Itejenu Kufumba Kwayehova Kuyiwumbi

‘Wakanlombolaña, wakanlejaña, nkumininaku wakantambula mulubanji lwalema.’—MAS. 73:24.

MUKWAKULA NENUDI?

Chumanyi chamwekeshaña nawu Kañemi Muneni hawumbaña hohu antu chinwumbila nawa hekala nachaambuku?

Muloñadi chitukuzañalela hakwiluka netu Kañemi ketu nateli “kufuntisha muchima mwivumu”?

Tunateli kwila ñahi neyi Yehova yatufumba hela yatubabesha?

1, 2. (a) Yumanyi yalema yitwatela kwila hakwila twikali nawubwambu wawuwahi naYehova? (b) Tukuhetelamu ñahi neyi tushinshika nsañu yekala muNsona yahosha hacheliluwu antu hampinji yayifumbuluwu kudi Nzambi?

 “ILAÑA ami kwami chachiwahi kukundama kwakwihi naNzambi: namwila dehi Mwanta Yehova nami dimu mwami mwakubatamina, kulonda nishimuni nyidimu yeyi yejima.” (Mas. 73:28) Munawa mazu, ñimbi wamasamu wamwekesheli chikuhwelelu chindi mudi Nzambi. Chumanyi chaleñeleli yahoshi awamazu? Ilaña chamweniyi antu atama anakushakama mukuwunda, hatachi ñimbi yamasamu watiyili kutama kumuchima. Wahosheli nindi: “Nadikabishi tuhu kwami nakuditookesha mumuchima wami, nakwisuka kumakasami nibuli muloña.” (Mas. 73:2, 3, 13, 21) Hela chochu, cheñililiyi “mumalala aNzambi,” wadiña mwiluña damukwashili kuhimpa yitoñojoka yindi nikuhemba wubwambu windi naNzambi. (Mas. 73:16-18) Ichi chuma chamudizishili iwu iyala wamwakama Nzambi chikuma chalema: Kwikala hamu nawantu jaNzambi, kutambwila kufumba, nikukwizatisha kwalema hakwikala nawubwambu wawuwahi naYehova.—Mas. 73:24.

² Anetu nawa twafwilaña kwikala nawubwambu wakola naNzambi walala nawa wamumi. Hakwila tushikiji ichi chikonkwanyi, chalema kwiteja kufumba kwindi kutwiwumbi kulonda twikali antu amuzañaleshaña. Kumpinji yakunyima, Nzambi wayimwekesheleli antu luwi nawa mpinji jikwawu nikunyuza yejima kuhitila mukuyinka kukooleka kwakwiteja kufumba kwindi. Nsañu yahosha hachuma cheliluwu ayisoneka muBayibolu “kulonda kutuleja nachu maana” nawa ‘nikutukonkomwena, etu tudi kunu kunsa yanyaka yamakonu.’ (Rom. 15:4; 1 Kor. 10:11) Kushinshika chikupu haniyi nsañu kukutukwasha kwiluka chatoñojokañayi Yehova nichitunateli kuhetelamu neyi yatwiwumba.

 KAÑEMI CHAZATISHAÑAYI ÑOVU JINDI

3. Hamukanda waIsaya 64:8 niYeremiya 18:1-6, indi ñovu jikwetiyi Yehova hadi antu ajilumbulula ñahi? (Talenu mwevulu wakutachikilahu.)

³ Hakulumbulula ñovu jikwetiyi Yehova hadi antu ninyunza kuhitila muchakutalilahu, Isaya 64:8 yahosha nawu: “Eyi Yehova yeyi tata yetu; etu yetu iwumba, eyi wukañemi ketu; wejima wetu tudi mudimu wakumakaseyi.” Kañemi wekala nañovu yakuwumba iseki muchuma chidi chejima chinakukeña kuwumbayi. Iseki hidinateli kuleja kañemi mwatela kudiwumbilaku. Chochimu, muntu hanateli kumuleja Nzambi mwatela kumuwumbilawuku. Hitukweti wuswa wakumuleja Nzambi chatela kutuwumbayuku, neyi chochidi iseki dewumba hidinateli kumuleja kañemi inuñu hela iwumba datela kuwumbayuku.—Tañenu Yeremiya 18:1-6.

4. Komana Nzambi wawumbaña hohu antu hela nyunza chinwumbila? Lumbululenu.

⁴ Yehova wamwekesheli ñovu jindi kudi Isarela wakushankulu hañovu jekala nakañemi hadi iseki. Ilaña hadi chaambu cheneni. Kañemi nateli kuwumba chuma chidi chejima chinatweshiyi kuwumbayi namaseki ewumba. Komana Yehova wawumbaña hohu antu chinwumbila hela nyunza, kuwumba amawahi niatama? Bayibolu yakulaña nawu inehi. Yehova wayinka antu chawana chalema, chawana chawuswa wakudifuukwila. Hazatishaña ñovu yindi yawanta nakukanjikija antu kulonda amwovwahileñaku. Antu atela kutondahu kuyiwumba kudi Nleñi yawu, Yehova.—Tañenu Yeremiya 18:7-10.

5. Komana Yehova wazatishaña ñahi ñovu jindi jakuwumba neyi antu akaana kuyiwumba?

⁵ Indi neyi antu akana tuhu chikupu kuyiwumba kudi Kañemi Muneni? Indi Yehova wazatishaña ñahi ñovu jindi jawukañemi? Toñojokenu hachuma chamwekanaña neyi chakwila iseki hidinateleli kwesekeja nachuma chiyanakukeña kuwumbawuku. Kañemi nateli kuwumbilamu chuma chacheñi hela kunata iseki. Chumichi chamwekanaña muloña kañemi hanawumbi chuma munjila yayiwahiku. Ilaña Yehova mpinji yejima wawumbaña antu munjila yayiwahi. (Kuhit. 32:4) Neyi muntu yakaana kumuwumba kudi Yehova, muntu wunakaani diyi wamonaña kukala. Yehova wahimpaña njila mwakuwumbila antu kwesekeja nachiyatambwilañawu kufumba kwindi. Antu atambwilaña chachiwahi ayiwumbaña munjila yayiwahi. Chakutalilahu, akwaKristu awayishewa ekala ‘yuma yaluwi’ awumbawu ‘kwikala yuma yalema.’ Ilaña antu akaanaña kufumba kwaNzambi ekalaña ‘yuma yatela kuzuwila, yaloñeshelawu dehi kujilumuka.’—Rom. 9:19-23.

6, 7. Indi Mwanta Davidi niMwanta Sawulu elili ñahi chayifumbiluwu kudi Yehova?

 ⁶ Njila yimu mwayiwumbilañayi Yehova antu hikuhitila mukuyifumba hela kuyibabesha. Tunateli kwiluka chazatishañayi ñovu jindi kuhitila mukushinshika hadi antu awumbañayi kuhitila mukushinshika hadi anyanta amuIsarela ayedi atachi, Sawulu niDavidi. Mwanta Davidi cheliliyi wuvumbi naBatisheba, yililu yindi yamuneñesheli nankashi nawa yaneñesheli niantu amakwawu. Hela chakwila Davidi wadiña mwanta, Yehova wamubabesheli chikupu. Nzambi watemesheli kaprofwetu kindi Natani kudi Davidi nakumuleja nsañu yamushikili hamuchima. (2 Sam. 12:1-12) Indi David welilidi? Chamutapili kumuchima nawa wabalumukili mumuchima. Davidi amutiyilili luwi kudi Nzambi.—Tañenu 2 Samweli 12:13.

 ⁷ Kwambukaku, Mwanta Sawulu waswaninuwu kudi Davidi, hatiyilili kukufumbaku. Yehova wamulejeli Sawulu lushimbi lwatiyakana kuhitila mudi kaprofwetu Samweli nindi: Jilumunaku aAmaleki ejima niyimuna yawu. Sawulu wovwahilili wanyi ilu lushimbi lwaNzambi. Wamupulwishili mwanta Agagi niyimuna yayiwahi. Muloñadi? Muloña wakeñeleña kuyampuhu. (1 Sam. 15:1-3, 7-9, 12) Sawulu wateleleli kwovwahila chiyamufumbiluwu, nakwiteja kulonda amuwumbi kudi Kañemi Muneni. Ilaña, Sawulu wakaanini kumuwumba. Wamweneña nindi yililu yindi yadiña hohu chiwahi. Wadiyiñishili nindi haluwañesheluku muloña yimuna  adi kuyizatisha hakuhana nyilambu, nawa wasekesheli kufumba kwaSamweli. Yehova wamukaanini Sawulu kwikala mwanta, nawa Sawulu hatwesheli cheñi kwikala nawubwambu wawuwahi naNzambi walalaku.—Tañenu 1 Samweli 15:13-15, 20-23.

NZAMBI HEKALA NACHAAMBUKU

8. Chumanyi chitunateli kudizila kumunza waIsarela chiwelili hampinji yawuwumbileñawu kudi Yehova?

⁸ Yehova wenka cheñi nyuza yejima kukooleka kwakumwovwahila. Mu 1513 B.C.E., anyana kaIsarela, ayikulili muwuduñu kufuma muEjipitu, nawa ekalili antu jambala jaYehova. Isarela wadiña munza windi watondewa nawa wadiña nakukooleka kwakumuwumba kudi Nzambi, neyi kwiji wadiña hambuña yaKañemi Muneni. Hela chochu, antu atwalekeluhu nakwila yuma yatama kumesu aYehova, atachikili nikudifukula kudi anzambi akutwamba anyunza yadiña mukamwihi. Yehova watwalekeluhu nakutemesha atuprofwetu kulonda aIsarela eluki nawu yuma yakoñeleñawu yatama, ilaña aIsarela hiyatiyililuku. (Yere. 35:12-15) Hamuloña wakuchinchika kwawu, aIsarela ayibabesheli chikupu. Kufwana neyi chuma chatelela kujilumunawu, wanta wanyitaña ikumi wakukabeta kaluwunda awushindili kudi Asiriya nawa wanta wanyitaña yiyedi wakukabeta kambwela awushindili kudi akaBabiloni. Chumichi chatudizishaña chuma chalema nankashi. Tunateli kuhetela mukuwumba kwaYehova neyi twiteja chachiwahi kuwumba kwindi.

9, 10. Indi aNineve elilidi chayisoñamishiluwu kudi Nzambi?

⁹ Yehova wayinkeli cheñi antu amumusumba waNineve wamuAsiriya mpinji yakutiyilila kusoñamisha kwindi. Izu dindi denjili kudi Yona, nindi: “Nyamukaku, wuyi kuNineve,  mukala wuna weneni, wakayibidiki; muloña kutama kwawu kunakandami dehi kwiwulu kunashiki kudami.” Nineve amumweni nawu ateleli kumujilumuna.—Yona 1:1, 2; 3:1-4.

¹⁰ Hela chochu, Yona chashimwiniyi nsañu yakujilumuka, “Antu amuNineve amwitiyili Nzambi; adibidikili nawu, Tujiñenu nanzala. Avweli yikeleyi, kufumisha hadi wadiñi walema mukachi kawu nakushika kudi wadiñi wamukunkulwayi.” Mwanta wawu “wanyamukili hetanda dindi dawanta, wavuulili ihina dindi, wavweli chikeleyi, washakamini mumawuti.” A Nineve etejeli kuyiwumba kudi Yehova nawa abalumukili munyichima. Chafuminumu, Yehova wawujilumwini wanyi iwu musumba.—Yona 3:5-10.

11. Chililwinyi chamwekesheliyi Yehova kudi Isarela niNineve?

¹¹ Kwikala muza watondewa hikwatalishili mukwila nawu Isarela hiyadi kumubabeshaku. A Nineve hiyadiña antu ambala aNzambuku, ilaña etejeli kuyiwumba kudi Nzambi. Hela chochu, ayishimwinini nsañu yaYehova yawusompeshi nawa wayitiyilili luwi hampinji yekaliluwu neyi iseki dadovu didi mumakasa indi. Iyi yakutalilahu yiyedi yamwekeshaña hatooka nawu Yehova Nzambi yetu “haakamaña muntuku.”—Kuhit. 10:17.

YEHOVA WATOÑOJOKELAÑAKU NAWA HAKOLELAÑA KUMUKU

12, 13. (a) Muloñadi Nzambi chahimpilañayi munafuukuliyi kwila neyi antu hamuntu-hamuntu atiyilila kukuwumba kwindi? (b) Chineli Yehova “wafuntishili muchima mwivumu” chamwekeshilidi hadi Sawulu? hadi Nineve?

¹² Chineli Nzambi wahimpaña mwakutuwumbila kwesekeja namunakeñeliyi chamwekeshaña nawu watoñojokelañaku nawa hakolelaña kumuku. Ichi chamwekenaña munjila mwafuukwilañayi Yehova kuleta wunsompeshi windi waloña hadi antu, ilaña yahimpa yitoñojoka yindi neyi abalumuka munyichima yawu. Kutalisha hadi mwanta watachi wawaIsarela Nsona yahoshaña nawu Yehova ‘chamudiishiliyi Sawulu wanta chamufutwili kumuchima.’ (1 Sam. 15:11) Antu amumusumba waNineve chabalumukiluwu mumuchima nakuleka njila jawu jatama, Bayibolu yahoshaña nawu: “Nzambi wafuntishili muchima mwivumu nachumochu chatama chahosheliyi nindi nakayikoña; hachilili kwinduku.”—Yona 3:10.

¹³ Izu dachiHeberu dabalumunawu nawu “wafuntishili muchima mwivumu” datalisha mukuhimpa yitoñojoka hela mwakeñaña kwilayi. Yehova wahimpili yitoñojoka yindi hadi Sawulu chatela yamutondi yekali mwanta ilaña wamukanini. Yehova wahimpili yitoñojoka, bayi neyi waluwañesheli hakutonda Sawuluku, ilaña hamuloña wakwila Sawulu wakañenyi kumwekesha chikuhwelelu nawa hovwahililuku. A Nineve chabalumukiluwu munyichima, Yehova wayanakeneni nawa hayijilumwinuku. Chatukundejaña chikupu hakwiluka netu Yehova Kañemi ketu watoñojokelañaku nawa hakwolelaña kumuku, wekala naluwi niwushona, wahimpaña munafuukuliyi kwila neyi antu anavulumuni abalumuka munyichima.

BAYI TUKAANAÑA KUFUMBA KWAYEHOVAKU

14. (a) Yehova watuwumbaña ñahi makonu? (b) Twatela kwila ñahi neyi Nzambi nakutuwumba?

¹⁴ Makonu Yehova watuwumbaña kuhitila Mwizu dindi Bayibolu, nimukuloñesha kwindi. (2 Tim. 3:16, 17) Komana kwila twitejaña kufumba hela kubabesha kutwatambwilaña kuhitila munijinjila nehi? Hichidi namuloña nayaaka yinahituhu kufuma hitwapapatisheweli hela nyidimu yitukweti mukuloñesha, twatela kutwalekahu kwiteja kufumba kwaYehova, kulonda kutuwumbi twikali yuma yalema.

15, 16. (a) Yitoñojokanyi yatama yinateli kwikalayi nayu muntu neyi kufumba kunabombelumu kumutambula kukooleka kukwetiyi muchipompelu? Lumbululenu. (b) Yumanyi yinateli kutukwasha hakwila tushindi yitoñojoka yatama neyi atufumba?

¹⁵ Mpinji yikwawu anateli kutufumba kuhitila munshimbi hela mukutolola.  Hela chochu, mpinji yikwawu anateli kutubabesha hamuloña wakwila tunaluwañeshi. Iku kubabesha kunateli kubombelamu nikututambula nyidimu kutukweti muchipompelu. Shinshikenu hachakutalilahu chaDennis * wadiña nakuzata neyi eluda. Wavulumwini hamuloña wakutonda mudimu watama wakulanda nakulandulula, nawa amuzuwilili kumbadi. Indi Dennis watiyili ñahi hefuku dabidikiluwu kuchipompelu nawu anamutambuli wueluda? Wahosheli nindi: “Natiyili nami nakañanyi. Hayaaka 30 yinahituhu, nadiña nakukooleka kwakuzata nyidimu yayivulu. Nadiña payiniya wampinji yejima, nazatililuku haBeteli, atondeli kwikala nkoñi wakuzatila nawa nekalili eluda. Cheñi nawa nafumini tuhu hakuhana mpanji yami yatachi hakupompa kwankambi. Kukooleka kwejimiku kwahitili neyi mukulabula kwadisu. Kubombela hansonyi nichineñi chinatiyili, natoñojokeleña nami hinatela kwikala muchipompeluku.”

¹⁶ Dennis wahimpili yililu yindi, hakwila nawu yaleki chiluwa chakoñeliyi chakeñekeleña kumwolola. Chumanyi chamukwashili hakwila yaleki kutiya nsonyi nichineñi? Walumbulwili nindi: “Nafwilileña kutwalekahu nakutaña Bayibolu, kuya nakushimwina mpinji yejima nikupompa. Nahamekeleña nankashi wukwashu wunatambwilileña kudi amana kwetu niahela nikukolesha kunawanineña munyikanda yetu. Chibaaba chahoshaña nawu ‘Did You Once Serve? Can You Serve Again?’ (‘Komana Mwadiñahu Dehi Nakukooleka kwaNyidimu muChipompelu? Komana Munateli Kukalakala Cheñi?’) Kaposhi Kakutalila kawundeli kaAugust 15, 2009, kadiña neyi mukanda wantemesheleluwu hakwakula kulomba kwami. Kufumba kunatiyili kuwaha nankashi kwakwila nawu, ‘Hampinji yiwunakubula kukalakala neyi eluda hela nkoñi wakuzatila muchipompelu, shaku muchima hakukolesha wuspiritu weyi.’” Indi Dennis wahetelelumu ñahi muniku kufumba? Chimwahitili yaaka, wahosheli nindi, “Yehova wankiswila cheñi nakukooleka kwakukalakala neyi nkoñi wakuzatila.”

17. Indi kuhaña muntu wunavulumuni muchipompelu kunateli kumukwasha ñahi yahimpi yililu yindi? Lumbululenu.

¹⁷ Kuhaña muntu muchipompelu hinjila yikwawu mwatufumbilañayi Yehova. Kwakiñaña chipompelu kukuluwañesha kwatama nawa kwaleñelaña muntu wunavulumuni yahimpi yililu yindi. (1 Kor. 5:6, 7, 11) Robert amuhañili muchipompelu kukamwihi nayaaka 16, hayina mpinji anvwali jindi niamana kwindi akoleli nawa ashinshikili hakulondela wunlomboli waMwizu daNzambi wahoshaña nawu bayi mudibomba namuntu welaña yuma yatama, bayi mudimusha namuntu wamuchidowuku. Hanahiti yaaka kufuma hamufuntishiluwu Robert nawa nakuyilaku hambidi kuspiritu. Chamwihwiluwu chuma chamuleñeleli yafunti kudi Yehova niantu Jindi hanyima yayaaka yayivulu yahituluhu, wakwili nindi njila yalondeleli chisaka chindi yamukwashili chikupu. “Neyi chakwila antaña jami ahanjekeleña nanami kampinji kantesha, chidi neyi kwinza nakuhempula, kuhanjeka nawu hakampinji kantesha chiña kwadi kunleñela nibuli kutaku maana nawa chipepa chakukeña kudikunda nawu hichadi kunsañumuna nikeñi kufunta kudi Nzambuku.”

18. Twatela kwikala maseki amuchidinyi mumakasa aKañemi Muneni?

¹⁸ Hitunateli kukeñeka kutubabesha munjila yoyimuku, ilaña tukwikala maseki amuchidinyi mumakasa aKañemi Muneni? Tukwila ñahi neyi atubabesha? Komana tukwikala neyi Davidi ntahindi neyi Sawulu? Kañemi Muneni diyi Tata yetu. Bayi muvulama nenu “Yehova wahosholaña antu akeñayi; dimu mwelaña tata yamuntu namwanindi atiyayi kuwaha.” Dichi, ‘chayibabeshañayi Yehova bayi mudiwulaña mwoku; chayihosholañayi bayi muzeyañaku.’—Yish. 3:11, 12.

[Tumazu twaheshina]

[Malwihu aKuzatisha haKudiza]

[Nyevulu yidi hefu 26]

Sawulu wadiwili nawa wakanini kufumba. Wakanini kumuwumba! (Talenu  parakalafu 7)

Davidi chamutapili kumuchima nawa wetejeli kumufumba. Wamwitejeli Nzambi yamufumbi. Komana ninenu mwamwitejaña? (Talenu  parakalafu 6)