NSAÑU YACHIHANDILU

Kumwovwahila Yehova Kunanleteli Nkisu Jajivulu

Washimwini Elisa Piccioli

Atata alumbulwili nawu: “Twadizilañaku yuma yayiwahi nankashi kudi Nowa. Nowa wamwovwahilili Yehova nawa wakeñeli chisaka chindi, wonsu wawu apulukili Dibaji muloña chisaka chejima cheñilili muwatu.”

ICHI dichuma chatachi chinanukaña hadi atata, muntu wadizoza, wadikita chikupu. Adiña akeña wuñaji chikupu, dichi chatiyiluwu nsañu yamuBayibolu mu 1953, ashikeneni dakuyitambwila. Kufuma hayina mpinji, azatili nañovu hakutudizisha etu anyana yuma yadizileñawu. Hatachi amama adiña nakushintajala hakuleka yuma yamuKatolika yakuhweleleluwu. Ilaña chimwahitili mpinji, atachikili kulemesha chikupu ntañishilu yamuBayibolu.

Chadiña chakala nankashi kudi anvwali jetu kutudizisha. Amama hiyelukili kutañaku, nawa Atata azatileña nañovu hadi mpinji yeneni mumaha. Mpinji jikwawu azeyeleña chikupu chakwila hakudiza akunukileña. Ilaña mukudikita kwawu mwafumini yuma yayiwahi. Ami yami nadiña mukulumpi hadi anyana ejima, dichi nadizishili muhelami niana kwami ayedi. Kakavulu twahosheleña hadi Nowa chakeñeliyi chisaka chindi nichamwovwahililiyi Nzambi. Iyi nsañu yamuBayibolu nayitiyileña kuwaha. Chimwahitili mpinji yantesha, wejima wetu twatachikili kuya kukupompa Hetala daWanta muRoseto degli Abruzzi, musumba wekala kumukulishu waAdriatic muItaly.

Mu 1955 nadiña hohu nayaaka 11 hampinji yitwaketwankesheli jimpidi nawamama nakuya kumujika kukupompa kwetu kwatachi kwankambi mumusumba waRome. Kufuma hayina mpinji, namonaña nami iku kupompa kwamaneni kwekala kwalema nankashi muchihandilu chawakwaKristu.

Chaaka chahiñiluhu, napapatisheweli nawa chimwahitili mpinji yantesha natachikili mudimu wampinji yejima. Chinashikijili yaaka 17, nekalili payiniya wadimena muLatina, kukabeta kambwela kaRome hekala makilomita 300 kufuma hamukala wetu. Wadiña himukala wawuha, dichi kwosi muntu wadiña nakwakama chadiña nakutoñojokawu antuñinawu. Ami nimukwetu payiniya twazañaleli chikupu hakuhana nyikanda yayivulu yashindameneni haBayibolu, ilaña hamuloña wakwila nadiña kansi, nadiña nakwanuka nankashi kwitala. Ilaña neyi nanuka nami Yehova wakeñeleña nindi nitwalekuhu, nafwilileña kumwovwahila.

Nkumininaku antemesheli kuya kuMilan nakuzataku mudimu wakuloñesha Kupompa kwaNyunza kwadiña namutu wakwila nawu “Everlasting Good News” (Nsañu Yayiwahi Yahaya  Nyaka) mu 1963. Hampinji yakupompa, nazatiluku mudimu wakudikeñela hamu nawamana kwetu amavulu, kubombelahu niPaolo Piccioli, mana kwetu wakansi wafumini kuFlorence. Hefuku damuchiyedi dakupompa, wahanini mpanji yayiwahi nankashi yahosheleña hawujiki. Inakwanuka natoñojokeli nami, ‘Iwu mana kwetu hamba kasumbulaku.’ Hela chochu, twatachikili kudisonekela nyikanda, nawa twelukili netu twadiña nayikonkwanyi yoyimu nawa wonsu wetu twamukeñeli Yehova nankashi nikufwila kumwovwahila. Ami niPaolo twadisumbwili mu 1965.

MPINJI YITWAHANJEKELEÑA NAWAKULUMPI JANSAKILILU

Nazatili wupayiniya wampinji yejima muFlorence hadi yaaka ikumi. Nazañaleli hakumona yipompelu chiyatoheleña, sweje-e dinu atwansi chiyayilileñaku hambidi. Ami niPaolo twadiluñishileña kuhanjeka nawatwansi hayuma yakuspiritu nikunooka, nawa Paolo wahemeneña nawu ngunja. Chakadi nikujina, nadiluñishileña kwikala hamu nanfumwami, ilaña namweneña nami atwansi niyisaka yamuchipompelu aheteleleñamu nawa akeñeleña mpinji yakushakama hamu nindi.

Chanzañaleshaña neyi nanuka atudizi aBayibolu amavulu itwadizishileña. Kadizi wumu wutwadizileña nindi wadiña Adriana, wahanjekeli nayisaka yiyedi hayuma yadizileñayi. Atiyañeni kubulakana nakapristu kulonda ahanjeki hatushidikilu twamuchechi tudi neyi Wunzambi wusatu ninsañu yakwila nawu wumi hiwafwañaku. Akulumpi jansakililu asatu enjili kuniku kubulakana. Kulumbulula kwawu kwadiña kwakala nawa hikwadiña kwolokaku, dichi atudizi etu aBayibolu ashikeneni dakwiluka chiyesekejeli yuma yatiyiluwu nantañishilu yamuBayibolu yoloka. Chafuminumu muniku kubulakana, antu 15 amuniyi yisaka ekalili aYinsahu.

Eñañi, anu mafuku njila jitunakuzatisha hakushimwina jinambukiku. Hayina mpinji, Paolo “welukili chikupu” chakuhanjeka nawatupristu, nawa wadibulakeneña nawu kakavulu. Inakwanuka mpinji yimu yadibulakenuwu nezanvu dawantu abulili kwikala aYinsahu. Chamwekeni hatooka nawu akwakudimbulula atiyañeni nawantu amakwawu mwizaza kulonda ehuli malwihu abula kushikilamu. Ilaña, yuma yabalumukili. Muntu wumu wenhwili neyi chachiwahi antu amuchechi kudiñija munsañu jamatuña nachiyuulu. Kapristu wakañenyi kwakula. Mumpinji yantesha malayiti ajimini, nawa dichi chamanini iku kuhanjeka. Chimwahitili yaaka twenjili nakwiluka netu atiyañeni nawu akajima malayiti neyi chakwila kuhanjeka hikunekali neyi chakeñeleñawu atupristuku.

NYIDIMU YAYIHA YASHIYASHANA

Hanyima yakwila ami naPaolo tunashakami dehi mumaluwi hadi yaaka ikumi, atutondeli kutachika kuzata mudimu wamuñinza. Chineli Paolo wadiña  nakuzata mudimu wawuwahi, hichadiña chapela kufuukulahu swayi-swayuku. Ilaña hanyima yakulombelahu chikupu, twetejeli kutachika kuzata iwu mudimu wawuha. Twadiluñishileña nankashi kwikala hamu nayisaka yatutambwilileña. Nampinji yamelela, twadizileña hamu neyi izanvu, kuhiñahu Paolo wakwashileña atwansi nyidimu yakushikola, sweje-e neyi himakumi. Kubombelahu, Paolo wakeñesheli nankashi kutaña nawa watulejeleña yuma yayiwahi nawa yakukolesha yatañileñayi. Kakavulu, Hachimu twayileña nakushimwina mujimbaka mwabulili kwikala aYinsahu, nakutambika antu kwiza nakutiya kumpanji namelela.

Hanyima yakuzataku hohu yaaka yiyedi mumudimu wamuñinza, atutambikili kuya nakuzatila haBeteli muRome. Paolo watachikila kuzatila kudipatimenti yatalaña hanyiloña, nawa ami nazatilileña kuDipatimenti yaMagazini. Hichadiña chapela kuhimpaku, ilaña twafwilileña kwikala ovwahila. Chatuzañalesheli hama hakumona mutayi wamuItaly chiwatoheleleñaku niamana kwetu chiyavulilileñaku. Hayina mpinji, nfulumendi yamuItaly yayitejeli aYinsahu jaYehova kutwalekahu kuzata nyidimu yawu. Chakadi nikujina, twazañaleli hama naniwu mudimu wetu wawuha.

Hampinji yitwazatileña haBeteli, yuma yitwakuhwelela yamuBayibolu kutalisha hamashi ayilukili chikupu muItaly. Muyaaka yakutachika yamuma 1980, kwadiña muloña wahosheleña hamashi waleteli ipumba chikupu. A Yinsahu ayedi adisumbula ayitwikili muloña nawu diwu aleñeleli mwanawu yafwi, hela chakwila wafwili hamuloña wachikatu chamashi chasambulañawu antu amavulu muItaly nimumatuña amakwawu amukamwihi. Amana kwetu niahela amuchisaka chaBeteli akwashiluku amahaku emeneneñaku awa anvwali akwaKristu. Tilakiti niAwake! yadimena yapulintiluwu yakwashili antu kwiluka yikuma nikutiyisha chahosha Izu Nzambi kutalisha hamashi. Mutukweji twenitu, Paolo wazatileña maora 16 hefuku chakadi kuleka. Anami nawa nazatili nañovu kulonda nimukwashuku muniwu mudimu walema wazatileñayi.

CHUMA CHIKWAWU CHAHIMPILI CHIHANDILU CHETU

Twashakamini mumaluwi hadi yaaka 20 hampinji yitwamweni yuma yitwabulili kukuhwelela. Nadiña nayaaka 41 nawa Paolo wadiña nayaaka 49 hampinji yinamulejeli nami ami namoni nemani dehi mumukala. Mumukanda windi mwasonekeleñayi nsañu nawaninumu mazu asonekeliyi hadina ifuku akwila nawu: “Kulomba: Neyi mwalala, Nzambi Tata tukwashi kulonda tutwalekuhu mumudimu wampinji yejima, bayi tufunta hanyima kuspirituku, nawa tukwashi kulonda twimiki chakutalilahu chachiwahi hamu neyi anvwali amawahi. Sweje-e dinu, nkwashenu kulonda nizatishuhu pesenti yimu hayuma yejima yinnahoshi hachinañamu kubadika hayaaka 30 yinahituhu.” Kushinshika hayuma yafuminumu, Yehova watela waakwili kulomba kwindi nikwami.

 Chihandilu chetu chahimpikili chikupu chavwalikiliyi Ilaria. Kuhosha hohu mwalala, twaneñeleña chikupu mpinji jikwawu, neyi chochahosha Yishimu 24:10 nawu: ‘Neyi wakazeya hefuku dakala ñovu jeyi jakakeha.’ Hela chochu, twadikwashileña wumu namukwawu, nakwanuka kulema kwakudikolesha.

Ilaria washimunaña muzañalu watiyañayi hakusemuka kudi aYinsahu ayedi adikitileña chikupu mumudimu wampinji yejima. Watiyaña nindi twamwakamenaña chikupu; wakulilili muchisaka chachiwahi. Nampinji yamwaana, nashalileña nindi. Paolo chafuntayi kwitala namelela, kakavulu wadiña namudimu wateleleli kumanishayi; ilaña, wawanineñaku mpinji yakushakama nindi hamu, kuhema nindi nikumukwashaku mudimu wakushikola. Wamukwashileña hela chakwila mpinji yikwawu watwalekeleñahu nakutona kushika nimpinji ya 2 koloku hela 3 koloku yakumacha kulonda yamanishi mudimu windi. Kakavulu Ilaria wahosheleña nindi, “Atata hiyebwambu dami chikupu.”

Hela chochu, hakwila tumukwashi Ilaria yeli mwaloña, mpinji jikwawu twamufumbileña chikupu. Inakwanuka mpinji yimu wahemeneña namukwawu ilaña wamuluwañesheli. Twazatishili Bayibolu nakumulumbulwila netu hateleleli kwila mwenimuku. Cheñi nawa twamulejeli netu yayi nakudanakena kudi ibwambu dindi hamesu etu.

Ilaria wahoshaña hatooka nindi wayihamekaña anvwali jindi muloña akeña mudimu wakushimwina. Chineli wasumbuka, weluka chikupu chichalemena kumwovwahila Yehova nikulondela wunlomboli windi.

KWOVWAHILA NIMUMPINJI YAKUNEÑA

Mu 2008, Paolo welukili nindi wudi nachikatu chakansa. Hakusambila twamweni neyi Paolo wukukola, nawa wankolesheli nankashi. Twazatili nañovu hakwila tukeñi ndotolu wakuluka yitembi wateleli kumuuka Paolo. Ami niIlaria twalombeleña chikupu kudi Yehova kulonda yatukwashi tuumiki yuma yenjileña kumbidi. Hela chochu, nadimweneni namesu kapu iyala wadiña wakola nawa wañovu hakuzeya chovu-chovu. Chafwiliyi mu 2010 twashalili kwamakasa munshiñu. Hela chochu, chankundejaña chikupu neyi nishinshika hanyidimu yitwazatili hamu hadi yaaka 45. Twamukalakeleli Yehova namuchima wejima. Neluki nami tukatwalekañahu nakwanuka mudimu wutwakalakeli. Nawa inakutalila chikupu kumpinji yikasañukayi Paolo, kwesekeja namazu aYesu ekala haYowanu 5:28, 29.

Mukachi kamuchima wami, nichidi ona kansi wamumbanda wakeñeli mpanji yaNowa. Nichidi kutwalekahu kwila munafuukwili. Inakufwila kumwovwahila Yehova, hichidi namuloña nachuma chinakukeñayi nindi nizati. Neluki chikupu nami kukala kudi kwejima, kudihana, hela yuma yinateli kujimbesha yantesha nankashi neyi niyesekeja nankisu jajiwahi jatukiswilañayi Nzambi yetu wakukeña. Muchihandilu chami namoni nami kumwovwahila Yehova mwafumaña nkisu jajivulu.

[Mwevulu wudi hefu 4]

Ifuku ditwadisumbwili

[Mwevulu wudi hefu 4]

Twadiluñishileña kuhanjeka nawatwansi, nawa Paolo wahemeneña nawu ngunja

[Mwevulu wudi hefu 5]

Paolo wakeñeli mudimu windi wahaBeteli

Kakavulu Ilaria wahosheleña nindi, “Atata hiyebwambu dami chikupu”

[Mazu ekoku adi hefu 6]

“Mukachi kamuchima wami, nichidi ona kansi wamumbanda wakeñeli mpanji yaNowa. Nichidi kutwalekahu kwila munafuukwili”