‘Tuleji, Mpinjinyi Hamba Kela Yumiyi?’

‘Chinjikijilwinyi chakwiluka nachu hiwamba kenzeyi, nihamba kakuma nyaka yamakonu?’—MAT. 24:3.

MUKWAKULA NENUDI?

Kudifwananyi kudi hakachi kakushikijewa kwawuprofwetu waYesu wuyedi wahosha halukadi lwasweja?

Indi chishimu chawanyikoku nawampembi chatuleñelaña tumoneña ñahi mudimu wakushimwina?

MuMatewu tupetulu 24 ni 25, Yesu watalishili kumpinjinyi hahosheliyi hakwinza kwindi?

1. Kufwana apostolu, yumanyi yitunakukeñesha kwiluka?

 MPINJI yashikili yakwila Yesu yamanishi mudimu windi wakushimwina hanu hamaseki nawa atumbanji twindi akeñeleña nankashi kwiluka yuma yikayimwekena kumbidi. Dichi chikwashalili mafuku antesha henohu kanda yafwi, apostolu indi awana amwihwili nawu: ‘Mpinjinyi hamba kela yumiyi nichinjikijilu chakwiluka nachu hiwamba kenzeyi, nihamba kakuma nyaka yamakonu?’ (Mat. 24:3; Maku 13:3) Yesu wayakwili kuhitila mukuyileja wuprofwetu walema chikupu, wasonekawu muMatewu tupetulu 24 ni 25. Muniwu wuprofwetu, Yesu washimwineñahu dehi yuma yayivulu yalema yamba kamwekana. Mazu ahosheliyi alema nankashi kudetu muloña anetu nawa tunakufwila chikupu kwiluka yuma yikamwekana kumbidi.

2. (a) Hayaaka yinahituhu, yumanyi yitwatiyishili chikupu? (b) Malwihwinyi asatu itukuhanjekahu?

² Hayaaka yinahituhu, amana kwetu awayishewa alombolaña alombaña nakudiza hawuprofwetu waYesu wahoshaña hamafuku akukuminina. Afwilaña kutiyisha chikupu mpinji hamba kashikijewa mazu aYesu. Hakwila tulumbululi chuma chinatukwashi kutiyisha chikupu mazu aYesu, tushinshikenu hamalwihu asatu anakuhosha ‘hampinji.’ Mpinjinyi hamba katachika “lukadi lwasweja”? Mpinjinyi Yesu hamba kasompeshayi anyikoku nawampembi? Mpinjinyi hamba ‘kenzayi’ Yesu?—Mat. 24:21; 25:31-33.

MPINJINYI HAMBA KATACHIKA LUKADI LWASWEJA?

3. Kuyaaka yakunyima, yumanyi yitwelukili kutalisha hampinji yalukadi lwasweja?

³ Hadi yaaka yayivulu yinahituhu, twatoñojokeleña netu lukadi lwasweja lwatachikili mu 1914 havulumukili Njita Yakaayi Yatachi nawa twelukili netu Yehova ‘waketwishili’ njita mu 1918 kulonda ashalahu ekali nampinji yakushimwina nsañu yayiwahi kunyunza yejima. (Mat. 24:21, 22) Hanyima yakumanisha mudimu wakushimwina, wanta waSatana akawujilumuna. Dichi, twatoñojokeleña netu lukadi lwasweja lwekala muyibalu yisatu: lwatachikili mu (1914-1918), aluketwishili (mu 1918  nakutwalekahu), nawa lukamana haAmagedoni.

4. Yumanyi yaleñeleli tutiyishi chikupu wuprofwetu waYesu wahoshaña hamafuku akukuminina?

⁴ Hela chochu, kuhitila mukushinshika cheñi chikupu hawuprofwetu waYesu, twelukili netu chibalu chawuprofwetu waYesu wahoshaña hamafuku akukuminina wukweti kushikijewa kuyedi. (Mat. 24:4-22) Kushikijewa kwatachi kwadiña muYudeya muyaaka nkulakaji yakusambila C.E., nawa kukekala kushikijewa kwamukaayi kejima munanu mafuku etu. Dichi twatela kutiyisha iwu wuprofwetu munjila yayiha. *

5. (a) Mpinjinyi yakala yatachikili mu 1914? (b) Yina mpinji yayihuñu yesekana nampinjinyi yamuyaaka nkulakaji yakusambila C.E.?

⁵ Twelukili cheñi netu chibalu chatachi chalukadi lwasweja chatachikili mu 1914 wanyi. Muloñadi? Muloña wuprofwetu wamuBayibolu wamwekeshaña nawu lukadi lwasweja hilwamba katachika nanjita yanyuzaku, ilaña lukatachika hampinji yikalukukawu nsakililu yakutwamba. Dichi, yuma yatachikili kumwekana mu 1914 hiyadiña kutachika kwalukadi lwaswejaku, ilaña yadiña ‘hikutachika kwayihuñu.’ (Mat. 24:8) Iyi “yihuñu” yesekana nayuma yamwekeni muYerusalema nimuYudeya kutachika mu 33 C.E. nakushika mu 66 C.E.

6. Chumanyi chikamwekesha nawu lukadi lwasweja hilukutachika?

 ⁶ Chumanyi chikamwekesha nawu lukadi lwasweja hilukutachika? Yesu washimwineñahu dehi nindi: “Chimwakamona chishimashima chakaletesha mahembi, chanatenuwu kudi kaprofwetu Danyeli, chinemani dehi mwajila; muntu wukutaña ashinshiki; henohu antu akekala muYudeya akatemukili kumapidi.” (Mat. 24:15, 16) Mukushikijewa kwatachi, ‘kwimana mwajila’ kwamwekeni mu 66 C.E. hampinji yelili amashidika awaRoma (“chishimashima”) alukuki Yerusalema nitembeli (iluña damweneñawu aYudeya nawu dajila). Mukushikijewa kweneni, ‘kwimana’ kwakamwekana hampinji United Nations (“chishimashima” chamakonu) hichakalukuka Kristendomu (wamonañawu  nawu wajila kudi antu aditenaña nawu hiyakwaKristu) niBabiloni Muneni wejima. Kulukuka kwokumu akwilumbulula cheñi haChimwekeshu 17:16-18. Chikamwekana chumichi dihakatachika lukadi lwasweja.

7. (a) Indi ‘wumi awuhandishili’ ñahi muyaaka nkulakaji yakusambila? (b) Chumanyi chitunateli kukuhwelela netu chikamwekana kumbidi?

 ⁷ Yesu cheñi washimwineñahu dehi nindi: ‘Mafuku owu akayikehesha.’ Mukushikijewa kwatachi, chumichi chamwekeni mu 66 C.E hampinji amashidika awaRoma ‘hayiketwishiluwu’ kulukuka kwawu. Kuhiñahu, akwaKristu awayishewa muYerusalema nimuYudeya atemukili, hakwila ‘ahandishi mujimba wawu hela wumi wawu.’ (Tañenu Matewu 24:22; Mal. 3:17) Dichi, yumanyi yitunateli kukuhwelela netu yikamwekana hakwinza kwalukadi lwasweja? Yehova ‘wakaketwisha’ kulukuka kwaUnited Nations hansakililu yakutwamba, haketeja nsakililu yalala akayijilumwini hamu nansakililu yakutwambaku. Ichi chikaleñela antu jaNzambi akayihandishi.

8. (a) Yumanyi yikamwekana hanyima yakwila chibalu chatachika chalukadi lwasweja chinahiti dehi? (b) Indi membala wukekala wakukumisha hakachika kawa 144,000 wakatambwila wuloku windi wamwiwulu hampinjinyi? (Talenu mazu adi kunsa.)

  ⁸ Chumanyi chikamwekana hanyima yakwila chibalu chatachi chalukadi lwasweja chinahiti dehi? Mazu ahosheliyi Yesu amwekeshaña nawu kwakekala mpinji yikatwalekahu kushika nihakatachika Amagedoni. Yumanyi yikamwekana muniyi mpinji? Ñakwilu yawanikaña hamazu asonekawu haEzekeli 38:14-16 niMatewu 24:29-31. (Tañenu.) * Hanyima yachumichi, twakadimwena namesu kapu njita yaAmagedoni, mpinji yakasweja chikupu lukadi lwasweja, yadifwana nakujilumuka kwaYerusalema mu 70 C.E. (Mal. 4:1) Chineli hanjita yaAmagedoni dihakaswejelaku lukadi lwasweja, ilu lukadi lwasweja lwakekala lwadimena chikupu, “lwakwila kufumisha kutachi yamatuña kushika nikulelu, kanda alumonañahu dehi.” (Mat. 24:21) Chikahita Amagedoni, Chiyuulu chaKristu Chayaaka Ikombakaji chikatachika.

9. Indi wuprofwetu waYesu wahoshaña halukadi lwasweja wakwashaña ñahi antu jaYehova?

 ⁹ Iwu wuprofwetu wahoshaña halukadi lwasweja watukoleshaña. Muloñadi? Muloña wakwila nawu hela chakwila akahita mumakabi, antu jaYehova, ejima hamu, akafuma mulukadi lwasweja. (Chim. 7:9, 14) Sweje-e dinu, twazañalalaña chikupu muloña haAmagedoni, Yehova wakayiñisha wanta windi nikujilika ijina dindi dajila.—Mas. 83:18; Ezek. 38:23.

MPINJINYI YESU HAMBA KASOMPESHAYI ANYIKOKU NIAMPEMBI?

10. Kunyaka, yumanyi yitwelukili kutalisha hampinji yakusompesha anyikoku nawampembi?

¹⁰ Shinshikenu cheñi hampinji yachibalu chikwawu chawuprofwetu waYesu—chishimu chahoshaña hakusompesha anyikoku niampembi. (Mat. 25:31-46) Kumafuku akunyima, twatoñojokeleña netu kusompesha antu neyi anyikoku hela ampembi kwatachikili mu 1914 ndo-o nikukukuma kwamafuku akukuminina. Twakunkulwileña netu antu akaanini nsañu yaWanta nawa afwili henohu lukadi lwasweja kanda lutachiki afwili neyi ampembi, dikwila nawu hiyadiña nakuchiñeja kwakusañukaku.

11. Muloñadi kusompesha antu neyi anyikoku hela ampembi chikwabulili kutachika mu 1914?

¹¹ Mu 1995, Kaposhi Kakutalila kalumbulwili cheñi nsona yaMatewu 25:31, yahosha nawu: “Chakenzayi Mwana kamuntu nalubanji lwakulema kwindi, hamu nawañelu jindi ejima, wakashakama hetanda dawanta dakulema kwindi.” Twelukili netu Yesu wekalili Mwanta waWanta waNzambi mu 1914, ilaña ‘hashakamini hetanda dawanta dakulema kwindi’ neyi Nsompeshi ‘wanyuza yejimaku.’ (Mat. 25:32; esekejenu Danyeli 7:13.) Hela chochu, chishimu chawanyikoku niampembi chamulumbulula chikupu Yesu neyi Nsompeshi. (Tañenu Matewu 25:31-34, 41, 46.) Chineli Yesu wadiña kanda yatachiki kukalakala neyi Nsompeshi wanyunza yejima mu 1914, dikwila nawu hatachikili kusompesha antu neyi anyikoku hela ampembi munichi chaakaku. * Hanu dinu, Yesu wakatachika kusompesha mpinjinyi?

12. (a) Mpinjinyi Yesu yakekalayi Nsompeshi wanyunza yejima katachi? (b) Yumanyi yikamwekana yalumbululawu haMatewu 24: 30, 31 niMatewu 25:31-33, 46?

  ¹² Wuprofwetu waYesu wahoshaña hamafuku akukuminina wamwekeshaña nawu wakekala Nsompeshi wanyunza yejima katachi hanyima yakwila nsakililu yakutwamba anayijilumuni dehi. Neyi chinalumbululiwu  muparakalafu 8, yuma yikwawu yikamwekana hayina mpinji ayisoneka haMatewu 24:30, 31. Chimwashinshika hanawa mavasi, mukwiluka nenu Yesu washimwineñahu dehi yuma yikamwekana yadifwana nayuma yateneniyi muchishimu chawanyikoku nawampembi. Chakutalilahu: Mwana kamuntu wakenza mulubanji lwakulema niañelu jindi; akapompesha nyichidi ninyunza yejima; akasompeshawu neyi anyikoku “akabandula nyitu [yawu] kwiwulu” muloña ‘wumi wahaya nyaka’ wunakuyitalila. * Antu akasompeshawu neyi ampembi “akatumpa,” chikelukawu nawu “akaya kwawu mukubabesha kwahaya nyaka.”—Mat. 25:31-33, 46.

13. (a) Mpinjinyi yakasompeshayi Yesu antu neyi anyikoku hela ampembi? (b) Indi kwiluka mwenimu kwatuleñelaña tumoneña ñahi mudimu wetu wakushimwina?

 ¹³ Dichi, tunateli kukunkulula netudi? Yesu wukasompesha antu amunyunza yejima neyi anyikoku hela ampembi chakenzayi hampinji yalukadi lwasweja. Dichi, haAmagedoni, hakasweja lukadi lwasweja, antu adi neyi ampembi ‘akayibabesha’ haya nyaka. Indi kwiluka mwenimu kwatukwashaña ñahi chitwamonaña mudimu wetu wakushimwina? Kwatukwashaña kwiluka netu mudimu wetu wakushimwina walema nankashi. Kushika nimpinji yikatachika lukadi lwasweja, antu achidi nampinji yakuhimpa yitoñojoka yawu nikutachika kwenda munjila yanyanya “yaya kuwumi.” (Mat. 7:13, 14) Mwamweni, antu anateli kumwekesha yililu  yidi neyi yawanyikoku hela yawampembi. Ilaña, twatela twanukeña netu kusompesha kwakukumishaku kwakwambula anyikoku nawampembi kukekalaku hampinji yalukadi lwasweja. Dichi, twatela kutwalekahu kushimwina kudi antu amavulu kulonda atiyi nawa atambwili nsañu yaWanta.

MPINJINYI HAMBA KENZAYI YESU?

14, 15. Nyikukwinyi yamazu yiwana yamunsona yahosha hakwinza kwaYesu kwakumbidi neyi Nsompeshi?

¹⁴ Komana kushinshika cheñi hawuprofwetu waYesu kunakumwekesha cheñi nawu twatela kuhimpa kutiyisha kwetu kwampinji yikamwekana yuma yikwawu yalema? Wuprofwetu waweni wukwakula ilu lwihu. Tushinshikenu chakwakulawu ilu lwihu.

¹⁵ Muchibalu chawuprofwetu windi wasonekawu haMatewu 24:29–25:46, Yesu wahosheli chikupu hayuma yikamwekana munanu mafuku akukuminina nihampinji yalukadi lwasweja lunakwinza. Muniwu wuprofwetu, Yesu wateneni ‘hakwinza’ kwindi mapampa katanu nakasatu. Kutalisha halukadi lwasweja, wahosheli nindi: “Akamona Mwana kamuntu wudi nakwinza hamavu amwiwulu.” “Himuneluki ifuku dakenzayi Mwanta wenuku.” “Mpinji yimukubula kutoñojoka diyi yakenzayi Mwana kamuntu.” Nawa muchishimu chindi chawanyikoku nawampembi, Yesu wahosheli nindi: ‘Mwana kamuntu wakenza mulubanji lwakulema kwindi. (Mat. 24:30, 42, 44; 25:31) Iyi nyikuku yamazu yiwana yejima yahosha hakwinza kwaKristu kwakumbidi neyi Nsompeshi. Muwuprofwetu waYesu, hadihi hitwawanaña nyikuku yamazu yiwana yinashaluku?

16. Kwinza kwaYesu akwishimuna munsonanyi jikwawu?

¹⁶ Kutalisha hadi nduñu wamaana nikashinshi, Yesu wahosheli nindi: “Owu nduñu akawanawu nakwila mwenomu hakenzayi mwanta windi, diyi wakakooleka.” Muchishimu chawambanda ajiki, Yesu wahosheli nindi: “Hayilañawu nakulanda, nsumbuli enza nikwinza.” Muchishimu chantalenta, Yesu walumbulwili nindi: “Chihanalehi nankashi, nkaka yanowu anduñu hakwinza.” Muchishimu chochimu, nkanka yawu wahosheli nindi: “Ichi chinenzi nitambuli yami.” (Mat. 24:46; 25:10, 19, 27) Iku kwinza kwaYesu kuwana kwatalisha kumpinjinyi?

17. Yumanyi yitwashimwini kutalisha hakwinza kwatenawu haMatewu 24:46?

 ¹⁷ Kunyima, twashimwini munyikanda yetu netu iyi nyikuku yamazu yiwana yakukumishaku yahosha hakwinza kwaYesu mu 1918. Chakutalilahu, toñojokenu hamazu aYesu ahosheliyi hadi ‘nduñu wamaana nikashinshi.’ (Tañenu Matewu 24:45-47.) Twelukili netu ‘kwinza’ kwatenawu muvasi 46 kwatalishili kumpinji yitwatoñojokeleña netu Yesu wenjili nakuhempula awayishewa chadiña nakuhandawu kuspiritu mu 1918 nawa twelukili netu nduñu amwinkeli mudimu wakuhemba yuma yahetayi Mwanta windi yejima mu 1919. (Mal. 3:1) Hela chochu, kushinshika cheñi hawuprofwetu waYesu kunakumwekesha nawu twatela kuhimpa kutiyisha kwetu kwampinji yayuma yikwawu muwuprofwetu waYesu. Muloñadi?

18. Kushinshika hawuprofwetu waYesu wejima kunatuleñeli tukunkululi netudi kutalisha hakwinza kwaYesu?

 ¹⁸ Mumavasi akuya nakushika kuMatewu 24:46, izu dakwila nawu ‘kwinza’ datalisha kumpinji yakenzayi Yesu nakushimuna nikusompesha hampinji yalukadi lwasweja. (Mat. 24:30, 42, 44) Cheñi nawa, kwesekeja nachitwahanjeka  muparakalafu 12, kwinza kwaYesu kwatenawu haMatewu 25:31 kwatalisha kumpinji yoyimu yakumbidi yakusompesha. Dichi tunateli kukunkulula netu kwinza kwaYesu nakwinka nduñu washinshika mudimu wakuhemba yuma yindi yahetayi yejima, kwatenawu haMatewu 24:46, 47, nikwena kwatalisha kumpinji yakumbidi yakenzayi, hampinji yalukadi lwasweja. Eñañi, kushinshika hawuprofwetu waYesu wejima kwamwekeshaña hatooka nawu iyi nyikuku yamazu yitanu nayisatu yahosha hakwinza kwindi yatalisha kumpinji yakumbidi yakusompesha hampinji yalukadi lwasweja.

19. Kutiyishanyi kwakuha kutunahanjekuhu, nawa malwihwinyi akakulawu muyibaaba yinalondeluhu?

¹⁹ Hakuhituluka muyuma yitunahanjekuhu, yumanyi yitunadizi? Kukutachika kwachinu chibaaba, twehula malwihu asatu anakuhosha ‘hampinji.’ Twasambila kudiza netu lukadi lwasweja lwatachikili mu 1914 wanyi, ilaña lukatachika neyi United Nations namulukuki dehi Babiloni Muneni. Kuhiñahu, twashinshika hachaleñeleli Yesu yabuli kutachika kusompesha anyikoku nawampembi mu 1914 ilaña kukekalaku hampinji yalukadi lwasweja. Nkumininaku, twashinshika muloña Yesu chabuliliyi kumwinka nduñu washinshika mudimu wakuhemba yuma yindi yahetayi hampinji yenjiliyi mu 1919 ilaña wukamwinka iwu mudimu hampinji yalukadi lwasweja. Dichi, malwihu ejima asatu anakuhosha ‘hampinji’ atalisha kumpinji yoyimu yakumbidi, yalukadi lwasweja. Indi iku kutiyisha kwakuha kwatela kutukwasha tumoneña ñahi chishimu chanduñu washinshika? Cheñi, kunateli kutukwasha ñahi kutiyisha yishimu yikwawu, hela yakutalilahu, yaYesu yinakushikijewa muyinu mpinji yakukuminina? Awa malwihu alema akayakula muyibaaba yinalondeluhu.

MAZU ADI KUNSA: (Yitañenu neyi tumazu twaheshina kwesekeja namaparakalafu anatenuwu.)

[Tumazu twaheshina]

[Malwihu aKuzatisha haKudiza]

[Chati yidi hefu 4, 5]

MPINJI YALUKADI LWASWEJA NIKUMBIDI

KUSHIKIJEWA KWAMAKONU

MAFUKU AKUKUMININA

YUMA YAMWEKENI MUYAAKA NKULAKAJI YAKUSAMBILA YESEKANA NAYUMA YASHIMWINUWU DEHI

United Nations (“chishimashima”) wakalukuka Kristendomu (“mwajila”) ninsakililu yakutwamba yejima (Chim. 17:16-18)

KUJILUMUKA KWANSAKILILU YAKUTWAMBA

Amashidika awaRoma (“chishimashima”) alukukili Yerusalema nitembeli yayu (“mwajila”)

“Chishimashima . . . chinemani dehi mwajila” (Mat. 24:15, 16)

(Talenu  parakalafu 6)

Yehova ‘wakaketwisha’ kulukuka kwansakililu yakutwamba;

Antu jaNzambi akayipulwisha

Amashidika awaRoma aketwishili kulukuka kwawu; akwaKristu muYerusalema nimuYudeya atemukili

“Ilaña mafuku owu akayikeheshela hanyijimba yawatondewa” (Mat. 24:22)

(Talenu  parakalafu 7)

KWAKADI KWILUKA KULEHA KWAMPINJI

Yesu wakasompesha antu amunyunza yejima neyi anyikoku hela ampembi (Mat. 25:31-46)

(Talenu  maparakalafu 12, 13)

MPINJI YIKAHITAHU

“Mafuku akalondashana mulukadi olu . . .” (Mat. 24:29-31)

(Talenu  parakalafu 8)

Yesu wakamwinka nduñu washinshika mudimu wakuhemba “yuma yindi yahetayi yejima” (Mat. 24:46, 47)

(Talenu  parakalafu 18)

Kujilumuka kwanyunza (Chim. 16:16)

AMAGEDONI

Kujilumuka kwaYerusalema

KUYUULA KWAKRISTU KWAYAAKA IKOMBAKAJI KUKATACHIKA

[Mwevulu wudi hefu 7]

Kushika nimpinji yikatachika lukadi lwasweja, antu achidi nampinji yakuhimpa yitoñojoka yawu

(Talenu  parakalafu 13)