KUFUMA MUNKALAÑA JETU

Atwalekeluhu Kwikala Akola ‘Mumpinji Yakweseka’

HAMPINJI yavulumukili Njita yaMukaayi Yatachi antu amavulu elukili nawu Atudizi aBayibolu hiyanateli kuzuña njitaku. (Isa. 2:2-4; Yow. 18:36; Efwes. 6:12) Indi ambuña aNzambi muBritain ahandili ñahi?

Lushimbi lwatuñiluwu muBritain mu 1916 lwashimwini nawu amayala abula kusumbula adi nayaaka 18 nakushika ku 40 ateleleli kuya nakuzata Mudimu waWushidika. Ilu lushimbi lwetejeli kwambulaku antu akaanineña kuya kunjita hamuloña “wansakililu hela hayuma yakuhwelelawu.” Nfulumendi yemikili yota yadiña nakutala hadi antu ateleli kwitejawu kubula kuya kunjita nawa kushika mpinjinyi.

Hela chakwila ahanini ilu lushimbi, Atudizi aBayibolu amakwawu hiyayifumishili kumudimu wawushidikaku, dichi atudizi 40 ayikasili mukaleya nawa 8 ayitwalili nakuzuña njita kuFrance. Hamuloña wakwila nfulumendi hiyalondeleli wuñanjuku, amana kwetu muBritain aholokeleli kunyendu yaKajiña Mpata Herbert Asquith kuhitila mukumusonekela mukanda kutalisha hadi amana kwetu akasiluwu mutuleya, nimukanda wakulomba nawu ayumbuku wafwachikiluwu kudi antu akushika ku 5,500.

Kufumahu kwenjili mujimbu wakwila nawu amana kwetu atanu nasatu atemesheluwu kuFrance ayilejeli nawu akuyiloza namata hamuloña wakukaana kuzuña njita. Ilaña amana kwetu chayitanjikiluwu kulonda ayilozi kudi amashidika, ayilejeli nawu muloña wawu anawuhimpi nawa akuyikasa mukaleya hadi yaaka ikumi. Ayifuntishili kuEngland kulonda akazatiluku yaaka yayikasiluwu mukaleya.

Njita chiyatwalekeluhu, lushimbi lwakutwala amayala kunjita lwabombelelumu niamayala asumbula. Henry Hudson, ndotolu nawa Kadizi waBayibolu wakuManchester muEngland amutwalili muchota chanyiloña. HaAugust 3, 1916, chota chahakwili nawu wadiña namuloña, amufwetesheli, nawa amutwalili kuwushidika. Hampinji yoyimu, muloña wukwawu awusompeleli muEdinburgh, Scotland. Kolopota wejina daJames Frederick Scott, wadiña nayaaka 25 yakusemuka, hiyamuwanini namuloñaku. Mukwakuhakula nyiloña watwalili cheñi iwu muloña muchota ilaña afuntishili nakutachika muloña wacheñi muLondon. Haniyi mpinji, mana kwetu wejina daHerbert Kipps amuwanini namuloña, amufwetesheli, nawa amutwalili kumudimu wawushidika.

Kushika muSeptember 1916, amana kwetu akushika ku 264 alombeli kulonda ayiteji abuli kuyitwala kumudimu wawushidika. Hakachi kawu 5 ayitejeli, 154 ayinkeli “kuzata mudimu wakala wanfulumendi,” 23 ayinkeli nyidimu yawushidika yabulili kubombelamu kwasa njita, 82 ayitwalili kuwushidika, nawa amakwawu ayisompesheleli muchota chawamashidika hamuloña wakubula kulondela nshimbi. Antu amavulu ahilili hakumona chayiyandishileñawu awa amayala, dichi nfulumendi yayifumishili  mutuleya twawamashidika nakuyitwala muyilombu mwadiña nakuzatilawu antu amavulu.

Edgar Clay niPryce Hughes, azatilileña mwijiya mwituña daWales, chafuminuwu mukaleya azatili neyi ankoñi amutayi muBritain. Cheñi nawa, Herbert Senior, wadiña hakachi kawamana kwetu atanu nasatu afuntishiluwu kufuma kuFrance, amutwalili kuKaleya kakuWakefield muYorkshire. Atudizi aBayibolu amavulu azatilili muKaleya kaDartmoor mwazatileñawu nyidimu yamashi mumazulu nawa chumichi chaleñeleli mukaleya kenaka mwinzali antu akaanineña kwiñila mudimu wawushidika.

Frank Platt, Kadizi waBayibolu wetejeli kuzata nyidimu yabulili kukundama kukwasa njita, amumwesheleña kalula nakumuyandisha hadi mpinji yayilehi chakaaniniyi kwasa njita. Atkinson Padgett, wadizili chalala hanyima yakwiñila wushidika, niyena amuyandishili chikupu kudi akulumpi jamashidika hamuloña wakukaana mudimu wakwasa njita.

Hela chakwila amana kwetu hayina mpinji hiyelukili chikupu mwatalishili kubula kudiñija munsañu jamatuña nachiyuuluku, ilaña afwilileña kumuzañalesha Yehova Nzambi. Amana kwetu anatenuwu hamajina muchinu chileji emikili chakutalilahu chachiwahi chakubula kudiñija munsañu jamatuña nachiyuulu ‘mumpinji yakala’ nankashi. (Chim. 3:10)—Kufuma munkalaña jetu muBritain.