MALWIHU KUFUMA KUDI ANTAÑI

Komana aIsarela ajahileña ambanji kuhitila mukuyikudika hamutondu?

▪ Nyunza yayivulu yakushankulu yajahileña ambanji kuhitila mukuyipopela hamutondu. Aroma akasileña hela kupopela muntu wamuchidiwu hamutondu wakushimika, hajiñilileñayi hadi mafuku amavulu iku wuchidi wamumi henohu kanda yafwa nakukata kwayilonda, mpwila, nzala niyikuñu yamupopeleñawu nachu. Aroma amweneña nawu kumupopela muntu hamutondu wakushimika iku kwadiña hikubabesha kwatama kwateleleli ayilumbu abula kulema.

Indi munza wakushankulu wawaIsarela? Komana aIsarela ajahileña ayilumbu kuhitila mukuyikudika hamutondu? Lushimbi lwenkeluwu Mosi lwahosheleña nawu: “Neyi kudi muntu navulumuni nshidi yatela kufwa, anamujahi dehi, wunamukudiki dehi kumutondu; bayi ajiñila kumutondu wufuku wejimaku, chiña wakamujiika ifuku dodimu.” (Kuhit. 21:22, 23) Dichi, hampinji yikwadiña hohu Nyikanda yachiHeberu, muntu wateleleli kufwa asambilileña kumujaha kuhiñahu amukudikileña hamutondu wakushimika hela kumutondu.

Muniyi njila, Alevi 20:2 yahosha nawu: “Neyi hadi anyana kaIsarela, hela hadi enyi ashakama muIsarela, hakamwekana wakahana mwanindi kudi Moleki, akamujahi hohu chalala; antu amwituña akamwasi malola.” Antu adiña ‘nakuzakuka mukishi, indi kwiji ekalileña atutepa’ niwena ayijahileña. Munjilanyi? Kuhitila ‘mukuyasa malola.’—Lev. 20:27.

Hansona yaKuhituluka 22:23, 24, twatañañahu nawu: “Neyi hakekala chañadima wamujiki, anamwoti kudi iyala, iyala wacheñi hakumuwana hamukala, hakukama nindi; mwakayitwali mwayedi wawu kuchisu chamukalowu, mwakayasi malola afwi; mumbanda, muloña hatambekeluku, kutoña wadiñi hamukala; iyala, muloña nasawishi dehi iñoda mukwawu; dichi chiwakafumisha chuma chatama mukachi kenu.” Dichi, hakachi kawaIsarela akusambila, kwasa malola diyi yadiña njila yayeni yakujahilamu antu awanineñawu nanyiloña yahamesu bwi-i. *

Mukanda waKuhituluka 21:23 wahosha nawu “muntu wakukudika washiñewa kudi Nzambi.” Kukudika chibimbi chamuntu watama “washiñewa kudi Nzambi” hatooka chakadi nikujina kwadiña nakusoñamisha aIsarela.

[Tumazu twaheshina]

[Mazu ekoku adi hefu 13]

Chakadi nikujina, hampinji yikwadiña hohu Nyikanda yachiHeberu, muntu wateleleli kufwa asambilileña kumujaha kuhiñahu amukudikileña hamutondu wakushimika hela kumutondu