Hamekenuña Yililu Yayehova, Kuhana Nikutoñojokelaku

“Yehova himuwahi kudi antu ejima; wushona windi wekala kunyidimu yindi yejima.”—MAS. 145:9.

MUKULUMBULULA NENUDI?

Yililwinyi yiyedi yaYehova yitunateli kuhameka chikupu?

Tunateli kwimbujola ñahi chililu chaYehova chakuhana?

Munjilanyi mutunateli kwimbujolela chililu chaYehova chakutoñojokelaku?

1, 2. Kukoolekanyi kukwetuwu amabwambu jaYehova?

 MUKWAKRISTU wejina daMonika wahosheli nindi: “Tunashakami mumaluwi kwakwihi nayaaka 35. Ami ninfumwami twadiluka chiwahi chikupu. Ilaña, hela chakwila tunashakami mumaluwi yaaka yejimiyi, tuchidi kudiza yuma yitwabulili kwiluka hakachi ketu.” Chakadi nikujina, etu amavulu dichi chitunateli kuhosha hamaluwi etu hela hadi amabwambu jetu.

² Twatiyaña kuwaha kudiluka nawantu itwakeña. Hela chochu, hawubwambu wejima wutwatela kukwata, kwosi wubwambu watela kubadika wubwambu wetu naYehovaku. Hitwamba keluka yuma yejima yitwatela kwiluka hadi yena. (Rom. 11:33) Twakekala nakukooleka nimuzañalu wakuhameka yililu Yehova haya nyaka nanyaka.—Mukwa. 3:11.

3. Yumanyi yitukudiza muchinu chibaaba?

³ Chibaaba chinafumihu chatukwashili kwiluka chikupu chitwatela kuhameka yililu yaYehova yakwikala wakasunuka nikubula chaambu. Ichi dinu tushinshikenu hayililu yikwawu yiyedi yayiwahi yaYehova, kuhana nikutoñojokelaku. Kwila mwenimu, kukutukwasha kwiluka chikupu netu “Yehova himuwahi kudi antu ejima; wushona windi wekala kunyidimu yindi yejima.”—Mas. 145:9.

YEHOVA WAHANAÑA

4. Indi kuhana kwalala kwatalisha mudihi?

⁴ Indi kwikala wahanaña kwatalisha mudihi? Twawanaña ñakwilu mumazu ahosheliyi Yesu asonekawu haYililu 20:35: ‘Mukuhana mwekala muzañalu weneni kubadika wekala mukutambwila.’ Muniwu mukuku wamazu, Yesu walumbulwili mwatalisha kuhana kwalala. Muntu wahanaña wazatishaña mpinji yindi namuchima wumu, ñovu jindi nimaheta kulonda yakwashuku amakwawu nawa welaña mwenimu namuzañalu chikupu. Mwamweni, kuhana hiyakwilukilaña kukutoha kwachumaku,  ilaña akwilukilaña kuyililu yamuntu wunakuhana. (Tañenu 2 Akorinda 9:7.) Kwosi muntu wahanaña chikupu kubadika ‘Nzambi yetu wamuzañalu,’ Yehova.—1 Tim. 1:11.

5. Munjilanyi mwamwekeshelañayi Yehova nawu wahanaña?

⁵ Indi Yehova wamwekeshaña ñahi nawu wahanaña? Wayikaña antu ejima yuma yakeñañawu, kushilahu tuhu niantu abulaña kudifuukula kudi yena. Eñañi, “Yehova himuwahi kudi antu ejima.” Yena “wanokeshaña nvula nihadi aloña nihadi aheña.” (Mat. 5:45) Iwu dimuloña waletesheli kapostolu Pawulu, hampinji yahosheleñayi kudi antu abula kwitiya, wahosheli nindi Yehova ‘welili chachiwahi, hakuyinka nvula yakufuma kwiwulu, niyilaaka yakudya, nakuyitiyisha kuwaha nayakudya, nikuluña mwaya nyichima yenu mwejima.’ (Yil. 14:17) Mwalala, Yehova wahanaña kudi antu ejima.—Luka 6:35.

6, 7. (a) Anyi atiyañayi Yehova kuwaha kuyinka yuma yakankilañawu? (b) Shimunenu chakutalilahu chinakumwekesha Nzambi chakwashañayi akwakudifukula indi ashinshika.

⁶ Sweje-e dinu Yehova watiyaña kuwaha kwinka akwakudifukula indi yuma yakeñañawu. Mwanta Davidi wahosheli nindi: “Nadiñi kansi, hanu nakula dehi nankashi, kanda nimonañahu dehi hashiyilawu muntu waloña, hela anyanindi nakulomba yakudyaku.” (Mas. 37:25) AkwaKristu amavulu ashinshika adimwena namesu kapu chayakamenañayi Yehova. Shinshikenu hanichi chakutalilahu.

⁷ Hayaaka yinahituhu, payiniya wampinji yejima wejina daNancy wadiña mukukala. Nancy wahosheli nindi: “Nakeñeleña madola akushika ku 66 mali akuAmerica akufwetela itala inateleleli kuhana ifuku dalondeleluhu. Nelukili nawanyi chinadi kuwana awa mali. Nalombeleluhu haniku kukala, kufumahu nayili kumudimu wakwinka antu yakudya. Hinakuhweleleli kutambwila mali amavulu akusakilila nachu kudi antu enjileña nakulanda yakudyaku muloña yadiña mpinji yamumulungu yabulileñawu antu kulanda yakudya nankashi. Chakuhayamisha, antu amavulu enjili kwitala dakudyila yakudya nawuna wufuku. Hampinji yinamanishileña kuzata mudimu nabombeli hamu mali ejima iyanyinkeli kudi antu enjileña nakulanda yakudya, ashikili $66 mali akuMerica.” Nancy weluka chikupu nindi Yehova wamwinkeli chuma chakeñeleñayi.—Mat. 6:33.

8. Chawananyi chabadika chahanayi Yehova?

⁸ Yehova wahana chawana chabadika kudi antu ejima. Hichawananyi? Himulambu wefutu danyiloña daMwanindi. Yesu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yow. 3:16) “Mpata yamunu mwishina” yinatenuwu muyinu vasi, yemenañaku muchidi wamuntu. Eñañi, chawana chabadika chahanayi Yehova chamuntu wudi wejima wafuukulañahu kuchitambwila. Antu amukuhwelelaña Yesu akatambwila wumi wakubadika kuvula, dikwila nawu wumi wahaya nyaka.  (Yow. 10:10) Mwamweni, ichi hichinjikijilu chinakumwekesha nawu Yehova wahanaña chikupu.

IMBUJOLENUÑA CHILILU CHAYEHOVA CHAKUHANA

9. Tunateli kwimbujola ñahi chililu chaYehova chakuhana?

 ⁹ Tunateli kwimbujola ñahi chililu chaYehova chakuhana? Yehova ‘watwinkaña yuma yejima nindi tuluñi nachu’; dichi, anetu nawa twatela kwinka akwetu kulonda niwena azañalaleña. (1 Tim. 6:17-19) Twazatishaña maheta etu namuzañalu kulonda tuhani yawana kudi akwetu itwakeña niantu adi mukukankila. (Tañenu Kuhituluka 15:7.) Chumanyi chinateli kutukwasha kwanuka netu twatela kuhanaña? AkwaKristu amakwawu azatishaña iyi njila: Mpinji yidi yejima neyi atambwila chawana, niwena nawa akeñakeñaña njila mwakuhanina chawana kudi muntu wacheñi. Muchipompelu chawa kwaKristu mwikala amana kwetu niahela ekala nanyichima yakuhana.

10. Njilanyi yimu yayiwahi yakwikalilamu ahanaña?

¹⁰ Njila yimu yayiwahi yakwikalilamu ahanaña yidi yakudihana etu aweni mumazu nimuyililu. Tunateli kwila ñahi mwenimu? Kuhitila mukuzatisha mpinji yetu niñovu kulonda kukwashaku amakwawu nikuyikolesha. (Ŋal. 6:10) Hakwila twiluki neyi tukweti muchima wakuhana, twatela kudihula netu: ‘Komana antu amakwawu ammonaña nawu nekala namuchima wakudihana nikutiyilila kuyuma yinakunlejawu? Neyi muntu yalomba nindi nimukwashuku mudimu, komana netejaña? Mpinjinyi yinahamekeli chikupu muntu wamuchisaka hela mukwetu mukwakwitiya?’ Neyi ‘tuhanaña,’ tunateli kukuhwelela netu tukukundama kwakwihi naYehova nikudi amabwambu jetu.—Luka 6:38; Yish. 19:17.

11. Njilanyi jikwawu mutunateli kwikalila namuchima wakuhana kudi Yehova?

 ¹¹ Tunateli kwikala cheñi ahanaña kudi Yehova. Nsona jatukoleshaña nawu: “Mulemeshi Yehova nayuma yeyi.” (Yish. 3:9)  Iyi ‘yuma yetu’ yabombelamu mpinji yetu, ñovu, nimaheta, itunateli kuzatisha chikupu mumudimu windi. Anyana anyanya niwena anateli kudiza chiyanateli kwikala ahanaña kudi Yehova. Jason tata yawantu wahosheli nindi: “Neyi chisaka chetu chifuukulahu kuhana chawana Hetala daWanta, twayinkaña anyanetu mali kulonda ashi muchikasha chamali. Atiyaña kuwaha muloña, neyi anakushamu mali, dikwila nawu anakuhana kudi Yehova.’” Anyana atiyaña kuwaha kuhana kudi Yehova henohu achidi atwansi anateli kutwalekahu kwikala namuchima wakuhana kudi Yehova nichikakulawu.—Yish. 22:6.

YEHOVA WATOÑOJOKELAÑAKU

12. Indi kutoñojokelaku kwatalisha mudihi?

¹² Chililu chikwawu chaYehova chabadika hikutoñojokelaku. Indi kutoñojokelaku kwatalisha mudihi? (Tit. 3:1, 2) Muntu watoñojokelañaku wekala wamwovu. Mpinji yejima hakeñekaña kulondela lushimbuku. Hasweja kukalisha hela kuzuwaku. Wakamenaña antu chachiwahi nawa wafwilaña kwiluka chidi chihandilu chawu. Watiyililaña kudi antu amakwawu, nawa neyi chinatwesheki, wayitejaña kwikala hela kwila yuma yinakukeñawu.

13, 14. (a) Indi Yehova wamwekeshaña ñahi nawu watoñojokelañaku? (b) Chumanyi chitukudizilaku kutalisha hachililu chakutoñojokelaku chamwekesheliyi Nzambi kudi Loti?

¹³ Yehova wamwekeshaña ñahi nawu watoñojokelañaku? Watoñojokaña hachinakutiyawu ambuñindi nawa kakavulu wayitejaña eli munakukeñawu. Chakutalilahu, toñojokenu ochu Yehova chamwakameneniyi Loti muntu waloña. Yehova chamweni nindi nakujilumuna musumba waSodoma naGomora, wamulejeli Loti nshimbi jatiyakana jateleli kulondelayi nakutemukila kumpidi. Hela chochu, kudi yuma yamuleñeleli Loti yalembi nindi amwiteji yatemukili kwiluña dacheñi. Toñojokenu hachumichi, Loti walombeli nindi Yehova yahimpi nshimbi Jindi jamulejeliyi.—Tañenu Kutachika 19:17-20.

¹⁴ Chaswayi muntu kutoñojoka nindi Loti wadiña wazeya hela nindi hadiña wovwahilaku. Loti hateleleli kutiya womaku, muloña Yehova wadi kumukiñila kwiluña didi dejima. Hela chochu, Loti wadiña nawoma nawa Yehova wamutoñojokeleluku. Wamwitejeli Loti kutemukila kumusumba Wakeñeleña kujilumunayi. (Tañenu Kutachika 19:21, 22.) Mwalala, Yehova hakela wakalisha hela wazuwaku. Wekala wovwahila nawa watoñojokelañaku.

15, 16. Indi Nshimbi yamwinkeluwu Mosi yamwekesheleña ñahi nawu Yehova watoñojokelañaku? (Talenu mwevulu wakutachikilahu.)

¹⁵ Nshimbi jayinkeluwu aIsarela kudi Yehova jamwekeshaña cheñi chatoñojokelañaku antu. Chakutalilahu neyi kaIsarela wadiña kazweñi chikupu chakwila hakutwesha kuhana mulambu wamukoku hela wampembi, wateleleli kuhana tutela tuyedi hela tupompa tuyedi. Indi neyi kaIsarela wadiña kazweñi kakeni chakwila hakutwesha kuhana tupompa tuyeduku? Haniwu muloña, Yehova wetejeli aIsarela adiña atuzweñi kuhana wuña wantesha. Hela chochu, ilukenu ichi chikuma chalema chakwila nawu: Hiwateleleli kwikala wuña wudi wejimaku, ilaña ‘wuña walembuluka,’ wazatishileñawu neyi anatambwili enyi alema. (Kutach. 18:6) Muloñadi chumichi chichalemena?—Tañenu Alevi 5:7, 11.

¹⁶ Eñañi, fwikijenu nenu mudi kaIsarela nawa kazweñi yomweni. Chimwashika hatabanaka natuwuña twantesha twakuhana mulambu, dichi himukumona aIsarela aheta anakuleta yimuna yawu. Munateli kutiya nsonyi hamuloña wamulambu wenu wawuña wasweja kukehelamu. Dichi mwanuka nenu kumesu aYehova, mulambu wenu walema nankashi. Muloñadi? Muloña wakwila, Yehova wakeñaña nindi wuña wikali wawuwahi chikupu. Chidi neyi Yehova walejeleña aIsarela atuzweñi nindi: ‘Neluki nami himunateli kuhana neyi chahanañawu amakwawuku, ilaña neluki cheñi nami yimunakunyinka dihanakumini ñovu jenu.’ Ichi chakutalilahu mwalala chinakumwekesha nawu Yehova  watoñojokelañaku. Hakeñaña yuma yabadika kudi ambuñindi kubadika yuma yinateli kuhanawuku.—Mas. 103:14.

17. Mudimu wamuchidinyi watambwilañayi Yehova?

 ¹⁷ Tunateli kukundejewa hakwiluka netu hamuloña wakututoñojokelaku, Yehova watambwilaña mudimu wutwamukalakelaña namuchima wejima. (Kol. 3:23) Muhela wachikulumpi wakuItaly wejina daConstance wahosheli nindi: “Kuhanjeka nawantu amakwawu hadi Nleñi yami dichuma chinakeña kwila nankashi mpinji yejima. Dimuloña wunatwalekelañahu nakushimwina nikulombola atudizi aBayibolu. Mpinji yikwawu nadishonaña nami hinatweshaña kuzata nankashuku hamuloña wayikatu. Ilaña nanukaña nami Yehova weluka hakumina ñovu jami, wankeña nawa wanhamekaña hanyidimu yinazataña.”

IMBUJOLENUÑA CHILILU CHAYEHOVA CHAKUTOÑOJOKELAKU

18. Njilanyi yimu anvwali muyanateli kwimbujolelawu chakutalilahu chaYehova?

¹⁸ Tunateli kwimbujola ñahi chililu chaYehova chakutoñojokelaku? Toñojokenu cheñi hadi Yehova chamwakameneniyi Loti. Yehova diyi hohu wadiña nañovu; ilaña, watiyilili chachiwahi kudi Loti chalumbulwileñayi chatiyileñayi. Nawa Nzambi wamwitejeli Loti kuya kwakeñeleñayi. Neyi mudi anvwali, komana munateli kwimbujola chakutalilahu chaYehova? Komana munateli kutiyilila munakulombawu anyanenu, nawa neyi chinatwesheki, muyiteja eli munakukeñawu? Kuhosha hanichi chikuma, Kaposhi Kakutalila kaSeptember 1, 2007, kahosheli nawu anvwali amakwawu ashakamaña hamu nawanyanawu hakutuña nshimbi jakulondela hetala. Chakutalilahu, anvwali anateli kufuukulahu kusha lushimbi kutalisha hampinji yatela kufunta anyana hetala namelela. Hela chochu, anvwali akwaKristu atela kutiya chinakuhoshawu anyanawu kutalisha hampinji yinemikuwu. Mpinji jikwawu, anvwali anateli kufuukulahu kuhimpa mpinji yinemikuwu chakala hohu hiyanakufumpa nshimbi jamuBayiboluku. Neyi anvwali ahosha nawanyanawu henohu kanda atuñi, anyana akutiyisha chikupu nshimbi nawa akujovwahila.

19. Indi aeluda anateli kuzata ñahi nañovu kulonda embujoleña chililu chaYehova chakutoñojokelaku?

¹⁹ Aeluda amuchipompelu azataña nañovu kulonda embujoleña chililu chaYehova chakutoñojokelaku. Elaña mwenimu kuhitila mukubula kukuhwelela amana kwawu niahela kwila yuma yabadika muñovu jawu. Anukenu nenu Yehova walemesheli ninyilambu yahanineñawu aIsarela adiña atuzweñi chikupu. Chochimu, amana kwetu niahela amakwawu hiyadikitaña chikupu mumudimu wakushimwinaku, hadaha hamuloña wayikatu hela kushinakaja. Indi neyi ananeñi hamuloña wakwila hiyanateli kudikita chikupuku? Aeluda atela kuyikolesha nakuyileja nawu Yehova wayikeña hanyidimu yinakukalakalawu hakumina ñovu jawu.—Maku 12:41-44.

20. Komana kutoñojokelaku kwatalisha mukwila nawu tubuleña kumuzatila Nzambi hakumina ñovu jetu? Lumbululenu.

²⁰ Hela chochu, kutoñojokelaku hikwatalisha mukubula kuzata nañovu mumudimu waNzambuku kulonda tuditiyili luwi etu aweni. (Mat. 16:22) Hitunakukeña kuzata hohu chantesha henohu tunateli kudikita chikupuku. Ilaña, wonsu wetu twatela ‘kukabila nañovu chikupu etu aweni’ hakukalakala mudimu waWanta. (Luka 13:24) Dichi, bayi tukolela kabadi kamuku. Kubombelahu, twatela tudikiteña chikupu, bayi tufuntaña hanyima mumudimu wetuku. Cheñi nawa, twatela kwanukaña netu Yehova hakeñaña nindi tuzateña nyidimu yabadika muñovu jetuku. Neyi tumukalakela namuchima wumu, tunateli kwiluka netu wazañalalaña. Komana hitwatiyaña kuwaha kumukalakela Nkaka yetu wahamekaña nawa watoñojokelañaku? Muchibaaba chinalondeluhu, tukashinshika hayililu yaYehova yikwawu yiyedi.—Mas. 73:28.

[Malwihu aKuzatisha haKudiza]

[Mwevulu wudi hefu 13]

AIsarela ayilejeli kwimbujola chililu chaYehova chakuhana (Talenu  parakalafu 9)

[Mwevulu wudi hefu 14]

“Mulemeshi Yehova nayuma yeyi.”—Yish. 3:9 (Talenu  parakalafu 11)

“Yuma yejima yimukwila yilenu namuchima wakukalakela.”—Kol. 3:23 (Talenu  parakalafu 17)