MUNAKWANUKA?

Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Indi kuzatisha Bayibolu munjila yaheña kwatalisha mudihi, nawa akwaKristu atela kukwimona ñahi?

Kwatalisha mukwila nawu muntu wukubakula Bayibolu hefu didi dejima nakukuhwelela nindi vasi yatachi hakubakulayi dihakuwanayi wukwashu wunakukeñayi. AkwaKristu alala hiyahoñañaku. Ilaña, adizaña Bayibolu kulonda aheti kwiluka kwalala niwukwashu waNzambi.—12/15, ifu 3.

‘Mpatanyi yamunu mwishina’ yikahita?

“Mpata yamunu mwishina” yikahita hiyantu ejima amukaayi abulaña kwila mwaya muchima waNzambi. (1 Yow. 2:17) Iseki niantu ashinshika akapuluka.—1/1, mafu 5-7.

Indi Abeli wuchidi kuhosha ñahi nanetu hela chakwila wafwa dehi? (Heb. 11:4)

Wuchidi kuhosha nanetu kuhitila muchikuhwelelu. Tunateli kudizila kudi yena nikufwila kwimbujola chikuhwelelu chindi. Chakutalilahu chindi chichidi kuzatika.—1/1, ifu 12.

Yumanyi yitwatela kushaku maana kulonda yibuli kutwambula kudi Nzambi?

Yuma yikwawu diyeniyi: Nyidimu yetu hela nyidimu yitwadiza, kunooka niyisela yitwatondaña, kudikunda nantaña yetu wahañewa, kudiñija mukuzatisha yozelu yamakonu, kwakama hakukola kwetu kwakumujimba, kwikala nayitoñojoka yaheña kutalisha hamali nikusweja kulemesha nankashi yitoñojoka yetu hela chifulu chetu.—1/15, mafu 12-21.

Yumanyi yitunateli kudizila kukudizoza kwaMosi?

Chatela yeteji ñovu yamwinkeluwu yimuleñeli yadinki wanta, Mosi washindameneni hadi Nzambi, bayi hadi yomwenuku. Hitunakukeña kudinka wanta hamuloña wakwila anatwinki ñovu hela hamuloña wakwikala nawuswa wakuzata yumaku, ilaña tunakukeña kumukuhwelela Yehova. (Yish. 3:5, 6)—2/1, ifu 5.

Indi antu akasañulawu akashakamaña kudihi?

Antu antesha akushika ku 144,000 akashakamaña mwiwulu. Ilaña, antu amavulu akasañulawu, akayisañwila kuwumi wahamaseki, nakuchiñeja kwakushakama haya nyaka hamaseki.—3/1, ifu 6.

Indi kwila nawu aIsarela adiña ‘ayidima munyichima yawu’ chatalishili mudihi? (Yere. 9:26)

Chatalishili mukwila nawu nyichima yawu yachinchikili nawa ateleleli kufumisha yuma yaleñeleli nyichima yawu yikali yachinchika, dikwila nawu yitoñojoka yawu hela yililu yamuneñesheleña Nzambi. (Yere. 5:23, 24)—3/15, mafu 9-10.

Indi Yesu wadiña ñahi chakutalilahu chamuntu wadiña nachihandilu chachiwahi?

Yesu wadiña namudimu wakuzata muchihandilu chindi, wakwila mwaya muchima waNzambi. Wamukeñeli chikupu Tata yindi, nawa wakeñeli antu. Chafuminumu, Yesu welukili nindi amukeña kudi Tata yindi nawa wukweti wuselewa windi. Iyi diyuma yaleñelaña muntu kwikala nachihandilu chachiwahi.—4/1, mafu 4-5.

Indi kuloñesha kwaNzambi kwahamaseki kwabombelamodi?

Kwabombelamu Izanvu Dalombolaña, makometi anyitayi, ankoñi endaña, mazanvu awaeluda, yipompelu niakwakushimwina hamuntu-hamuntu.—4/15, mafu 29.

Muloñadi chitunateli kuhoshela netu Nzambi hadiña watama hakuleta wunsompeshuku?

Yehova hatiyaña kuwaha nakufwa kwamuntu watamaku. (Ezek. 33:11) Yuma yakoñeliyi kunyima yamwekeshaña nawu wasambilaña kusoñamisha antu mukukeña henohu kanda yaleti wunsompeshuku. Chumichi chinateli kutuleñela tukuhweleli netu twakapuluka wunsompeshi wunakwinza kumbidi.—5/1, mafu 5-6.

Komana aIsarela ajahileña ambanji kuhitila mukuyikudika hamutondu?

Inehi. Nyunza yikwawu yakushankulu ajahileña ambanji kuhitila mukuyipopela hamutondu ilaña aIsarela wena nehi. Mumafuku azatishileñawu nshimbi jekala muNyikanda yachiHeberu, ayiluwañimbi asambilileña kuyijaha, chidi neyi kuyasa malola. (Lev. 20:2, 27) Kuhiñahu, chibimbi chamuntu watama achikudikileña hamutondu kulonda kusoñamisha aIsarela amakwawu.—5/15, ifu 13.

Muloñadi antu chinakañenyuwu kuleta kuwunda mukaayi?

Hela chakwila antu anakukoña nyidimu yayivulu, adana ñovu yakuyuula nyendu yawuku. (Yere. 10:23) Satana diyi wunakuyuula mpata yamunu mwishina, dichi antu hiyakatwesha kuleta kuwunda. (1 Yow. 5:19)—6/1, ifu 16.