Zatishenu Izu Danzambi Kulonda Diyikwashi Nawa Mukwashi Amakwawu

“Chinatoñojokelaña nami mwejima muwafumbaña mwaloña hohu.”—MAS. 119:128.

MUKWAKULA NENUDI?

Munateli kuzatisha ñahi chiwahi Nsona neyi munakutañisha amakwawu?

Indi Pawulu watalishili mudihi chahosheliyi ‘hakwolola yuma’?

Indi ‘kufumba mukuloña’ kwatalisha mudihi kudi aeluda nianvwali?

1. Muloñadi chitwatela kukuhwelela chikupu Izu daNzambi?

 NEYI aeluda hiyakushinshika hadi kadizi waBayibolu kulonda eluki neyi nashikuhu kutachika kuya mumudimu wamwiha, adihulaña nawu, ‘Komana mazu anakwakulayi iwu kadizi anakumwekesha nawu wakuhwelela nindi Bayibolu Hizu daNzambi donenewa?’ * Muntu wunakukeña kwikala mukwakushimwina waWanta, kushilahu niambuña aNzambi ejima, ashikenaña dakwiteja nawu eña. Muloñadi? Kukuhwelela Izu daNzambi nikudizatisha mumudimu wetu wakushimwina kukutukwasha hakwila tukwashi amakwawu amwiluki Yehova kulonda akapuluki.

2. Muloñadi chitwatela ‘kushakamina muyuma yitwadizili’?

² Kapostolu Pawulu wakonkomweneni hakulema kwezu daNzambi hampinji yamusonekeleliyi Timotewu nindi: “Shakamaku muyuma yiwadizili nakushinshikamu.” ‘Yuma’ yateneniyi Pawulu hichalala chamuBayibolu chamusañumwini Timotewu kukuhwelela nsañu yayiwahi. Ichi chalala chatusañumunaña ninetu makonu, nawa chatwalekañahu kutukwasha kulonda tutwalekuhu kwikala ‘namaana akumona nachu wamwinu.’ (2 Tim. 3:14, 15) Twavula kuzatisha mazu aPawulu analondeluhu hakuleja amakwawu netu Bayibolu yafuma kudi Nzambi, ilaña tunateli kuhetelamu cheñi munawa mazu ekala ha 2 Timotewu 3:16. (Tañenu.) Tushinshikenu chikupu haniyi vasi. Kwila mwenimu kukutuleñela kwiluka chikupu netu mwejima mwafumbañayi Yehova “mwaloña.”—Mas. 119:128.

IZU DANZAMBI ‘DAWAHA KULEJA NACHU’

3-5. (a) Indi izaza dawantu delili ñahi chiyatiyili mpanji yahaniniyi Petulu haPentekosta, nawa muloñadi? (b) Muloñadi antu amavulu muTesalonika chiyetejeleluwu chalala? (c) Chumanyi chinateli kuzañalesha antu makonu kutalisha hamudimu wetu wakushimwina?

³ Yesu walejeli muza wawaIsarela nindi: “Nukuyitemeshela  atuprofwetu, niakwamaana, niansoneki.” (Mat. 23:34) Yesu wadiña nakutena atumbanji twindi, adizishiliyi kuzatisha Nsona mumudimu wakushimwina. HaPentekosta 33 C.E., wumu hakachi kanawa ‘ansoneki,’ kapostolu Petulu, waheni mpanji kwizaza deneni muYerusalema mwazatishiliyi nsañu yayivulu kufuma Munyikanda yachiHeberu. Chatiyiluwu chalumbulwiliyi Petulu awa mazu, antiyilili amavulu ‘alemeni nimunyichima yawu.’ Abalumukili munyichima yawu nakuleka nshidi yawu yakoñeleñawu kunyima. Antu akushika kumakombakaji asatu alombeli kudi Nzambi kulonda yayanakeni nawa ekalili akwaKristu.—Yil. 2:37-41.

⁴ Ntañishi mukwawu, kapostolu Pawulu, washimwinineña nsañu yayiwahi nikumaluña amakwawu bayi muYerusalema hohuku. Chakutalilahu, muTesalonika musumba wamuMasidoniya, washimwinini kudi antu adiña nakudifukula musinagogi. HajiSabata jisatu, Pawulu ‘wahanjekeleña nawu mwomwaya Nyikanda yajila. Hakuyilumbulwila nakukolesha chikupu nindi, Chalala Kristu wateleleli kukaba nakusañuka mudi afu.’ Chumanyi chafuminumu? “Amakwawu [aYudeya] hiyakwiteja,” neyi chelili ‘izaza dadeni dawaHeleni.’—Yil. 17:1-4.

⁵ Ambuña aNzambi chazatishañawu Bayibolu makonu chazañaleshaña antu amavulu. Mwiniitala wumu muSwitzerland chelili natiyilili dehi kudi muhela wamutañilileña nsona, wamwihwili nindi: “Wayaña muchechinyi?” Wamwakwili nindi: “Ami nimukwetu tudi aYinsahu jaYehova.” Ona iyala wahosheli nindi: “Dimu. Kwosi antu amakwawu anateli kwinza kwitala dami nakutaña Bayibolu, chiña aYinsahu jaYehova hohu.”

6, 7. (a) Indi antu atañishaña chipompelu anateli kuzatisha ñahi Bayibolu chachiwahi? (b) Muloñadi kuzatisha chiwahi Nsona hakudizisha antu Bayibolu chikwalemena nankashi?

⁶ Tunateli kuzatisha ñahi Bayibolu chikupu muntañishilu yetu? Neyi mukweti kukooleka kwakutañisha chipompelu hachinañamu, mwatela kutaña nsona kufuma muBayibolu. Chatela mulejeña izaza chinakuhosha nsona hela kutaña nsona jimunapulinti hachipapilu hela jidi hakadikina, mwatela kubakula Bayibolu nikutaña nsona, nawa mwatela kukolesha izaza kwila chochimu. Kubombelahu, ikalenu nampinji yakulumbulula chimwatela kuzatisha owu mavasi munjila yikuleñela izaza dikundami kwakwihi naYehova. Chatela muzatisheña yakutalilahu yakala niyuma yamwekeni yakusehesha hohu, zatishenu iyi mpinji kulonda mulumbululi chiwahi Izu daNzambi.

⁷ Chumanyi chitwatela kwanuka hampinji yitunakudizisha antu Bayibolu? Hampinji yitunakuzatisha nyikanda yetu yawakwaKristu, twatela kushaku kashinshi chikupu kulonda tubuli kukilukila nsona jamuBayibolu. Twatela kumukolesha kadizi yatañeña nsona jinasonekuwu nikumukwasha kutiyisha mujinatalishi. Munjilanyi? Kuhitila mukumwinka kadizi mpinji yalumbululi yomweni, etu bayi tuvulisha mazu akuhoshahuku. Chatela tumulejeña yuma yatela kukuhwelelayi hela chatela kwilayi, tunateli kumwihula malwihu akumushika hamuchima anateli kumukwasha kwiluka chatañishaña Bayibolu. *

IZU DANZAMBI ‘DAWAHA . . . KUTANYISHA NACHU’

8. Yumanyi yalwishileñayi nayu Pawulu?

⁸ Kakavulu twatoñojokaña netu “kutanyisha” himudimu watela kuzata aeluda awakwaKristu. Mwamweni, ankoñi akweti mudimu ‘wakutanyisha antu avulumunaña.’ (1 Tim. 5:20; Tit. 1:13) Hela chochu, kuditanyisha etu aweni nikwena kwalema. Pawulu wadiña mukwaKristu wemikili chakutalilahu chachiwahi nawa wadiña nachinleji chamuchima chitooka. (2 Tim. 1:3) Hela chochu, wasonekeli nindi: “Namoni lushimbi lwacheñi muyidi yami lwalwishaña nalushimbi lwayitoñojoka yami, lunakeñi kuñiñija muwuduñu walushimbi lwanshidi.” Neyi tudiza  mazu ananyeñumuki awa mavasi, tukwiluka chiwahi njita yalwileñayi Pawulu hakwila yayuuli kuzeya-zeya kwindi.—Tañenu Aroma 7:21-25.

9, 10. (a) Pawulu walwishileña nakuzeya-zeya kwamuchidinyi? (b) Pawulu watela watwalekeluhu ñahi kulwisha nakuzeya-zeya kwindi?

⁹ Kuzeya-zeyanyi kwalwishiliyi naku Pawulu hakwila yashindi? Hela chakwila wakwishimwina wanyi, wamusonekeleli Timotewu nindi wadiña “mukwawinyi.” (1 Tim. 1:13) Henohu kanda yekali mukwaKristu, Pawulu wayimwesheli akwaKristu ikezeñi. Kutalisha hachatiyileñayi hadi atumbanji twaKristu, wadihosheleli yomweni nindi: ‘Naswejeli kuyizuwila neyi kuzaluka hohu.’ (Yil. 26:11) Pawulu watachikili kuyuula ndulu yindi, hela chochu mpinji jikwawu watela walwishileña hakuyuula yitoñojoka yindi ninhoshelu. (Yil. 15:36-39) Chumanyi chamukwashili?

¹⁰ Hampinji yasonekeleleñayi akwaKristu muKorinda, Pawulu washimwini njila yazatishileñayi hakuditanyisha yomweni. (Tañenu 1 Akorinda 9:26, 27.) Wazatili nañovu hakushinda kuzeya-zeya kwindi. Chakadi nikujina, wakeñakeñeli kufumba kwamuNsona, walombeli kudi Yehova kulonda yamukwashi yazatishi iku kufumba nawa wazatili nañovu kulonda yazatishi iku kufumba. * Tunateli kudizilaku kuchakutalilahu chindi muloña ninetu twalwishaña nakuzeya-zeya kwetu.

11. Tunateli kutwalekahu ñahi ‘kudeseka’ kulonda twiluki neyi chakwila tunakwenda muchalala chikupu?

¹¹ Bayi twikala nakadiwu mukudifukula kwetuku. Ilaña, twatela ‘kutwalekahu kudeseka’ kulonda twiluki chikupu netu tunakwenda muchalala. (2 Kor. 13:5) Neyi tunakutaña nsona jidi neyi Akolose 3:5-10, tunateli kudihula netu: ‘Komana, inakuzata nañovu kulonda nilwishi nakuzeya-zeya kwami tahindi inakuzeyelaku chikupu? Neyi inakuzatisha Intaneti nawa henza yuma yatama, komana nalekaña kuzatisha, tahindi natwalekañahu kukeñakeña maWebu sayiti atama?’ Kuzatisha kufumba kwekala Mwiizu daNzambi muniyi njila kukutukwasha ‘kwikala atona nawa ababala.’—1 Tesa. 5:6-8.

IZU DANZAMBI ‘DAWAHA KWOLOLA NACHU’

12, 13. (a) Chikonkwanyinyi chitwatela kwimika ‘hakwolola yuma,’ nawa tunateli kumwimbujola ñahi Yesu hakwila mwenimu? (b) Nhoshelu yamuchidinyi yabula kutelela ‘hakwolola yuma’ nawakwetu?

¹² Izu dachiGiriki dabalumunawu nawu ‘kwolola nachu’ datalisha mukwila nawu “kuwahisha, kufuntisha munjila yayiwahi, yoloka.” Mpinji jikwawu, twatela kwolola yuma nawakwetu anabuli kutiyisha yuma yitunahoshi hela yililu yetu. Chakutalilahu, akulumpi jansakililu yawaYudeya adiña nakudila-dila nawu Yesu watiyilileña luwi ‘ansonkeshi niakwanshidi.’ Yesu wayakwili nindi: ‘Akola hiyakeñakeñaña chimbukuku, chiña akata. Yenu mwakashinshiki mwatalisha mazu akwila nawu, ‘Nakeñi luwi, bayi chimuna chakuketulaku.’’ (Mat. 9:11-13) Wayilumbulwilili antu ejima mazu aNzambi mukuwunda nawa chachiwahi. Dichi, antu adizoza amwilukili Yehova nawu ‘hiNzambi wenzala wushona, watoñaña antu, hazuwaña swayuku, wasweja niluwi, wavulisha ninsañu yalala.’ (Kwid. 34:6) Chafuminumu, antu amavulu atachikili kukuhwelela nsañu yayiwahi.

¹³ Chakutalilahu chemikiliyi Yesu chatudizishaña twiluki chitwatela kukwasha amakwawu. Muntu wunahili nateli kuhosha nezu dakuhila nindi, ‘Inakukeña kukwolola.’ Mazu asonekawu ha 2 Timotewu 3:16 hiyatalisha mukwila nawu tuhosholeña akwetu kulonda kwolola yumaku. “Nyikanda yajila yejima” hiyatwinka lusesa lwakuzuwila akwetuku. Kufwana ‘kutapola kwampoku yakabali,’ mazu akuhoshola akatishaña chikupu kumuchima nawa himwavula kufuma yuma yayiwahuku.—Yish. 12:18.

14-16. (a) Indi aeluda anateli ‘kwolola ñahi yuma’ munjila yikukwasha amakwawu kumanisha kukala kukwetuwu? (b) Muloñadi ‘kwolola yuma’ kwesekeja namwaya Nsona chikwalemena hakukulisha anyana?

 ¹⁴ Tunateli kwikala ñahi adiwunjika nawa aluwi ‘hakwolola yuma’? Twili netu eyala namumbanda adisumbula analombi wukwashu kudi eluda mukwaKristu kulonda yayikwashi abuleña kusweja kubobola. Chumanyi chatela kwilayi eluda? Chatela yahakwiluku wumu, watela kuhanjeka nawu hayishina yamuBayibolu, hadaha watela kuzatisha yekala mumukanda waChakwikala naMuzañalu muChisaka kapetulu 3. Eluda chikuhanjekañayi nawu, eyala namumbanda anateli kwiluka kufumba kwatela kuzatishawu chikupu wonsu wawu. Chimwahita mpinji, eluda watela kuyihula chinakushakamawu muchisaka chawu nikuyikwasha cheñi neyi chinakukeñeka.

 ¹⁵ Anvwali anateli ‘kwolola ñahi yuma’ munjila yinateli kukolesha anyanawu kuspiritu? Fwikijenu nenu munakukeña kukwasha kankaña wenu wamumbanda kulonda yatondolweleña ibwambu dindi wudi nayililu yaheña. Chatachi, mwatela kusambila kwiluka chekalayi owu ibwambu. Kuhiñahu, neyi munamoni nenu nakukeñeka kumukwasha, munateli kuhosha nindi, hadaha kuzatisha yikuma yekala mumukanda waWundeli waQuestions Young People Ask—Answers That Work, Volume 2. Mumafuku akulondelahu, munateli kuwanaku mpinji yakuhanjeka nindi. Munateli cheñi kushinshika chekala yitoñojoka yindi hampinji yinakuzatayi mumudimu wamwiha hela hampinji yakunooka hamu nachisaka. Neyi mumwekesha kudiwunjika niluwi, mwanenu wamumbanda wukwiluka nindi mwamukeña. Nateli kuzatisha kufumba kwenu nikutondolwela yuma yinateli kumuletela kukala muchihandilu chindi.

¹⁶ Munjila yoyimu yakudiwunjika nikumwekesha luwi, tunateli kukolesha antu ananeñi hakukola kwawu kwakumujimba, ananeñi chikupu hanyima yakuyihaña nyidimu, hela anakañanyi kutiyisha ntañishilu  yamuNsona. Kuzatisha Izu daNzambi ‘hakwolola yuma’ kwaletaña nkisu yayivulu kudi antu jaYehova.

IZU DANZAMBI ‘DAWAHA KUFUMBA NACHU MWALOÑA’

17. Muloñadi chitwatela kutambwila kufumba namuzañalu?

¹⁷ ‘Kufumba kwejima hikwatiyishaña kuwaha hohenohuku, kwaneñeshaña.’ Ilaña, ‘hakukuminina kwasoñeshaña nyikabu yakuwunda yaletaña kuloña kudi antu akwovwahilamu.’ (Heb. 12:11) AkwaKristu akulumpi amavulu etejaña nawu kufumba kwayifumbiluwu kudi anvwali jawu etiya kwayikwashili nankashi. Kutambwila kufumba kwafumaña kudi Yehova, kuhitila mudi aeluda akwaKristu, kwatukwashaña kutwalekahu kwenda munjila yakuwumi.—Yish. 4:13.

18, 19. (a) Muloñadi kufumba kwekala haYishimu 18:13 chikwalemena hakufumba ‘mukuloña’? (b) Neyi aeluda amwekesha muchima wakuwunda nikukeña hakufumba muntu wunavulumuni, chumanyi chafumañamu?

¹⁸ Indi aeluda nianvwali anateli kwiluka ñahi chakufumba chiwahi? Yehova walejeli akwaKristu kufumba ‘mukuloña.’ (2 Tim. 3:16) Dichi, twatela kuzatisha yishina yamuBayibolu kulonda yitulomboleña. Chishina chimu chamuchidiwu chekala haYishimu 18:13: “Muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.” Dichi, aeluda neyi anakukeña kuhanjeka namuntu wunakutwikawu muloña nawu navulumuni chikupu, atela kukeñakeña muloña wejima kulonda awani wunsahu wejima. (Kuhit. 13:14) Neyi anawani dehi wunsahu dihu hiyanateli kufumba ‘mukuloña.’

¹⁹ Kubombelahu, Izu daNzambi dalejaña aeluda akwaKristu kwolola amakwawu “namuchima wawunda.” (Tañenu 2 Timotewu 2:24-26.) Eñañi, muntu nateli kuleta kasawuntu hadi Yehova nikuneñesha antu akadi muloña. Hela chochu, eluda wahilaña hakufumba muntu wamuchidiwu hanateli kumukwashaku. Ilaña, neyi aeluda embujola ‘chililu chakuwaha chaNzambi,’ anateli kuleñela muntu wunavulumuni yabalumuki mumuchima.—Rom. 2:4.

20. Yishinanyi yatela kuzatishawu anvwali hakufumba anyanawu?

²⁰ Hakukulisha anyanawu “nakuyibabesha nikuyikonkomwena mudi Mwanta,” anvwali atela kuzatisha yishina yamuBayibolu. (Efwes. 6:4) Tata yawantu watela kutondolwela kubabeshaña mwanindi chatiyayi hohu nindi mwanindi nakutiya wanyi. Muchisaka chawakwaKristu himwatela kwikala muntu wasweja kuzuwaku. ‘Yehova wasweja kutiyila antu wushona niluwi,’ dichi antu ejima akweti mudimu wakufumba atwansi atela kufwila kumwekesha yililu yamuchidiwu yakukeña.—Yak. 5:11.

CHAWANA CHALEMA CHATWINKAYI YEHOVA

21, 22. Mazwinyi ekala haMasamu 119:97-104 anakulumbulula chiwahi chimwatiyaña kutalisha Hezu daYehova?

²¹ Muntu wamwakamineña Nzambi washimwini muloña wakeñeleliyi nshimbi jaYehova. (Tañenu Masamu 119:97-104.) Kuhitila mukudiza Bayibolu, waheteli maana, kashinshi, nikwiluka. Kutiyilila kufumba kwekalamu kwamukwashili kutondolwela njila jatama jaleteli yuma yomisha mbaña hadi amakwawu. Yena watiyileña kuwaha kudiza Nsona nawa kwamuzañalesheleña. Wadikasili mumuchima windi kumwovwahila Nzambi muloña nshimbi jindi jamukwashileña chikupu muchihandilu chindi.

²² Komana mwalemesha “Nyikanda yajila yejima”? Yinateli kuyikwasha mukuhweleli chikupu nenu Nzambi wakashikija nkeñelu yindi. Kufumba kwonenewa kwamunsona kwayikiñaña kuyuma yafwana yafumaña mukwila nshidi. Nawa neyi mulumbulula chiwahi iku kufumba, munateli kukwasha amakwawu kulonda awani njila yakuwumi nikutwaleka kwendamu. Chitukumukalakelaña Yehova Nzambi yetu wukweti maana nikukeña, tuzatishenu chikupu “nyikanda yajila yejima.”

[Tumazu twaheshina]

[Malwihu aKuzatisha haKudiza]

[Mwevulu wudi hefu 12]

[Nyevulu yidi hefu 15]

Kuhitila mukuzatisha chiwahi Bayibolu ‘hakwolola yuma nawanyanawu anyanya, anvwali akwashaña anyanawu kutondolwela yuma yatama yafumañamu (Tañenu  parakalafu 15)