nindi, “Munenzi enu atunkaña, neyi chinadiña nakuyitalila.” Twadizileña Bayibolu namuhelindi. Kansi wamumbanda wamulejeli muhelindi nindi yaloñeshi kulonda tumuhempuli hefuku denidi. Ilaña, hiyatulejeli iyi nsañuku. Twatachikili kudiza Bayibolu nindi niantaña jindi ashakamineña mwitala dadiña hakamwihi. Chimwahitili mpinji yantesha, twabombeli atudizi ejima hamu nakutachika kuyidizishila hamu nawa ashikili ikumi nayedi. Kufuma tuhu  hayina mpinji, antu amavulu amunichi chisaka ekala aYinsahu jaYehova.

Mu 1965, atutemesheli kuchipompelu kutudi muKuusamo, kukabeta Kaluwunda kakuFinland. Hayina mpinji, chipompelu chadiña hohu nawakwakushimwina antesha. Hakusambila, kushimwina munidi iluña detu dadiha kwadiña kwakala. Antu adiña akeñesha nsakililu nawa aheleli nankashi mudimu wetu. Hela chochu, antu amavulu alemesheli nankashi Bayibolu, chumichi chaleñeleli tutweshi kuyishimwina. Twesekeli kwiluka antu chovu-chovu, nawa hanyima yayaaka yiyedi, chekalili chapela kutachika kudizisha antu Bayibolu.

TUCHIDI KUDIKITA MUMUDIMU WAKUSHIMWINA

Makonu, hitukweti ñovu yakuzata mpinji yayilehi mumudimu wamwihaku, ilaña twayaña mumudimu wakushimwina hefuku hefuku. Kutiyakesha nsañu yayiwahi kudi antu amwiluña detu deneni dakushimwina kwapeleli hampinji Aili, amukolesheli kudi mwinhwetu, watachikili kudiza kwendesha motoka nawa watambwili chitupa chawuñendeshi mu 1987 iku wudi nayaaka 56. Twatambwilili cheñi wukwashu wukwawu hampinji yitwatuñili Itala daWanta dadiha nawa twabuukilili mutupeka twadiña kwitala daWanta.

Twazañalalaña chikupu hakumona antu amavulu anadizi chalala. Hampinji yitwatachikili mudimu wampinji yejima kukabeta kaluwunda kakuFinland, kwadiña hohu akwakushimwina antesha apalañenenumu munidi iluña deneni. Ichi yipompelu yayivulu yatuña ñinza. Kakavulu chamwekanaña hakupompa kwanyanya nikwamaneni chakwila muntu wukudilumbulula yomweni nawa wukwihula neyi chakwila tunamwiluki. Mpinji yikwawu, muntu wukudilumbulula nindi twadizileña Bayibolu nachisaka chindi hadiñayi kansi. Mbutu yitwatumbili yaaka yakunyima yasoñeli nyikabu!—1 Kor. 3:6.

Mu 2008, twashikijili yaaka 50 mumudimu wawupayiniya wadimena. Twamusakililaña Yehova netu twatwesheli kudikolesha wumu namukwawu kulonda tutwalekuhu kuumika muniwu mudimu windi walema. Chihandilu chetu chadiña chapela, ilaña hitwakankilileña chuma chidi chejimaku. (Mas. 23:1) Ichi dinu tuneluki netu hitwateleli kwakama hakutachika mudimu wawupayiniyaku! Chamuzañalu, muyaaka yejimiyi, Yehova natukoleshi kwesekeja nachikaninu chindi chekala haIsaya 41:10: “Nakakwinkaña ñovu; chalala nakakukwashañaku; chalala nakakukwataña chachiwahi nachikasa chami chachidiilu chakuloña kwami.”

[Mwevulu wudi hefu 17]

Kwiluña kunakuzatilawu Annikki niAili makonu

[Jimapu jidi hefu 17]

(Neyi munakukeña kumona ntanjikilu yejima talenu mumukanda)

FINLAND

HELSINKI

Sodankylä

Pello

Arctic Circle

Kuusamo

Kemi

Oulu

Kalajoki

[Mwevulu wudi hefu 18]

Kufuma kuchimunswa: Matti (tata yawantu), Tauno, Saimi, Maria Emilia (mama yawantu), Väinö (mwana), Aili niAnnikki mu 1935

[Mwevulu wudi hefu 18]

Kufuma kuchimunswa: Eeva Kallio, Saimi Mattila-Syrjälä, Aili, Annikki, niSaara Noponen mu 1949

[Mwevulu wudi hefu 19]

Tunakuya kukupompa kweneni kuKuopio mu 1952. Kufuma kuchimunswa: Annikki, Aili, Eeva Kallio

[Mwevulu wudi hefu 19]

Kaisu Reikko niAili adi mumudimu wakushimwina

[Mazu ekoku adi hefu 19]

Chimwahitili yaaka 50 yitwazatili mudimu wawupayiniya, mali itwahembeli twachidiña nawu!

[Mwevulu wudi hefu 20]

Tudi hamu mumudimu wakushimwina hefuku daswejeli kutuuta nankashi

[Mwevulu wudi hefu 20]

Antu amakwawu itwadizishileña Bayibolu

[Mwevulu wudi hefu 21]

Twadiña nakudiluñisha mudimu wakushimwina nimumafuku aswejeleña nvula yachishika yitooka