Koleshenu Maluwi Enu Kuhitila Mukuhanjeka Chachiwahi

“Izu dakuhoshela hidinateleli didi neyi mabula awuru analoñejuwu mumabañu asiliva.”—YISH. 25:11.

MUKWAKULA NENUDI?

Indi kumwekesha kashinshi kwaleñelaña ñahi muhanjekeña chiwahi mumaluwi?

Muloñadi adisumbula chatela kudilemeshelawu wumu namukwawu?

Indi kwikala adizoza kunateli kukwasha ñahi maluwi?

1. Indi kuhanjeka chiwahi kwakwashaña ñahi maluwi?

 MANA kwetu wumu wakuCanada wahosheli nindi: “Chaswayi nikala nampinji yakushakama hamu nañodami kubadika namuntu wacheñi.” Iwu mana kwetu watwalekeluhu nindi kushakama hamu nañodindi kwamuleñelaña yaswejeña kwikala namuzañalu nawa kwamukwashaña kuumika kukala. Iyala wasumbula wakuAustralia wasonekeli nindi: “Kwosi ifuku nidimu dahitahu dehi chakadi kuhosha nañodami hadi yaaka 11 yitunashakami hamu.” Wahosheli nindi kuhanjeka chiwahi kunayikwashi kudikuhwelela chikupu wumu namukwawu nikwikala namaluwi akola. Muhela wakuCosta Rica wahosheli nindi: “Kuhanjeka chiwahi hikunakoleshi hohu maluwetuku; ilaña kunatuleñeli kukundama kwakwihi naYehova, kwatukiñaña kukweseka, kunatuleñeli kwikala anuñañana nikusweja kudikeña.”

2. Yumanyi yinateli kuleñela adisumbula abuleña kuhanjeka chachiwahi?

² Komana mwadiluñishaña kuhanjeka chiwahi namwini kwenu, indi kwiji chayikalilaña kwikala nampinji yakuhanjeka chiwahi? Eñañi, munateli kumona kukala, muloña maluwi anuñañeshaña hamu antu ayedi abula kuwanina akweti wuntu washiyashana, kubombelahu niyaaku yamwekeshaña chisemwa ninkulilu yawu. (Rom. 3:23) Hela chochu, antu adisumbula anateli kwikala nanjila jakuhanjekelamu jashiyashana. Dichaleñeleli akwakusandujola hansañu yamaluwi John M. Gottman niNan Silver ahosheli nawu: “Adisumbula atela kudihana nakuzata nañovu chikupu neyi anakukeña ahanjekeña chiwahi nawa maluwi awu atwalekuhu.”

3. Chumanyi chinakwashi adisumbula kukolesha maluwi awu?

³ Mwamweni, kuzata nañovu dikwaleñelaña kwikala namaluwi amawahi. Ilaña mwafumaña muzañalu wabadika. Antu adisumbula adikeña wumu namukwawu anateli kudiluñisha chikupu kushakama hamu. (Mukwa. 9:9) Toñojokenu hamaluwi amawahi aIsaka naRebeka. (Kutach. 24:67) Hela hanyima yakushakama hamu hadi mpinji yayilehi  hamu neyi eyala namumbanda, kwosi chuma chamwekeshaña nawu alekeli kudikeña. Chochimu niantu amavulu adisumbula makonu. Chumanyi chayikwashaña? Eluka chakuhanjeka chiwahi wumu namukwawu nikushimuna yuma yinakutoñojokawu nichinakutiyawu, munjila yayiwahi, kuhitila mukwikala nikumwekesha kashinshi, kukeña, kalemesha kakeni nikudizoza. Neyi chitukudiza, neyi iyi yililu yalema yikala mumaluwi, chekalaña chapela mpinji yejima kuhanjeka chiwahi.

MWEKESHENU KASHINSHI

4, 5. Indi kashinshi kanateli kukwasha ñahi adisumbula kudiluka chiwahi chikupu? Shimunenu yakutalilahu.

⁴ Mukanda waYishimu 16:20 wahosha nawu: “Muntu watiyaña izu dawakwawu wakawana yayiwahi.” Mwalala ichi chakwashanaña mumaluwi nimuchisaka. (Tañenu Yishimu 24:3.) Mwiizu daNzambi dimutwatela kuwana hohu kashinshi nimaana. Mukanda waKutachika 2:18 watulejaña nawu Nzambi waleñeli mumbanda kulonda yekala nkwashi yeyala, bayi neyi chifwikija chinduku. Wamwekeshaña nawu hinkwashi kuhitila munjila yahanjekelañamu namwinikwindi. Hela chochu, antu ashiyashana, ilaña ambanda kakavulu akeña kuhosha jidi kumuchima, hadi antu nihawubwambu. Atiyaña kuwaha kuhanjeka nawu munjila yayiwahi chakadi kuyihita mumbadi muloña chayileñelaña atiyeña nawu akeñewa. Kwambukaku, amayala amavulu hiyavula kuhosha jidi kumuchimaku ilaña avula kuhosha hanyidimu, hakukala nimwakumanishila kukala. Nawa amayala akeñaña kuyilemesha.

⁵ Muhela wakuBritain wahosheli nindi: “Nfumwami wakeñaña kumanisha kukala swayi-swayi chatela yatiyi chinnakuhosha. Walumbulwili nindi chumichi chinateli kumuneñesha muloña chuma chakeñañayi kudi yena hikumutiyilila nikutiya jidi kumuchima windi. Iyala wumu wasumbula wasonekeli nindi: “Hampinji yitwadisumbwili hohu ami niñodami, nadiña nachaaku chakukeña kuwana swayi-swayi njila mwakumanishila kukala kukwetiyi. Hela chochu, chimwahitili kapinji kantesha nelukili nami chakeñeleñayi chikupu hikumutiyilila.” (Yish. 18:13; Yak. 1:19) Iyala wakashinshi welukaña jidi kumuchima wañodindi nawa wafwilaña kuhanjeka nindi munjila yinateli kumuleñela yatiyi nindi wakeñewa. Hampinji yoyimu, wamulejaña nindi yitoñojoka yindi yalema nankashi kudi yena. (1 Pet. 3:7) Mumbanda wakashinshi niyena wafwilaña kutiyisha chinakutoñojokayi nfumwindi. Neyi eyala namumbanda azata nyidimu yayinkayi Nzambi, anateli kwikala namaluwi amuzañalu nawa akuzatilaña hamu hakufuukula chachiwahi.

6, 7. (a) Indi lushimbi lwekala haMukwakutaŋisha 3:7 lunateli kukwasha ñahi adisumbula kumwekesha kashinshi? (b) Indi mumbanda nateli kumwekesha ñahi kashinshi, nawa nfumwindi watela kwila ñahi?

⁶ Adisumbula adi nakashinshi eluka cheñi nawu kwekala “mpinji yakumwena, nimpinji yakuhosha.” (Mukwa. 3:1, 7) Muhela wunashakami mumaluwi hadi yaaka ikumi wahosheli nindi: “Ichi dinu neluki nami mpinji jikwawu hichakeñekaña kuhosha hansañuku. Neyi nfumwami nyidimu yinamukalili hela wudi nanyidimu yikwawu, nachiñililaña hahiti mpinji henohu kanda nimuleji. Ichi chaleñelaña tuhanjekeña mumesu akuwunda.” Neyi mumbanda yahoshaña munjila yayiwahi nawa ‘hampinji yatelela,’ nfumwindi wukwikala namuzañalu wakutiya jinakuhoshayi.—Tañenu Yishimu 25:11.

⁷ Iyala mukwaKristu wasumbula watela kuzata mudimu windi bayi hohu kuhitila mukutiyilila chinakuhoshayi ñodinduku, ilaña nikuhitila mukushimuna chiwahi chinakutoñojokayi. Eluda wunashakami mumaluwi hadi yaaka 27 wahosheli nindi: “Natela kuzata nañovu kulonda nimulejeña ñodami yuma yidi kumuchima wami.” Mana kwetu wunashakami mumaluwi hadi yaaka 24 wahosheli nindi hakeñaña kuhosha hakukalaku. Watoñojokaña nindi neyi yadimwenenahu kukala kunateli kumana. Ilaña wabombeleluhu nindi: “Ichi neluki nami kuhosha jidi kumuchima hikuzeyaku. Neyi nikañanya kulumbulula chiwahi, nalombaña kulonda niwani mazu amawahi nawa nihoshi munjila yayiwahi. Kuhiñahu nakokaña muuya dinu hinukutachika kuhosha.” Chalema kudi antu  adisumbula kuwana mpinji yayiwahi yakuhanjeka, chidi neyi hampinji yadiwu nkawawu nakuhanjeka hansona yefuku hela hampinji yinakutañilawu Bayibolu hamu.

8. Hakwila ahembi maluwi awu, yumanyi yikwawu yasañumunaña akwaKristu adisumbula?

⁸ Kulomba nikufwila kuwahishaku njila yakuhanjekelamu chachiwahi kwalema chikupu kudi eyala namumbanda. Mwalala, chinateli kwikala chakala hakwila adisumbula ahimpi njila mwahanjekelañawu. Ilaña neyi adisumbula amukeña Yehova, alomba spiritu yindi nawa amonaña maluwi awu nawu ajila, iyi diyi yuma yinateli kuyisañumuna. Mumbanda wunashakami mumaluwi hadi yaaka 26 wasonekeli nindi: “Ami ninfumwami twalemesha nankashi maluwi neyi chayilemeshayi Yehova, dichi hitwatoñojokaña hakwambukaku. Chumichi chatuleñelaña tuzateña nañovu hakumanisha kukala kuhitila mukuhanjeka hamu.” Kashinshi kamuchidiwu nikumwakama Nzambi kwamuzañaleshaña nawa mwafumaña nkisu chikupu.—Mas. 127:1.

SWEJENU KUKEÑAÑANA

9, 10. Munjilanyi adisumbula mwatela kuleñelawu kukeña kwawu kuswejeluku?

⁹ Kukeña, “diyi mpanda yasweja kunuña antu hamu,” chililu chalema nankashi mumaluwi. (Kol. 3:14) Kukeña kwalala kwaswejelañaku hampinji yatwalekañawu antu adisumbula ashinshika kushakama hamu, mumuzañalu nimumakabi. Wubwambu wawu wakolelañaku nawa adiluñishaña kushakama hamu. Kudi yuma yayivulu yawahishaña maluwi amuchidiwu, bayi neyi yuma yantesha yalema, neyi yamwekeshañawu munyivwimbimbi hela hachisanji chanyevuluku, ilaña kuhitila mukwila yuma yayivulu yanyanya yidi neyi, kudikumbata, kumuhameka namazu amawahi, kumwilila mukwenu chuma chachiwahi, kutumba chimwemweta hakanwa, hela hosha chakufuma hamuchima nenu “munazati ñahi?” Iyi yuma yanyanya yawahishaña maluwi chikupu. Adisumbula anashakami mumaluwi amuzañalu hadi yaaka 19 ahosheli nawu aditemeshelaña nshiña hela kudisonekela mazu namwaana kulonda “eluki chinakwenda yuma.”

¹⁰ Kukeña nikwena kwasañumunaña adisumbula kutwalekahu kudiluka chiwahi. (Fwi. 2:4) Chafumañamu, kudiluka chiwahi kwaleñela kukeña kwawu kuswejeluku hela chakwila hiyawaninaku. Mukuhita kwampinji maluwi amawahi atwalekañahu nakuwahilaku nawa akolelañaku. Dichi neyi mudi mumaluwi, dihulenu nenu: ‘Komana mwinikwami namwiluka chiwahi? Komana neluka chatiyañayi nichatoñojokañayi hayuma? Komana navulaña kutoñojoka hadi mwinikwami, hadaha nikutoñojoka hayililu yaleñeleli nimukeñi hakusambila?’

 IKALENU NAKALEMESHA

11. Muloñadi kalemesha chikalemena hakwikala namaluwi amawahi? Lumbululenu.

¹¹ Hela tuhu maluwi amuzañalu chikupu hiyekala maluwi awaninaku, nawa mpinji yikwawu aditadikishaña. Abarahama niSara mpinji yikwawu aditadikishileña. (Kutach. 21:9-11) Ilaña, kuditadikisha hikwaleñeleli maluwi awu azeyuku. Muloñadi? Muloña adilemesheleña chikupu. Chakutalilahu, Abarahama wahosheli nindi “mwani” kudi Sara. (Kutach. 12:11, 13) Niyena nawa, wamwovwahilili Abarahama nawa wamumweneña nindi ‘himwanta’ windi. (Kutach. 18:12) Neyi adisumbula anakukañanya kudilemesha, kakavulu ichi chamwekenaña mumazu azatishañawu ninhoshelu. (Yish. 12:18) Neyi akañanya kumanisha kukala kunakuleñela, dikwila nawu maluwi awu akuya mumenji.—Tañenu Yakoba 3:7-10, 17, 18.

12. Muloñadi antu amaha mumaluwi chatela kuzatilawu nañovu kulonda ahosheña nakalemesha?

¹² Antu amaha mumaluwi atela kuzata nañovu kulonda ahanjekeña chiwahi nikudilemesha wumu namukwawu, chikuleñela ekali akasunuka nawa akuhanjekaña chakadi kuhita mumbadi. Iyala wasumbula wahosheli nindi: “Yaaka yatachi mumaluwi, hela chakwila yekalaña yamuzañalu, mpinji yikwawu yinateli kukuneñesha. Chiwatachika kwiluka chatiyaña ñodeyi, yaaku yikwetiyi, niyuma yakeñañayi, niyena yatachika kwiluka yiwakeña, yuma yinateli kukala chikupu. Hela chochu, munatweshi kwikala namaluwi amawahi kuhitila mukwikala nakashinshi nawa amuzañalu nikumwekesha kudizoza, kuduñumika nikumukuhwelela Yehova.” Iku hikufumba kwakuwahi kutwatela kulondela wonsu wetu!

MWEKESHENU KUDIZOZA KWALALA

13. Muloñadi kudizoza chikwalemena hakwikala namaluwi amuzañalu?

¹³ Adisumbula anateli kuhanjeka munjila yayiwahi nawa yakuwunda neyi adi “nayitoñojoka yakudizoza.” (1 Pet. 3:8) Mana kwetu wumu wunashakami mumaluwi hadi yaaka 11 wahosheli nindi kudizoza kwakwashaña adisumbula kumanisha kukala muloña kwayileñelaña kuhosha nawu “muñanakenuku.” Eluda wunashakami mumaluwi chachiwahi hadi yaaka 20 wahosheli nindi, “Mpinji yikwawu kuhosha nawu ‘Muñanakenuku’ kwalema nankashi kubadika kuhosha nawu ‘nakukeña.’” Walumbulwili kulomba chikwamukwashaña yena niñodindi hakwila amwekesheña kudizoza. Wahosheli nindi, “Ami niñodami  neyi tulombela hamu kudi Yehova, chatwanukishaña netu tudi antu abula kuwanina nikutwanukisha haluwi lwaNzambi lwabadika.” Ichi chayikwashaña kudimona aweni munjila yayiwahi nikukala kukwetuwu.

14. Indi kudivwimba kunateli kukisañana ñahi maluwi?

¹⁴ Hela chochu, kudivwimba, kwaleñelaña adisumbula akañanyeña kuhanjeka chiwahi nikumanisha kukala. Muntu wadivwimba hafwilaña hela hekalaña nawulobu wakudanakenaku. Chatela yadizozi nakuhosha nindi, “Naluwañeshi; muñanakenuku mwani,” muntu wadivwimba wadikañaña. Chatela yamwekeshi wulobu nakwiteja kuzeya kwindi, washinshikaña hayiluwa yidi mudi muntu mukwawu. Neyi anamuvuloki, chatela yafwili kuleta kuwunda, wazuwaña, hadaha nikufuntisha katama nakatama namazu atama hela kumwena nzo-o. (Mukwa. 7:9) Eñañi, kudivwimba kunateli kukisa maluwi. Chachiwahi kwanuka netu ‘Nzambi wadikañaña nawakwakudinka wanta, hakwila akwakudizoza wayitiyilaña luwi.’—Yak. 4:6.

15. Lumbululenu kuzatisha lushimbi lwekala haAefwesesa 4:26, 27 chikunateli kukwasha adisumbula amanishi kukala kunateli kumwekana hakachi kawu.

¹⁵ Eñañi, hichinateli kwikala chaloña kutoñojoka netu hitunateli kudivwimbaku. Twatela kwiluka chekala kudivwimba nikuzatilahu mukunyakashana. Pawulu walejeli akwawu akwaKristu nindi: “Bayi muhumisha itañwa iku saña mwahililaku.” (Efwes. 4:26, 27) Neyi tukañanya kutiyilila Izu daNzambi munateli kufuma chineñi. Muhela wumu wahosheli nindi: “Mpinji yikwawu, ami ninfumwami twakañanyaña kuzatisha nsona yaAefwesesa 4:26, 27. Chafumañamu mpinji yikwawu nachishaña tubulu chakadi kukaama tulu!” Chalema nankashi kumanisha kukala hayoyenoyu mpinji nakufwila kuleta kuwunda. Eñañi, adisumbula atela kudinka mpinji yantesha kulonda awundishi muchima mwivumu. Chalema cheñi kulomba wukwashu kudi Yehova kulonda mwikali nayitoñojoka yayiwahi. Ichi chinabombelumu kwikala nayililu yakudizoza, yinateli kuyikwasha mutali hakukala, bayi hadi enu awenuku, neyi nehi kukala kunateli kuswejelaku.—Tañenu Akolose 3:12, 13.

16. Kudizoza kunateli kukwasha ñahi adisumbula kumona wuswa wukwetuwu hamuntu hamuntu munjila yayiwahi?

¹⁶ Kudizoza kunateli kukwasha adisumbula kulemesha yililu yayiwahi yamwekeshañawu niwuswa wukwetuwu. Chakutalilahu: Mumbanda nateli kwikala nachawana chadimena munzatilu yindi chazatishañayi hakwila chisaka chihetelumu. Neyi nfumwindi wadizoza, hakumona nindi namubadikiku ilaña wukumukolesha kulonda yatwalekuhu kuzatisha chawana chindi, neyi yela mwenimu wukumwekesha nindi wamulemesha ñodindi nawa wamukeña. (Yish. 31:10, 28; Efwes. 5:28, 29) Mpinji yoyimu, mumbanda wadizoza hanateli kutachika kuditiya hawuswa wukwetiyi hela kusekesha nfumwinduku. Muloña wejima wawu ayedi adi “mujimba wumu” nawa chuma chikuneñesha iwu chikuneñesha nimukwawu nawa.—Mat. 19:4, 5.

17. Yumanyi yinateli kukwasha maluwi amakonu kwikala amuzañalu nikuleta kalemesha kudi Nzambi?

¹⁷ Chakadi nikujina munakukeña nenu maluwenu ekali neyi aAbarahama naSara hela aIsaka naRebeka, maluwi amuzañalu, ahaya nyaka nawa atela kuleta kalemesha kudi Yehova. Neyi dichimunakukeña, kakelenu kudi Nzambi kulonda mumoneña maluwi neyi chayimonañayi. Tañenu Mwiizu dindi kulonda mwiluki kashinshi nimaana. Ikalenu nakukeña kwalala, “himuzuzu waweni wakudi Yehova,” kuhitila mukuhameka yuma yayiwahi yakoñañayi mwinikwenu. (Kam. 8:6) Zatenu nañovu kulonda mwikali adizoza. Mulemeshenuña mwinikwenu. Neyi mwila yumiyi, maluwenu akuyiletela muzañalu nikudi Tata yenu wamwiwulu. (Yish. 27:11) Eñañi, ninenu munateli kuhosha neyi chahosheli iyala wunashakami mumaluwi hadi yaaka 27, wasonekeli nindi: “Hinatweshi kushakama chakadi ñodamuku. Maluwi etu anakutwalekahu nakukolelaku ifuku niifuku. Anakukolelaku muloña twamukeña Yehova nawa twahanjekaña mpinji yejima.”

[Malwihu aKuzatisha haKudiza]