‘Shinshikenu Yuma Yabadika Kuwaha’
‘Shinshikenu Yuma Yabadika Kuwaha’
‘Shinshikenu yuma yabadika kuwaha.’—FWI. 1:10.
YIKUMA YAKUTOÑOJOKAHU CHIKUPU
Indi yimwenu yayimwekesheleluwu aIsaya, Ezekeli niDanyeli yatukoleshaña ñahi?
Chumanyi chitwadizaña kuhitila mukuhanjeka hanyidimu yakalakalaña kuloñesha kwaYehova kwahamaseki?
Indi chinu chibaaba chinayikwashi ñahi?
1, 2. Wuprofwetwinyi kutalisha hamafuku akukuminina wahayamishili atumbanji twaYesu, nawa muloñadi?
PETULU, Yakoba, Yowanu niAnderi nkumininaku asheli nkawawu naMwanta wawu. Mazu ahosheliyi Yesu hakusambila kutalisha hakujilumuka kwatembeli ayineñesheli nankashi. (Maku 13:1-4) Dichi ehwili nawu: ‘Tuleji, mpinjinyi hamba kela yumiyi, nichinjikijilu chakwiluka nachu hiwamba kenzeyi, nihamba kakuma nyaka yamakonu?’ (Mat. 24:1-3) Yesu watachikili kuyileja hayuma yakahimpa chikupu chihandilu chawantu niyuma yikamwekesha mafuku akukuminina akaayi kaSatana. Chuma chimu chamwekeni chatela chahayamishili atumbanji twaYesu. Hanyima yakushimuna yuma yatama yidi neyi njita, nzala nikusweja kuluwa, Yesu washimwini cheñi chuma chachiwahi chakamwekesha nawu tudi mumafuku akukuminina. Wahosheli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Mat. 24:7-14.
2 Atumbanji twaYesu adiluñishili kushimwina nsañu yayiwahi yaWanta hamu naKristu. (Luka 8:1; 9:1, 2) Atela anukili nawu wahosheli nindi: “Mbutu yinahi yayivulu, ilaña akwakukalakala anakehi. Dichi lombenu kudi Mwanta diyi mukwakwañula, atemeshi akwakukalakala kumudimu wakwañula mbutu yindi.” (Luka 10:2) Hanu dinu, adi kushimwina ñahi “mwahita matuña ejima mwashakamawu antu” nakuyishimwina “nyuza yejima wunsahu”? Indi akwakukalakala adi kufuma kudihi? Neyi atumbanji atoñojokeli hampinji yakumbidi hampinji yashakaminuwu naYesu hadina ifuku, mutenowu adi kwiluka iwu mudimu chikawuzatawu. Chakadi nikujina adi kuhayama chikupu hakumona kushikijewa kwanawa mazu antesha itwatañaña haMatewu 24:14.
3. Indi nsona yaLuka 21:34 yinakushikijewa ñahi makonu, nawa malwihwinyi akudishinshika itwatela kudihula?
3 Tunakushakama mumpinji munakushikijewa wuprofwetu waYesu. Yihita yawantu anadibombi hamu kulonda awanishi iseki dejima nakushimwina nsañu yayiwahi yaWanta. (Isa. 60:22) Hela chochu, Yesu wahosheli nindi, antu amakwawu chakayikalila kusha maana kuniwu mudimu munanu mafuku akukuminina. Akahuñumuka nawa ‘nyichima yawu yakasweja kwikuta.’ (Tañenu Luka 21:34.) Cheñi tunakumona kushikijewa kwanawa mazu. Amakwawu hakachi kawantu jaNzambi anakupwempuka munjila. Chumichi chamwekeneña hayuma yafuukulañawu kutalisha hanyidimu yakumujimba, kutaña shikola yahewulu nikusweja kukeña maheta nankashi kushilahu nimpinji yamanishilañawu kuyisela. Antu amakwawu anakuzata nankashi wanyi mumudimu waNzambi muloña wakusweja kwakama nankashi hachihandilu chamafuku ejima. Dihulenu nenu: Inakuzata ñahi? Indi yuma yinafuukulañahu yamwekeshaña nawu nakeñesha yuma yamuchidinyi muchihandilu?
4. (a) Indi Pawulu walombeli nindidi kutalisha hadi akwaKristu akuFwilipi, nawa muloñadi? (b) Yumanyi yitukudiza muchinu chibaaba nimuchibaaba chinalondeluhu, nawa yikutukwasha ñahi?
4 AkwaKristu amuyaaka nkulakaji yakusambila azatili nañovu hakwila atwalekuhu kutwamijaku yuma yakuspiritu. Dihafumini kapostolu Pawulu yalombi nindi antu adiña muFwilipi ‘ashinshiki yuma yabadika kuwaha.’ (Tañenu Afwilipi 1:9-11.) Kufwana kapostolu Pawulu, antu amavulu akushankulu ‘aswejeli nankashi wulobu wakuhosha mazu aNzambi chakadi woma.’ (Fwi. 1:12-14) Munjila yoyimu, anetu nawa makonu twashimwinaña Izu daNzambi chakadi woma. Hela chochu, komana kushinshika hanyidimu yinakukalakalawu mukuloñesha kwaYehova makonu kunateli kutukwasha kusha maana chikupu hamudimu walema nankashi wakushimwina? Eñañi kunateli kutukwasha. Muchinu chibaaba, tukushinshika hantanjikilu yaloñeshayi Yehova kulonda yishikiji nsona yaMatewu 24:14. Indi kuloñesha kwaYehova kunashindameni hakuzata mudimwinyi, nawa kwiluka chumichi kunateli kutusañumuna ñahi hamu nayisaka yetu? Muchibaaba chinalondeluhu, twakadiza yuma yinateli kutukwasha kuumika nikutwalekahu kwendela hamu nakuloñesha kwaYehova.
KULOÑESHA KWAYEHOVA KWAMWIWULU KUNAKUYILAKU HAMBIDI
5, 6. (a) Muloñadi Yehova chamwekesheleliyi yimwenu yakuloñesha kwindi kwamwiwulu? (b) Chumanyi chamweniyi Ezekeli muchimwenu?
5 Kudi yuma yayivulu yafuukwiluhu Yehova kubula kuyisoneka Mwiizu dindi. Chakutalilahu, halumbulula chazatikaña woñu hela chazatikaña yileñaleña yejima, hela chakwila nsañu yejimiyi yatuhayamishaña! Ilaña, Yehova watwinkeli nsañu yatukwashaña hakwila twiluki nkeñelu yindi nikwikala nachihandilu chesekana nankeñelu yeniyi. (2 Tim. 3:16, 17) Chatuzañaleshaña hakwiluka netu Bayibolu yatulumbulwilaña chekala kuloñesha kwaYehova kutwabulaña kumona! Twahayamaña hakutaña chalumbululawu kuloñesha kwaYehova kwamwiwulu kwasonekeluwu kudi Isaya, Ezekeli, niDanyeli ninsañu yaYowanu yamuChimwekeshu. (Isa. 6:1-4; Ezek. 1:4-14, 22-24; Dan. 7:9-14; Chim. 4:1-11) Chidi neyi Yehova wabakwili ihina kulonda tusumbili mwiwulu. Muloñadi chatulejeleliyi iyi nsañu?
6 Yehova wakeñeleña nindi twanukeña netu twekala mukuloñesha kwekala mukaayi kejima. Kudi nyidimu yayivulu yitwabulaña kumona yinakukalakalawu hakukwasha nkeñelu yaYehova. Chakutalilahu, Ezekeli wamweni ikalu damwiwulu demeneneñaku kuloñesha kwaYehova kwabulaña kumwekana. Idi ikalu datemukileña nankashi nikuteñuluka kudi nakuya swayi-swayi. (Ezek. 1:15-21) Neyi tufumbu tunyeñumuka, ikalu dendaña chintampu cheneni nankashi. Muchimwenu chenichi, Ezekeli wamweni cheñi Mukwakwendesha Ikalu denidi. Wahosheli nindi: ‘Namweni kudi neyi wuneñu wakekema, kudi nakumwekana neyi kesi kadi mukachi kwi-ndo. Kwamwekeni neyi kulema kwaYehova.’ (Ezek. 1:25-28) Ezekeli chamweniyi ichi chimwenu chamuhayamishili nankashi! Wamweni Yehova nakuyuula kuloñesha kwindi chikupu, nikulombola chikunakwenda kuhitila mudi spiritu yindi yajila. Kuloñesha kwaYehova kwamwiwulu kunakuyilaku hambidi akumwekesha munjila yakuhayamisha!
7. Indi chimwenu chamumwekesheleluwu Danyeli chatukoleshaña ñahi?
7 Danyeli niyena wamweni yuma yayivulu yatukoleshaña. Amwitejeli kumona Yehova anamumwekeshi neyi “Wakunyaka nanyaka” natentami hetanda dawanta nanyilañu yakesi. Itanda dawanta dadiña hatufumbu. (Dan. 7:9) Yehova wakeñeleña Danyeli yeluki nindi kuloñesha Kwindi kunakwenda, nakwila nkeñelu Yindi. Danyeli wamweni cheñi “wumu wudi neyi mwana kamuntu,” Yesu, anamwinki mudimu wakulombola kuloñesha kwaYehova kwahamaseki. Kuyuula kwaKristu kwaloña hikwekala kwayaaka yanteshaku. Ilaña, “hikuyula kwahaya nyaka nanyaka, hikwamba kahitaku, niwanta windi hiwamba kakisikaku.” (Dan. 7:13, 14) Chumichi chatusañumunaña kumukuhwelela Yehova nikwiluka nyidimu yinakukalakalayi. Wamwinkeli Mwanindi Yesu wesekawu nawa wakuhwelelawu, “nikuyula, nimpuhu, niwanta.” Yehova wamukuhwelela Mwanindi. Dichi, anetu nawa twatela kukuhwelela wunlomboli waYesu.
8. Indi yimwenu yafumini kudi Yehova yaleñeleli Ezekeli niIsaya kwiladi, nawa chumanyi chitwatela kwila?
8 Indi yimwenu yinakumwekesha kuloñesha kwaYehova kwabulaña kumwekana yatela kutusañumuna ñahi? Kufwana Ezekeli, anetu nawa twahayamaña nikudizoza kutalisha hayuma yinakukoñayi Yehova. (Ezek. 1:28) Kutoñojoka chikupu hakuloñesha kwaYehova kunateli kutusañumuna kuzataña nañovu mumudimu windi, neyi chikwamusañumwini Isaya. Hampinji yadiñayi nakukooleka kwakulejaku amakwawu hayuma yinakukoñayi Yehova, welili mwenimu chakadi kukwata kumatahu. (Tañenu Isaya 6:5, 8.) Isaya wakuhweleleli nindi kuhitila muwukwashu waYehova, wakatwesha kuumika kukala kudi kwejima. Munjila yoyimu, yuma yantesha yitunadizi hakuloñesha kwaYehova kwabulaña kumwekana yatela kutuhayamisha nikutuleñela kuzata nañovu mumudimu windi. Chatukoleshaña nankashi kutoñojoka haniku kuloñesha kunakuyilaku hambidi nawa kunashindameni hakwila nkeñelu yaYehova.
KULOÑESHA KWAYEHOVA KWAHAMASEKI
9, 10. Muloñadi kuloñesha kwaYehova kwamwekanaña chikwakeñekelaña?
9 Kuhitila mudi Mwanindi, Yehova watuñili kuloñesha kwahamaseki kwazatilaña hamu nakuloñesha kwamwiwulu. Muloñadi kuloñesha kwahamaseki chikwakeñekelaña hakukalakala mudimu washimunawu haMatewu 24:14? Tushinshikenu hayikuma yisatu.
10 Chatachi, Yesu wahosheli nindi iwu mudimu wakushimwina wakaleñela atumbanji twindi kushika “nikwakumina maseki.” (Yil. 1:8) Chamuchiyedi, antu akazataña iwu mudimu akakeñeka kuyiloñeshela yakudya yakuspiritu nikuyikolesha. (Yow. 21:15-17) Chamuchisatu, akakeñeka kwikala neluña hakupompela kulonda adifukwileña hamu kudi Yehova nikudiza chakushimwina. (Heb. 10:24, 25) Iyi yikonkwanyi hiyadi kuzatika neyi mululakenu wamuvu nankayuku. Hakwila nawu atumbanji twaKristu azati chiwahi, iwu mudimu wakeñekeleña kuwuloñesha chiwahi.
11. Twamwekeshaña ñahi netu tunakukwasha ntanjikilu yakuloñesha kwaYehova?
11 Twamwekeshaña ñahi netu tunakukwasha ntanjikilu yakuloñesha kwaYehova? Njila yimu yalema yekala yakukuhwelela antu enkawu mudimu kudi Yehova niYesu wakutulombola mumudimu wetu wakushimwina. Awa amana kwetu chatela azatisheña mpinji yawu niñovu kulonda amanishi kukala kunakumonawu mukanu kaayi, ashaña muchima kumudimu waNzambi. Indi kuloñesha kwaYehova kwamwekanaña kwashaña maana hamudimwinyi?
KUSHA MAANA ‘HAYUMA YABADIKA KUWAHA’
12, 13. Indi aeluda akwaKristu azataña ñahi mudimu wawu, nawa muloñadi ichi chuma chichayikoleshelaña enu?
12 Aeluda akuluka yitembi mwahita kaayi kejima ayitonda kulonda ataleña nikulombola mudimu wakushimwina mumaluña mwashakamañawu. Neyi awa amayala hiyakufuukula, alombaña wunlomboli Mwiizu daNzambi, nikwilisha ‘izu kwikala inoñu dakunyendu yawu nichejeji chamunjila yawu’ nawa alombaña wukwashu kudi Yehova chakufuma hamuchima.—Mas. 119:105; Mat. 7:7, 8.
13 Kufwana antu adiña nakulombola muyaaka nkulakaji yakusambila, aeluda akwaKristu atalaña hamudimu wakushimwina makonu asha muchima ‘kumudimu wakushimuna izu.’ (Yil. 6:4) Atiyaña kuwaha nankashi hamudimu wakushimwina nsañu yayiwahi chiwunakuyilaku hambidi mwiluña mwashakamañawu nimukaayi kejima. (Yil. 21:19, 20) Hiyatuñaña nshimbi ninjila jakulondela jabulaña kumanaku. Ilaña, alondelaña Nsona niwunlomboli waspiritu yaNzambi yajila hampinji yinakutanjikawu yuma yinakukeñeka kulonda mudimu wakushimwina wutwalekuhu kuya hambidi. (Tañenu Yililu 15:28.) Hakwila mwenimu, awa amana kwetu emikaña chakutalilahu chachiwahi nankashi kudi antu ejima muyipompelu mwekalawu.—Efwes. 4:11, 12.
14, 15. (a) Yumanyi yaloñeshawu kulonda tuzateñaku mudimu wakushimwina nsañu yayiwahi mukaayi kejima? (b) Mwatiyaña ñahi hakuzataku mudimu wakushimwina Wanta?
14 Amana kwetu amavulu azataña mafuku ejima kuloñesha nyikanda, kupompa nikupompa kwamaneni. Makombakaji awantu adihana azataña nañovu hakwila abalumuneña iyi yakudya yakuspiritu mumadimi 600 kulonda antu amavulu adizi “nyidimu yaNzambi yañovu” mwidimi dawu. (Yil. 2:7-11) Amana kwetu niahela atwansi azatilaña kumakina amaneni apulintaña nyikanda yayivulu nankashi hakapinji kantesha nimakina akulamika nachu nyikanda. Nkumininaku, iyi nyikanda ayitwalaña kuyipompelu nikumaluña akwakulehi nankashi.
15 Kudi yuma yayivulu yaloñeshawu kulonda yitukwasheñaku kusha maana kumudimu wakushimwina nsañu yayiwahi muchipompelu chetu. Chakutalilahu, makombakaji awantu adihanaña kulonda akwashaneña mumudimu wakutuña Matala aWanta niMatala Akupompelamu Kupompa Kweneni, kukwasha antu anaholokeli mukukala kwadimwekenaña kwakweni hela anaholokeli muyikatu yakukasumwisha, kuloñesha kupompa kwanyanya nikwamaneni nikutañisha mashikola ateokalatiki kushilahu ninyidimu yikwawu yayivulu yazatikaña yitwabulaña kumona. Nkeñelwinyi yanyidimu yejimiyi? Kulonda tushimwineña nsañu yayiwahi, tuyiluku hambidi muchalala nikukwasha antu amavulu kulonda ekali akwakudifukula aYehova. Komana kuloñesha kwaYehova kwahamaseki kwatwalekahu kusha maana hayuma yabadika kuwaha? Eñañi kwatwalekahu.
LONDELENUÑA CHAKUTALILAHU CHAKULOÑESHA KWAYEHOVA
16. Yumanyi yimunateli kusandujola hakudifukula kwachisaka hela hakudiza kwahalwenu?
16 Komana mpinji jikwawu twekalañaku nampinji yakutoñojoka hanyidimu yinakukalakala kuloñesha kwaYehova? Amakwawu afuukulahu kwikala nampinji yakusandujola haniyi nsañu nikutoñojokahu hampinji yakudifukula kwachisaka hela hakudiza kwahalwawu. Yimwenu yayimwekesheleluwu aIsaya, Ezekeli, Danyeli niYowanu hinsañu yayiwahi nankashi yitwatela kudiza. Mukanda waJehovah’s Witnesses—Proclaimers of God’s Kingdom ninyikanda yikwawu hela maDVD imukweti mwidimi denu akuyikwasha mwiluki yuma yayivulu hakuloñesha kwaNzambi.
17, 18. (a) Indi yuma yitunahanjekuhu yinayikwashi ñahi? (b) Malwihwinyi itwatela kudihula?
17 Tunateli kuhetelamu neyi tutoñojokaña chikupu hanyidimu yinakukalakalayi Yehova kuhitila mukuloñesha kwindi. Kwendela hamu naniku kuloñesha kwakuwahi, tufuukulenuhu kutwalekahu kusha maana hayuma yabadika kuwaha. Neyi twila mwenimu chikutukolesha kufuukulahu neyi cheliliyi Pawulu, wasonekeli nindi: “Chitukweti mudimu iwu, mwomutunatambuli luwi hitwazeyañaku.” (2 Kor. 4:1) Wakolesheli cheñi akwawu akwakukalakala nindi: “Bayi tuzeyaña nakwila mwamuwahuku, muloña twakadya hachilaaka chakudya, neyi tunabuli kuzeya.”—Ŋal. 6:9.
18 Komana kudihu yuma yitwatela kuhimpa hamuntu hamuntu hela hamu neyi chisaka kulonda tushinshikeña hayuma yabadika kuwaha hefuku-hefuku? Komana kwila tupeleshaku chihandilu chetu hela kukeheshaku yuma yatuluwañeshaña kulonda tushi maana nankashi kumudimu walema nankashi wakushimwina nehi? Muchibaaba chinalondeluhu, tukadiza hayuma yitanu yikatukwasha kutwalekahu kwendela hamu nakuloñesha kwaYehova.
[Malwihu aKuzatisha haKudiza]
