‘Indi Nduñu Wamaana Nikashinshi Hinyi?’

‘Indi nduñu wamaana nikashinshi anenkuwu kudi nkaka yindi mudimu wakuhemba amwitala dindi hinyi?’—MAT. 24:45.

MUNATELI KUWANA ÑAKWILU?

Indi nduñu wamaana nikashinshi hinyi?

Indi akwetala hiyanyi, nawa mpinjinyi Yesu yamwinkeliyi nduñu washinshika mudimu wakuyitala?

Mpinjinyi Kristu yakamwinkayi nduñu washinshika mudimu wakuhemba yuma yindi yahetayi yejima, nawa yikabombelamu yumanyi?

1, 2. Njilanyi yinakuzatishayi Yesu makonu hakutudiisha, nawa muloñadi chichalemena kwiluka iyi njila?

 “AMANA kwami, hinateli kutwesha kuchinda yibaaba yimwasonekaña mwawanikaña nansañu yinakeñeleña hampinji yatelela.” Ichi dichahosheli muhela wumu hamukanda wasonekeliyi wakuhameka amana kwetu azatilaña hachishina chetu chamukaayi. Komana ninenu dichimwatiyaña? Etu amavulu dichitwatiyaña. Komana chumichi chatela kutuhayamisha? Inehi.

² Yakudya yakuspiritu yahampinji yatelela yitwatambwilaña hiwunsahu wakumwekesha nawu Yesu, Mutu wachipompelu nakushikija mwatukaniniyi nindi wakatwinkaña yakudya yakuspiritu. Nakutwinka yakudya yakuspiritu kuhitila mudinyi? Hampinji yashimwineñayi chinjikijilu chakwinza kwindi, Yesu wahosheli nindi wukazatisha ‘nduñu wamaana nikashinshi’ kulonda yakayinkeña aketala dindi ‘yakudya hampinji yatelela.’ * (Tañenu Matewu 24:45-47.) Iwu nduñu washinshika diyi njila yinakuzatishayi Yesu hakudyisha atumbanji twindi alala muyinu mpinji yakukuminina. Chalema nankashi kwiluka iwu nduñu washinshika. Hakwila nawu twikali akola kuspiritu nikwikala nawubwambu wawuwahi naNzambi chashindamena haniyi njila.—Mat. 4:4; Yow. 17:3.

3. Indi nyikanda yetu yashimwineña nawudi kutalisha hachishimu chanduñu washinshika?

³ Hanu dinu chishimu chaYesu chahoshaña hadi nduñu washinshika tunateli kuchitiyisha ñahi? Kumpinji yakunyima, nyikanda yetu yalumbulwileña muniyi njila yinalondeluhu nawu: HaPentekosta 33 C.E., Yesu wamwinkeli nduñu washinshika mudimu wakuhemba akwetala dindi. Nduñu wemenañaku akwaKristu awayishewa ejima hamaseki hamu neyi izanvu hampinji yimu kufuma hayina mpinji. Akwetala dindi hiyantu wowamu awayishewa hamuntu hamuntu. Mu 1919 Yesu wamwinkeli nduñu wamaana mudimu wakuhemba “yuma yindi yahetayi yejima,” yuma yindi yaWanta yejima yahamaseki. Hela chochu, hamuloña  wakudiza nikulombelahu nakutoñojokahu chikupu kunamwekeshi nawu twatela kuhimpa kutiyisha kwetu kwamazu aYesu ahoshaña hadi nduñu wamaana nikashinshi. (Yish. 4:18) Tushinshikenu hanichi chishimu kulonda twiluki chichinakundami kudetu, chili tukweti kuchiñeja kwakuya mwiwulu hela kwakushakama hamaseki.

ICHI CHISHIMU CHATELA KUSHIKIJEWA MPINJINYI?

4-6. Muloñadi chitunateli kukunkulwila netu chishimu chaYesu chahoshaña hadi nduñu chatachikili kushikijewa hohu hanyima ya 1914?

⁴ Nsañu yekala muchishimu chanduñu wamaana nikashinshi yamwekeshaña nawu hichatachikili kushikijewa haPentekosta 33 C.E., wanyi, ilaña munanu mafuku akukuminina. Tushinshikenu haNsona kulonda twiluki chinaleñeli tukunkululi mwenimu.

⁵ Chishimu chanduñu washinshika chekala hawuprofwetu waYesu wahoshaña ‘hachinjikijilu chakwinza kwindi nikukuma kwanyaka yamakonu.’ (Mat. 24:3) Chibalu chatachi chaniwu wuprofwetu, chasonekawu haMatewu 24:4-22, chikweti kushikijewa kuyedi—kwatachi, muyaaka yakutachika mu 33 C.E nakushika mu 70 C.E., nawa kwamuchiyedi, kunakushikijewa chikupu munanu mafuku etu. Komana ichi chatalisha mukwila nawu mazu aYesu ahosha hadi nduñu washinshika niwena akweti kushikijewa kuyedi? Inehi.

⁶ Kutachika namazu asonekawu haMatewu 24:29, Yesu wahosheli nankashi hayuma yinakumwekana makonu. (Tañenu Matewu 24:30, 42, 44.) Hakuhosha hayuma yikamwekana hampinji yalukadi lwasweja, wahosheli nindi antu “akamona Mwana kamuntu wudi nakwinza hamavu amwiwulu.” Kuhiñahu, mumazu atalishiliyi kudantu anakushakama mumafuku akukuminina, wayikolesheli kwikala asoñama nindi: “Himuneluki ifuku dakenzayi Mwanta wenuku” nawa, “Mpinji yimukubula kutoñojoka diyi yakenzayi Mwana kamuntu.” * Haniyi nsañu, hampinji yahosheleñayi hayuma yikamwekana mumafuku akukuminina, Yesu walumbulwili chishimu chanduñu washinshika. Dichi, tunateli kukunkulula netu mazwindi ahosha hadi nduñu washinshika atachikili kushikijewa hanyima yakwila mafuku akukuminina anatachiki dehi mu 1914. Kukunkulula muniyi njila kwalala. Muloñadi?

7. Lwihwinyi lwalema lwehwiluwu chatachikila chilaaka chakumuna, nawa muloñadi?

⁷ Toñojokenu hanilu lwihu lwakwila nawu: ‘Indi nduñu wamaana nikashinshi hinyi?’ Muyaaka nkulakaji yakusambila, hichateleleli kwihula lwihu lwamuchidiwuku. Neyi chitwadiza muchibaaba chinafumuhu, apostolu atwesheleña kukoña yihayamisha nikuhana yawana yayihayamisha yamwekesheleña nawu Nzambi wadiña nakuyikwasha. (Yil. 5:12) Dichi muloñadi muntu wudi wejima chatela kwihulayi nindi hinyi yenkeluwu mudimu wakulombola kudi Kristu? Hela chochu, mu 1914 yuma yambukiluku chikupu. Chilaaka chakumuna chatachikili munichi chaaka. Mpinji yashikili yakwambula matahu nitidiku. (Mat. 13:36-43) Chatachikili chilaaka chakumuna, lwihu lwalema lwadiña lwakwila nawu: Chineli akwaKristu akutwamba aditeneneña nawu hiyatumbanji twaKristu alala avulili, indi tidiku, akwaKristu awayishewa adi kuyiluka ñahi? Chishimu chahoshaña hadi nduñu washinshika chaakwili ilu lwihu. Atumbanji twaKristu awayishewa ateleleli kwikala antu adiishileñawu chiwahi kuspiritu.

INDI NDUÑU WAMAANA NIKASHINSHI HINYI?

8. Muloñadi chichatelela kwila nawu nduñu washinshika yatuñewi nawakwaKristu awayishewa?

⁸ Nduñu washinshika watela kutuñewa nawakwaKristu awayishewa adi hanu hamaseki. Ayitenaña nawu ‘hiyatupristu awanta’ nawa ayinka mudimu ‘wakutiyakesha kashinshi kakeni kayena wayitambikili nindi afumi mumwidima, eñili muchejeji chindi chakuhayama.’ (1 Pet. 2:9) Komana chidi chatelela awa ‘atupristu awanta’ kwikala namudimu wakudizisha akwawu akwakwitiya chalala.—Mal. 2:7; Chim. 12:17.

9. Komana akwaKristu awayishewa ejima diwu ekala nduñu washinshika? Lumbululenu.

 ⁹ Komana awayishewa ejima adi hamaseki diwu ekala nduñu washinshika? Inehi. Chikuma chacheni chidi chakwila nawu bayi neyi awayishewa ejima ekala namudimu wakuhana yakudya yakuspiritu kudi akwawu akwakwitiya mukaayi kejimaku. Hakachi katidiku hekala amana kwetu awayishewa azataña neyi ankoñi akwakuzatila hela aeluda muyipompelu yawu. Adizishaña kwitala nikwitala nimuchipompelu chawu, nawa alondelaña chikupu wunlomboli wafumaña kuchishina. Ilaña hiyazatañaku mudimu wakuhana yakudya yakuspiritu kudi amana kwetu mukaayi kejimaku. Cheñi hakachi kanawa awayishewa hekala ahela adizoza, abulaña kufwila mudimu wakwikala antañishi muchipompelu.—1 Kor. 11:3; 14:34.

10. Indi nduñu wamaana nikashinshi hinyi?

¹⁰ Hanu dinu, nduñu wamaana nikashinshi hinyi? Hakulondela njila yaYesu yakudiisha antu amavulu kuhitila mudi antu antesha, iwu nduñu watuñewa nezanvu dawamana kwetu awayishewa antesha azataña mudimu wakuloñesha nikuhana yakudya yakuspiritu hampinji yakwinza kwaKristu. Mumafuku akukuminina ejima, amana kwetu awayishewa ekala nduñu wakashinshi akalakelaña hamu hachishina. Iwu nduñu diyi Izanvu Dalombolaña dawaYinsahu jaYehova. Hela chochu, ilukenu nenu, izu dakwila nawu “nduñu” muchishimu chaYesu, dinakumwekesha nawu hinduñu wumu. Dichi, yuma yafuukulaña Izanvu Dalombolaña ayifuukwilaña hamu.

INDI AMWITALA HIYANYI?

11, 12. (a) Nyidimwinyi yiyedi yamwinkeluwu nduñu wamaana nikashinshi? (b) Mpinjinyi Yesu yamwinkeliyi nduñu washinshika mudimu wakutala akwetala dindi, nawa anyi atondeliyi?

¹¹ Dichi twatela kwiluka netu muchishimu chaYesu, nduñu wamaana nikashinshi akamwinka nyidimu yiyedi yashiyashana. Mudimu watachi wakuhemba akwetala dindi; wamuchiyedi wakuhemba yuma yamwanta yahetayi yejima. Chineli ichi chishimu chinakushikijewa hohu munanu mafuku akukuminina, iwu nduñu adi kumwinka iyi nyidimu yejima yiyedi hanyima yakwila kwinza kwaYesu muñovu jawanta kunatachiki dehi mu 1914.

¹² Mpinjinyi Yesu yamwinkeliyi nduñu washinshika mudimu wakuhemba akwetala dindi? Hakwila twakuli, twatela tushinshiki hayuma yamwekeni mu 1914, mpinji yatachikili chilaaka chakumuna. Kwesekeja nachitwadizili, hayina mpinji mazanvu amavulu aditeneneña  nawu adiña akwaKristu. Hanu dinu mwizanvu dimu didihi mwadi kutondayi Yesu nduñu washinshika nakumwinka mudimu? Ilu lwihu alwakwili hanyima yakwila Yesu niTata yindi enzi nakuhempula tembeli, hela ntanjikilu yakuspiritu yakudifukwilamu, kutachika mu 1914 nakushika kukutachika kwa 1919. * (Mal. 3:1) Atiyili kuwaha nezanvu danyanya dawaTudizi aBayibolu ashinshika amwekesheli nawu ashili nyichima hadi Yehova niIzu dindi. Hela chochu, akeñekeleña kuyitookesha, nawa mukudizoza etejeli hampinji yantesha yakweseka nikuzakasa. (Mal. 3:2-4) Awa Atudizi aBayibolu ashinshika adiña akwaKristu alala adi neyi tidiku. Mu 1919, mpinji yakusañumuna iyena dakushimwina, Yesu watondeli amana kwetu atelela hakachi kawu nakwikala nduñu wamaana nikashinshi nikumwinka mudimu wakuhemba akwetala dindi.

13. Anyi adibombela mudi akwetala, nawa muloñadi?

¹³ Indi akwetala hiyanyi? Twili netu, hiyantu adiishañawu. Kukutachika kwamafuku akukuminina, akwetala adiña awayishewa ejima. Chimwahitili mpinji, mudi awa akwetala mwadibombeleli nizaza deneni dawanyikoku acheñi. Chayinu mpinji anyikoku acheñi diwu ekala “mukanka wumu” weneni wunakulombolawu kudi Kristu. (Yow. 10:16) Mazanvu ejima ayedi ahetelañamu muyakudya yakuspiritu yahampinji yatelela yahanañayi nduñu washinshika. Indi amamembala aMwizanvu Dalombolaña ekala nduñu wamaana nikashinshi makonu? Awa mana kwetu akeñekaña kudiishewa kuspiritu. Dichi, mukudizoza eluka nawu hamuntu hamuntu hiyakwetala neyi chochekalawu atumbanji twaYesu alala ejima.

14. (a) Mudimwinyi wamwinkawu nduñu washinshika, nawa mwabombeladi? (b) Indi Yesu wamusoñamishili nindidi nduñu wamaana nikashinshi? (Talenu chikasha chinakwila nawu “Neyi Kudi Nduñu Watama . . .”)

¹⁴ Yesu wamwinkeli nduñu wamaana nikashinshi mudimu walema. Kushankulu, nduñu wakuhweleleluwu, hela kalama, wadiña mukwakutala itala. (Luka 12:42) Dichi nduñu wamaana nikashinshi amwinka mudimu wakutala akwetala dakwitiya. Iwu mudimu wabombelamu kutala yuma yahetayi, mudimu wakushimwina, maprogiramu akupompa kwanyanya nikwamaneni, nimudimu wakusoneka nyikanda yashindamena haBayibolu yakuzatisha mumudimu wamwiha nihakudiza kwahalwetu nikwachipompelu. Akwetala ashindamena hayakudya yakuspiritu yaloñeshañayi nduñu.

 MPINJINYI YAKAMWINKAWU MUDIMU WAKUHEMBA YUMA YAMWANTA WINDI YAHETAYI YEJIMA?

15, 16. Mpinjinyi Yesu yakamwinkayi nduñu washinshika mudimu wakuhemba yuma yindi yahetayi yejima?

¹⁵ Mpinjinyi Yesu yakamwinkayi mudimu wamuchiyedi wakutala, “yuma yindi yahetayi yejima”? Yesu wahosheli nindi: “Owu nduñu akawanawu nakwila mwenomu hakenzayi mwanta windi, diyi wakakooleka. Nukuyileja chalala nami wakamwinka mudimu wakuhemba yuma yindi yahetayi yejima.” (Mat. 24:46, 47) Ilukenu nenu Yesu wakamwinka mudimu wamuchiyedi neyi nenzi dehi nawa namuwani iwu nduñu ‘nakwila mwenimu,’ dikwila nawu, nakuhana yakudya yakuspiritu nakashinshi. Dichi chamwinkayi mudimu watachi hakahita mpinji hakwila yakamwinka mudimu wamuchiyedi. Hakwila twiluki mpinji nichakamwinkayi Yesu nduñu mudimu wakuhemba yuma yindi yahetayi yejima, twatela kwiluka yuma yiyedi: mpinji yakenzayi niyuma yabombela muyuma yahetayi.

¹⁶ Mpinjinyi yakenzayi Yesu? Ñakwilu yawanikaña mumavasi akutachikilahu amukanda waMatewu kapetulu 24. Anukenu nenu neyi mavasi anafumuhu ahosha hadi Yesu nawu “nakwinza,” idi izu datalishaña kumpinji yakenzayi nakushimuna nikusompesha hakukuma kwakanu kaayi. * (Mat. 24:30, 42, 44) Dichi, ‘kwinza’ kwaYesu kwatenawu muchishimu chanduñu washinshika kukamwekana hampinji yalukadi lwasweja.

17. Indi yuma yahetayi Yesu yabombelamu yumanyi?

¹⁷ Indi “yuma [yaYesu] yahetayi yejima” yabombelamu yumanyi? Yesu hazatishili izu dakwila nawu “yejima,” munjila yakwila ditalishi hohu kuyuma yindi yahamasekuku. Mwamweni, Yesu wukweti ñovu yabadika mwiwulu. Wahosheli nindi: “Ñovu jamwiwulu nijahamaseki jejima anajinyinki.” (Mat. 28:18; Efwes. 1:20-23) Makonu yuma yindi  yahetayi yabombelamu Wanta wawuMesiya, wekala mumakasindi kufuma tuhu mu 1914 nawa wakayuulilayi hamu nawatumbanji twindi awayishewa.—Chim. 11:15.

18. Muloñadi Yesu chakatiyilayi kuwaha kumwinka nduñu washinshika mudimu wakuhemba yuma yindi yahetayi yejima?

¹⁸ Kwesekeja naniyi nsañu, tunateli kukunkulula netudi? Chakenzayi Yesu hampinji yalukadi lwasweja, wakawana nindi nduñu washinshika watwalekeluhu nakuhana yakudya yakuspiritu hampinji yatelela kudi akwetala. Kuhiñahu Yesu wakazañalala kumwinka mudimu wamuchiyedi, wakuhemba yuma yindi yahetayi yejima. Antu ekala nduñu washinshika akatambwila iwu mudimu neyi anatambwili dehi wuloku wawu wamwiwulu, nakutachika kuyuulila hamu naYesu.

19. Komana nduñu washinshika wakatambwila wuloku weneni mwiwulu kubadika awayishewa ejima? Lumbululenu.

 ¹⁹ Komana nduñu washinshika wakatambwila wuloku weneni mwiwulu kubadika awayishewa ejima? Inehi. Izanvu danyanya anateli kudikana wuloku hampinji yimu ilaña chimwahita mpinji amakwawu niwena anateli kuhetelamu muwuloku wowumu. Chakutalilahu, shinshikenu chahosheliyi Yesu kudi apostolu indi ashinshika 11 hawufuku wakwila kanda yafwi. (Tañenu Luka 22:28-30.) Yesu wakanini idi izanvu danyanya dawamayala nindi wuloku wawuwahi wunakuyitalila hamuloña wakashinshi kawu. Akekala anyanta hamu nayena mwiwulu. Ilaña chimwahitili yaaka, wahosheli nindi a 144,000 ejima akashakama hamatanda nakuyuulila hamu nindi. (Chim. 1:1; 3:21) Chochimu, kwesekeja nachahoshawu haMatewu 24:47, wakanini nindi izanvu danyanya dawamayala, amana kwetu awayishewa ekala nduñu washinshika, akayinka mudimu wakuhemba yuma yindi yahetayi yejima. Mwalala, a 144,000 ejima akekala nañovu yakuhemba maheta aKristu.—Chim. 20:4, 6.

20. Muloñadi Yesu chatondeleliyi nduñu washinshika, nawa chumanyi chimunafuukuluhu?

²⁰ Kuhitila mudi nduñu wamaana nikashinshi, Yesu nakulondela njila yoyimu yazatishiliyi muyaaka nkulakaji yakusambila, yakudiisha antu amavulu kuhitila mudi antu antesha. Yesu wamutondeli iwu nduñu washinshika kulonda atumbanji twindi alala, awayishewa hela anyikoku acheñi, atambwileña yakudya yakuspiritu hampinji yatelela mumafuku akukuminina ejima. Tufuukulenuhu kulonda tumwekesheña kuhameka kuhitila mukulondela nakashinshi munakutulejawu amana kwetu awayishewa ekala nduñu wamaana nikashinshi.—Heb. 13:7, 17.

MAZU ADI KUNSA: (Yitañenu neyi tumazu twaheshina kwesekeja namaparakalafu anatenuwu.)

[Tumazu twaheshina]

[Malwihu aKuzatisha haKudiza]

[Chikasha chidi hefu 22]

Komana Mwatiyisha Chikuma?

‘Nduñu wamaana nikashinshi’: Kadizanvu kanyanya kawamana kwetu awayishewa aloñeshaña nikuhana yakudya yakuspiritu mumpinji yakwinza kwaYesu. Makonu, awa amana kwetu awayishewa diwu ekala Izanvu Dalombolaña

“Akwetala dindi”: Awa hiyantu adiishañawu, chili awayishewa hela anyikoku acheñi

‘Amwinkeli mudimu wakuhemba akwetala dindi’: Mu 1919, Yesu watondeli amana kwetu awayishewa ashikahu kwikala nduñu windi wamaana nikashinshi

“Wakamwinka mudimu wakuhemba yuma yindi yahetayi yejima”: Antu atuña nduñu akatambwila iwu mudimu hampinji yikatambwilawu wuloku wawu wamwiwulu. Wena niakwawu ekala hakachi kawa 144,000, akekala nañovu yakuhemba amaheta aKristu ejima

[Mwevulu wudi hefu 22, 23]

Chili tukweti kuchiñeja kwakuya mwiwulu chili kushakama hanu hamaseki, wejima wetu tudi akwetala nawa twakeñaña yakudya yoyimu yahampinji yatelela

[Chikasha chidi hefu 24]

“Neyi Kudi Nduñu Watama . . .”

Yesu wamwinkeli nduñu wamaana nikashinshi mudimu walema nankashi wakulombola akwetala nikuyinka yakudya yakuspiritu hampinji yatelela. Yesu welukili nindi antu akweti mudimu weneni akalumbulwila heneni. (Luka 12:48) Dichi, wakunkulwili chishimu chindi kutalisha hadi nduñu wamaana nikashinshi nakusoñamisha kweneni.

Yesu wasoñamishili nduñu watama welileña mumuchima windi nindi nkaka yindi nakulaba nawa watachikili kweta akwawu anduñu. Yesu wahosheli nindi, nkaka yindi chakenzayi wakamubabesha ona nduñu watama “wakamuvupola chacheni.”—Tañenu Matewu 24:48-51.

Komana Yesu washimwineñahu dehi nindi kwakekala izanvu danduñu watama kumafuku akukuminina? Inehi. Mwamweni, antu amakwawu amwekeshaña spiritu yoyimu nayamwekesheli ona nduñu watama watenenuwu kudi Yesu. Tunateli kuyitena netu akwakusekesha, chili adiña awayishewa hela adiña ‘amwizaza deneni.’ (Chim. 7:9) Ilaña antu amuchidiwu hiyatuña izanvu danduñu watamaku. Yesu hahosheli nindi wakatonda izanvu danduñu watamaku. Awa mazu ahosheliyi adiña akusoñamisha nduñu wamaana nikashinshi.

Ilukenu nenu Yesu watachikili iku kusoñamisha namazu akwila nawu “neyi kudi.” Awa mazu amwekeshaña nawu chuma chikwawu chateneniyi Yesu hichadi kumwekanaku. Chidi neyi Yesu wahosheleña nindi: ‘Neyi nduñu wamaana nikashinshi wahembeleña akwawu anduñu chatama muniji njila, nkaka yindi wakamuvupola chacheni.’ (Talenu cheñi Luka 12:45.) Ilaña, nduñu wamaana nikashinshi watwalekahu kwikala watona nikuhana yakudya yayiwahi yakuspiritu.

Amana kwetu awayishewa akalakelaña hamu neyi nduñu washinshika eluka nawu akalumbulula kudi Nkaka yawu kutalisha hachiyahembañawu akwetala dindi. Amana kwetu awayishewa akweti muchima wakufwila kuzata mudimu wawu nakashinshi kulonda Nkaka yawu chakenzayi yakayili nindi ‘muzataña mwani.’

[Mwevulu wudi hefu 25]

A 144,000 ejima akekala nañovu yakuhemba maheta aYesu

(Talenu  parakalafu 19)