Anvwali, Anyana, Hanjekenuña Mukukeña

“Antu ejima anyakali kutiya, alabi kuhosha, alabi kuzuwa.”—YAK. 1:19.

MUKWAKULA NENUDI?

Muloñadi chichalemena kwikala nampinji yakuhanjeka?

Indi anvwali anateli kuzatisha ñahi nsona yaYakoba 1:19?

Indi anyana anateli kuzatisha ñahi nsona yaYakoba 1:19?

1, 2. Indi kutiyañana hakachi kawanvwali nawanyana kwekala ñahi, ilaña kukalanyi kuyamonañawu mpinji yikwawu?

 “NEYI mwiluka nenu anvwali jenu akafwa kumadiki, chumanyi chimukukeñesha chikupu kuyileja lelu?” Ilu dilwihu luyehwiluwu makombakaji awanyana mwituña daUnited States. Chatela ashinshikeña hamakabi nikukala kwamweneñawu, anyana akushika kumapesenti 95 ahosheli nawu anateli kuleja anvwali jawu nawu: “Muñanakenuku hayiluwa yinakoñeleña” nawa “Nayikeña nankashi.”—For Parents Only (Mukanda waWanvwali Hohu), wasonekeluwu kudi Shaunti Feldhahn niLisa Rice.

² Chakadi nikujina, anyana akeña anvwali jawu nianvwali nawa akeña anyanawu. Chumichi chamwekanaña nankashi muyisaka yawakwaKristu. Hela chakwila anvwali nianyana afwilaña kudikunda wumu namukwawu, mpinji jikwawu kuhanjeka kwakalaña. Muloñadi nsañu yikwawu chayileyelañawu kuhanjekahu? Yumanyi yakañeshaña kuhanjeka chachiwahi? Chumanyi chinateli kwilawu kulonda ahanjekeña chiwahi?

‘KWATILENU MPINJI MAANA’ KULONDA MUHANJEKEÑA

3. (a) Muloñadi kuhanjeka chachiwahi chikwakalila muyisaka yayivulu? (b) Muloñadi yisaka yawa Isarela akushankulu chiyabulilili kwikala nakukala kwakuwana mpinji yakuhanjeka hamu?

³ Chekalaña chakala kudi yisaka yayivulu kuwana mpinji yakuhanjeka chachiwahi. Ilaña mumpinji yawaIsarela, yuma yadiña yambukaku. Mosi walejeli atata jawantu amuIsarela nindi: “Wakalejañamu anyaneyi [mazu aNzambi] chakashinshi, diyi mpanji yiwakahanjikaña chiwakashakamaña mwitala deyi, nichiwakendaña munjila, nihakukama, nihakuhinduka.” (Kuhit. 6:6, 7) Anyana awanikileña nawamama jawu kwitala hela nawatata jawu kumaha hela kwazatilileñawu nyidimu. Anyana nianvwali adiña nampinji yeneni yakwikala  hamu nikuhanjeka. Chafumineñamu chakwila nawu, anvwali atwesheleña kwiluka yuma yakeñeleña anyana, yuma yafwilileñawu niwuntu wawanyanawu. Munjila yoyimu, anyana niwena adiña nampinji nikukooleka kwakwiluka chiwahi anvwali jawu.

4. Chumanyi chaleñelaña yisaka yayivulu makonu yikañanyeña kuhanjeka?

⁴ Makonu chihandilu chambukaku chikupu. Mumatuña amakwawu, anyana atachikaña kuya kushikola henohu achidi atwansi nankashi, mpinji yikwawu atachikaña shikola neyi anashikiji hohu yaaka yiyedi. Anvwali awamayala niawambanda amavulu azatilaña kwakulehi netala. Neyi anvwali nianyana adi hamu, amanishilaña mpinji yawu kukutala nyivwimbimbi nikuzatisha makompyuta hela nshiña. Muyisaka yayivulu, anvwali nianyana hiyadiluka chiwahuku. Hiyahanjekañaku.

5, 6. Indi anvwali amakwawu ela ñahi hakwila ‘awanuku’ mpinji yeneni yakwikala hamu nawanyanawu?

⁵ Komana kwila ‘muwanaku’ mpinji kulonda mwikaleña hamu nachisaka chenu nehi? (Tañenu Aefwesesa 5:15, 16.) Yisaka yikwawu yaditeja kukeheshaku kutala nyivwimbimbi hela kuzatisha kompyuta. Amakwawu afuukulahu kudyilaña hamu kamu hefuku hefuku. Kudifukula kwachisaka himpinji yayiwahi nankashi muloña kwakwashaña anvwali nianyana kudiluka chiwahi hampinji yinakuhanjekawu hayuma yakuspiritu. Chinateli kuwaha neyi muwanaku ora yimu hela kubadikahu kulonda mudizileña hamu, ilaña munateli kuzata nañovu kulonda muhanjekeña chikupu. Haniwu muloña, kuhanjeka mpinji yejima kwalema. Henohu anyana kanda ayi kushikola, hoshenu yuma yinateli kuyikolesha, hanjekenu hansona yefuku hela lombenu hamu nawanyanenu. Kwila mwenimu kunateli kukwasha nankashi anyanenu.

⁶ Anvwali amakwawu ahimpa chihandilu chawu kulonda ekaleña nampinji yakuwanika nawanyanawu. Chakutalilahu, Laura, * nvwali wukweti anyana anyanya ayedi, walekeli  mudimu haniwu muloña. Wahosheli nindi: “Wejima wetu nantetemena twatemukilileña kuya kumudimu hela kushikola. Chinafunta nawufuku, nawanineña anyanami anakami dehi. Dichi chinaleka nyidimu chaleñela twikaleña namali antesha, ilaña inakutiya nami ichi dinu neluki yitoñojoka niyuma yinakukabisha anyanami. Natiyaña chiyahoshaña mukulomba nikuyilombola, kuyikolesha nikuyidizisha.”

‘IKALENU ANYAKALA KUTIYA’

7. Chumanyi chabañawu anyana nianvwali?

⁷ Hanyima yakwihujola atwansi amavulu, ansoneki yamukanda waFor Parents Only (Mukanda waWanvwali Hohu) elukili chuma chikwawu chakañeshaña kuhanjeka. Ahoshaña nawu: “Anyana mwaabu watachi waabiluwu hadi anvwali jawu wakwila nawu, ‘Anvwali hiyatiyaña mwahoshaña anyanawuku.’” Iku kukala kunakundami antu ejima. Kakavulu anvwali niwena abaña chochimu hadi anyanawu. Hakwila muhanjekeña chiwahi, antu amuchisaka chiña atiyililaña, kuditiyilila chikupu wumu namukwawu.—Tañenu Yakoba 1:19.

8. Indi anvwali anateli kutiyilila ñahi chikupu kudi anyanawu?

⁸ Anvwali, komana mwayitiyililaña chikupu anyanenu? Chinateli kuyikalila neyi munazeyi hela neyi nsañu yinaletuwu yanyanya yinakumwekana neyi yalema wanyi. Ilaña nsañu yinateli kumwekana neyi yamukunkulwayi kudenu yinateli kwikala yalema chikupu kudi mwanenu. Kwikala ‘anyakala kutiya’ hichatalisha mukutiyilila hohu nakanañachima kuyuma yinahoshi mwanenuku, ilaña nichinakuhoshayi. Chinakutiyakana izu nimmwekenu yindi yikuyikwasha kwiluka chinakutiyayi mwana. Kwihula malwihu nikwena kwalema. Bayibolu yahosha nawu: “Mpuña yekala mumuchima wamuntu yidi neyi inyiñi, ilaña muntu wakashinshi wukuyitaha.” (Yish. 20:5) Kashinshi nikwiluka kanakukeñeka chikupu neyi munakukeña anyanenu ahoshi jidi kunyichima hansañu yakala.

9. Muloñadi anyana chatela kutiyililawu anvwali jawu?

⁹ Anyana, komana mwovwahilaña anvwali jenu? Izu daNzambi dahosha nawu: “Eyi mwanami, tiya mwakufumbañayi tata yeyi, bayi wuleka nshimbi jamama yeyuku.” (Yish. 1:8) Anukenu nenu, anvwali jenu ayikeña nawa anakukeña mwikali nachihandilu chachiwahi, dichi mwatela kuyitiyilila nikuyovwahila. (Efwes. 6:1) Chikwikala chapela kuyovwahila neyi muhanjekaña chiwahi nawa neyi mwiluka nenu ayikeña. Mwenda muyileja anvwali jenu chimunakutoñojoka hayuma. Ichi chikuleñela anvwali jenu eluki chimunakutoñojoka. Anenu nawa mwatela kufwila kwiluka chinakutoñojokawu anvwali jenu.

10. Chumanyi chitwadizilañaku kunsañu yaRehobowami?

¹⁰ Mwatela kubabala hakutiyilila mwayifumbañawu akwenu atwansi. Anateli kuyileja yuma yimunakukeña kutiya, ilaña kufumba kwawu hikunateli kuyikwashaku. Neyi kubabala nehi, kunateli kuyiletela jomisha mbaña. Hamuloña wakubula kwikala namaana nikashinshi kekalaña nawakulumpi, atwansi amavulu hiyamonaña yuma yikamwekana kumbidi nawa hiyanateli kwiluka yuma yatama yafumaña muyuma yinakwilawuku. Anukenu chakutalilahu chaRehobowami mwana kaMwanta Solomoni. Hampinji yekaliliyi mwanta waIsarela, chadi kuwaha neyi walondeleli kufumba kwawakulumpi. Ilaña, walondeleli kufumba kwatama kwamulejeluwu kudi anyikwenzi akuliliyi nawu hamu. Dichi antu amavulu amuwanta windi alekeli kumwovwahila. (1 Anya. 12:1-17) Chatela mwimbujoleña njila yatama yaRehobowami, zatenu nañovu kulonda muhanjekeña chiwahi nawanvwali jenu. Yilejenu chimunakutoñojoka. Hetelenu mukufumba kwawu, nawa dizilenuku kumaanawu.—Yish. 13:20.

11. Chumanyi chinateli kufumamu neyi anvwali hiyadi akasunukaku?

 ¹¹ Anvwali, neyi himunakukeña anyanenu ehuleña maana kudi akwawuku, ikalenu akasunuka, kulonda anyanenu chiyipeleleña kuhosha nenu. Muhela wumu wakansi wasonekeli nindi: “Chinatena hohu ijina damukwenzi anvwali jami ashikenaña dakwakama. Chumichi chanleñelaña ninami kwakama nawa nakañanyaña kutwalekahu kuhosha.” Muhela mukwawu wakansi wasonekeli nindi: “Atwansi amavulu akeñaña kufumba kwawanvwali, ilaña neyi anvwali kushaku maana nehi, anyana akuya kudi muntu wacheñi wunateli kuyifumba, hela tuhu kudi antu abula kwiluka yuma yayivulu.” Neyi mufwilaña kutiyilila chachiwahi kudi anyanenu hansañu yidi yejima, munateli kumona nenu akwikala akasunuka kuhosha nenu nawa akulondelaña kufumba kwenu.

IKALENU ‘ALABA HAKUHOSHA’

12. Indi yililu yamwekeshaña anvwali yinateli kukañesha ñahi kuhanjeka chiwahi nawanyanawu?

¹² Yililu yamwekeshañawu anvwali yinateli kuleñela anyanawu akañanyeña kuhoshanawu. Anvwali anateli kunyakala kumwekesha nawu anahili namazu anahoshi mwanawu. Chakadi nikujina, anvwali akwaKristu akeñaña kukiña anyanawu, muloña munanu ‘mafuku akukuminina’ munenzali yuma yafwana. (2 Tim. 3:1-5) Hela chochu, anvwali anateli kumona nawu anakukiña anyanawu ilaña anyana anateli kutoñojoka nawu anvwali jawu asweja kukalisha.

13. Muloñadi anvwali chiyatela kuwundilawu hakushimuna yitoñojoka yawu?

¹³ Chikuwaha neyi anvwali abula kunyakala kumwekesha chinakutoñojokawu. Eñañi, hichekala chapela kumwenahu neyi anyanenu anayileji chuma chinayineñeshuku. Ilaña chalema kutiyilila chachiwahi henohu kanda mwakuli. Mwanta wamaana Solomoni wasonekeli nindi: “Muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.” (Yish. 18:13) Neyi muwunda, mukutiya nsañu jajivulu nawa anyanenu akutwalekahu kuyileja. Mwatela kusambila kutiya nsañu yejima henohu kanda muyikwashi. ‘Mazu akulusukila’ anateli kuyileñela mwiluki jidi kumuchima wamwanenu. (Yoba 6:1-3) Hakwikala anvwali akweti kukeña, tiyililenu nawa fwilenu kwiluka chinakutiyawu anyanenu kulonda muyileji yuma yinateli kuyikwasha.

14. Muloñadi anyana chatela kwikalilawu alaba hakuhosha?

¹⁴ Anyana, anenu nawa mwatela kwikala ‘alaba hakuhosha,’ bayi munyakalaña kukaana munakuhosha anvwali jenuku, muloña Nzambi wayinka mudimu wakuyifumba. (Yish. 22:6) Hadaha ahitahu dehi muyuma yidi neyi yimunakuhitamu. Hela chochu, aditoñeshaña hayiluwa yakoñeluwu hampinji yadiñawu anyiki nawa anakufwila kuyikiña kulonda mubuli kukoña yiluwa yoyimu. Anvwali jenu hiyamabwambu jenu, bayi neyi ayilumbu jenuku. Anakukeña kuyikwasha, bayi kuyineñeshaku. (Tañenu Yishimu 1:5.) “Lemeshaku tata yeyi nimama yeyi,” nawa mwekeshaku neyi wayikeña neyi chakukeñawu. Ichi chikuyipelela hakwila ‘ayileli nakuyibabesha nikuyikonkomwena mudi Yehova.’—Efwes. 6:2, 4.

IKALENU “ALABA KUZUWA”

15. Yumanyi yinateli kutukwasha kwikala adiwunjika nikubula kuhilila antu itwakeña?

¹⁵ Kakavulu hitwamwekeshaña kudiwunjika kudi antu itwakeñaku. Kapostolu Pawulu wasonekeli nindi: “Tudi nakuyisonekela mukanda, enu akwakujila, niana kwetu ashinshika amudi Kristu, ekala kuKolose.” “Enu atata, bayi muvuloka anyanenuku, akenda kamona kukala.” (Kol. 1:1, 2; 3:19, 21) Pawulu wakonkomweneni Aefwesesa nindi: “Lekenu ndulu yejima, nindombu,  nikuzuwa, nimapumba, nikutukana.” (Efwes. 4:31) Kwikala nayililu yamukabu waspiritu yaNzambi yidi neyi kukaba kabe-e, kwovwaha nikudihemba, yikutukwasha kwikala awunda neyi tuholokela muyuma yakala.—Ŋal. 5:22, 23.

16. Indi Yesu wafumbili ñahi atumbanji twindi, nawa muloñadi chichadiña chakuhayamisha?

¹⁶ Toñojokenu hachakutalilahu chaYesu. Toñojokenu hachineñi chatiyiliyi hampinji yakudya kwamelela kwakukumishaku nawapostolu indi. Yesu welukili nindi kunashali hohu maora antesha nakufwa kufwa kwatama. Kujilika ijina daTata yindi nikupuluka kwachisaka chawantu kwashindameneni hakashinshi kindi. Ilaña, hakuna kudya, ‘havulumukili ntadi [hakachi kawapostolu] yakwila nawu mwinawinyi wateleleli kwikala wabadika akwawu?’ Yesu hayizuwilili hela kuyihililaku. Ilaña, wahanjekeli nawu mukuwunda. Yesu wayanukishili nindi atwalekeluhu kukakela kudi yena mumpinji yakweseka. Hela chakwila Satana wakeñeleña kuyisala neyi tidiku, Yesu wayikuhweleleli nindi akatwalekahu kwikala ashinshika. Dichi wakwatili chitiyañenu nawu.—Luka 22:24-32.

17. Chumanyi chinateli kukwasha anyana kuwundisha muchima?

¹⁷ Anyana niwena atela kuwundisha muchima. Sweje-e neyi anashiki dehi muyaaka yawukampululu, dihu hatachikañawu kutoñojoka nawu anvwali jawu ayikuhwelela wanyi, dichinakuleñela ayilejeña mwakwilila. Mpinji yikwawu munateli kutoñojoka mwenimu, ilaña mwatela kwiluka nenu anvwali jenu ayikeña dichaleñelaña ayakameneña. Kuhitila mukuyitiyilila mumesu awunda nikuyovwahila, akutachika kuyilemesha nawa akuyimonaña nawu mudi namaana. Kuhiñahu anvwali jenu anateli kuyinka lusesa lwakudilila yuma yikwawu. Kumwekesha chililu chakudihemba diyi njila yamaana. Bayibolu yahosha nawu: “Chisupi washimunaña yejima yidi mumuchima windi, ilaña mukwamaana wadifumbaña nakudimwenesha.”—Yish. 29:11.

18. Indi kukeña kunateli kuyikwasha ñahi muhanjekeña chachiwahi?

¹⁸ Dichi enu anvwali nianyana itwakeña, bayi muzeya neyi muchisaka chenu himunakuhanjeka chiwahi kwesekeja nachimwakeñañaku. Twalekenuhu nakuzatilahu, nikutwalekahu kwenda muchalala. (3 Yow. 4) Mwituña dadiha, antu awanina akahanjekaña chachiwahi, chakadi kukala. Hela chochu, makonu wonsu wetu twelaña yuma yitwaditoñeshaña chimwahita mpinji. Dichi bayi mushintajala kulomba kwanakena. Anakenenuña chikupu. ‘Ikalenu anuñañana mukukeña.’ (Kol. 2:2) Kukeña kukweti ñovu. ‘Kukeña kwadiwunjikaña, kukweti niluwi. Hikwanyakalaña kuzuwaku; hikwafuukwilaña mukwawu chuma chatamaku. Kwovwahilaña yuma yejima, kwetejaña yuma yejima, kwachiñejaña yuma yejima, kwatatakenaña mwahita yuma yejima.’ (1 Kor. 13:4-7) Twalekenuhu kwikala nakukeña kulonda muhanjekeña chiwahi, chikuleñela mwikali namuzañalu muchisaka nikuleta kalemesha kudi Yehova.

[Tumazu twaheshina]

[Malwihu aKuzatisha haKudiza]