Aeluda—Komana muKuwundisha ‘Muchima waMuntu Wazeya’?

Angela, * muhela mujiki wudi muyaaka yamu 30, nadakameni. Nakutalila aeluda. Nsañwinyi yinakwinza nakumulejawu? Eña, najiñi kukupompa mafuku antesha, ilaña nazeyi hanyima yakuzatila atushinakaji ifuku dejima. Kubombela hayuma yinakumwakamisha ifuku niifuku, naneñi nankashi muloña amama yindi akata.

Neyi chakwila muya nakumuhempula Angela, mwadi kukolesha ñahi iwu ‘muchima wamuntu wazeya’? (Yere. 31:25) Ntahi, munateli kuloñesha ñahi kulonda mumukoleshi chiwahi hampinji yimukumuhempula?

TOÑOJOKENU HACHIHANDILU CHAWAMANA KWENU

Mpinji jikwawu, wejima wetu twazeyaña hamuloña wanyidimu yakumujimba hela yamukuloñesha. Chakutalilahu, kaprofwetu Danyeli ‘wazeyeli chikupu’ hampinji yatambwililiyi chimwenu chabulili kwilukayi muchatalishili. (Dan. 8:27) Amukwashili kudi kañelu Gabireli hampinji yenjiliyi kudi yena. Kañanda kaNzambi kamukwashili Danyeli kwiluka mwatalishili chimwenu, nakumukolesha nindi Yehova watiyili kulomba kwindi nawa kamulejeli nindi wachidiña “wasweja kukeñewa.” (Dan. 9:21-23) Hampinji yikwawu, awa mazu amawahi ahosheli kañelu mukwawu amukolesheli iwu kaprofwetu wazeyeli.—Dan. 10:19.

Chochimu, henohu kanda mumuhempuli mukwenu mukwakwitiya wunazeyi hela wunaneñi, ikalenuku nampinji yakutoñojoka hachihandilu chindi. Kukalanyi kunakumonayi? Indi iku kukala kunakumuzeyesha ñahi? Yililwinyi yayiwahi yamwekeshañayi? Richard, eluda wunakalakali kubadika hayaaka 20  wahosheli nindi: “Nafwilaña kushinshika hayililu yayiwahi yikwetiyi mana kwetu.” Wabombeleluhu nindi: “Kuhitila mukutoñojoka chiwahi hachihandilu chawu henohu kanda niyihempuli chapelaña kwiluka njila mwakuyikoleshela kwesekeja nakukankila kwawu.” Neyi mukuya hamu naeluda mukwawu nakuhempula, komana kwila mubulakana hamu nakuhanjeka hachihandilu chamana kwenu nehi?

WUNDISHENU NYICHIMA YAWAMANA KWENU

Munateli kwiteja nenu mana kwetu nateli kutiya nsonyi hakulumbulula chidi nshakaminu yindi kudi eluda. Chakutalilahu: Chinateli kumukalila mana kwenu kuyileja aeluda anamwendeli yuma yidi kumuchima. Munateli kumukwasha ñahi mana kwenu kulonda yekali wakasunuka? Neyi mutumba chimwemweta hakanwa nawa muzatisha mazu akukolesha munateli kumukwasha chikupu. Michael, eluda wunakalakali yaaka kubadika ha 40, neyi chakwila nayi nakuhempula muntu, kakavulu watachikaña namazu akwila nawu: “Muneluki, kukooleka kumu kwakuwahi nankashi kukwetiyi eluda, hikuhempula amana kwetu mumatala awu nikuyiluka chiwahi. Dichi nadiña nakutalila chikupu kuyihempula ifuku dalelu.”

Munateli kulomba chakufuma hamuchima hakutachika kuhanjeka. Mukulomba kwindi, kapostolu Pawulu wateneni chikuhwelelu chadiña nawamana kwindi, kukeña, nikutatakena. (1 Tesa. 1:2, 3) Kuhitila mukushimuna chimwatiyaña hayililu yayiwahi yawamana kwenu, munateli kuloñesha muchima wenu nimuchima wamana kwenu kulonda muhanjeki chiwahi. Mazu enu niwena anateli kumuwundisha muchima. Ray, eluda wakuluka yitembi wahosheli nindi: “Mpinji jikwawu, wonsu wetu twavulamenaña yuma yayiwahi yitwakalakalaña. Dichi neyi muntu yatwanukisha, chawundishaña muchima wetu.”

YINKENU CHAMUKUNKULU CHAKUSPIRITU

Kufwana Pawulu, munateli kuhana ‘chamukunkulu chakuspiritu’ kuhitila mukuhanjeka hachikuma chamuNsona, hela chinakufuma  havasi yimu. (Rom. 1:11) Chakutalilahu, mana kwetu wunaneñi chikupu nateli kutoñojoka nindi wamukunkulwayi, kufwana ñimbi wamasamu wadesekejeli ‘nanswaha yafwindila dehi nawishi’ yominina. (Mas. 119:83, 176) Hanyima yakulumbulula awa mazu chantesha, munateli kushimuna chimwamukuhwelela mana kwenu nenu ‘hanavulameni’ nshimbi jaNzambuku.

Munjila yoyimu, komana chishimu chamali ajimbeli chinateli kumushika muhela hamuchima wunafumi muchipompelu hela wunazeyi? (Luka 15:8-10) Dali dajimbeli datela dadiña hakachi kamali asiliva amavulu atuñiluwu nachu ileñi dawuseya. Kuhitila mukuhanjeka nindi hanichi chishimu, munateli kumukwasha kulonda yeluki nindi walema chikupu muchipompelu chawakwaKristu. Hanyima yakumulumbulwila ichi chikuma, munateli kumuleja nenu wekala hakachi kanyikoku yaYehova nawa wamwakamenaña chikupu.

Akwetu akwakwitiya kakavulu atiyaña kuwaha kushimuna yuma yelukawu yamuBayibolu. Dichi mwatela kuyinka mpinji yakuhosha! Hanyima yakutaña vasi yinakuhosha hakukala kukwetuwu, munateli kutena izu hela mukuku wamazu nikuyihula kulonda ahoshuhu. Chakutalilahu, hanyima yakutaña 2 Akorinda 4:16, eluda nateli kwihula nindi, “Munateli kutena njila mwayibalumwinayi Yehova hela kuyinka ñovu?” Neyi muzatisha iyi njila chikuleñela muhanjeki chachiwahi ‘nakudikolesha wumu namukwawu.’—Rom. 1:12.

Munateli cheñi kuwundisha muchima wamukwenu mukwakwitiya kuhitila mukuhanjeka hadi muntu wamuBayibolu wahitili muyuma yoyimu. Muntu wunaneñi nateli kutiya neyi chatiyiliyi Hana hela Epafwaditu. Mpinji jikwawu, wejima wawu aneñeleña ilaña atwalekeluhu kwikala alema kumesu aNzambi. (1 Sam. 1:9-11, 20; Fwi. 2:25-30) Neyi chinatwesheki, komana kwila muhanjeka hayakutalilahu yayiwahi yamuBayibolu nehi?

TWELEKENUHU KUYIKWASHA

Munateli kumwekesha nenu mwayakamena amana kwenu niahela kuhitila mukutwalekahu kuyakamena. (Yil. 15:36) Hakumanisha kuhanjeka, munateli kuyileja kulonda mukazati nawu mumudimu wakushimwina. Bernard, eluda wakuluka yitembi, neyi yadibulakana namana kwetu hela muhela wahempwiliyi katataka, wamwihulaña munjila yayiwahi nindi, “Yina nsañu yitwahanjekeluhu yinakuyikwasha?” Neyi muyimwekeshelaña kukeña muniyi njila, mukutwesha kwiluka neyi chakwila anakukeñeka kuyikwasha cheñi.

Makonu, amana kwetu niahela atela kutiya nawu twayakamena chikupu, tweluka chihandilu chawu nawa twayikeña chikupu. (1 Tesa. 5:11) Dichi, henohu kanda muyi nakuyibiña, ikalenu nampinji yakutoñojoka hachihandilu chamana kwenu. Lombelenuñahu chikupu. Tondenu nsona jajiwahi jimukuzatisha. Neyi mwila mwenimu mukuwana mazu anateli kuwundisha “muchima wamuntu wunazeyi.”

[Tumazu twaheshina]

[Mwevulu wudi hefu 29]

Henohu kanda muyi nakuhempula, toñojokenu hachihandilu chawakwenu akwakwitiya

[Nyevulu yidi hefu 30]

Akwetu akwakwitiya kakavulu atiyaña kuwaha kushimuna yuma yelukawu yamuBayibolu

[Mwevulu wudi hefu 31]

Twalekenuhu kuyakamena