Komana Mukweti ‘Iyena Dakuzata Nyidimu Yayiwahi’?

“Yesu Kristu . . . wadiheni hadetu kulonda . . . aditookesheli antu akudihetela, akuta nyichima hanyidimu yayiwahi.”—TIT. 2:13, 14.

MUKUHOSHAHU NENUDI?

Muloñadi chimukuhoshela nenu kwikala neyena dakuzata nyidimu yayiwahi hikukooleka kweneni?

Indi nsona yaDanyeli 2:41-45 yamwekeshaña ñahi chichalemena kwikala neyena dakuzata mumudimu wakushimwina?

Lumbululenu yililu yayiwahi chiyakokolaña antu kukudifukula kwalala nikudi Yehova Nzambi.

1, 2. Kulemanyi kukwetuwu aYinsahu jaYehova, nawa mwatiyaña ñahi hakulema kweniku?

 ANTU atiyaña kuwaha neyi ayisomwena hachuma chachiwahi chinazatuwu. Chakutalilahu, antu amakwawu atambwila Nfwetu hamuloña wakuzata nañovu hakuleta kuwunda hakachi kanyuza yiyedi. Ilaña hikukooleka kwasweja kulema hakututemesha kudi Nzambi kulonda tukwashi antu ekali nawubwambu wawuwahi naNleñi yawu!

² Hakwikala aYinsahu jaYehova, tukweti kukooleka kwadimena. Hakwovwahila lushimbi lwaNzambi nilwaKristu, twalembelelaña antu netu “kundamenu kudi Nzambi.” (2 Kor. 5:20) Yehova nakutuzatisha kulonda tukwashi antu akundami kudi yena. Iwu mudimu wunaleñeli yihita yawantu mumatuña akubadika ha 235 ayikwashi kwikala nawubwambu wawuwahi naNzambi nikwikala nakuchiñeja kwakuheta wumi wahaya nyaka. (Tit. 2:11) Hamuloña weyena didi munyichima yetu, tunakufwila kutambika “yowu wukukeña kutambula, atambuli meji awumi chakadi kulanda.” (Chim. 22:17) Hamuloña wakwila twalemesha iwu mudimu nawa twawuzataña nakanañachima, anateli kututena nawu antu akweti ‘iyena dakuzata nyidimu yayiwahi.’ (Tit. 2:14) Ichi dinu tuhanjekenu hakwikala neyena dakuzata nyidimu yayiwahi chikwatukwashaña kukwokola antu kudi Yehova. Njila yimu yidi yakuhitila mumudimu wetu wakushimwina.

IMBUJOLENUÑA IYENA DIKWETIYI YEHOVA NIYESU

3. Indi mazu akwila nawu “iyena dakumuchima waYehova” atukoleshaña ñahi?

³ Kutalisha hanyidimu yakakoña chiyuulu chamwana kaNzambi, mukanda waIsaya 9:7 wahosha nawu: “Iyena dakumuchima waYehova wamazaza dodakakoña chumichi.” Dichi awa mazu anakutukolesha nawu Yehova wakeñaña nindi antu akapuluki. Chakutalilahu chemikayi Yehova chakwikala neyena chamwekeshaña chikupu nawu mudimu watwinkayi Nzambi wakwikala akwakushimwina aWanta twatela kuwuzata namuchima wejima nawa neyena. Mpwila yetu yakukeña kukwasha antu kulonda  amwiluki Nzambi yamwekeshaña iyena daYehova. Dichi, hakwikala akwakukalakala ambala aNzambi, komana tunakufwila kuzata chikupu iwu mudimu wakushimwina nsañu yayiwahi kushika hakumina ñovu jetu?—1 Kor. 3:9.

4. Yesu wemikili ñahi chakutalilahu chakwikala neyena dakutwalekahu wadikita mumudimu wakushimwina?

⁴ Toñojokenu cheñi heyena daYesu. Wemikili chakutalilahu chachiwahi chakutwalekahu neyena dakudikita mumudimu wakushimwina. Hela chakwila adiña nakumudimbulula chikupu, watwalekeluhu kwikala neyena dakuzata mudimu wakushimwina kushika nimpinji yafwiliyi. (Yow. 18:36, 37) Yesu wazatili nañovu chikupu hakukwasha antu amwiluki Yehova, muloña welukili nindi mpinji yakufwa kwindi yashikili mukamwihi.

5. Indi Yesu wafwanini ñahi mukwakuhemba nyivinyu wamuchishimu chamutondu wamukuyu?

⁵ Chakutalilahu, muchaaka cha 32 C.E., Yesu watili chishimu chamuntu wadiña namutondu wachikuyu mwitempa dindi danyivinyu wakañenyi kusoña nyikabu hadi yaaka yisatu. Mukwakuhemba nyivinyu chamulejeluwu kutema iwu mutondu, walombeli mpinji nindi yashuku wushi. (Tañenu Luka 13:6-9.) Hampinji yatiliyi Yesu ichi chishimu, antu antesha hohu diwu ekalili atumbanji. Ilaña kwesekeja nachahosheliyi muchishimu chamukwakuhemba nyivinyu, Yesu wazatishili mpinji yantesha yashaliluku, kwakwihi natukweji tutanu nakamu, nakuzata chikupu mudimu wakushimwina muYudeya nimuPereya. Chikwashalili mafuku antesha nakufwa kwindi, Yesu wadilililuku antu ‘atiyili mazu indi chakadi kubalumuka.’—Mat. 13:15; Luka 19:41.

6. Muloñadi chitwatela kudikitila chikupu mudimu wetu wakushimwina?

⁶ Chineli tunashiki dehi chikupu mumafuku akukuminina, komana kwila tuswejelaku kudikita mumudimu wetu wakushimwina nehi? (Tañenu Danyeli 2:41-45.) Hikukooleka kweneni chikupu hakwikala aYinsahu jaYehova. Yetu hohu hanu hamaseki twalejaña antu hakuchiñeja kukamanisha kukala kwawantu. Mukwakusoneka nsañu katataka wahosheli nindi chekala chakala kwiluka chaleñelaña yuma yatama yiholokeleña nihadi antu amawahi. Bayibolu yatulejaña chaleñelaña, nawa hakwikala akwaKristu tukweti mudimu nikukooleka kwakulejaku antu amakwawu. Hakukalakala iwu mudimu watwinkawu kudi Nzambi, twatela kwikala “neyena muspiritu.” (Rom. 12:11) Nankisu yaNzambi, mudimu wetu wakushimwina wutwadikitaña neyena wunateli kukwasha antu amwiluki Yehova nikumukeña.

SPIRITU YAKUDIHANA YALETAÑA KALEMESHA KUDI YEHOVA

7, 8. Indi yililu yakudihana yaletaña ñahi kalemesha kudi Yehova?

⁷ Kwesekeja nachamwekeshaña yuma yahitilumu kapostolu Pawulu, mudimu wetu wakushimwina wunateli kutuleñela ‘kukonkama nimukubula kudya.’ (2 Kor. 6:5) Awa mazu amwekesha chikupu hatooka chalumbulula kudihana nawa anateli kutwanukisha apayiniya atwamijañaku mudimu wawu wakushimwina muchihandilu iku anakukeña-keña mali akudikwasha nachu. Toñojokenu cheñi hadi amishonali etu adihanaña chikupu ‘adihuñununaña aweni neyi hichuma chakulambula’ kulonda akalakeli antu mumatuña awenyi. (Fwi. 2:17) Indi aeluda etu azataña nañovu nikubula kudya hela kubula kukaama tulu kulonda akameni nyikoku yaYehova? Tukweti cheñi atushinakaji niantu anakuyekela nakankati adinkañaku chikupu hakwila ayi kukupompa kwawakwaKristu nikuya mumudimu wakushimwina. Twayihamekaña nankashi munyichima neyi tushinshika hadi ambuña aNzambi ejima anakudihana. Iku kudikita kwawu kwaleñela antu amakwawu ahamekeña mudimu wetu wakushimwina.

⁸ Hamukanda wasonekeleluwu kudi Lincolnshire Boston Target, muUnited Kingdom, iyala wumu wabula kwikala chinsahu wahosheli nindi: “Antu analeki dehi kukuhwelela nsakililu . . . Indi akulumpi  jamachechi anakwiladi? Hiyayaña nakuwana antu neyi chelileñayi Kristuku . . . A Yinsahu jaYehova diyi nsakililu hohu akamenaña antu, ayaña nakuwana antu nawa ashimwinaña chikupu nsañu yalala.” Mukanu kaayi munenzali yililu yakusweja kudiñija muyuma yinakwilayi muntu, yililu yetu yakudihana yamuhamekaña chikupu Yehova Nzambi.—Rom. 12:1.

9. Chumanyi chinateli kutusañumuna kulonda tutwalekuhu neyena dakuzata nyidimu yayiwahi mumudimu wetu wakushimwina?

⁹ Hela chochu, chumanyi chitunateli kwila neyi iyena detu dakushimwina hidikumana? Kutoñojoka chikupu hamudimu wunakukalakalayi Yehova kuhitila mukushimwina kunateli kutukwasha. (Tañenu Aroma 10:13-15.) Wamwinu washindamena hakutambika hejina daYehova nachikuhwelelu, ilaña antu anateli kutambika hejina dindi chiña neyi tuyishimwina. Kwiluka mwenimu kwatela kutusañumuna tutwalekuhu kudikita nyidimu yayiwahi nikushimwina chikupu nsañu yayiwahi yaWanta.

YILILU YAYIWAHI YAKOKOLAÑA ANTU KUDI NZAMBI

10. Muloñadi chitukuhoshela netu yililu yetu yayiwahi yakokolaña antu kudi Yehova?

¹⁰ Kwikala hohu neyena mumudimu wetu wakushimwina hikunateli kuleñela antu amwiluki Nzambuku. Chuma chamuchiyedi hanyidimu yayiwahi yakokolaña antu kudi Nzambi hiyililu yayiwahi yawakwaKristu. Pawulu wakonkomweni hakulema kwayililu hampinji yasonekeliyi nindi: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama.” (2 Kor. 6:3) Nhoshelu niyililu yetu yayiwahi yalemeshaña ntañishilu yaNzambi, nakuleñela kudifukula kudi Yehova kukokoleña antu. (Tit. 2:10) Kakavulu, twatiyaña yuma yayiwahi yafumañamu neyi antu anyichima yayiwahi ashinshika hayililu yetu yidi neyi yaKristu.

11. Muloñadi chitwatela kulombela hayililu yetu?

¹¹ Hela chakwila tweluka netu yuma yitwelaña yinateli kukwasha antu munjila yayiwahi,  hampinji yoyimu yinateli kuyiluwañesha. Dichi hela tudi kumudimu, hetala, hela kushikola, bayi twila chuma chikuleñela muntu yamoni mudimu wetu niyililu yetu nindi yatamaku. Neyi twilaña nshidi mumushikila, mukafuma jomisha mbaña. (Heb. 10:26, 27) Kwiluka chikumichi kwatela kutusañumuna kulombela hayuma yitunakwila niyililu yetu chayimonañawu kudi antu. Yililu yamukaayi chiyinakutaminaku, antu ashinshika akuswejelaku ‘kushinshika nakwambula niwaloña niwatama, niwamukalakelaña Nzambi, niwabulaña kumukalakela.’ (Mal. 3:18) Eñañi, yililu yetu yayiwahi yawakwaKristu yakwashaña chikupu antu kufunta kudi Nzambi.

12-14. Chitomikaña kweseka kwachikuhwelelu kwaleñelaña antu amakwawu amoneña ñahi mudimu wetu wakushimwina? Shimunenu chakutalilahu.

¹² Hakusonekela Akorinda, Pawulu washimwini nindi wahitili ‘muyihuñu, mukukala, munyinkakambu, nimutuleya. (Tañenu 2 Akorinda 6:4, 5.) Neyi tuholokela mukweseka kwachikuhwelelu, kuumika kwetu kunateli kuleñela antu anakututala kwiteja nsañu yalala. Chakutalilahu: Kuyaaka yakunyima, kwiluña dimu damuAngola akeñeleña kujiyisha aYinsahu jaYehova. A Yinsahu ayedi adisumbula apapatishewa niantu amaha 30 adiña nakupompa ayinyeñumukili nakuyisha hakachi. Kuhiñahu antu amuchituñilu apompeli nakutala akwakudimbulula chiyeteleña awa antu akadi muloña sampu nimashi tupu. Ambanda nianyana niwena ayeteleli kumu chatama. Afwilileña kuyitiyisha antu woma kulonda abuleña kutiyilila kudi aYinsahu jaYehova. Ilaña chakumishiluwu kuyetela hamesu awantu, antu amavulu amuchituñilu ayili kudi aYinsahu nakulomba nawu atachiki kuyidizisha Bayibolu. Kuhiñahu, mudimu wakushimwina Wanta wayililuku hambidi, nawa mwafumini nkisu jajivulu.

¹³ Ichi chakutalilahu chinakumwekesha kukolela kunshimbi jamuBayibolu chikunateli kukwasha chikupu antu amakwawu. Hadaha tunateli kujinooka netu antu añahi afuntili kudi Nzambi hamuloña wakuumika kwaPetulu niapostolu amakwawu. (Yil. 5:17-29) Ilaña etu, akwetu mutwatañilaña, mutwazatilaña, hela antu amuchisaka chetu anateli kwiteja chikupu nsañu yalala neyi amona chitwakolelaña kukwila yuma yayiwahi.

¹⁴ Amana kwetu anakuyiyandisha hadi mpinji yidi yejima. Chakutalilahu, muArmenia, amana kwetu akushika ku 40 ayikasa mukaleya muloña wakubula kudiñija munsañu jamatuña, nawa mutukweji tunakwinza amana kwetu amavulu anateli kuyikasa. Mu Eritrea, ambuña aYehova akushika ku 55 ayumbila mukaleya, amakwawu anabadiki hayaaka 60 yakusemuka. Mu South Korea, aYinsahu akushika ku 700 ayikasa mukaleya kukola chikuhwelelu chawu. Munidi ituña iku kukala kunatwalekuhu hadi yaaka 60. Tunakulomba netu kashinshi kawamana kwetu ayandishañawu mumatuña ashiyashana kakuleta kalemesha kudi Nzambi nikukwasha antu akeña kuloña kuhakwilaku kudifukula kwalala.—Mas. 76:8-10.

15. Lumbululenu kwikala ashinshika muchihandilu chetu chikunateli kukokola antu kuchalala.

¹⁵ Kwikala ashinshika muchihandilu chetu nikwena kunateli kukokola antu kuchalala. (Tañenu 2 Akorinda 6:4, 7.) Chakutalilahu, toñojokenu hachuma chamwekeni: “Muhela wadiña nakusolola mali kulonda yafweti kubasi ilaña mukwawu wamulejeli nindi hateleleli kufweta maluku, muloña wayileña hakamwihi. Muhela wamulumbulwilili nindi, hela wayileña hakamwihi wateleleli kufweta. Chiyendeluku chantesha, mukwawu wasulukili mubasi. Kufumahu, ñendeshi wabasi wamwihwili muhela nindi, “Wudi Chinsahu chaYehova?” Muhela wakwili nindi, “Eña mwani.” “Munehwilidi?” “Natiya chimunahanjekeña hakufweta mali kubasi, nawa neluka nami aYinsahu jaYehova ekala hakachi kawantu antesha afwetaña nawa ashinshika muyuma yejima.” Chimwahitili tukweji twantesha, iyala wumu wamuwanini muhela hakupompa nawa wamwihwili nindi, “Wunañiluki? Yami ñendeshi wabasi wahanjekeli naneyi  hakufweta mali kubasi. Chinashinshikili hayililu yeyi, nafuukwiluhu kutachika kudiza Bayibolu nawaYinsahu jaYehova.” Antu chelukawu nawu twekala ashinshika, anateli kukuhwelela nsañu yayiwahi yitwashimwinaña.

MPINJI YEJIMA MWEKESHENUÑA YILILU YALETAÑA KALEMESHA KUDI NZAMBI

16. Muloñadi yililu yidi neyi kukaba kabe-e, kukeña niluwi chiyashikilaña antu hanyichima? Shimunenu chakutalilahu.

¹⁶ Cheñi twakokolaña antu kukundama kudi Yehova neyi tumwekesha yililu yidi neyi kukaba kabe-e, kukeña niluwi. Antu amakwawu atumonaña anateli kukeña kudiza hadi Yehova, hankeñelu yindi nihadi antu jindi. Yililu yawakwaKristu alala yambuka chikupu nayililu yawantu amwekesha neyi amwakama Nzambi ilaña kudifukula kwawu kwekala kwawunfwikiji. Akulumpi jansakililu amakwawu anaheti hamuloña wakudimba nyikoku yawu, kuzatishaña mali ahanaña anyikoku nakutuñishamu matala nikulandamu nyotoka yawuseya, nikutuña kaditala kakawahi mwakukama kawa mudi nikina dakutuutishamu. Mwalala, antu amavulu aditenaña nawu hiyatumbanji twaYesu hiyalondelaña lushimbi ‘lwakuhana chamukunkuluku.’ (Mat. 10:8) Ilaña, kufwana atupristu atama amuIsarela, ‘atañishaña kulonda kudyilamu yuma,’ nawa yuma yatañishañawu hiyekala yamunsonaku. (Mika 3:11) Yililu yamuchidiwu yawunfwikiji hiyaleñelaña muntu wudi wejima yakundami kudi Nzambuku.

17, 18. (a) Twaletaña ñahi kalemesha kudi Yehova neyi tumwekeshaña yililu yindi muchihandilu chetu? (b) Chumanyi chayisañumunaña enu kutwalekahu kuzata nyidimu yayiwahi?

¹⁷ Munjila yikwawu, antu akeñaña kwikala amabwambu jaNzambi neyi eluka nawu twatañishaña chalala nawa amona chitwashakamaña chiwahi nawantuñi netu. Chakutalilahu, payiniya wumu hampinji yadiñayi nakushimwina kwitala nikwitala, amuhañili swayi-swayi kudi mumbanda nfwila wachikulumpi. Wahosheli nindi hampinji yadondomweneniyi kuchisu, wadiña handalu muchinsambu wakeñeleña kusha babu yamalayiti. Wamulejeli nindi, “Himwatela kuzata iwu mudimu nkawenuku.” Kuhiñahu iwu payiniya wamukwashili iwu nfwila kuhimpa babu nawa wayili. Mwana kaniwu nfwila weyala chatiyiliyi chuma chamwekeni, wazañaleli nankashi nawa wamukeñakeñeli iwu mana kwetu kulonda yamusakilili. Nkumininaku, iwu mwana wetejeli kudiza Bayibolu.

¹⁸ Muloñadi chimunakufwila kutwalekelahu kuzata nyidimu yayiwahi? Hadaha mweluka nenu neyi tumwekesha iyena mumudimu wetu wakushimwina nikwila yuma kwesekeja nankeñelu yaNzambi, twamulemeshaña Yehova nawa tunateli kukwasha antu amakwawu kulonda akahandi. (Tañenu 1 Akorinda 10:31-33.) Iyena dakuzata nyidimu yayiwahi mukushimwina nsañu yayiwahi nikushakama mwaya kumwakama Nzambi dafumaña hakufwila kumwekesha chikupu chitwamukeña Nzambi niakwetu antu. (Mat. 22:37-39) Neyi tukweti iyena dakuzata nyidimu yayiwahi, tukwikala namuzañalu waweni nikuwunda makonu. Kubombelahu, tunateli kutalilaña mpinji hakatweshawu antu ejima kudifukula nikumulemesha Nleñi yetu, Yehova.

[Malwihu aKuzatisha haKudiza]

[Nyevulu yidi hefu 10]

Neyi muyaña mumudimu wakushimwina mukuhanaña wunsahu wawuwahi kudi antu akuyimonaña

[Mwevulu wudi hefu 12]

Antu amonaña kashinshi kenu nichimwazataña nañovu