NSAÑU YACHIHANDILU

Twafwilileña Kumukalakela Yehova Kwiluña Didi Dejima

Ashimwini Markus niJanny Hartlief

Kanda nishimwineñahu dehi nkawamuku. Nadiña nawoma chakwila neyi inakushimwina nyendu yami yazalileña. Sweje-e dinu, mwiluña munadiña nakushimwina antu hiyatambwilileña nsañuku. Antu amakwawu ahilileña nankashi nawa akeñeleña kuñeta. Mukakweji katachi kamudimu wami wawupayiniya, nahanini hohu kamukanda kamu.—Markus.

YUMIYI yamwekeni mu 1949, hanahiti dehi yaaka yakubadika 60, ilaña nsañu yami yinatachikili kuyaaka yakunyima henohu chaaka cha 1949 kanda chishiki. Atata aHendrik, adiña akwakutuña nsapatu nawa adimineña matempa muDonderen, mukala wanyanya wakukabeta kaluwunda kaDrenthe, muNetherlands. Navwalikilili mwiluña denidi mu 1927 nawa yami wamuchiwana hakachi kawanyana atanu nayedi. Itala detu dadiña kukamwihi namukwakwa wamajilu munkambi yanidi ituña. Antuñi netu amavulu adiña andimi nawa nadiluñishileña nachihandilu chawundimi. Mu 1947, hinadiña nayaaka yakusemuka 19, natachikili kudiza chalala nantuñi netu wumu wejina daTheunis Been. Nanukaña nami hinamukeñeli Theunis chinamubulakeni katachuku, ilaña chimwahitili hohu mpinji yantesha hanyima yaNjita Yakaayi Yamuchiyedi, wekalili Chinsahu chaYehova nawa namweni nami wadiña ibwambu wamuwahi nankashi kubadika chadiñayi hatachi. Hakumona chahimpiliyi yililu yindi chansañumwini ninami, dichi natiyililili chahosheleñayi hachikaninu chaNzambi chaparadisa yahanu hamaseki. Natambwilili chalala swayi-swayi nawa nekalili ibwambu dindi chikupu. *

Natachikili kushimwina muMay 1948, nawa kakweji kahiñiluhu, napapatisheweli haJune 20, hakupompa kwankambi kwadiña muUtrecht. HaJanuary 1, 1949, natachikili mudimu wawupayiniya nawa antemesheli kuya nakuzatila kuBorculo, kumusela waNetherlands, kwadiña chipompelu chanyanya. Chineli kwiluña kunayileña hadiña chintampu  chamakilomita 130, nafuukwiluhu kuzatisha nkinga yami. Natoñojokeleña nami nikwendahu maora akushika ku 6, ilaña hamuloña wakwila kwanokeli nvula yeneni nimpepela yeneni nankashi, nendeluhu maora 12, hela chochu hamakilomita 90 ashaliluku nakandami masuwa. Chikwelili wufuku, nashikili kunayileña, hetala dachisaka chawaYinsahu inashakamineña nawu hampinji yinazatileña wupayiniya munidi iluña.

Hanyima yanjita antu adiña namaheta antesha. Nadiña nasuti yimu hohu ninyitañanyi yiyedi, suti yadiña yeneni, nawa nyitañanyi yadiña yayihi. Neyi chinashimuna hakusambila, mukakweji katachi muBorculo chihandilu chankalilili, ilaña Yehova wankiswilili nawaTudizi aBayibolu amavulu. Chimwahitili tukweji tutanu natuwana, antemesheli kuya nakuzatila kuAmsterdam.

KUFUMA KUMUKALA NAKUYA KUMUSUMBA

Nakulilili munkambi mwadiña wundimi, ilaña haniyi mpinji natachikili kushakama muAmsterdam, musumba weneni wamuNetherlands. Mudimu wakushimwina wendeleña chiwahi nankashi. Mukakweji katachi, nahanini nyikanda yayivulu nankashi kubadika yinahanini mutukweji tutanu natuwana twahitiluhu. Nadiña nakulombola atudizi aBayibolu akubadika hadi atanu nasatu. Hanyima yakuntonda kwikala nkoñi wachipompelu (watenañawu makonu nawu nloñeshi wezanvu dawaeluda), anyikeli mpanji yawantu amavulu yadiña yatachi. Iwu mudimu wantiyishili woma, dichi natiyili kuwaha chiyantemesheli kuchipompelu chacheñi henohu kanda niyihani. Nelukili wanyi nami mukuhita kwayaaka, nakahana jimpanji jakubadika ha 5,000.

MuMay 1950, antemesheli kuya kuHaarlem. Kuhiñahu antambikili kuya mumudimu wawunkoñi. Nakaamini wanyi hadi mafuku asatu. Namulejeli Robert Winkler, mana kwetu wazatilileña hakasanji kamutayi, nami nukutwesha wanyi kuzata iwu mudimu, ilaña wanlejeli nindi: “Eyi sonekaku hohu hayipapilu. Wukadiza.” Chimwahitili mpinji yantesha, andizishili hadi kakweji kamu nawa natachikili kuzata neyi nkoñi wañinza. Mpinji yinendeleli chipompelu chimu, nadibulakeni naJanny Taatgen, payiniya wamuzañalu wamukeñeli Yehova chikupu nawa wadiña naspiritu yakudihana. Twadisumbwili mu 1955. Ilaña henohu kanda nitwalekuhu kulumbulula, Janny wukushimuna chekaliliyi payiniya nichitwakalakeleli hamu hanyima yakudisumbula.

KUZATILA HAMU NEYI EYALA NAMUMBANDA

Janny: Amama ekalili aChinsahu mu 1945 hinadiña nayaaka 11 yakuvwalika. Anyakeli kwiluka kulema kwakudiza Bayibolu nawanyanawu asatu, ilaña atata adiña nakudimbulula chalala, dichi amama atudizishileña neyi atata anafumuhu hetala.

Kupompa kwatachi kunapompeli kwadiña kupompa kwankambi muThe Hague 1950. Chimwahitili mulungu wumu, nayili nakupompa katachi Hetala daWanta mu Assen (Drenthe). Atata ahilili chikupu nawa anhañili mwitala. Amama anlejeli nawu, “Wuneluki kuwatela kushakama.” Nelukili nami ateneneña amana kwami niahela akuspiritu. Natachikili kushakama nachisaka chawaYinsahu ashakamineña  mukamwihi, ilaña atata achidiña nakunyandisha, dichi nabuukilili kuchipompelu chaku Deventer (Overijssel), hadiña chintampu chamakilomita 95. Hela chochu, nadiña kansi, dichi atata ayitwikili muloña kudi nfulumendi hamuloña wakunhaña hetala. Ichi chaleñeleli anleji nawu nifunti hetala. Hela chakwila atata hiyatambwilili chalalaku, mukuhita kwampinji añitejeli nawu niyeña kukupompa kwejima nimumudimu wakushimwina.

Chimwahitili mpinji yantesha hanyima yakufunta hetala, amama akatili chikupu nawa natachikili kuzata nyidimu yejima yahetala. Hichadiña namuloña nakukala kwejimikuku, natwalekeluhu nakukulilaku kuspiritu nawa napapatisheweli mu 1951 hinadiña nayaaka 17 yakusemuka. Chakoleluwu amama mu 1952, nazatili hamu nawahela asatu apayiniya hadi tukweji tuyedi neyi payiniya wakukwasha. Twashakamineña mwitala datuñililuwu hawatu nawa twashimwinineña mumbaka jiyedi muDrenthe. Nekalili payiniya wampinji yejima mu1953. Chimwahitili chaaka chimu, nkoñi wañinza wakansi wandeleli chipompelu chetu. Iwu wadiña Markus. Twadisumbwili muMay 1955, chitwamweni netu tunateli kumukalakela chiwahi Yehova hamu neyi eyala namumbanda.—Mukwa. 4:9-12.

Markus: Hanyima yakudisumbula, atwitemesheli katachi kuya nakuzata neyi apayiniya kuVeendam (Groningen). Twashakamineña mukapeka kanyanya chikupu kadiña namamita ayedi muwihi nimamita asatu mukuleha. Hela chochu, Janny wakiwahishileña chiwahi kapeka. Wufuku niwufuku, twaswijileña mesa yetu niyitwamu yiyedi kulonda twaluhu kadidi.

Chimwahitili tukweji tutanu nakamu, atwitemesheli mumudimu wakwenda muBelgium. Mu 1955, munidi ituña mwadiña hohu akwakushimwina kwakwihi na 4,000. Chayinu mpinji anashiki dehi 24,000. MuFlanders, yekala kukabeta kaluwunda kaBelgium, antu ahoshaña idimi dodimu nadahoshañawu muNetherlands. Hela chochu, nhoshelu yawakaBelgium yambukaku chantesha, dichi chatachi twasambilili kudiza idimi.

Janny: Mudimu wakwenda wakeñekaña kudihana chikupu. Twendeleleña yipompelu namakinga etu nawa twashakamineña kumatala awa mana kwetu niahela. Chineli hitwadiña netala detu mwakushakama neyi tunamanishi kwendela chipompelu, twashakamineña sampu nihaChimu, mwaka dinu haChiyedi nantetemena tunyamuka nakuya kuchipompelu chikwawu. Ilaña mpinji yejima twamweneña mudimu wetu netu hinkisu yakufuma kudi Yehova.

Markus: Hakusambila, kwosi amana kwetu niahela itwelukili muchipompeluku, hela chochu atwakameneni nikutumwekeshela chisambu. (Heb. 13:2) Hadi yaaka yayivulu, twendeleli yipompelu yejima yazatishileña idimi daDutch muBelgium mapampa kakavulu. Ichi chatuleteleli nkisu jajivulu. Chakutalilahu, twayilukili amana kwetu niahela ejima munkambi yaDutch, nawa twayikeña nankashi. Tunamoni atwansi amavulu chinakuluwu kumujimba nakupama kuspiritu nikudihana kudi Yehova, nakutwamijaku yuma yaWanta muchihandilu chawu. Chatuzañaleshaña nankashi hakumona amavulu hakachi kawu  anakumukalakela Yehova nakashinshi mumudimu wampinji yejima. (3 Yow. 4) Iku ‘kudikolesha wumu namukwawu’ kunaleñeli chitupeleli kutwalekahu kukalakala namuchima wumu mumudimu wetu.—Rom. 1:12.

KUKALA KWENENI NINKISU YAYENI

Markus: Kufuma tuhu hefuku ditwadisumbwili, twafwilileña netu tukayi kuShikola yaGileyadi. Ifuku niifuku, twadizileña Chizungu hadi ora yimu. Hela chochu, hichadiña chapela kudiza Chizungu munyikanda hohuku, dichi twafuukwiluhu kuya kuEngland hamafuku akunooka kulonda twakesekeña kushimwina muchizungu. Nkumininaku, mu 1963 twatambwilili chisweku chamukanda chafumini kuchishina chamukaayi chakuBrooklyn. Mwadiña nyikanda yiyedi, mukanda wumu wadiña wami mukwawu waJanny. Mukanda wami wadiña wakuntambika kushikola yadimena yaGileyadi hadi tukweji ikumi. Kudiza kwashindameneni hakudizisha amana kwetu nakuyileja nshimbi jamukuloñesha. Dichi hakachi kawatudizi 100 iyatambikili, 82 adiña amana kwetu.

Janny: Hamukanda wunatambwilili hanidi ifuku, anlombeli kutoñojokahu chachiwahi nikulombelahu neyi chakwila nateli kushakama muBelgium hampinji yakayayi Markus kuShikola yaGileyadi. Kuhosha hohu chalala hakusambila naneñeli. Chamwekeni neyi Yehova hankiswilili munyidimu yami yakufwila kukalakala chikupuku. Hela chochu, nanukili nkeñelu yaShikola yaGileyadi, yekala yakukwasha antu ahitaña muniyi shikola kulonda ashimwineña chikupu nsañu yayiwahi mukaayi kejima. Dichi netejeli kushala nawa antondeli kukalakala neyi payiniya wadimena mumusumba waGhent muBelgium hamu naAnna niMaria Colpaert, apayiniya adimena ayedi akuluka yitembi.

Markus: Hamuloña wakwila nateleleli kwilukisha Chizungu, antambikili kuyañahu dehi kuBrooklyn hadi tukweji tutanu henohu shikola kanda yitachiki. Nadiña nakuzatila kudipatimenti yatalaña kuNyikanda niyaMudimu. Kuzatila hachishina chamukaayi nikukwasha mudimu wakuloñesha nyikanda yakutwala kuAsia, Europe niSouth America kwanleñeleli niluki nami kudi amana kwetu amavulu amukaayi kejima nikuyilemesha. Nanukaña chikupu Mana Kwetu A. H. Macmillan, wakalakeli mumudimu wakwenda mumpinji yaMana Kwetu Russell. Wadiña washinakaja dehi hayina mpinji nawa watiyishileña nankashi wanyi, ilaña wawanikileña kukupompa kwejima kwachipompelu. Ichi chankolesheli nankashi nawa nelukili nami twatela kulemesha chikupu kudikunda kwetu kwawakwaKristu.—Heb. 10:24, 25.

Janny: Ami niMarkus twadisonekeleleña nyikanda kapampa kakavulu mumulungu. Twadanukileña chikupu wumu namukwawu. Hela chochu, Markus wadiluñishileña nankashi yuma yadizileñayi kuShikola yaGileyadi, anami nawa nadiluñishileña nankashi mumudimu wami wakushimwina. Mpinji yafuntiliyi Markus kufuma kuUnited States, nadiña nakulombola atudizi aBayibolu 17. Kutwambula hadi tukweji 15 kwatukalili chikupu, ilaña namweni nami Yehova watukiswilili hakudihana kwetu. Ifuku dafuntileñayi Markus, ndeki yalabili kushika namaora amavulu, dichi chashikiliyi, twadikumbatili nakuwulumuna madilu. Kufuma hayina mpinji, kanda twambukeñahu dehi.

TWASAKILILAÑA HAKUKOOLEKA KWEJIMA KWANYIDIMU YITWATAMBWILILI

Markus: Chinafuntili kufuma kuShikola yaGileyadi muDecember 1964, atutemesheli kuya nakuzatila haBeteli. Ilaña yuma yahimpikili. Hanyima yatukweji tusatu hohu, atutemesheli kuya nakuzata mudimu  wamunkambi muFlanders. Aalzen niEls Wiegersma chayitemesheluwu neyi amishonali kuBelgium, ayitemesheli kuya nakuzata mudimu wamunkambi nawa twafuntili kuBeteli kunatachikili kuzata kuDipatimenti yaMudimu. Kutachika mu 1968 nakushika mu 1980, kakavulu twelileña aha tuzatilaku haBeteli aha tuya mumudimu wakwenda. Nkumininaku, kutachika mu 1980 sampu 2005, nazatileña cheñi neyi nkoñi wankambi.

Hela chakwila mudimu wetu wahimpikileña kakavulu, hitwavulameneni chuma chitwamukanini Yehova netu twakamukalakelaña namuchima wetu wejima. Twatiyileña kuwaha nankashi mudimu wejima wutwatambwilileña, nakukuhwelela netu mudimu wejima wutwazatileña wadiña nakutwala yuma yaWanta hambidi.

Janny: Nadiluñishili nankashi kukooleka kweneni kwakuya naMarkus kuBrooklyn mu 1977 nikuPatterson mu 1997 hayiliyi nakudizilahu yuma yikwawu neyi membala waKometi yaMutayi.

YEHOVA WELUKA YUMA YITWAKEÑAÑA

Markus: Mu 1982, Janny amuladikili nawa wakoleli. Chimwahitili yaaka yisatu, chipompelu chamuLouvain chatwinkeli kapeka kadiña hewulu Detala daWanta. Iyi diyi mpinji yadiña yatachi kwikala nakapeka kahalwetu muyaaka 30 yahitiluhu. Hachiyedi, hampinji yitwakasileña yiteli kulonda tuyi nakuhempula chipompelu, nasulukileña nikukandama masitepusi 54 kapampa kakavulu hakutwala yiteli yetu heshina. Chamuzañalu, mu 2002 atwiloñesheleli kapeka kaheshina mutwatachikili kushakama. Hanyima yakushikija yaaka 78 yakusemuka, atutemesheli kuya nakuzata neyi apayiniya adimena mumbaka yaLokeren. Tudi namuzañalu hama hakwila nawu tuchidi kuzata neyi apayiniya adimena nawa tunateli kuya mumudimu wakushimwina ifuku niifuku.

Janny: Yaaka yitunazati hamu mumudimu wampinji yejima yinabadiki hayaaka 120. Tunadimweni namesu kapu kushikijewa kwamazu aYehova akanayi akwila nawu ‘Hamba katulekaku’ nawa neyi tutwalekahu kumukalakela nakashinshi, ‘hitwamba kabula chumaku.’—Heb. 13:5; Kuhit. 2:7.

Markus: Hampinji yitwadiña atwansi, twadihanini kudi Yehova. Hitwakeñeleña yuma yabadikaku. Twadihana kutambwila mudimu wudi wejima wunatwinkuwu muloña twakuhwelela chikupu netu Nzambi yetu Yehova wutwakalakelaña diyi wabadika kulema, bayi neyi iluña kutunakukalakela hela chifuluku.

[Tumazu twaheshina]

[Mwevulu wudi hefu 28]

Hewulu: Markus (kunsa yachidiilu) nakushimwina mumukwakwa kwakwihi naAmsterdam mu 1950

[Mwevulu wudi hefu 28]

Heshina: Janny (kunsa yachidiilu) hazatileñayi wupayiniya wakukwasha mu 1952

[Mwevulu wudi hefu 29]

Kuchidiilu: Ifuku ditwadisumbwili mu 1955

[Mazu ekoku adi hefu 31]

“Twakuhwelela chikupu netu Nzambi yetu Yehova wutwakalakelaña diyi wabadika kulema, bayi neyi iluña kutunakukalakela hela chifuluku”