Zatenu Mudimu Wenu Wamukwakushimwina Nsañu Yayiwahi

‘Ilaku mudimu wamukwakushimwina nsañu yayiwahi; kalakalaku mudimu weyi wuwumanishi chikupu.’—2 TIM. 4:5.

MUKWAKULA NENUDI?

Indi mukwakushimwina hinyi?

Muloñadi antu chiyatela kutiyilawu nsañu yayiwahi?

Indi akwakushimwina ashimwinaña chiwahi elañadi?

1. Muloñadi chitunateli kumutenena Yehova netu diyi Mukwakushimwina watachi nawa wabadika?

 MUKWAKUSHIMWINA himuntu washimunaña nsañu yayiwahi. Yehova Nzambi diyi Mukwakushimwina watachi nawa wabadika. Anvwali jetu atachi chadikañiluwu, hohenohu Yehova washimwini nsañu yayiwahi nindi kapela, dikwila nawu Satana Diyabolu, akamujilumuna. (Kutach. 3:15) Muyaaka yejima yinahituhu, Yehova woneneni amayala ashinshika kulonda asoneki nsañu yejima yalumbululaña njila mwakayiñishilayi ijina dindi, chikafumishayi kutama kwejima kwaletayi Satana, niantu chakekalawu nakukooleka kwajimbesheluwu Adama naEvu.

2. (a) Mudimwinyi wazatañawu añelu kutalisha hamudimu wakushimwina? (b) Chakutalilahwinyi Yesu chemikililiyi akwakushimwina?

² Añelu niwena hiyakwakushimwina. Añelu ashimwinaña nsañu yayiwahi, nikukwasha amakwawu kushimwina nsañu yayiwahi. (Luka 1:19; 2:10; Yil. 8:26, 27, 35; Chim. 14:6) Indi mukulumpi wawañelu Mikeli? Hampinji Yesu yadiñayi hamaseki, wayimikilili antu akwakushimwina chakutalilahu. Yesu washili maana hakushimwina nsañu yayiwahi muchihandilu chindi chejima!—Luka 4:16-21.

3. (a) Nsañwinyi yayiwahi yitwashimwinaña? (b) Malwihwinyi alema itwatela kudihula etu akwakushimwina?

³ Yesu walejeli atumbanji twindi kwikala akwakushimwina. (Mat. 28:19, 20; Yil. 1:8) Kapostolu Pawulu wakonkomweneni mukwawu mukwakukalakala Timotewu nindi: ‘Ilaku mudimu wamukwakushimwina nsañu yayiwahi; kalakalaku mudimu weyi wuwumanishi chikupu.’ (2 Tim. 4:5) Nsañwinyi yayiwahi yitwashimwinaña etu atumbanji twaYesu? Yabombelamu nsañu yalala yakutukolesha nawu Tata yetu wamwiwulu, Yehova watukeña. (Yow. 3:16; 1 Pet. 5:7) Njila yayeni mwamwekeshelañayi Yehova Nzambi kukeña kwindi yekala yakuhitila muWanta windi. Dichi, twazañalalaña hakulejaku amakwawu netu antu ejima akwovwahila chiyuulu chaWanta, kumwovwahila Nzambi, nikwila yuma yaloña anateli kwikala amabwambu jindi. (Mas. 15:1, 2) Chakadi nikujina, Yehova wakeñaña kufumishahu makabi ejima. Wamba kafumishahu cheñi kutama  kutwatiyaña hamuloña wakwanuka makabi akunyima. Mwamweni iyi hinsañu yayiwahi! (Isa. 65:17) Chineli tudi akwakushimwina, tushinshikenu hañakwilu yamalwihu ayedi alema akwila nawu: Muloñadi chichalemena kudi antu kutiya nsañu yayiwahi makonu? Tunateli kuzata ñahi chiwahi mudimu wetu hamu neyi akwakushimwina?

MULOÑADI ANTU CHIYATELA KUTIYILAWU NSAÑU YAYIWAHI?

4. Nsañwinyi yakutwamba yashimunañawu antu hadi Nzambi?

⁴ Fwikijenu nenu anayileji nawu atata yenu anayitemuki enu hamu nachisaka chenu chejima. Nawa antu ahosheleña nawu ayiluka atata yenu hiyakuhosha nawu adiña adinyamuna, akeña kusweka nsañu nawa atama. Antu amakwawu akukeña mukuhweleli nenu himwatela nikufwila kwiluka kudi atata yenuku, muloña afwa dehi. Munjila yoyimu, antu amavulu ayilejaña nsañu yamuchidiwu hadi Nzambi. Ayilejaña nawu hiyanateli kumwiluka Nzambuku, kwosi wamwiluka, hela nawu watama. Chakutalilahu, akulumpi jansakililu amakwawu ahoshaña nawu Nzambi wakababesha antu atama mukesi haya nyaka. Antu amakwawu amutwikaña Nzambi muloña hamakabi afumaña muwubanji wadimwekenaña waweni. Hela iwu wubanji wajahaña antu amawahi niatama, ahoshaña nawu ayibabeshaña kudi Nzambi.

5, 6. Indi ntañishilu yakwila nawu yuma yadileñeli yayeni nintañishilu yakutwamba yaluwañesha ñahi antu?

⁵ Antu amakwawu ahoshaña nawu hikwekala Nzambuku. Haniyi nsañu, toñojokenu hantañishilu yakwila nawu yuma yadileñeli yayeni. Antu amavulu ahakwilañaku iyi ntañishilu ahoshaña nawu wumi hiyawuleñeli kudi nleñi wamaanaku. Ahoshaña nawu hikwekala Nleñuku. Antu amakwawu ahoshaña nawu muntu hikanyama niyena, dichi hitwatela kuhayama neyi tumona muntu nakumwekesha yililu yawunyamaku. Ahoshaña nawu chachiwahi antu adi nañovu kuyandishaña antu abula ñovu. Dichi hitwatela kuhayama hakwiluka netu antu amavulu akuhwelela nawu yuma yatama yikatwalekañahu hohu kutumwekena. Dichi, antu akuhwelela nawu yuma yadileñeli yayeni hiyakweti kuchiñejaku.

⁶ Chakadi nikujina, ntañishilu yakwila nawu yuma yadileñeli yayeni nintañishilu yakutwamba niyena yinakojeji makabi anakuhitamu antu munanu mafuku akukuminina. (Rom. 1:28-31; 2 Tim. 3:1-5) Iyi ntañishilu yawantu yinakañanyi kuleta nsañu yalala yayiwahi yahaya nyaka. Ilaña, kwesekeja nachahosheliyi kapostolu Pawulu nindi, yinaleñeli yitoñojoka yawantu ‘yishali mumwidima, nakwaambuka kuwumi waNzambi.’ (Efwes. 4:17-19) Kubombelahu, ntañishilu yakwila nawu yuma yadileñeli yayeni nintañishilu yakutwamba yinakañeshi antu amavulu kutambwila nsañu yayiwahi yafumaña kudi Nzambi.—Tañenu Aefwesesa 2:11-13.

7, 8. Njilanyi yimu hohu mwatela kwilukilawu antu nsañu yayiwahi?

⁷ Hakwila antu afunti kudi Nzambi, chatachi atela kwiluka chikupu nawu Yehova wekala koku nawa anateli kuhetelamu neyi akundama kwakwihi nayena. Tunateli kuyikwasha kulonda aheti iku kwiluka kuhitila mukuyikolesha ashinshikeña hayileñaleña. Neyi antu adiza hayileñaleña nayitoñojoka yakukeña kudiza, akwiluka maana aNzambi niñovu jindi. (Rom. 1:19, 20) Hakufwila kukwasha antu kulonda ahamekeña neyi hiyakutoñojoka yuma yakoñayi Nleñi yetu Wabadika, tunateli kuzatisha mabuloshuwa ayedi anakuhosha nawu Was Life Created? (Komana Wumi Awuleñeli?) ni The Origin of Life—Five Questions Worth Asking (Kwafumini Wumi—Malwihu Atanu Alema Kwihula). Hela chochu, kudi malwihu amakwawu anateli kukañanyayi muntu kwakula neyi yadiza hayileñaleña hohu. Chakutalilahu, hanatweshi kwiluka muloña waleñela Nzambi yeteji makabi kutwalekahuku, chekala nkeñelu yaNzambi kwiseki, hela kwiluka neyi Nzambi watwakamenaña.

⁸ Antu anateli hohu kwiluka chikupu nsañu yayiwahi hadi Nzambi nihankeñelu yindi kuhitila mukudiza Bayibolu. Tukweti kukoleka  chikupu kwakukwasha antu kulonda awani ñakwilu yamalwihu akwetuwu. Hela chochu, hakwila tushiki hanyichima yawantu anakututiyilila, bayi tuyileja yikuma hohuku; ilaña twatela kuyishinjila. (2 Tim. 3:14) Tunateli kuyishinjila chikupu kuhitila mukulondela chakutalilahu chaYesu. Muloñadi chatwesheleleñayi kushinjila antu? Muloña wazatishileña malwihu munjila yayiwahi. Tunateli kumwimbujola ñahi?

ANTU ASHIMWINAÑA CHACHIWAHI NSAÑU YAYIWAHI AZATISHAÑA MALWIHU MUNJILA YAYIWAHI

9. Hakwila nawu tukwashi antu kuspiritu, chumanyi chitwatela kwila?

⁹ Kufwana Yesu, muloñadi wutwatela kuzatishila malwihu mumudimu wakushimwina? Toñojokenu hachumichi: Ndotolu wenu nayileji nindi wukweti nsañu yayiwahi. Nateli kuyuuka chikatu chimukweti neyi ayiladika. Munateli kumukuhwelela. Indi neyi yayikana mwenimu henohu kanda yayihuli chimunakutiya? Himunateli kumukuhwelelaku. Hela chakwila ndotolu wakuluka yitembi, watela kuyihula malwihu nikutiyilila chimukumulumbulwila chidi yikatu yenu henohu kanda yatachiki kuyuuka. Munjila yoyimu, hakwila nawu tuyikwashi antu atambwili nsañu yayiwahi yaWanta, twatela kwiluka chakwihula malwihu amawahi kulonda twiluki chitunateli kuyikwasha.

10, 11. Yumanyi yitunateli kwila neyi twimbujola ntañishilu yaYesu?

¹⁰ Yesu welukili nindi ntañishi nateli kuzatisha malwihu bayi neyi hamuloña wakukeña yamwiluki kadizi hohuku, ilaña nikukwasha kadizi yatoñojoki nawa yashimuni munakutoñojokayi. Chakutalilahu, hampinji yakeñeleñayi Yesu kudizisha atumbanji twindi hakudizoza, wasambilili kuyihula lwihu lwayileñeleli atoñojoki. (Maku 9:33) Yesu wamwihwili Petulu lwihu lwadiña nañakwilu jashiyashana kulonda yatonduhu hampinji yamudizishileñayi chakushinshika hayishina. (Mat. 17:24-26) Mpinji yimu, Yesu chakeñeleñayi kwiluka yuma yadiña munyichima yawatumbanji twindi, wayihwili malwihu amavulu aleñeleli ashimuni chatoñojokeleñawu. (Tañenu Matewu 16:13-17.) Yesu halejeleña antu hohu yuma yateleli kwilawuku. Wasañumwini antu kwiteja nsañu yayiwahi nikuhimpa muchihandilu chawu kuhitila mukuyihula malwihu.

¹¹ Neyi tumwimbujola Yesu kuhitila mukwihula malwihu chiwahi, twelaña yuma yisatu. Twelukaña chitunateli kukwasha antu chiwahi, chakuhanjeka nawantu anakufwila kutukañeshaña kuhanjekanawu nawa twadizishaña antu adizoza chiyanateli kuhetelamu. Toñojokenu hayuma yisatu yinakumwekesha chitunateli kuzatisha chiwahi malwihu.

12-14. Munateli kukwasha ñahi mwana kwikala wakasunuka hakushimwina nsañu yayiwahi? Shimunenu chakutalilahu.

¹² Chakutalilahu chatachi: Hamu neyi anvwali, mukwila ñahi neyi mwanenu wakansi yayileja nindi watiya woma wakulejaku akwawu mwatañilañawu hansañu yahoshaña hayileñaleña? Chakadi nikujina mukukeña kumukwasha kulonda yabuleña kutiya woma hakushimwina nsañu yayiwahi. Chatela mutachiki kumuhoshola hela munyakali kumuleja chatela kwilayi, komana kwila mwimbujola chakutalilahu chaYesu nikumwihula malwihu akumuleñela yashimuni chinakutoñojokayi nehi? Munateli kwila ñahi mwenimu?

¹³ Hanyima yakutañila hamu namwanenu yibalu mubuloshuwa yinakuhosha nawu The Origin of Life—Five Questions Worth Asking, munateli kumwihula kulonda yashimuni yuma yinamutiyishi kuwaha. Mukoleshenu yatoñojokeña hayuma yikwawu yamuleñela yakuhweleli mudi Nleñi nawa yashimuni muloña wunakukeñelayi kumukalakela. (Rom. 12:2) Mukwashenu mwanenu yeluki nindi yuma yikumuleñela yamukalakeleña hiyatela  kwesekana chikupu nayuma yikuyileñela enu mumukalakeleñaku.

¹⁴ Mulumbulwilenu mwanenu nenu neyi hakuhanjeka namukwawu mwatañilañawu kushikola, nateli kulondela njila yoyimu yimunamuleji. Dikwila nawu, watela kuhituluka muyikuma yimu kuhiñahu wukumwihula malwihu akumuleñela mukwawu yashimuni yitoñojoka yindi. Chakutalilahu, nateli kumuleja mukwawu muyatañilaña kulonda yatañi mazu adi muchikasha chidi hefu 21 mubuloshuwa yaOrigin of Life. Kuhiñahu mwanenu nateli kwihula nindi, “Komana mwalala DNA yinateli kuhemba nsañu yayivulu kubadika kompyuta yidi yejima mukaayi?” Mukwawu muyatañilaña nateli kwakula nindi dimu. Kuhiñahu mwanenu nateli kumwihula nindi, “Neyi chakwila antu adiza jamakompyuta hiyanateli kuwana nsañu yamuchidiwuku, indi chuma chabulaña kutoñojoka chinateli kwila ñahi mwenimu?” Hakwila mumukwashi mwanenu kulonda yekaleña wakasunuka chikupu hakuhanjeka nawakwawu hayuma yakuhwelelayi, munateli kuhitulukañamu nindi kakavulu. Neyi mumudizisha kuzatisha chiwahi malwihu, mukumukwasha kulonda yazateña chiwahi mudimu windi wamukwakushimwina.

15. Tunateli kuzatisha ñahi malwihu hakwila tukwashi muntu wakuhwelela nindi Nzambi wekalaku wanyi?

¹⁵ Chakutalilahu chamuchiyedi: Mumudimu wetu wakushimwina, twawanaña antu ajinokaña nawu Nzambi wekalaku wanyi. Chakutalilahu, muntu nateli kutuleja nindi hakuhwelela mudi Nzambuku. Chatela twiteji awa mazu atukañeshi kuhanjeka nindi, tunateli kumwihula nakalemesha mpinji yatachikiliyi kukuhwelela nindi Nzambi wekalaku wanyi nichuma chamuletesheli yakuhweleli mwenimu. Hanyima yakutiya chinakuliyi nikumuhameka hakutoñojokahu chikupu haniyi nsañu, tunateli kumwihula neyi chakwila nakutoñojoka nindi chikwikala chaluwa kutaña nsañu yinakumwekesha nawu wumi awuleñeli. Neyi mwiniitala nakukeña kudiza chikupu, wukwiteja kutaña wunsahu wunakumwekesha nawu  wumi awuleñeli. Kuhiñahu tunateli kumwinka buloshuwa yinakuhosha nawu Was Life Created? hela buloshuwa yidi namutu wuna kwila nawu The Origin of Life—Five Questions Worth Asking. Neyi twihulaña malwihu amawahi nawa munjila yakalemesha, anateli kwenzununa muchima wamuntu kulonda yatambwili nsañu yayiwahi.

16. Muloñadi chitunateli kubulila kwiteja kadizi waBayibolu kutañaña hohu ñakwilu yasonekawu mumukanda hela mubuloshuwa?

¹⁶ Chakutalilahu chamuchisatu: Hampinji yitunakudizisha muntu Bayibolu, chumanyi chinateli kumwekana neyi tumwiteja kwakula hohu ñakwilu yasonekawu mumukanda hela mubuloshuwa? Hela chochu, neyi twila mwenimu, kadizi hanateli kuyilaku hambidi kuspirituku. Muloñadi? Muloña kadizi wahitulukaña hohu muñakwilu chakadi kutoñojokahu chikupu nyiji yindi yachalala chakuspiritu hiyinateli kujiyama chikupuku. Wukwikala neyi mutondu womaña neyi kunasweji nkanza. (Mat. 13:20, 21) Hakwila nawu chumichi chibuli kumwekana, twatela kumwihula kadizi chinakutiyayi hayuma yinakudizayi. Esekenu kwiluka neyi chakwila nakwiteja yikuma yinakudizayi. Sweje-e dinu, mwilenu yashimuni muloña wunakwitejelayi hela wunakukaaninayi. Kuhiñahu mukwashenu kutoñojoka haNsoña kulonda yeluki nindi yuma yakuhwelelayi yashindamena haBayibolu. (Heb. 5:14) Neyi tuzatisha malwihu chiwahi, antu itwadizishaña akwikala nachikuhwelelu chakola nawa akatwesha kudikaña nawantu akufwilaña kuyikañesha hela kuyiluwañesha. (Kol. 2:6-8) Chumanyi chikwawu chitunateli kwila kulonda tuzati mudimu wetu neyi akwakushimwina?

ANTU ASHIMWINAÑA CHIWAHI NSAÑU YAYIWAHI ADIKWASHAÑA WUMU NAMUKWAWU

17, 18. Neyi tunakushimwina namukwetu, tunateli kuzatila ñahi hamu?

¹⁷ Yesu watemesheli atumbanji twindi mumudimu wakushimwina ayedi-ayedi. (Maku 6:7; Luka 10:1) Chimwahitili mpinji, kapostolu Pawulu wateneni ‘akwakukalakala nindi akabakeni nindi munsañu yayiwahi.’ (Fwi. 4:3) Kwesekana naniyi nsañu yamunsona yamwekeni kunyima, mu 1953, akwakushimwina aWanta atachikili progiramu yakudizisha amakwawu mumudimu wakushimwina.

¹⁸ Neyi munakushimwina namukwaKristu mukwawu, munateli kuzatila ñahi hamu? (Tañenu 1 Akorinda 3:6-9.) Bakulenu nsona jinakuzatishayi mukwenu muBayibolu yenu. Shenu maana kudi mukwenu neyi nakushimwina hela kudi mwiniitala neyi nakuhosha. Londelenu chikupu chinakuhanjekawu kulonda mutweshi kumukwashaku mukwenu kuhanjeka namwiniitala wunakukeña kuleya. (Mukwa. 4:12) Hela chochu, mwatela kwanuka chumichi: Tondolwelenu chaaku chakukeña kumuketwisha mukwenu imunakuzata nindi neyi chakwila nakulumbulula chiwahi chikuma. Neyi muketwisha mpanji, munateli kumuzeyesha mukwenu imunakuzata nindi hela kumuluwañesha mwiniitala. Mpinji yikwawu, chinateli kuwaha kuhoshahu. Ilaña neyi munakukeña kuhoshahu, keheshenuku mazu imunakukeña kuhosha. Kuhiñahu mulejenu mukwenu imunakuzata nindi yatwalekuhu kuhanjeka nindi.

19. Chumanyi chitwatela kwanukaña, nawa muloñadi?

¹⁹ Munateli kudikwasha ñahi namukwenu imunakuzata nindi hampinji yimunakuya kwitala niitala? Komana kwila mwikala nampinji yantesha yakuhanjeka hachimwatela kuwahishaku chakutachika kushimwina neyi? Babalenu nanhoshelu yenu kulonda mubuleña kuneñesha antu amwiluña denu dakushimwina. Chochimu, tondolwelenu muhetu wakuhosha yuma yatama hadi akwetu akwakushimwina. (Yish. 18:24) Twatela kwanukaña netu kwosi muntu wawanina hakachi ketuku. Yehova watumwekeshela luwi lwasweja kuhitila mukutwinka iheta damudimu wakushimwina nsañu yayiwahi. (Tañenu 2 Akorinda 4:1, 7.) Dichi wejima wetu tumwekeshenu kuhameka hanidi iheta kuhitila mukuzata hakumina ñovu jetu kulonda tuzati mudimu wetu neyi akwakushimwina.

[Malwihu aKuzatisha haKudiza]

[Mazu ekoku adi hefu 5]

Hakwila tushiki hanyichima yawantiyilili etu, twatela kuyishinjila

[Mwevulu wudi hefu 6]

Malwihu amawahi . . . 1 akwashaña antu kulonda eluki chaletesha akuhwelela yuma yakuhwelelawu

[Mwevulu wudi hefu 6]

. . . 2 enzununaña yitoñojoka ninyichima yawu kulonda atambwili chalala

[Mwevulu wudi hefu 6]

. . . 3 ayikwashaña kutoñojoka kulonda eluki chalala