Hamekenuña Chikupu Yililu Yayehova

“Ikalenu akwakwimbujola Nzambi, neyi anyana akeñewa.”—EFWES. 5:1.

MUKWAKULA NENUDI

Tunateli kuswejelaku ñahi kuhameka yililu yaYehova?

Yumanyi yaleñelaña muntu yekali wakasunuka?

Tunateli kwimbujola ñahi chililu chaYehova chakwikala wakadi chaambu?

1. (a) Yililwinyi yaYehova yatela kutoñojokahu mukwaKristu? (b) Tunateli kuhetelamu ñahi neyi tushinshika hayililu yaNzambi?

 NEYI mutoñojoka hayililu yaYehova, yililwinyi yimwanukaña? Etu amavulu twatoñojokaña hakukeña, wuñaji, maana niñovu. Hela chochu, tweluka netu Yehova wukweti yililu yayivulu yayiwahi. Dichi, hayaaka yinahituhu, nyikanda yetu yinahanjeki hayililu yaYehova yakubadika ha 40. Neyi mudiza chililu chimu nachimu halwenu hela nachisaka chenu, toñojokenu hayuma yayivulu yimunateli kudiza hadi Yehova. Tunateli kuhetelamu ñahi mukudiza kwamuchidiwu? Kudiza kwamuchidiwu kunateli kutuleñela tusweji kumuhameka Tata yetu wamwiwulu. Chikafumamu, tukasweja kufwila kumwimbujola Yehova nikwikala nawubwambu wawuwahi nayena.—Yosh. 23:8; Mas. 73:28.

2. (a) Lumbululenu chitunateli kuswejelaku kuhameka yililu yaYehova. (b) Yumanyi yitukushinshikahu?

² Hela chochu, chatalisha mudihi “kuhameka” chuma? Kwesekeja nachitukudizatisha idi izu, chatalisha mukwiluka kulema kwachuma. Kuhameka kunateli kuswejelaku chovu-chovu. Chakutalilahu: Hakwila tuhameki yakudya yitwabula kudyahu dehi twasambilaña kutiya kadivumba kakawahi, kufumahu tutompahu, nkumininaku tuditelekela etu aweni. Chochimu, twaswejaña kuhameka yililu yaYehova neyi tuyiluka, tutoñojokahu nawa nkumininaku tuyimbujola muchihandilu chetu. (Efwes. 5:1) Chinu chibaaba niyibaaba yiyedi yinalondeluhu anayisoneki kulonda yitukwashi tuhamekeña chikupu yililu yaNzambi yitunateli kutoñojoka netu hiyalema kubadika yililu yindi yabadikamuku. Hachililu nichililu, tukushinshika hanawa malwihu: Chatalisha mudihi? Indi Yehova wachimwekeshaña ñahi? Nawa tunateli kumwimbujola ñahi Yehova hakuchimwekesha?

 YEHOVA WEKALA WAKASUNUKA

3, 4. (a) Indi muntu wakasunuka munateli kumulumbulula ñahi? (b) Indi Yehova wamwekeshaña ñahi nindi wekala wakasunuka?

³ Tusambilenu kushinshika hachililu chakwikala wakasunuka. Indi muntu wakasunuka munateli kumulumbulula ñahi? Hadaha munateli kuhosha nenu, ‘Himuntu wamuwahi muchima, waswayi kuhosha nindi, nawa wekalaña nampinji yakuhosha nawakwawu.’ Kakavulu munateli kumwiluka muntu neyi wakasunuka hela nehi kuhitila mukutiyilila kuyuma yahoshañayi ninhoshelu, chazatishañayi yidi yamujimba, chamwekanañayi hamesu, niyinjikijilu yikwawu yitwamwekeshelaña mukachi.

⁴ Indi Yehova wamwekeshaña ñahi nawu wakasunuka? Hela chakwila diyi Nleñi wabadika mukuleña kwejima, Yehova watulejaña nawu wakeñaña nawa wafwilaña kutiyilila kukulomba kwetu nikutwakula. (Tañenu Masamu 145:18; Isaya 30:18, 19.) Tunateli kuhosha naNzambi hadi mpinji yayilehi nawa hampinji yidi yejima hela kwiluña didi dejima. Tunateli kuya kudi Yehova namuchima wumu, nakuhwelela netu hanateli kutuhoshola hakwila mwenimuku. (Mas. 65:2; Yak. 1:5) Izu daNzambi damulumbululaña Yehova munjila yatuleñelaña twikali akasunuka kuhosha nindi mukulomba. Chakutalilahu, Davidi ñimbi wamasamu wasonekeli nindi ‘mesu aYehova atutalaña’ nawa ‘chikasa chindi chachidiilu chatukwataña.’ (Mas. 34:15; 63:8) Kaprofwetu Isaya wamufwanikijili Yehova kudi kabiña, hakuhosha nindi: “Wakakuñwila anyana muchikasa chindi, wakayisendela hantulu yindi.” (Isa. 40:11) Toñojokenu hachumichi. Yehova nakukeña nindi tukundami kwakwihi nayena neyi mwana kamukoku wudi muntulu yakabiña. Eñañi, tukweti Tata yetu wakasunuka. Tunateli kumwimbujola ñahi Yehova hakumwekesha ichi chililu?

CHILILU CHALEMA NANKASHI

5. Muloñadi chichalemena kudi aeluda kwikala akasunuka?

⁵ Katataka, aYinsahu adikita ashakamaña mumatuña amboka-mboka ayihwili nawu, “Chililwinyi chimwahamekaña nankashi mudi eluda?” Antu amavulu akwili nawu, “Kwikala wakasunuka.” Eñañi, mukwaKristu  wejima watela kwikala nanichi chililu chikupu, ilaña chalema nankashi kudi aeluda kwikala akasunuka. (Isa. 32:1, 2) Kuhosha hachuma chaleñelaña yamoneña nindi ichi chililu chalema chikupu, muhela wumu wahosheli nindi: “Neyi eluda wakasunuka chikuleñela tuheteli muyililu yikwawu yikwetiyi.” Mwahosheli iwu muhela dimu. Hanu dinu chumanyi chaleñelaña muntu yekali wakasunuka?

6. Chumanyi chacheni chaleñelaña muntu yekali wakasunuka?

⁶ Chuma chacheni chaleñelaña muntu yekali wakasunuka hikusha maana hadi antu amakwawu. Neyi eluda wakamenaña antu amakwawu nawa wafwilaña kudihana kulonda yayikwashi, amana kwindi niahela, kubombelahu niatwansi akwiluka nawu wekala wakasunuka. (Maku 10:13-16) Carlos wudi nayaaka yakusemuka 12, wahosheli nindi: “Nayimonaña aeluda Mwitala daWanta anakutumba chimwemweta hakanwa nikwakamena amakwawu, nawa chantiyishaña kuwaha.” Hela chochu, eluda hatela kuhosha hohu nindi wekala wakasunukaku; ilaña watela kumwekesha chililu chenichi. (1 Yow. 3:18) Hanu dinu nateli kumwekesha ñahi ichi chililu?

7. Muloñadi kuvwala baji yahakupompa kwankambi chikwaleñelaña antu akeñeña kuhanjeka nanetu, nawa chumanyi chitunateli kudizilaku?

⁷ Toñojokenu hanichi chakutalilahu. Katataka, mana kwetu wavwalili baji hampinji yafuntileñayi kwitala nandeki hakufuma kukupompa kwayiliyi kwituña dacheñi. Kalama wamundeki chamweniyi mazu adiña habaji akwila nawu “Wanta waNzambi Winzi” wamulejeli mana kwetu nindi, “Eñañi winzi, twatela kuhanjekahu haniyi nsañu.” Kuhiñahu, ahanjekeli haniyi nsañu nawa kalama watambwili magazini etu. Etu amavulu twamonahu dehi chuma chamuchidiwu. Hanu dinu, muloñadi antu chiyakeñelaña kuhanjeka nanetu chamonawu tunavwali baji? Muloña yalejaña antu nawu: “Ikalenu akasunuka kuhanjeka nanami. Ñihulenu kwinakuya.” Baji hichinjikijilu chaleñelaña antu eluki nawu twakeñaña kuhanjeka hayuma yitwakuhwelela. Chochimu, aeluda akwaKristu atela kumwekesha chinjikijilu kudi akwawu akwakwitiya nawu: “Ikalenu akasunuka kuhanjeka nanami.” Hinjilanyi jikwawu aeluda muyanateli kwilila mwenimu?

8. Indi aeluda amwekeshaña ñahi kukeña kudi antu amakwawu, nawa chipompelu chahetelañamu ñahi?

⁸ Mumatuña amavulu, munateli kumwekesha nenu mwayakamena amana kwenu niahela kuhitila mukutumba chimwemweta hakanwa nikuyimusha mumakasa neyena chikupu. Hinyi wunateli kutachikilahu kwila mwenimu? Shinshikenu hachakutalilahu chemikiliyi Yesu. Matewu washimwini nindi chadibulakenuwu nawatumbanji twindi, “Yesu hakwinza kudi wena, hakuhosha nawu.” (Mat. 28:18) Chochimu, aeluda makonu atela kutachikilahu kwimusha akwawu akwakwitiya nikuhosha nawu. Indi kwila mwenimu kunateli kukwasha ñahi chipompelu? Muhela payiniya wayaaka yakusemuka 88 wahosheli nindi: “Yimwemweta yatumbañawu hakanwa kudi eluda nimazu akukolesha ahoshañawu neyi niñila Mwitala daWanta yanleñelaña nikundami kudi wena.” Muhela mukwawu washinshika wabombeleluhu nindi: “Chinateli kumwekana neyi hichalemaku, ilaña neyi yanshikija nachimwemweta hakanwa neyi nenzi nakupompa, chankoleshaña nankashi.”

WAKASUNUKA NAWA WUKWETI MPINJI

9, 10. (a) Chakutalilahwinyi chachiwahi chemikayi Yehova? (b) Indi aeluda anateli kwikala ñahi nampinji yakuhanjeka nawantu amakwawu?

 ⁹ Chakadi nikujina, antu hiyanateli kwinza kudi etu neyi hitwekala nampinji yakuhanjeka nawuku. Yehova wemika chakutalilahu chachiwahi. “Yena hekala kwakulehi nanetu ejimaku.” (Yil. 17:27) Njila yimu aeluda mwekalilañawu nampinji yakuhanjeka nawamana kwawu niahela, atwansi niakulumpi, yekala yakwikala nampinji  yakuhanjeka henohu kupompa kwawakwaKristu kanda kutachiki nihanyima yakupompa. Mana kwetu payiniya wahosheli nindi: “Neyi eluda yehula chinnakuhanda nawa yatiyilila kuyuma yinnakuhosha, natiyaña nami wanlemesha.” Muhela wunamukalakeli Yehova kwakwihi nayaaka 50 wahosheli nindi: “Aeluda ekalaña nampinji yakuhanjeka nanami hanyima yakupompa anleñelaña nitiyeña nami nalema.”

¹⁰ Eñañi, atubiña akwaKristu niwena atela kwikala nampinji yakuzata nyidimu yikwawu. Hela chochu, hakupompa kwejima atela kwikala nampinji yakuhanjeka nawamana kwetu niahela.

YEHOVA HEKALA NACHAAMBUKU

11, 12. (a) Indi kubula chaambu kwatalisha mudihi? (b) Yehova watwimikila ñahi chakutalilahu chakubula kwikala nachaambu?

¹¹ Chililu chikwawu chachiwahi chekalayi nachu Yehova hikubula chaambu. (Yil. 10:34) Indi kubula chaambu kwatalisha mudihi? Kwatalisha mukwakamena antu ejima munjila yoyimu. Hela chochu, neyi tunakukeña tubuli kumwekesha chaambu kudi antu amakwawu, twatela kwiluka netu hitwatela kumwekesha chaambu kudi muntu wudi wejimaku. Muntu wabula chaambu hamonaña antu amakwawu nindi alema kubadika amakwawu hamuloña wammwekenu yawu hela hamuloña wakwikala namali amavuluku. Antu ejima wayimonaña chochimu hichidi namuloña nachiyekalawuku.

¹² Yehova wemika chakutalilahu chachiwahi chakubula chaambu. Izu dindi dahoshaña nawu “haakaminaña antu kumesuku” nawa “haakamaña muntuku.” (Tañenu Yililu 10:34, 35; Kuhituluka 10:17.) Chuma chamwekeni mumpinji yaMosi chamwekeshaña nawu Nzambi haakaminaña muntu kumesuku.

13, 14. (a) Kukalanyi kwamwenuwu anyana kaZelofwehadi awambanda atanu? (b) Indi Yehova wamwekesheli ñahi kubula chaambu?

 ¹³ AIsarela chashikiluwu kukamwihi nakwiñila Mwituña daChikaninu, ahela atanu ajiki amuchisaka chimu adiña nakukala. Kukalanyi kwadiñawu naku? Elukili nawu chisaka chawu, neyi chochichadiña kuyisaka yikwawu yawaIsarela, ateleleli kutambwila mpata yenkeluwu tata yawu. (Kuch. 26:52-55) Hela chochu, tata yawu, Zelofwehadi wakumutaña waManase, wafwili. Kwesekeja namwaya chisemwa, anyana kaZelofwehadi awamayala diwu ateleleli kuswana mpata, ilaña wadiña hohu nanyana yawambanda. (Kuch. 26:33) Chineli muchisaka mwadiña mwosi mwana weyala wakuswana mpata, komana mpata yachisaka adi kuyihana kudi antaña nawa anyanindi awambanda adi kushala chakadi wuswana?

¹⁴ Anyana awambanda atanu ayili kudi Mosi nawa amwihwili nawu: “Ijina datata yetu akudifumishiladi hachisaka chindi? Muloña chochu chabuliliyi mwana weyala tahindi?” Amulembeleli nawu: “Atwinki wuswana wetu hamu nawana kwatata. Komana Mosi wayakwili nakuhosha nindi, ‘Imu dimwatalisha nshimbi, kwosi munatela kuyikwashila’? Inehi, “Mosi watweli nsañu yawu kudi Yehova.” (Kuch. 27:2-5) Amwakwili  nawudi? Yehova wamulejeli Mosi nindi: “Anyana kaZelofwehadi awambanda anahoshi chachiwahi; eña yinki ituña dawu dakuswanaña hamu nawana kwatata yawu wakayiswanishi wuswana watata yawu.” Dichi Yehova watwalekeluhu. Wabalumwini iyi nsañu kwikala lushimbi, wamulejeli Mosi nindi: “Neyi kwakekala muntu wakafwa chakubula mwana weyala, wuswana windi mwakaswanishi mwanindi wamumbanda.” (Kuch. 27:6-8; Yosh. 17:1-6) Kufuma hayina mpinji, aIsarela awambanda ejima amweneña kukala kwamuchidiwu adi kukiñewa.

15. (a) Indi Yehova wakamenaña ñahi antu jindi, sweje-e aholokelaña mukukala? (b) Nsañwinyi yikwawu yamuBayibolu yamwekeshaña nawu Yehova hekala nachaambuku?

¹⁵ Iku kwadiña kufuukula kwakuwahi nawa kwakadi chaambu! Yehova wayakameneni nakalemesha awa ambanda adiña mukukala, neyi chochayakameneniyi aIsarela adiña nachihandilu chachiwahi. (Mas. 68:5) Iyi hinsañu yimu yekala hakachi kansañu yayivulu yamuBayibolu yamwekeshaña wunsahu walala wakwila nawu: Yehova wakamenaña ambuñindi ejima chakadi chaambu.—1 Sam. 16:1-13; Yil. 10:30-35, 44-48.

TUNATELI KUMWIMBUJOLA YEHOVA

16. Tunateli kwikala ñahi nachililu chakubula chaambu nikuchimwekesha chikupu?

¹⁶ Tunateli kumwimbujola ñahi Yehova hakwikala abula chaambu? Anukenu nenu, neyi tunakukeña tubuli kumwekesha chaambu kudi antu amakwawu, twatela kwiluka netu hitwatela kumwekesha chaambu kudi muntu wudi wejimaku. Mwamweni, wonsu wetu twatoñojoka netu hitwekala nachaambuku. Hela chochu, munateli kwiteja nenu, chekala chakala kudishinshika chiwahi etu aweni nakwiluka yitoñojoka yetu. Dichi, tunateli kwila ñahi kulonda twiluki neyi antu amakwawu atwiluka nawu hitwekala nachaambuku? Hampinji Yesu yakeñeleñayi kwiluka chadiña nakuhoshawu antu hadi yena wenhwili amabwambu jindi akuhweleleliyi nindi: “Ami Mwana kamuntu, antu elaña nawu yaminyi?” (Mat. 16:13, 14) Komana kwila twila neyi cheliliyi Yesu nehi? Munateli kwihula amabwambu jenu imwakuhwelela anateli kuyileja mwalala neyi ayiluka nawu himwekala nachaambuku. Chakutalilahu, nateli kuyileja nindi mpinji jikwawu mwakamenaña antu amuchidi wumu kubadika wukwawu hela nindi mwekala chiwahi kudi antu aheta hela ataña chikupu. Neyi ibwambu denu yayileja mwenimu, chumanyi chimwatela kwila? Lombenu chikupu kudi Yehova hachimunakutiya, nakumulembelela yayikwashi muhimpi yitoñojoka yenu hakwila mumwekesheña chikupu chililu chindi chakubula chaambu.—Mat. 7:7; Kol. 3:10, 11.

17. Munjilanyi mutunateli kwakamenena antu amakwawu chakadi chaambu?

 ¹⁷ Muchipompelu chawakwaKristu, twamwekeshaña mpwila yetu yakumwimbujola Yehova wabula chaambu kuhitila mukwakamena amana kwetu niahela ejima nakalemesha niluwi lwabadika. Chakutalilahu, hakumwekesha chisambu, twatela kutambika akwetu akwakwitiya ejima, kubombelahu niakweti chitachi chaambukaku nanetu kushilahu niatuzweñi, anyana anshona, hela anfwila. (Tañenu Aŋalija 2:10; Yakoba 1:27.) Kubombelahu, mumudimu wakushimwina Wanta, twashimwinaña chakadi chaambu kudi antu ejima akuyitachi yashiyashana, kushilahu niantu akumatuña acheñi. Tudi amuzañalu hakwikala nanyikanda yashindamena haBayibolu mumadimi 600. Ichi hichinjikijilu chinakumwekesha hatooka nawu hitwekala nachaambuku.

18. Mukumwekesha ñahi nenu mwahamekaña yililu yaYehova yakwikala wakasunuka nawa wakadi chaambu?

¹⁸ Mwamweni, neyi twikala nampinji yakutoñojoka hadi Yehova chekalayi wakasunuka nawa wakadi chaambu, tukusweja kumuhameka chikupu. Neyi tusweja kumuhameka, chikutusañumuna kwimbujola yililu yaYehova chikupu, nakuyimwekesha kudi akwetu akwakwitiya nikudi antu itwashimwinaña.

[Malwihu aKuzatisha haKudiza]

[Mwevulu wudi hefu 8]

“Yehova wudi kwakwihi nawantu ejima akumutambika.”—Mas. 145:18 (Talenu  parakalafu 9)

“Yehova Nzambi yenu . . . haakamaña muntuku.”—Kuhit. 10:17 (Talenu  parakalafu 17)

[Mwevulu wudi hefu 10]

Anyana kaZelofwehadi awambanda ahamekeli chililu chaNzambi chakubula chaambu (Talenu  maparakalafu 13, 14)