Hetelenumu Chikupu Mukutaña Bayibolu
Hetelenumu Chikupu Mukutaña Bayibolu
‘Natiyaña kuwaha nanshimbi jaNzambi.’—ROM. 7:22.
WANENU IYI YIKUMA
Indi kutaña ‘nezu damwishina’ kunateli kuyikwasha ñahi?
Munateli kwiluka ñahi nsona jimwatela kuzatisha hakukwasha amakwawu?
Kutaña Bayibolu nakanañachima kwayikiñaña ñahi?
1-3. Nkiswinyi yitwawanaña mukutaña Bayibolu nikuzatisha ntañishilu yayu?
“NAMUSAKILILAÑA Yehova ifuku niifuku nabudidi hakunkwasha kutiyishisha Bayibolu.” Muhela wachikulumpi mukwaKristu wahosheli awa mazu wataña dehi Bayibolu yejima mapampa 40 nawa wuchidi kutwalekahu kuyitaña. Muhela wakansi wasonekeli nindi kutaña Bayibolu kwamukwashili kwiluka nindi Yehova walala. Chafumamu, wakundama kwakwihi naTata yindi wamwiwulu. Wahosheli nindi, “Kanda nizañalaleñahu dehi chakubadika aha muchihandilu chami.”
2 Kapostolu Petulu wakonkomweneni antu ejima nindi, “Fwilenu mayeli awuspiritu akadi makasu.” (1 Pet. 2:2) Neyi tudizaña nsañu yamuBayibolu nikuzatisha yuma yatañishaña Bayibolu, tunateli kwikala nachinleji chitooka nikwikala nachihandilu chachiwahi. Tukwikalaña nawubwambu wakola nawantu amukeña Nzambi walala nawa amukalakelaña. Yuma yejimiyi diyi yatuleñelaña ‘tutiyeña kuwaha nanshimbi jaNzambi.’ (Rom. 7:22) Nawa mwafumaña nkisu jajivulu. Hinkiswinyi jikwawu jafumañamu?
3 Chimwasweja kumwiluka Yehova niMwanindi, mukusweja kuyikeña nankashi nawa nikukeña kumwakeña akwenu antu kukuswejelaku. Kuheta kwiluka kwalala kwamuNsona kukuyikwasha mwiluki nenu Nzambi keña yapulwishi antu ovwahila kufuma mukanu kaayi kanakuya nakujilumuka. Mukweti nsañu yayiwahi yakuleja antu mumudimu wenu wakushimwina. Yehova wukuyikiswila chimukutañishaña antu yuma yimunadizi hakutaña Izu daNzambi.
TAÑENU NIKUTOÑOJOKA HAYUMA YIMUNATAÑI
4. Indi kutaña Bayibolu ‘nakutoñojokahu chikupu’ kwatalisha mudihi?
4 Yehova hakeñaña nindi ambuñindi atañeña Izu dindi lufuchi lufuchuku. Wamulejeli Yoshuwa wakushankulu nindi: “Weniwu mukanda wanshimbi bayi wakafuma mukanwa keyuku, chiña wakatoñojokañamu nimwaana niwufuku.” (Yosh. 1:8; Mas. 1:2) Iyi nshimbi yinatalishi mukwila nawu mwatela kutaña munjila yatela kuyikwasha kutoñojokahu chikupu. Neyi mutañaña Bayibolu ‘nikutoñojokahu chikupu,’ chikuyikwasha kusha maana hayibalu yalema nankashi nawa yinakuyikolesha hanoyu mpinji. Neyi muwana nyikuku yamazu, mavasi hela nsañu yatela kuyikolesha, yitañenu chovu-chovu, hadaha nikuyitaña nezu damwishina hampinji yimunakutaña. Kuhiñahu, yuma yimunakutaña yinateli kuyishika hamuchima. Muloñadi chumichi chichalemena? Muloña neyi mutiyisha kufumba kwaNzambi, mukufwilaña kukwizatisha muchihandilu chenu chejima.
5-7. Lumbululenu kutaña Izu daNzambi nezu damwishina chikunateli kuyikwasha (a) kutwalekahu kwikala akadi majilu; (b) kuhoshaña nawantu amakwawu mukudiwunjika niluwi; (c) kumukuhwelela Yehova nimumpinji yakala.
5 Neyi tunakutaña nyikanda yamuBayibolu yitunakutoñojoka netu yakala kutiyishisha, chatela kutukwasha neyi tuyitaña chovu-chovu nawa nakanañachima kulonda chitukwashi kutoñojoka hansañu yitunakutaña. Chakutalilahu, fwikijenu haniyi yuma yisatu. Chatachi, toñojokenu hadi mana kwetu mukwaKristu wakansi wunakutaña mukanda wawuprofwetu waHosiya. Mukapetulu 4, hakuhudikila hanyima yakutaña mavasi 11 nakushika ku 13 kulonda yatoñojoki hansañu yinatañiyi munawa mavasi. (Tañenu Hoseya 4:11-13.) Muloñadi? Awa mavasi anamushiki hamuchima muloña walwishileña kulonda yadikañi nekakeja dayililu yatama kushikola. Chinatoñojokiyi hamavasi wenawa, hakukunkulula nindi: ‘Yehova wamonaña yuma yatama yakoñañawu antu nimukuswamujoka. Hinakukeña kumuhilishaku.’ Mana kwetu hakufuukulahu kutwalekahu kwikala wakadi majilu kumesu aNzambi.
6 Chamuchiyedi, muhela mukwaKristu nakutaña mukanda wawuprofwetu waYoweli nawa nashiki mukapetulu 2, vasi 13. (Tañenu Yoweli 2:13.) Chinakutañayi iyi vasi nezu damwishina, hakutoñojoka chinateli kumwimbujolayi Yehova, wukweti ‘luwi, wasweja wushona, wabulaña kuzuwa swayi nawa wavulisha nikwanakena.’ Hakufuukulahu kuleka kuzatisha nhoshelu yatama yazatishañayi kudi nfumwindi niantu amakwawu.
7 Chamuchisatu, fwikijenu tata yawantu mukwaKristu wunahañuwu mudimu nawa nakwakama hachihandilu chañodindi nianyana. HaNahumi 1:7, hakutaña nezu damwishina nindi Yehova “weluka antu abatamaña mudi yena” nawa wayikiñaña neyi ‘mpwembu yakudikañila muntu mwifuku dayihuñu.’ Iyi nsañu yinamukundeji. Hakwiluka nindi Yehova wakamenaña nawa hakuleka kusweja kwakama nankashi. Kufumahu hakutaña vasi 15 nezu damwishina. (Tañenu Nahumi 1:15.) Mana kwetu hakwiluka nindi neyi yashimwinaña nsañu yayiwahi mumpinji yakala, wukumwekeshaña nindi wamonaña Yehova nindi himpwembu yindi. Mana kwetu chinakutwalekahu kukeña-keña mudimu wakumujimba, nakoleshewi cheñi kuyaña kukubulakana kwakuya mumudimu wamwiha kwekalañaku mukachi kamulungu.
8. Shimunenu mukwihihisha nsañu yalema yakuspiritu yimwawanini hakutaña Bayibolu.
8 Yikuma yayiwahi yitunahanjekuhu yinafumi munyikanda yamuBayibolu yinateli kukañanyawu antu amakwawu kutiyisha. Chimukutañaña munyikanda yaHoseya, Yoweli, niNahumi nampwila yakukeña kudiza, mwatela kutaña nezu damwishina mavasi amakwawu amuniyi nyikanda. Mukuheta maana nawa mukuwana kukundeja chikupu mumazu asonekeli awa atuprofwetu! Indi nsañu yikwawu yidi muBayibolu? Izu daNzambi didi neyi mungochi wukweti diyamondi yayivulu. Chimukutañaña Bayibolu yejima, twalekenuhu nakukeña-keñenu kulonda muwani “diyamondi” hela wunlomboli nikukolesha kwekala muBayibolu!
FWILENU KUTIYISHISHA NSAÑU YIMUNAKUDIZA
9. Tunateli kuyilaku ñahi hambidi mukutiyisha kwetu kwankeñelu yaNzambi?
9 Chineli chekala chalema kutaña Bayibolu hefuku-hefuku, mwatela cheñi kuheta maana nikashinshi. Dichi, mwatela muzatisheña chiwahi nyikanda yamukuloñesha kwaYehova kulonda musandujoleña hachihandilu chawantu, maluña niyuma yamwekeni yimwatañaña. Neyi muneluki wanyi ntañishilu yikwawu yamuBayibolu chiyatela kuyikwasha, munateli kwihula eluda wamuchipompelu hela mukwaKristu mukwawu wapama kulonda yayikwashi. Hakwila tulumbululi kulema kwakuyilaku hambidi mukutiyisha kwetu, tushinshikenu hachakutalilahu chamukwaKristu wamuyaaka nkulakaji yakusambila washiluku kashinshi kakwila mwenimu. Ijina dindi wadiña Apolosi.
10, 11. (a) Apolosi amukwashili ñahi kuyilaku hambidi hamu neyi mukwakushimwina nsañu yayiwahi? (b) Tukudizilaku yumanyi kunsañu yaApolosi? (Talenu chikasha chinakwila nawu “Komana Mwatañishaña Kwesekana naNtañishilu Yakatataka?”)
10 Apolosi wadiña mukwaKristu kaYudeya wadiña “wasweja ñovu jakwiluka mwalumbulukila nyikanda yajila” nawa ‘wadiña neyena muspiritu.’ Mukanda waYililu wamulumbulula nawu: “Hakuhosha nakuleja antu nsañu yaYesu chakashinshi, weluka kwachipapatishu chaYowanu hohu.” Chakadi kwiluka, Apolosi wadiña nakutañisha ntañishilu yachipapatishu yahita dehi. Hanyima yakutiya chatañishileñayi muEfwesesa, akwaKristu adisumbula aPirisila naAkwila amulumbulwilili “mwaya njila yaNzambi, chakashinshi.” (Yil. 18:24-26) Indi Apolosi wahetelelumu ñahi?
11 Chakumishiliyi kushimwina muEfwesesa, Apolosi wayili muAkaya. “Chanashikiyi hakuyikwashaku nankashi antu anetiyi naluwi lwaNzambi. Muloña waswejeli kuyibayisha aYudeya nañovu hatooka, nakuyilejela kunyikanda yajila nindi Yesu diyi Kristu.” (Yil. 18:27, 28) Haniyi mpinji, Apolosi watwesheli kulumbulula chachiwahi mwatalisha chipapatishu chawakwaKristu. Chatiyishiliyi chikupu muchatalisha, ‘wakwashili nankashi’ amaha kuyilaku hambidi mukudifukula kwalala. Chumanyi chitunateli kudizila kuniyi nsañu? Kufwana Apolosi, twafwilaña kutiyisha nsañu yitwatañaña muBayibolu. Hela chochu, neyi mukwaKristu wakuluka yitembi yatuleja njila mutwatela kutañishila chachiwahi, twatela kutambwila wukwashu mukudizoza nikumusakilila. Neyi twila mwenimu, tukuzataña chiwahi nyidimu yetu yajila.
ZATISHENU NSAÑU YIMUNAKUDIZA KULONDA MUKWASHI AMAKWAWU
12, 13. Lumbululenu kuzatisha Nsona munjila yayiwahi chikunateli kukwasha atudizi aBayibolu kuyilaku hambidi.
12 Kufwana Pirisila, Akwila niApolosi, tunateli kukwasha chikupu amakwawu. Mwatiyaña ñahi neyi mukolesha muntu wamuha kushinda kukala kunakumukañesha kukulilaku kuspiritu? Neyi mudi aeluda, mwatiyaña ñahi neyi mukwenu mukwakudifukula yayisakilila hakufumba kwamuNsona kwamukwashili kushinda kukala? Chakadi kujina, kuzatisha Izu daNzambi hakukwasha amakwawu kuyilaku hambidi muchihandilu chawu kwatutiyishaña kuwaha nikutuzañalesha. * Talenu chimwatela kushikija ichi chikonkwanyi.
13 Kutalisha hakudifukula kwalala nikwakutwamba, aIsarela amavulu amumafuku aElija adiña kanda afuukuluhu kulondela kudifukula kwalala hela kulondela kwakutwamba. Kufumba kwaElija kwafumbiliyi awa antu kunateli kukwasha kadizi waBayibolu wuchidi kanda yafuukuluhu kukulilaku kuspiritu. (Tañenu 1 Anyanta 18:21.) Shinshikenu cheñi hakukala kukwawu: Neyi muntu wunakukeña kudiza chalala nakuchina amabwambu hela chisaka, munateli kumukolesha kulonda yafuukuluhu kudifukula kudi Yehova kuhitila mukutoñojoka haIsaya 51:12, 13.—Tañenu.
14. Chumanyi chinateli kuyikwasha enu kwanuka nsañu yamuBayibolu neyi munakukeña kuyizatisha hakukwasha amakwawu?
14 Chakadi nikujina, muBayibolu mwekala mazu amavulu anateli kutusañumuna, kwolola hela kukolesha antu atañaña Bayibolu. Ilaña munateli kujinoka nenu, ‘Nateli kwiluka ñahi nsona jakuzatisha neyi inakukeña kujizatisha?’ Tañenuña Bayibolu nikutoñojoka chikupu hayitoñojoka yaNzambi mafuku ejima. Neyi mwila mwenimu, munateli kwiluka nsañu yekala muBayibolu, nawa Yehova nateli kuzatisha spiritu yindi yajila kulonda yiyikwashi kwanuka chahosha Bayibolu.—Maku 13:11; tañenu Yowanu 14:26. *
15. Chumanyi chinateli kuyikwasha kulonda mutiyishi Izu daNzambi chikupu?
15 Kufwana Mwanta Solomoni, lombenu kudi Yehova kulonda yayinki maana akuzata nyidimu yateokalatiki. (2 Kushi. 1:7-10) Neyi cheliluwu atuprofwetu akushankulu, ‘ihujolenu nakukabila’ Izu daNzambi kulonda mwiluki nsañu yalala hadi Yehova ninkeñelu yindi. (1 Pet. 1:10-12) Kapostolu Pawulu wamukolesheli Timotewu kudidyisha yomweni chachiwahi “mazu aya mukwitiya kwakukuhwelela, nikuleja kwakuwahi.” (1 Tim. 4:6) Neyi mwila mwenimu, mukutwesha kukwasha chachiwahi amakwawu kuspiritu. Mpinji yoyimu, mukukolesha chikuhwelelu chenu.
KUKIÑEWA KWALALA KWASHINDAMENA HEZU DANZAMBI
16. (a) Indi ‘kutalatala chachiwahi munyikanda yajila hefuku-hefuku’ kwayikwashili ñahi aBereya? (b) Muloñadi kutaña Bayibolu mafuku ejima chikwalemena kudi etu makonu?
16 AYudeya ashakamineña muMasidoniya mumusumba waBereya adiña nachaaku ‘chakutalatala chachiwahi munyikanda yajila hefuku-hefuku.’ Hampinji yashimwiniyi Pawulu nsañu yayiwahi kudi awa aYudeya, esekejeli mazu indi nayuma yelukiluwu yamuNsona. Yumanyi yafuminumu? Antu amavulu etejeli nawu wadiña nakutañisha chalala nawa ‘etiyili.’ (Yil. 17:10-12) Chumichi chinakumwekesha nawu kutaña Bayibolu mafuku ejima kwaleñelaña tumukuhweleli Yehova chikupu. Chikuhwelelu chamuchidiwu dikwila nawu “kwiluka chalala netu yuma yitwachiñejaña yidi kwoku,” chalema nankashi neyi tunakukeña netu twakeñili mwituña daNzambi dadiha.—Heb. 11:1.
17, 18. (a) Indi chikuhwelelu chakola nikukeña kwakiñaña ñahi muchima wamukwaKristu wachifwikija? (b) Indi kuchiñeja kwatukiñaña ñahi kuwubanji?
17 Kudi yuma yayiwahi yaletesheli Pawulu yasoneki nindi: “Etu antu amwaana tubabalenu, tuvwalenu chikuñu chakujika hantulu chakukuhwelela nakukeña; niitepa dachikuñu dakuchiñeja wamwinu.” (1 Tesa. 5:8) Muchima wamushidika watela kukiñewa kulonda chilumbu chindi yabuli kumukatisha. Munjila yoyimu, muchima wachifwikija wamukwaKristu wakeñekaña kuwukiña. Chumanyi chinateli kumwekana neyi kambuña aYehova yekala nachikuhwelelu chakola muyuma yakanayi Nzambi nikumukeña Nzambi niakwawu antu? MukwaKristu wamuchidiwu wavwalaña chikuñu chakujika hantulu chakuspiritu chakola chikupu. Hanateli kwila chuma chikumuleñela yajimbeshi wuselewa waNzambuku.
18 Pawulu wahosheli cheñi hetepa dachikuñu, “dakuchiñeja wamwinu.” Kushankulu neyi ishidika yabula kukiña mutu windi, nateli kujimbesha wumi windi mumpinji yantesha hakulwa njita. Ilaña neyi yavwala itepa dachikuñu dakola, nyivu yikushikenaña kumutu hiyinateli kumukatishaku. Twakoleshaña kuchiñeja kwetu muñovu jaYehova jakutupulwisha kuhitila mukudiza Izu dindi. Kwikala nakuchiñeja kwakola kwatukwashaña kudikaña nawakwakusekesha ‘nikubobola kwawu kwamukunkulwayi.’ (2 Tim. 2:16-19) Kuchiñeja kwetu kwatwinkaña ñovu yakudikaña nawantu anateli kutuleña tudiñiji muyililu yahelayi Yehova.
KUTAÑA BAYIBOLU KUKATUKWASHA KUPULUKA MAFUKU AKUKUMININA
19, 20. Muloñadi chitwalemeshela chikupu Izu daNzambi, nawa twamwekeshaña ñahi netu twadilemesha? (Talenu chikasha chinakwila nawu “Yehova Wanyinkaña Yuma Yinakeñaña.”)
19 Chineli hitukushika kunsa yakukuma kwakanu kaayi, twatela kushindamena chikupu Hezu daYehova. Dinateli kutukwasha kuleka yaaku yatama nikutukañesha kwila nshidi. Dikutukundejaña nikutukolesha kulonda tuumikeña neyi tuholokela mukweseka kunakufuma kudi Satana nikaayi kindi. Nshimbi jekala Mwizu daYehova jikutukwasha kutwalekahu kwenda munjila yakuwumi.
20 Anukenu nenu nkeñelu yaNzambi yakwila nawu ‘antu ejima akahandi.’ Ambuña aYehova ekala hakachi ‘kawantu ejima.’ Chochimu niantu itunateli kukwasha kuhitila mumudimu wetu wakushimwina nikutañisha. Ilaña antu ejima anakufwila kuhanda atela kwiluka “nsañu yalala chikupu.” (1 Tim. 2:4) Dichi, kupuluka mumafuku akukuminina kwendelaña hamu nakutaña Bayibolu nikuzatisha nshimbi jonenawu jekalamu. Eñañi, neyi tutañaña Bayibolu ifuku niifuku tukumwekeshaña nawu twalemesha chikupu Izu dalema dansañu yalala daYehova.—Yow. 17:17.
[Tumazu twaheshina]
^ Hela chochu, hitwazatishaña kufumba kwamuBayibolu kulonda kushinjila hela kuhiisha amakwawuku. Twatela kwikala adiwunjika nawa enzala wushona nakadizi waBayibolu neyi chekalayi Yehova kudetu.—Mas. 103:8.
^ Munateli kwila ñahi neyi mwanuka hohu mazu akela hanoyu nsañu ilaña mukañanya kwanuka mukanda, kapetulu nivasi? Kuhitila mukukeña mazu muindekisi yekala kunyima yaBayibolu, muWatchtower Library, hela muconcordance yaNew World Translation, munateli kuwana nsona yimunakukeña.
[Malwihu aKuzatisha haKudiza]
