MALWIHU KUFUMA KUDI ANTAÑI

Indi ‘anyana kaNzambi walala awamayala’ atenawu haKutachika 6:2, 4 adiñaku henohu Dibaji kanda dinzi adiñanyi?

▪ Kwekala wunsahu wawuwahi wakwila nawu awa mazu atalisha kudi anyana kaNzambi awamayala akuspiritu. Hanu dinu hiwunsahwinyi?

Mavasi akutachikilahu ahoshaña nawu: ‘Anyana kaNzambi awamayala amweni anyana kawantu awambanda nawu akweti lubanji, asumbula niañodi jawu, ejima akeñeluwu.’—Kutach. 6:2.

MuNyikanda yachiHeberu, mazu akwila nawu ‘anyana kaNzambi walala awamayala’ ‘nianyana kaNzambi awamayala’ awanikaña haKutachika 6:2, 4; Yoba 1:6; 2:1; 38:6; nihaMasamu 89:6. Indi iji nsona jamwekeshañadi kutalisha hadi ‘anyana kaNzambi awamayala’?

‘Anyana kaNzambi walala awamayala’ itwatañaña haYoba 1:6 mwamweni hiyileñaleña yakuspiritu yapompeli kumesu aNzambi. Hakachi kawu hadiña Satana, wadiña ‘nakutambatamba hamaseki.’ (Yoba 1:7; 2:1, 2) Munjila yoyimu, haYoba 38:4-7, twatañaña hadi ‘anyana kaNzambi awamayala’ ‘adikuwili nakuzañalala’ hampinji Nzambi ‘yaliliyi ilola dakwiwombu.’ Atela adiña añelu, muloña hayina mpinji antu adiña kanda ayileñi. Dichi ‘anyana kaNzambi awamayala’ atenawu haMasamu 89:6 hiyileñaleña yamwiwulu yashakamaña naNzambi, bayi antuku.

Indi ‘anyana kaNzambi walala awamayala’ atenawu haKutachika 6:2, 4 adiñanyi? Kwesekeja nansañu yalala yamuBayibolu yitunahanjekuhu dehi, tunateli kukunkulula netu iyi nsañu yahoshaña hadi anyana kaNzambi awamayala enjili hanu hamaseki.

Antu amakwawu akaanaña nawu añelu hiyanateli kwikala nampwila yakushimbaku. Mazu aYesu ekala haMatewu 22:30 amwekeshaña nawu mwiwulu himwekala kudisumbula hela kudishimbaku. Ilaña, kakavulu añelu ashileña nyijimba yawu nakuvwala nyijimba yawuntu, nawa adileña nikunwina hamu. (Kutach. 18:1-8; 19:1-3) Dichi, tunateli kukunkulula netu chahimpiluwu nyijimba yawu, atachikili kudikama nawambanda.

Kudi wunsahu wamuBayibolu waleñela twiteji netu añelu amakwawu elili mwenimu. Mukanda waYuda 6, 7 wesekejaña nshidi yawantu amuSodoma, elileña yuma yakumujimba yabulili kwikala mwayileñeleluwu, ‘nawañelu abulili kuhemba wanta wawu, afumini mwaawu mwashakamineñawu.’ Chikuma chadifwana hakachi kawañelu niaSodoma chakwila nawu “adumbilili muwuvumbi nakwila yuma yabulili kwikala mwayileñeleluwu.” Nsañu yikwawu yadifwana yekala ha 1 Petulu 3:19, 20 yafwanisha añelu adikañili ‘namafuku aNowa.’ (2 Pet. 2:4, 5) Dichi, njila yakudikaña yalondeleluwu añelu mumafuku aNowa anateli kuyesekeja kunshidi yamuSodoma naGomora.

Dichi, chaloña kukunkulula mwenimu neyi tumona netu ‘anyana kaNzambi walala awamayala’ atenawu haKutachika 6:2, 4 adiña añelu ashili nyijimba yawu nakuvwala nyijimba yawuntu nakudishimba nawanyana kawantu awambanda.

 Bayibolu yahosha nawu Yesu ‘washimwinini kudi aspiritu amukaleya.’ (1 Pet. 3:19) Komana chumichi chatalisha mudihi?

▪ Kapostolu Petulu wayilumbulula awa aspiritu nindi hiyaspiritu ‘adikañili hamwaka, hadiwunjikiliyi Nzambi nakuchiñilila mumafuku Nowa.’ (1 Pet. 3:20) Chakadi nikujina, Petulu wateneneña yileñaleña yakuspiritu yafuukwiluhu kulondela kudikaña kwaSatana. Yuda watena añelu “abulili kuhemba wanta wawu, hiyakufuma mwaawu mwashakaminañawu,” nakuhosha nindi Nzambi “nayihembi mumaleñi ahaya nyaka mumwidima wiyila bwi, nayiswekeli kusompesha kwefuku odu deneni.”—Yuda 6.

Munjilanyi mwadikañilili iyi yileñaleña yakuspiritu mumafuku aNowa? Henohu Dibaji kanda dinzi, awa aspiritu atama avuulili nyijimba yawu nakuvwala nyijimba yawuntu, chuma chabulili kuyinkayi Nzambi. (Kutach. 6:2, 4) Kubombelahu cheñi, ana añelu akamini nawambanda elileña chuma chabulili kuyileñelawu. Nzambi haleñeli yileñaleña yakuspiritu kulonda yidishimbeña nawambandaku. (Kutach. 5:2) Awa añelu atama nawa adikañili, akayijilumuna mumpinji yatoñolayi Nzambi. Kwesekeja nachahosha mukanda waYuda, chayinu mpinji adi “mumwidima wiyila bwi,” hela twili netu mukaleya kakuspiritu.

Mpinjinyi nawa munjilanyi Yesu mwayishimwininiyi awa “aspiritu amukaleya”? Petulu wasonekeli nindi chumichi chamwekeni hanyima yakwila Yesu ‘anamuhandishi muspiritu.’ (1 Pet. 3:18, 19) Cheñi nawa, hanu Petulu nahoshi nindi Yesu ‘washimwinini.’ Chinyika chakunyima chazatishiliyi Petulu chinakumwekesha nawu Yesu wayishimwinini henohu Petulu kanda yasoneka mukanda windi watachi. Chumichi chinakumwekesha nawu chimwahitili mpinji kufuma hasañukiliyi, Yesu wayishimwinini awa aspiritu atama kutalisha hakujilumuka kwayitelela kukayishikena. Iku hikwadiña kuyishimwina kwayuma yayiwahuku. Kwadiña kuyishimwina kwawunsompeshi. (Yona 1:1, 2) Yesu chamwekesheliyi chikupu chikuhwelelu chindi nikashinshi kushika nikukufwa nawa amusañwili, nakumwekesha nawu Diyabolu hadiña nachuma mudi yenaku, chamuteleleli Yesu kushimuna mazu amuchidiwu awunsompeshi.—Yow. 14:30; 16:8-11.

Kumpinji yakumbidi, Yesu wakamukasa Satana niañelu jindi nakuyumbila mwikela. (Luka 8:30, 31; Chim. 20:1-3) Sampu iyi mpinji yinashiki dehi, awa aspiritu adikañili akutwalekahu kwikala mumwidima wakuspiritu wiyila bwi, nawa chakadi nikujina akayijilumuna.—Chim. 20:7-10.