Hembenu Wuswana Wenu Kuhitila Mukufuukulahu Chiwahi

“Tiyenu kutama nayuma yatama, kakelenu yuma yayiwahi.”—ROM. 12:9.

MUKWAKULA NENUDI?

Munateli kulumbulula ñahi wuswana wetu wakuspiritu?

Yumanyi yakusoñamisha yitunateli kudizila kuyuma yakoñeliyi Esawu?

Tunateli kuhemba ñahi wuswana wetu?

1, 2. (a) Chumanyi chayileñeleli mufuukuluhu kumukalakela Nzambi? (b) Malwihwinyi itwatela kudihula kutalisha hawuswana wetu wakuspiritu?

 YIHITA yawantu amavulu twafuukulahu kumukalakela Yehova Nzambi nikulondela chikupu mumahaji aYesu Kristu. (Mat. 16:24; 1 Pet. 2:21) Twalemesha chikupu kudihana kwetu kudi Nzambi. Hitwafuukwiluhu kudihana kudi Nzambi hanyima yakudiza nsañu yantesha yamunsonaku, ilaña hanyima yakudiza chikupu Izu daNzambi. Chafuminumu, twadizili yikuma yayivulu yakukolesha chikuhwelelu kutalisha hawuswana wahembelayi Yehova antu ‘anakumwiluka niYesu Kristu watemesheliyi.’—Yow. 17:3; Rom. 12:2.

² Hakwila tutwalekuhu kuzata chiwahi neyi akwaKristu, twatela kufuukulahu yuma yinateli kumuzañalesha Tata yetu wamwiwulu. Ichi chibaaba chikwakula malwihu alema akwila nawu: Indi wuswana wetu hichumanyi? Twatela kuwumona ñahi? Tunateli kuzata ñahi nañovu kulonda tutambwili wuswana wetu? Yumanyi yikutukwasha kufuukulahu chachiwahi?

INDI WUSWANA WETU HICHUMANYI?

3. Wuswananyi wunakutalilawu (a) awayishewa ni (b) “anyikoku acheñi”?

³ Izanvu danyanya dawakwaKristu datalilaña kutambwila ‘wuswana wakatokaña, wakadi kujilola, wabulaña kujimuka,’ dikwila nawu kukooleka kweneni kwakuyuula hamu naKristu mwiwulu. (1 Pet. 1:3, 4) Hakwila akatambwili iwu wuswana, awa antu atela ‘kuvwalika chachiha.’ (Yow. 3:1-3) Wuswananyi wukatambwila yihita ‘yanyikoku acheñi’ aYesu, anakukalakela hamu nawatumbanji twindi awayishewa hakushimwina nsañu yayiwahi yaWanta waNzambi? (Yow. 10:16) Anyikoku acheñi akatambwila wuswana wakañenyi kutambwilawu aAdama  naEvu akwanshidi, wumi wahaya nyaka wamuparadisa yahamaseki chakadi makabi, kufwa, hela kudila. (Chim. 21:1-4) Dichi Yesu wamukanini mukwanyiloña wafwilili hamu nayena nindi: “Chalala Nakuleji lelu nami, Wukekala nanami muParadisa.”—Luka 23:43 NW.

4. Nkiswinyi yitunakudiluñisha?

⁴ Hela makonu, tunakudiluñisha yuma yimu yawuswana wetu. Hamuloña wakukuhwelela ‘mukukuula kwekala mudi Kristu Yesu,’ tukweti kuwunda niwubwambu wawuwahi naNzambi. (Rom. 3:23-25) Tweluka chachiwahi yikaninu yayiwahi yekala Mwizu daNzambi. Kubombelahu, twazañalala nankashi hamuloña wakwikala hakachi kawamana kwetu amukaayi kejima. Nawa hikukooleka kweneni hakwikala Chinsahu chaYehova. Dimuloña wutwalemeshela wuswana wetu.

5. Chumanyi chafwilañayi Satana kwila kudi antu jaNzambi, nawa chumanyi chinateli kutukwasha kudikaña namaanindi?

⁵ Hela chochu, hakwila tukwatishi wuswa wetu wabadika, twatela kwikala asoñama kutukosi twaSatana. Mpinji yejima Satana wesekaña kuluwañesha antu jaNzambi kulonda atondeña yuma yikuleñela ajimbeshi wuswana wawu. (Kuch. 25:1-3, 9) Chinelukiyi nindi mpinji yindi yakukuma yidi kukamwihi, Satana nakuzata nañovu kulonda yatuluwañeshi. (Tañenu Chimwekeshu 12:12, 17.) Hakwila tutwalekuhu “kudikaña namaana adiyabolu akudimbana,” twatela kutwalekahu nakulemesha chikupu wuswana wetu. (Efwes. 6:11) Muniyi njila, kusoñamisha kwaEsawu mwana kankakulula yetu Isaka kwatudizishaña yuma yalema yitwatela kutiyilila chikupu.

BAYI MWIKALA NEYI ESAWUKU

6, 7. Indi Esawu wadiñanyi, nawa wuswananyi wateleleli kutambwilayi?

⁶ Kwakwihi nayaaka 4000 yinahituhu, Isaka niRebeka avweli ambuyi nakapa, aEsawu naYakoba. Chakulileñawu awa amana kwamuntu, ambukili muyililu nimuyuma yelileñawu. “Esawu wadiñi chibinda wasweja, muntu wampata kwindi,” hakwila “Yakoba wadiñi muntu wawunda, washakaminaña mumatenti.” (Kutach. 25:27) Yakoba amuteneneña nawu wawunda muloña wadiña wakashinshi nawa hakoñeleña nshiduku.

⁷ Hampinji Esawu niYakoba hadiñawu nayaaka 15, nkaka yawu Abarahama wafwili, ilaña chikaninu chaYehova chamukaniniyi Abarahama hichafwiluku. Chimwahitili mpinji, Yehova wamukanini cheñi Isaka, wamulejeli nindi nyunza yejima yahamaseki yakawenaku kukooleka kuhitila mulubutu lwaAbarahama. (Tañenu Kutachika 26:3-5.) Ichi chikaninu chamwekesheli nawu Mesiya, ‘lubutu’ lwashinshika lwashimunawu haKutachika 3:15, lukasemukila kuhitila mudi anyana kaAbarahama. Chineli Esawu wadiña wedi waIsaka, wadiña nakukooleka kwakutambwila chikaninu chamukaninuwu Abarahama kudi Nzambi. Esawu wateleleli kutambwila wuswana wawuwahi nankashi! Komana walemesheli iwu wuswana?

8, 9. (a) Chumanyi chatondeliyi Esawu kutalisha hawuswana windi? (b) Chimwahitili yaaka, chumanyi chelukiliyi Esawu hachuma chatondeliyi, nawa welili ñahi?

⁸ Ifuku dimu Esawu chafuntiliyi kufuma mumpata, wamweni Yakoba “nakuteleka yakudya.” Esawu wahosheli nindi: “Anyinkuhu, mwani, oyu yichinana oyu nidyi, nafwi dehi chinzeya.” Yakoba wamwakwili Esawu nindi: “Sambilaku kunlandisha wukulumpi weyi wakusemuka.” Indi Esawu watondeluhu chumanyi? Chakuhayamisha, wahosheli nindi: ‘Wukulumpi nakadiilamu yikahi?’ Eñañi, Esawu watondeluhu cheña chayakudya kubadika wukulumpi windi. Yakoba wakeñeleña kwiluka chikupu neyi Esawu mwamweni walandishileña wukulumpi windi wakusemuka, dichi wamulejeli nindi  yasanyiki. Yakoba wahosheli nindi: “Sambilaku kusanyika.” Hohenuhu, Esawu walandishili wukulumpi windi. Kuhiñahu, “Yakoba hakumwinka Esawu nidinkendi, nimakundi akuteleka. Wadiili, wanwini, wanyamukili, hakuya kwindi. Dimu mwadiwililiyi Esawu wukulumpi windi.”—Kutach. 25:29-34.

⁹ Chimwahitili yaaka, Isaka chelukiliyi nindi keña yafwi, Rebeka waloñesheli chiwahi kulonda Yakoba yatambwili nkisu yakaaniniyi Esawu. Esawu chelukiliyi nindi wakoñeli chuma chatama kuhitila mukulandisha wukulumpi windi, wamulembeleli Isaka nindi: “Nkiswili nkisu ninami nawa, eyi tata . . . Hiwunanswekeluku nkisu yamuku?” Isaka chamulejeliyi nindi hanateli kuhimpa nkisu yamukiswililiyi Yakobaku, “Esawu hakutwa ikumbu dakudila.”—Kutach. 27:30-38.

10. Indi Yehova wayimweneña ñahi aEsawu naYakoba, nawa muloñadi?

¹⁰ Chumanyi chitunateli kudizilaku kuchuma cheliliyi Esawu? Wamwekesheli nindi walemesheli nankashi yuma yakumujimba kubadika nkisu yadi kutambwilayi kumbidi kuhitila muwuswana windi. Esawu walemesheli wanyi wukulumpi windi nawa wamuheleli Nzambi. Kubombelahu, Esawu wadiwili chuma chadi kumwekena anyanindi hamuloña wachuma chafuukwiliyi. Kwambukaku, Yakoba walemesheli chikupu wuswana windi. Chakutalilahu, Yakoba welili mwamulejeluwu anvwali jidi hakutonda ñodindi. (Kutach. 27:46–28:3) Hamuloña wakwila Yakoba wafuukwiluhu chuma chakeñekeleña kudiwunjika nikudihana, wekalili nkakulula yaMesiya. Indi Nzambi wayimweneña ñahi aEsawu naYakoba? Kuhitila mudi kaprofwetu Malaki, Yehova wahosheli nindi: “Ami nakeñeli Yakoba; naheleli Esawu.”—Mal. 1:2, 3.

11. (a) Muloñadi etu akwaKristu chitwatela kudizilaku kuchakutalilahu chaEsawu? (b) Muloñadi Pawulu chahosheleliyi hawuvumbi kutalisha hachuma chakoñeliyi Esawu?

¹¹ Komana akwaKristu makonu anateli kudizila kunsañu yamuBayibolu yahoshaña hadi Esawu? Eñañi anateli kudizilaku. Kapostolu Pawulu wasoñamishili akwawu akwakwitiya kwikala ababala kulonda “habuli kwikala chivumbi, hela muntu wasekesha yajila, neyi Esawu walandishili wuswana windi nakudya kwakudya hohenohu.” (Heb. 12:16) AkwaKristu niwena ayisoñamishaña chochimu. Twatela kutwalekahu kulemesha yuma yajila kulonda yuma yakumujimba yibuli kuleñela tujimbeshi wuswana wetu wakuspiritu. Hampinji yahosheleñayi hachuma chakoñeliyi Esawu, muloñadi Pawulu chahosheleliyi nihawuvumbi? Muloña kwikala nayililu yakumujimba neyi yadiña naEsawu kunateli kuleñela muntu yadiwuli yuma yajila yakuspiritu nakudiñija muyuma yatama, chidi neyi wuvumbi.

 LOÑESHENU MUCHIMA WENU YOYINU MPINJI

12. (a) Indi Satana watwesekaña ñahi? (b) Shimunenu yakutalilahu yamuNsona yinateli kutukwasha hakufuukulahu hayuma yakala.

¹² Hakwikala ambuña aYehova, hitwadiñijaña muyuma yinateli kutuleñela tuholokeli mukweseka kwakwila yuma yatama yawuvumbuku. Ilaña, twalombaña netu Yehova Nzambi yatukwashi kulonda tubuli kutiyilila muntu wukutweseka nindi tudikañi naYena. (Mat. 6:13) Ilaña mpinji yejima Satana wafwila kuzeyesha wuspiritu wetu chitwafwilaña kuhemba kashinshi ketu munidi ituña datama. (Efwes. 6:12) Satana diyi nzambi wakanu kaayi katama nawa weluka chakweseka antu kulonda adiñiji muyuma yatama yafwilañawu. (1 Kor. 10:8, 13) Chakutalilahu, fwikijenu nenu munaholokeli mukweseka kwakwila chuma chimwakeñesha ilaña munjila yaheña. Mukwila ñahi? Komana mukufwana Esawu nakuhosha nenu: ‘Nyakala! Nyinkuhu!’ Ntahindi mukushinda kweseka nakutemuka, neyi chelili Yosefu mwana kaYakoba, wesekeluwu kudi ñoda Potifwari?—Tañenu Kutachika 39:10-12.

13. (a) Makonu, amana kwetu amavulu elaña ñahi neyi cheliliyi Yosefu, nawa amakwawu elaña ñahi neyi cheliliyi Esawu? (b) Chumanyi chitwatela kwila kulonda tubuli kwila neyi cheliliyi Esawu?

¹³ Amana kwetu amavulu niahela ahitaña muyuma yaleñelaña atonduhu neyi cheliliyi Esawu hela Yosefu. Antu amavulu anakoñi mwamuwahi nawa atiyishaña muchima waYehova kuwaha. (Yish. 27:11) Hela chochu, akwetu akakwitiya amakwawu neyi aholokela mukweseka atondañahu kwikala neyi Esawu, ashaña wuswana wawu wakuspiritu hakatoña. Nyiloña yayivulu yawunsompeshi nikuhaña yamwekanaña chaaka nichaaka yekalaña yawuvumbi. Chalema nankashi kuloñesha muchima wetu, henohu kanda tuholokeli muyuma yinateli kweseka kanshinshi ketu. (Mas. 78:8) Tunateli kulondela njila jiyedi jinateli kutukiña kukweseka nikutukwasha tukafuukuluhu chiwahi kumbidi.

TOÑOJOKENUHU CHIKUPU NAWA DILOÑESHENU

14. Malwihwinyi itwatela kutoñojokahu anateli kutukwasha ‘kutiya kutama nayuma yatama nikukakela kuyuma yayiwahi’?

¹⁴ Chuma chatachi chitwatela kwila chabombelamu kutoñojoka hayuma yinateli kufuma muyililu yetu. Hakwila tulemeshi chikupu wuswana wetu wakuspiritu chashindamena hakumukeña chikupu Yehova, Watwinka iwu wuswana. Muloña neyi muntu twamukeña, hitwakeñaña kumuneñeshaku. Ilaña, twafwilaña kwikala nawuselewa windi. Chineli twafwilaña kwila mwenimu, twatela kutoñojokaña hayuma yafumaña munshidi neyi chakwila tudiñija mukufwila yuma yakumujimba yatama. Twatela kudihula netu: ‘Indi kudiñija muyililu yalwisu kunateli kuluwañesha ñahi wubwambu wami naYehova? Kukoña chuma chatama kunateli kuluwañesha ñahi chisaka chami? Indi amana kwami niahela muchipompelu akutiya ñahi? Komana nateli kutuntwisha amakwawu?’ (Fwi. 1:10) Tunateli cheñi kudihula netu: ‘Komana yuma yatama yinnateli kwila hakampinji kantesha yinesekani nachineñi chakafumamu? Komana mwalala inakukeña kwikala neyi Esawu, nakutwa ikumbu hanyima yakwiluka chuma chinnakoñi?’ (Heb. 12:17) Kutoñojoka hamalwihu amuchidiwu kukutukwasha ‘kutiya kutama nayuma yatama nikukakela kuyuma yayiwahi.’ (Rom. 12:9) Kumukeña Yehova dikwatela kutusañumuna tukakeli kuwuswana wetu.—Mas. 73:28.

15. Yumanyi yikutukwasha kulonda twikali adiloñesha kushinda yuma yinateli kuzeyesha wuspiritu wetu?

¹⁵ Njila yamuchiyedi yabombelamu kudiloñesha kulonda kuumika kweseka. Yehova watuloñeshela yuma yayivulu yinateli kutukwashi tudiloñeshi kulonda tushindi yuma yinateli kuzeyesha wuspiritu wetu. Yuma  yatuloñeshelayi yabombelamu kudiza Bayibolu, kupompa kwawakwaKristu, mudimu wakushimwina, nikulomba. (1 Kor. 15:58) Mpinji yejima yitwalombaña chakufuma hamuchima kudi Yehova nikushimwina chikupu mumudimu wawakwaKristu, dikwila nawu tunakudiloñesha kulonda tuumiki kweseka. (Tañenu 1 Timotewu 6:12, 19.) Twatela kutwalekahu kuzata nañovu hakwila yumiyi kulonda twikali adiloñesha kushinda kweseka. (Ŋal. 6:7) Chumichi achilumbulula mukapetulu kamuchiyedi kamukanda waYishimu.

‘TWALEKENUHU KUKEÑAKEÑA MAANA’

16, 17. Tunateli kutwesha ñahi kuheta maana anateli kutukwasha kufuukulahu chiwahi?

¹⁶ Mukanda waYishimu kapetulu 2 watukoleshaña kwikala namaana nikutoñojoka kwakashinshi. Iyi yawana yatukwashaña kutonda chiwahi hayuma yayiwahi niyatama nikutukwasha kwiluka mwakukumina chatela tudiñijeña muyuma yatama. Ilaña hakwila tutweshi kwila mwenimu, twatela kuzata nañovu chikupu. Bayibolu yalumbulula nawu: “Eyi mwanami, neyi wukutambula mazu ami hiwukutudika kuleja kwami hankelelu yeyi yamuchima; wuteñeleki itu deyi wutiyi maana, wushi muchima weyi kukashinshi; mwalala, neyi wakabilela neyi niiluki mwalumbulukila nsañu, wutambika kashinshi nezu deyi, neyi wakamukeñakeña neyi siliva, neyi wakamutondatonda neyi yuma yalema yaswekawu dehi, dihu hiwakashinshika mwaya kwakama Yehova, dihu hiwakamwena kwiluka Nzambi. Muloña Yehova diyi wenkaña muntu maana; mukanwa kindi dimu mwafumaña nikwiluka nikashinshi.”—Yish. 2:1-6.

¹⁷ Eñañi, hakwila tutweshi kuwana kashinshi kakeñekaña hakutonda yuma yayiwahi chashindamenaña hakuwanisha yuma yashimunawu muYishimu. Tunateli kushinda kweseka neyi twiteja mazu aYehova afumbi wuntu wetu wamukachi, neyi tutatakena mukulomba wunlomboli waNzambi, nawa neyi tutwalekahu nakukeñakeña maana aNzambi neyi chakeñakeñañawu malola awuseya ajiikama.

18. Yumanyi yimunakufwila kutwalekahu kwila, nawa muloñadi?

¹⁸ Yehova wahanaña kwiluka, kashinshi, nimaana kudi antu azataña nañovu hakukeñakeña iyi yawaana. Tukusweja kukundama kudi Yehova wahanaña iyi yawana neyi tuswejaña kuyikeñakeña nikuyizatisha. Kuhiñahu, wubwambu wetu naYehova Nzambi wunateli kutukiña neyi tuholokela mukweseka. Kukundama kwakwihi naYehova nikumwakama chikupu kwatukiñaña kulonda tubuleña kwila yuma yatama. (Mas. 25:14; Yak. 4:8) Wubwambu wetu naYehova nimaana atwinkañayi akutukwasha kufuukulahu yuma yayiwahi yikumuzañalesha nikukiña wuswana wetu.

[Malwihu aKuzatisha haKudiza]