NSAÑU YACHIHANDILU

Chaleñela Twikali naChihandilu Chachiwahi

Washimwini Patricia Smith

CHASEMUKILI mwanami Gary mu 1958, hohu nashikeneni dakwiluka nami yuma yadiña chiwahi wanyi. Hela chochu, mwahitili tukweji ikumi hakwila ndotolu yeluki chikatu chindi nawa hahitili yaaka yitanu hakwila andotolu akuluka yitembi akuLondon eteji nawu dimu. Naneñeli nankashi hampinji mwanami wamumbanda Louise wasemukili henohu munahiti dehi yaaka yitanu nayiwana kufuma hasemukililiyi Gary, yamwekeshi yinjikijilu yaswejeli kutama chikupu kubadika yaGary.

Andotolu anlejeli nawu, “Anyaneyi ejima ayedi akweti chikatu chatenañawu nawu Laurence-Moon-Bardet-Biedl (LMBB), * nawa hikwekala yihembaku.” Hayina mpinji, antu elukili hohu nsañu yantesha hanichi chikatu chamumashi. Chikatu chenichi chaleñelaña kufwa mesu, kusweja kutoha, kwikala nanyinu yayivulu kumakasa hela kunyendu, kukiya, kubula kuzatika chiwahi kwayidi yamujimba nikusweja kutoha kwanshiya. Dichi, chankalilili chikupu kwakamena anyanami. Nsañu yawaninuwu katataka yamwekeshaña nawu hadi antu 125,000 muBritain wumu wakata chikatu chenichi, hela chakwila antu amavulu chikatu chenichi kanda chishini.

YEHOVA WEKALILI “KAPOSHI KAKALEHI KAKUTEMUKILA”

Hanyima yakusumbuka nahanjekeli naChinsahu chaYehova, nawa hohenohu nelukili nami adizishaña chalala chamuBayibolu. Ilaña nfumwami wakeñeleña wanyi kudiza chalala. Hamuloña wamudimu wazatileñayi, twabuukileña nankashi, dichi hinatwesheleña kudikunda nachipompelu. Hela chochu, natwalekeluhu kutaña Bayibolu nikulomba kudi Yehova. Natiyili kuwaha nankashi hakutaña nawu “Yehova wukwikala kaposhi kakalehi kakutemukila awa anachikuwu, kaposhi kahanyaka yakamonawu kukala” nawa ‘amukeñakeñaña yena, hakayumbaku.’—Mas. 9:9, 10.

Gary wamweneña chiwahi wanyi, dichi hadiñayi nayaaka yitanu nachimu, wayili nakutañila kushikola yawamputa mesu shikola yekala nayilombu kumukulishu wakukabeta kambwela kaEngland. Kakavulu wantemesheleleña nshiña nakunleja yuma yamuneñesheleña, dichi hanshiña natwesheleña kumukwasha kulonda yeluki nshimbi jalema jamuBayibolu. Chimwahitili yaaka yantesha kufuma hasemukiliyi Louise, naholokeleli mukankati, nakatili chikatu chatenañawu nawu multiple sclerosis ni fibromyalgia. Gary wafuntili kufuma kushikola yayilombu hadiñayi nayaaka 16. Hela chochu, chikatu chindi chamesu chaswejeleluku, nawa mu 1975 amusonekesheli nawu himputa mesu. Mu 1977 nfumwami watutemukili.

Chimwahitili mpinji yantesha kufuma hafuntiliyi Gary, twatachikili kudikunda hamu nachipompelu mwadiña amana kwetu atukeña, nawa napapatisheweli mu 1974. Nazañaleli chikupu chamukwashiluwu Gary kudi eluda wumu hakwila yomiki nakukala kwamweneñayi kumujimba muyaaka yindi yawansi. A Yinsahu amakwawu ankwashileñaku nyidimu yahetala, nawa mukuhita kwampinji, akwanfulumendi atachikili kufweta awa aYinsahu atanu azatileña nyidimu yahetala. Iyi hinkisu chikupu!

Gary watwalekeluhu nakukulilaku mukwiluka chalala nawa wapapatisheweli mu 1982. Wakeñeleña nankashi kuzata mudimu wawupayiniya wakukwasha. Dichi, nafuukwiluhu kusonekesha wupayiniya nawa natwalekeluhu kuzata wupayiniya hadi yaaka yayivulu. Chimwahitili mpinji, mwanami wazañaleli nankashi chamwinhwiluwu kudi nkoñi wetu wañinza nawu, “Gary, komana kwila wutachika wupayiniya wampinji  yejima nehi?” Gary wakeñekeleña kumukolesha muniyi njila, nawa mu 1990 amutondeli kwikala payiniya wampinji yejima.

Gary amuladikili munkuma kapampa kayedi, katachi mu 1999 nawa kamuchiyedi mu 2008, ilaña yikatu yaLouise yaswejeli. Wasemukili mputamesu, nawa chinamweni kumwendu windi kunasompoki namunu wumu, nelukili nami niyena wukweti chikatu cha LMBB. Chamupiminuwu ashikeneni dakuwana nawu wadiña nawufwayi washiyashana muyidi yamukachi kamujimba. Hayaaka yejima yinahituhu, amuladikili kapampa kakavulu, kubombelahu nikumuladika kunshiya jindi kapampa katanu. Kufwana Gary, niyena wadiña nachikatu chashuga.

Hamuloña wakwiluka kukala kwamwekanaña neyi muntu anakumuladika, Louise wayilejelañamu chadimu chachiwahi akwakuladika, andotolu akuluka yitembi mukuhana yitumbu yawujinji, niañimenu jachipatela muloña wakaaninañayi mashi. Chafumañamu, amwakamenaña chiwahi kudi antu ejima amuukaña.

TUKWETI CHIHANDILU CHACHIWAHI

Mwitala detu twazataña nyidimu yayivulu hakudifukula kudi Yehova. Henohu kanda atuñi makina amaha, nazatishileña maora amavulu nakuyitañila aGary naLouise. Ilaña ichi maCD, nimaDVD, nimazu akukwata dehi adi ha www.pr418.com atukwashaña wonsu wetu kudiluñisha kutaña Bayibolu mulungu nimulungu hampinji yashiyashana, nawa twakulañahu chiwahi hakupompa kwawakwaKristu.

Mpinji yikwawu Gary wakulaña yuma yinahembeliyi kumutu, nawa neyi wudi nampanji muShikola yaMudimu waTeokalatiki, wayihanaña chakadi kutala haawutulayini. Mu 1995 amutondeli kwikala nkoñi wakuzatila nawa mpinji yejima wadikitaña chikupu Hetala daWanta, washikijaña antu amuchipompelu neyi hiyakwinza nakupompa nawa wazatilaña hamakina ayihoshelu.

Akwawu aYinsahu azataña hamu nindi mumudimu wakushimwina, kakavulu amwendeshaña muchitwamu chindi chatufumbu chazatishañayi hamuloña wachikatu chamanuñu. Mana kwetu wumu wamukwashili kulombola kadizi waBayibolu wukweti mpwila yakudiza. Gary wakolesheli cheñi muhela mukwaKristu wazeyeli hadi yaaka 25. Awa antu ayedi chayinu mpinji ayaña kukupompa kwawakwaKristu.

Hadiñayi nayaaka yitanu nayiwana, Louise wadizili chakutuña nyipila kudi akanka yindi awambanda, nikudi muhela watuzatilileña nyidimu hetala nawa namudizishili chakutuña nakusowashana. Hamuloña wakwila wadiluñishileña nankashi mudimu wakutuña, watuñileña nyemba yawulombu wawuwahi yawankemba niyawatushinakaji amuchipompelu. Watuñaña cheñi makaadi akwimushilahu antu, halamikañayi tunyevulu twanyanya. Antu atambwilaña awa makaadi asakililaña chikupu. Louise wadizili kutayipa hachidiñayi kansi. Chayinu mpinji wahanjekaña nawakwawu kuhitila mukuzatisha kompyuta yadimena. Neyi yahosha mazu iyi kompyuta yakwataña mazu nakuyitemesha. Louise wapapatisheweli hadiñayi nayaaka 17. Hampinji yamakampeni adimena akushimwina, twadiluñishaña kuzatila hamu mudimu wawupayiniya wakukwasha. Kufwana Gary, Louise wahembelaña nsona kumutu hakwila yashimuni chikuhwelelu chindi muyikaninu yaNzambi yakuleta ituña ‘mwakatoneshawu mesu awamputamesu’ nawa “mwenimbu hakahosha nindi, Ami nakataku.”—Isa. 33:24; 35:5.

Twahamekaña chikupu hansañu yalala yitwawanaña Mwizu daYehova donenewa. Nyichima yetu yinenzali nakuhameka hawukwashu wawuwahi wutwatambwilaña kuchipompelu chetu, muloña chakadi wukwashu wawu hitwadi kutwesha kuzata nyidimu yejimiyuku. Sweje-e dinu hamuloña wawukwashu waYehova, chinaleñeli twikali nachihandilu chachiwahi.

[Tumazu twaheshina]