Hamekenuña Yililu Yayehova, Kashinshi Nikwanakena

“Eyi Mwanta wumuwahi waanakenaña, antu ejima akutambikaña wasweja kuyitiyila luwi.”—MAS. 86:5.

MUNATELI KULUMBULULA?

Munjilanyi mutunateli kwimbujolela chililu chaYehova chakwikala washinshika?

Tunateli kwimbujola ñahi chililu chaYehova chakwanakena?

Muloñadi chimunakukeñela kutwalekahu nakuhameka chikupu yililu yaYehova?

1, 2. (a) Muloñadi chitwalemeshelaña amabwambu ashinshika nawa anakenaña? (b) Malwihwinyi itukuhanjekahu?

 INDI ibwambu denu walala munateli kumulumbulula ñahi? Muhela mukwaKristu wejina daAshley wahosheli nindi: “Ami, ibwambu dami walala himuntu wañakamenaña mpinji yejima nawa wañanakenaña neyi navulumuni.” Wonsu wetu twakeñaña kwikala nawamabwambu ashinshika nawa anakenaña. Atuleñelaña tutiyeña netu twakiñewa nawa twakeñewa.—Yish. 17:17.

² Yehova diyi Ibwambu detu washinshika nawa wanakenaña. Chidi neyi chahosheliyi ñimbi yamasamu nindi: “Eyi Mwanta wumuwahi waanakenaña, antu ejima akutambikaña wasweja kuyitiyila luwi [hela ‘kukeña kwabadika’].” (Mas. 86:5) Indi kwikala washinshika nawa wanakenaña kwatalisha mudihi? Yehova wamwekeshaña ñahi iyi yililu yayiwahi? Nawa tunateli kwimbujola ñahi chakutalilahu chindi? Kwakula awa malwihu kukutuleñela tusweji kumukeña Ibwambu detu wahamuchima, Yehova. Cheñi, akutukwasha kukolesha wubwambu wetu wumu namukwawu.—1 Yow. 4:7, 8.

YEHOVA WASHINSHIKA

3. Indi kwikala washinshika chatalisha mudihi?

³ Muntu washinshika wekalaña wakashinshi kudi muntu wakeñayi. Wamwekeshaña kukeña kwindi kuhitila mukutwalekahu kumukwasha nikuzatila nindi hamu. Welaña mwenimu nimumpinji yakala. Bayibolu yamulumbululaña Yehova nawu “Eyi Waloña.” Kwosi muntu waloña wunateli kwesekana nayena.—Chim. 16:5.

4, 5. (a) Indi Yehova wamwekeshaña ñahi kashinshi? (b) Tunateli kukoleshewa ñahi kuhitila mukutoñojoka hachamwekeshañayi Nzambi kashinshi?

⁴ Yehova wamwekeshaña ñahi nawu washinshika? Hashiyaña akwakudifukula indi aloñaku. Mukwakudifukula wumu wadiña, Mwanta Davidi, wamweni kashinshi  kaYehova. (Tañenu Masamu 101:6.) Hampinji yadiñayi Davidi mukweseka, Yehova wamulombweli, kumukiña nikumupulwisha. (2 Sam. 22:1) Davidi welukili nindi kashinshi kaYehova kabadika hamazu hohu. Muloñadi Yehova chamumwekesheleliyi Davidi kashinshi? Muloña Davidi yomweni wadiña ‘washinshika’. Yehova walemesha chikupu kashinshi kawakwakudifukula indi, nawa wayimwekeshelaña kashinshi.—Yish. 2:6-8.

⁵ Twakoleshewaña chikupu neyi tutoñojokaña hayuma yakoñayi Yehova mukashinshi. Mana kwetu washinshika wejina daReed wahosheli nindi: “Chankwashaña chikupu neyi nitaña nsañu yamwekeshaña Yehova chamukwashiliyi Davidi mumpinji yamakabi. Nihampinji Davidi hatemukileñayi, nakuswamujoka mumayeñu, mpinji yejima Yehova wamukwashileña. Iyi nsañu yankoleshaña nankashi! Yañanukishaña nawu hichidi namuloña nakukala kudi kwejimaku, hela chakwila yuma yikukala ñahi, Yehova nateli kunkwasha neyi nitwalekahu kwikala washinshika kudi yena.” Chakadi nikujina, hadaha ninenu dichimwatiyaña.—Rom. 8:38, 39.

6. Munjilanyi jikwawu mwamwekeshelañayi Yehova kashinshi, nawa akwakudifukula indi ahetelañamu ñahi?

⁶ Munjilanyi jikwawu mwamwekeshelañayi Yehova kashinshi? Mpinji yejima walondelaña nshimbi jindi. Watukonkomwenaña nindi: “Kushika nikuwushinakaji wenu yami.” (Isa. 46:4) Mpinji yejima kufuukula kwindi kwashindamenaña hanshimbi jindi jabulaña kuhimpa kutalisha hayuma yayiwahi nayatama. (Mal. 3:6) Kubombelahu, Yehova wamwekeshaña kashinshi kuhitila mukutwalekahu kuhemba mwakaniniyi. (Isa. 55:11) Dichi kashinshi kaYehova kakwashaña akwakudifukula indi ejima ashinshika. Munjilanyi? Neyi tuzata nañovu hakulondela nshimbi jaYehova, tunateli kukuhwelela netu wakahemba chikaninu chindi wukatukiswila.—Isa. 48:17, 18.

IMBUJOLENUÑA CHILILU CHAYEHOVA CHAKWIKALA WASHINSHIKA

7. Njilanyi yimu mutunateli kwimbujolila kashinshi kaNzambi?

 ⁷ Tunateli kwimbujola ñahi kashinshi kaYehova? Njila yimu yidi yakukwasha antu anakukabakana. (Yish. 3:27) Chakutalilahu, kudihu mukwenu mukwakwitiya wunaneñi, hadaha hamuloña wayikatu, indi kwiji anakumudimbulula kudi chisaka, hela hamuloña wakuzeya kwakumujimba? Komana kwila mutachikilahu enu aweni kulonda ‘mumuleji mazu amawahi, mazu akukundeja’ nehi? (Zek. 1:13) * Neyi mwila mwenimu, dikwila nawu munakumwekesha nenu mudi ashinshika nawa ibwambu walala, “ibwambu wasweja kulamata, chakubadika mana kweyi.”—Yish. 18:24.

8. Tunateli kwimbujola ñahi chililu chaYehova chakwikala washinshika, chakutalilahu, mumaluwi?

⁸ Tunateli kwimbujola cheñi chililu chaYehova chakwikala washinshika kuhitila mukutwalekahu kwikala ashinshika kudi antu itwakeña. Chakutalilahu, neyi twasumbula hela twasumbuka, tweluka netu twatela kwikala ashinshika kudi mwinikwetu. (Yish. 5:15-18) Dichi twatondolwelaña njila yejima yinateli kutwileñela twili wuvumbi. (Mat. 5:28) Kubombelahu, twamwekeshaña netu twekala ashinshika kudi akwetu akwakwitiya kuhitila mukutondolwela matuñu hela kutwamba, nikubula kutandisha nhoshelu yamuchidiwu hela kutiyililaku.—Yish. 12:18.

9, 10. (a) Twatela kutwalekahu kwikala ashinshika chikupu kudinyi? (b) Muloñadi mpinji yikwawu kwovwahila nshimbi jaYehova chikwakalila?

⁹ Sweje-e dinu, twatela kutwalekahu kwikala ashinshika kudi Yehova. Tunateli kwila ñahi mwenimu? Kuhitila mukufwila kumona  yuma neyi chayimonañayi Yehova, dikwila nawu kukeña yuma yakeñayi nikuhela yuma yahelayi, nikwikala nayililu yayiwahi. (Tañenu Masamu 97:10.) Neyi yitoñojoka yetu yendelaña hamu nayitoñojoka yaYehova, tukuswejaña kwovwahila nshimbi jindi.—Mas. 119:104.

¹⁰ Eñañi, mpinji yejima hichapela kwovwahila nshimbi jaYehovaku. Twatela kuzata nañovu kulonda tutwalekuhu kwikala ashinshika. Chakutalilahu, akwaKristu amakwawu ajiki akeñaña kusumbula hela kusumbuka, ilaña kanda awani muntu watelela hadi akwakudifukula aYehova. (1 Kor. 7:39) Muhela mujiki nateli kumona nindi akwawu abula kwitiya muyazatilaña mpinji yejima amuletelaña amayala anateli kumusumbula. Hadaha muhela nakutiyaña wudi nankashi. Hela chochu, wafwilaña chikupu kutwalekahu washinshika kudi Yehova. Komana hitwahamekaña chakutalilahu chamuchidiwu chakwikala washinshikaku? Chakadi nikujina Yehova wakakiswila antu ejima anakutwalekahu kwikala ashinshika nimumakabi.—Heb. 11:6.

YEHOVA WANAKENAÑA

11. Indi kwanakena kwatalisha mudihi?

¹¹ Hakachi kayililu yaYehova yayiwahi nankashi hekala muchima wakwanakeña. Indi kwanakena kwatalisha mudihi? Kwabombelamu kwanakena samuloña neyi chinateleli kumwanakena. Hichinatalishi mukwila nawu muntu wunanakeni neteji yiluwa yakoñeluwu hela nakaani nindi hiyaluwañesheluku. Ilaña, watondañahu kubula kuhila. Nsona yatudizishaña nawu Yehova “waanakenaña” antu abalumukaña chikupu munyichima.—Mas. 86:5.

12. (a) Indi Yehova wamwekeshaña ñahi kwanakena? (b) Indi ‘kujima’ nshidi jamuntu kwatalisha mudihi?

¹² Indi Yehova wamwekeshaña ñahi nawu wanakenaña? Neyi Yehova yanakena, wanakenaña “nankashi”; wanakenaña chikupu nawa haya nyaka. (Isa. 55:7) Tuneluki ñahi netu Yehova wanakenaña chikupu? Talenu mazu akukolesha itwatañaña haYililu 3:19. (Tañenu.) Kapostolu Petulu wakonkomweneni antiyilili indi ‘abalumuki munyichima yawu nikufunta.’ Neyi mukwanshidi  yabalumuka mumuchima chikupu, watiyaña kutama chikupu hayiluwa yindi yakoñeliyi. Cheñi nawa wazataña nañovu kulonda yabuli kufuntishahu nshidi yakoñeliyi. (2 Kor. 7:10, 11) Kubombelahu, kubalumuka chikupu mumuchima kwaleñelaña mukwanshidi ‘yafunti,’ nakuleka njila yindi yatama nakutachika kwila yuma yamuzañaleshaña Nzambi. Neyi chakwila antu anakutiyili kumazu aPetulu akumwekesha kubalumuka mumuchima chikupu, chumanyi chikufumamu? Petulu wahosheli nindi “akajimañesha” nshidi jawu. Idi izu dafuma kwizu dachiGriki datalisha mukwila nawu “kujima.” Dichi neyi Yehova yanakena, chidi neyi kwiji najimi nshidi jetu. Wanakenaña chikupu.—Heb. 10:22; 1 Yow. 1:7.

13. Indi mazu akwila nawu “ninshidi yawu hinakayanuka nawa cheñuku” atudizishañadi hadi Yehova?

¹³ Tweluka ñahi netu Yehova wanakenaña haya nyaka? Toñojokenu hawuprofwetu waYeremiya kutalisha hachitiyañenu chachiha, chatiyañenuwu nawakwaKristu awayishewa, chaleñelaña antu akuhwelela mwifutu danyiloña ayanakeni chikupu. (Tañenu Yeremiya 31:34.) Yehova wahosha nindi: “Ami nakayanakena kuluwa kwawu, ninshidi yawu hinakayanuka nawa cheñuku.” Dichi Yehova wakonkomwenaña nindi neyi yanakena, hamba katubabesha hamuloña wanshidi yitwakoñeli kunyimaku. Hanukaña nshidi jetu kulonda yatufwishi namuloña hela kutumwesha kalulaku. Ilaña, Yehova wanakenaña nshidi jeniji nawa wajimbalañaku chikupu.—Rom. 4:7, 8.

14. Tunateli kukundejewa ñahi neyi tutoñojokaña chikupu hakwanakena kwaYehova? Shimunenu chakutalilahu.

¹⁴ Kutoñojoka chikupu hakwanakena kwaYehova kunateli kutukundeja. Toñojokenu hanichi chakutalilahu. Kuyaaka yakunyima, muhela wutukutena netu Elaine amuhañili muchipompelu. Chimwahitili yaaka yayivulu, amufuntishili muchipompelu. Elaine wetejeli nindi: “Hela chakwila nelukili nawa nalejeleña antu amakwawu nami Yehova wañanakeneni, mpinji yejima natiyileña nami wadiña kwakulehi nanami hela nami antu amakwawu adiña kukamwihi nayena nawa amumweneña Nzambi nawu walala.” Hela chochu, kutaña nikutoñojoka hamazu alumbululaña hakwanakena kwaYehova kwamukundejeleña Elaine. Elaine wabombeleluhu nindi: “Namweni kukeña kwaYehova nikuñakamena munjila yinabulili kwiluka. Awa diwu mazu amusañumwini chikupu akwila nawu: “Yehova chanakenayi nshidi jetu, hitwatela kutiyaña netu kudi nshidi jatulamata muwumi wetu wejimaku.” * Elaine wahosheli nindi: “Nenjili nakwiluka nami hinakuhweleleli nami Yehova nateli kuñanakenaku, nawa natoñojokeleña nami nakaneñaña hohu muchihandilu chami chejima. Neluki nami hakahita mpinji yeneni, ilaña ichi natachiki kutiya nami nateli kukundama kudi Yehova, nawa nakutiya nami chineñi hichikumana.” Mwamweni, twakalakelaña Nzambi wakukeña nawa wanakenaña.—Mas. 103:9.

IMBUJOLENUÑA CHILILU CHAYEHOVA CHAKWANAKENA

15. Tunateli kwimbujola ñahi chililu chaYehova chakwanakena?

¹⁵ Tunateli kwimbujola chililu chaYehova chakwanakena kuhitila mukwanakena akwetu neyi chinateleli. (Tañenu Luka 17:3, 4.) Anukenu nenu neyi Yehova yanakena, wajimbalañaku nshidi jetu chakwila hayanukaña nawa cheñuku. Neyi twanakena akwetu, anetu nawa tunateli kuyanakena kuhitila mukujimbalaku chikupu nikubula kwanuka nawa cheñuku.

16. (a) Komana kwanakena yiluwa yawakwetu kwatalisha mukwila nawu tuneteji yiluwa yawu hela nawu twatiyaña kuwaha kutwila katama? Lumbululenu. (b) Hakwila Nzambi yatwanakeni, chumanyi chitwatela kwila?

 ¹⁶ Kwanakena yiluwa yawantu hikwatalisha mukwila nawu tuneteji yiluwa yawu hela nawu twatiyaña kuwaha kutwila katamaku. Inehi. Chatalisha mukwila nawu twafuukulañahu kuleka ndulu. Hela chochu, chalema  kwanuka netu hakwila Nzambi yatwanakeni, twatela kwanakena akwetu. (Mat. 6:14, 15) Yehova wanukaña nindi tudi ‘lunkuñu hohu kwalu.’ (Mas. 103:14) Komana muchima wawushona hiwatela kutuleñela tudiwuleña yiluwa yawakwetu, nikuyanakena namuchima wejimaku?—Efwes. 4:32; Kol. 3:13.

17. Chumanyi chinateli kutukwasha neyi mukwetu mukwakwitiya natuneñeshi?

 ¹⁷ Hela chochu, hichekala chapela kwanakenaku. AkwaKristu awayishewa amuyaaka nkulakaji yakusambila niwena chayikalilileña kumanisha kukala kwamweneñawu hakachi kawu. (Fwi. 4:2) Chumanyi chinateli kutukwasha neyi chakwila mukwetu mukwakwitiya yatuneñesha? Toñojokenu hadi Yoba. Amuneñesheli chikupu kudi “amabwambu” jindi, Elifwazi, Bilidadi niZofwari, amutwikileña nyiloña yakadi kwiluka. (Yoba 10:1; 19:2) Nkumininaku, Yehova wayihosholeli awa asakutwamba amutwikileña Yoba nyiloña. Nzambi wayilejeli kuya kudi Yoba kulonda akalambuli nyilambu yahanshidi yawu. (Yoba 42:7-9) Ilaña Yehova wakeñeleña nindi Yoba niyena yeluhu chuma chimu. Chumanyi chateleleliyi kwila? Yehova wamulejeli Yoba kulombelaku ana antu amutwikileña nyiloña. Yoba welili mwejima mwamulejeluwu kudi Yehova, nawa Yehova wamukiswilili hakumwekesha spiritu yakwanakena. (Tañenu Yoba 42:10, 12, 16, 17.) Chumanyi chitukudizilaku? Kulombelaku muntu chakufuma hamuchima wunatuneñeshi kunateli kutukwasha kubula kuhemba ndulu.

TWALEKENUHU KUHAMEKA CHIKUPU YILILU YAYEHOVA

18, 19. Tunateli kutwalekahu ñahi nakuhameka chikupu yililu yaYehova yayiwahi?

¹⁸ Kuhanjeka hayililu yayiwahi yaYehova yashiyashana kunatukoleshi chikupu. Tunadizi netu wekala wakasunuka, wabula chaambu, wahanaña, watoñojokelañaku, washinshika nawa wanakenaña. Hela chochu, tunadizi hohu yuma yantesha. Tunateli kwikala namuzañalu wakudiza yuma yayivulu hadi Yehova haya nyaka. (Mukwa. 3:11) Twetejaña mazu asonekeliyi kapostolu Pawulu, nindi: “Maheta amaana nayuma yelukayi Nzambi, o chiyakunama!”—kufumishaku chililu chakukeña niyililu yikwawu yitanu nachimu yitunahanjekuhu.—Rom. 11:33.

¹⁹ Wonsu wetu tutwalekuhu kuhameka chikupu yililu yaYehova yayiwahi. Tunateli kwila mwenimu kuhitila mukwiluka yililu yindi, nikutoñojokahu chikupu, nikuyimbujola muchihandilu chetu. (Efwes. 5:1) Chitukwilaña mwenimu, chakadi nikujina tuketeja chikupu mwahosheli ñimbi yamasamu wembili nindi: “Ami kwami chachiwahi kukundama kwakwihi naNzambi.”—Mas. 73:28.

[Tumazu twaheshina]

[Malwihu aKuzatisha haKudiza]

[Mwevulu wudi hefu 19]

“Kwekala ibwambu wasweja kulamata, chakubadika mana kweyi.”—Yish. 18:24 (Talenu  parakalafu 7)

“Danakenenu muntu namukwawu.”—Efwes. 4:32 (Talenu  parakalafu 16)

[Mwevulu wudi hefu 21]

Kulomba kwetu kwakwanakena kufumeña hanyichima (Talenu  parakalafu 17)