Bayi ‘Mumuhililaña Yehovaku’

‘Wusupi wamuntu diwu watamishaña njila yindi; muchima windi wamuhililaña Yehova.’—YISH. 19:3.

MUKWAKULA NENUDI?

Yumanyi yinateli kutuleñela ‘tumuhilileña Yehova’?

Yikumanyi yitanu yinateli kutukwasha kutondolwela chaaku chakumuhililaña Nzambi?

Yumanyi yitwatela kwanuka neyi tunakumona kukala kwasweja?

1, 2. Muloñadi chitwatela kubula kumutwikila Yehova muloña hamakabi amonañawu antu? Lumbululenu.

 TWILI netu mwasumbula nawa munashakami mumaluwi chachiwahi hadi yaaka yayivulu. Ilaña ifuku dimu hakufunta kwitala, muwana nenu yuma yejima mwitala anayikisañani. Yitwamu anayikotoli, yeña anayifumpi, kapeti anayikisañani chikupu. Itala denu dalubanji dinekali neyi muchizumba. Komana mukulundumuka nakuhosha nenu, “Muloñadi ñodami chinakoñeliyi mwenimu?” Ntahindi munateli kwihula nenu, “Hinyi wuneli mwenimu?” Chakadi nikujina mukushikena kwihula ilu lwihu lwamuchiyedi. Muloñadi? Muloña muneluki nenu mwinikwenu imwakeñesha hanateli kukisañana yuma munjila yamuchidiwuku.

² Makonu, tunakumona iseki anadikisañani. Maseki, menji nimpepela jejima anajikisañani. Antu anadiñiji mumadombu nimuyililu yatama. Hakwikala antu adiza chahosha Bayibolu, tweluka netu Yehova hidiyi wakojejaña yumiyuku. Waleñeli dinu iseki kulonda dikali paradisa yayiwahi. (Kutach. 2:8, 15) Yehova hiNzambi wakukeña. (1 Yow. 4:8) Kudiza Nsona kunatukwashi kwiluka wakojejaña kukala kwakuvulu kwamwekanaña mukaayi. Satana Diyabolu diyi, ‘nyuuli wampata yamunu mwishina.’—Yow. 14:30; 2 Kor. 4:4.

3. Indi yitoñojoka yetu yinateli kuluwankana ñahi?

³ Hela chochu, hitunateli kumutwika Satana nyiloña yejima hamakabi ejimaku. Muloñadi chitukubulila kumutwikila nyiloña? Muloña kukala kukwawu kutwamonaña kwafumaña muyiluwa yetwetu aweni. (Tañenu Kuhituluka 32:4-6.) Hela chakwila tukwiteja mwenimu, kubula kuwanina kwetu kunateli kuluwañesha yitoñojoka yetu nakutuleñela twendi munjila yikututwala muwubanji. (Yish. 14:12) Munjilanyi?  Chatela tuditwikeña nyiloña etu aweni hela kumutwika Satana hakukala kutwamonaña, tunateli kutachika kumutwika Yehova nyiloña. Tunateli kutachika ‘nikumuhilila Yehova.’—Yish. 19:3.

4, 5. Indi mukwaKristu nateli ‘kumuhilila ñahi Yehova’?

⁴ Komana mwalala tunateli ‘kumuhilila Yehova’? Chakadi nikujina neyi tumuhililaña Yehova dikwila nawu tunakudikabisha hohu. (Isa. 41:11) Tukuhetelamu mwodi? Mukwakusoneka nkumbu wumu wahosheli nindi: “Kachikasa keyi kakihi hikakutwesha kuzuña naNzambuku.” Hadaha hitunateli kuhosha netu tunamuhilili Yehovaku. Ilaña mukanda waYishimu 19:3 wahoshaña nawu iyala chisupi ‘watamishaña njila yindi; muchima windi wamuhililaña Yehova.’ Eñañi, muntu nateli kumuhilila Nzambi mumuchima windi. Yililu yamuchidiwu yinateli kutachi kumwekena munjila yakala kuyiluka. Muntu nateli kumuhembela Yehova nkunyi kumuchima. Chafumañamu, muntu nateli kuleka kupompa hela kuleka kuzataku nyidimu yakundama kukudifukula kudi Yehova.

⁵ Yumanyi yinateli kutuleñela ‘tumuhilili Yehova’? Tunateli kutondolwela ñahi aka kakosi? Chalema kwiluka ñakwilu yanawa malwihu kulonda tukiñi wubwambu wetu naYehova Nzambi.

YUMANYI YINATELI KUTULEÑELA ‘TUMUHILILEÑA YEHOVA’?

6, 7. Muloñadi aIsarela amumafuku aMosi chatachikililuwu kumutobela Yehova?

⁶ Yumanyi yinateli kuleñela ñamba waYehova washinshika yatachiki kumutobela Nzambi yindi? Tushinshikenu hayuma yitanu niyakutalilahu yamuBayibolu yinakuhosha hadi antu afwili mukakosi kenaka.—1 Kor. 10:11, 12.

⁷ Nhoshelu yatama yawantu amakwawu yinateli kutuluwañesha. (Tañenu Kuhituluka 1:26-28.) A Isarela afumini hohu hakuyikuula muwuduñu muEjipitu. Yehova waleteli yipupu ikumi muchihayamisha haniwu munza walukambu kufumahu wajilumwini Fwaro niamashidika indi Mukaluñalwiji Kachinana. (Kwid. 12:29-32, 51; 14:29-31; Mas. 136:15) Antu jaNzambi adiña kwakwihi nakwiñila Mwituña daChikaninu. Ilaña, hayina mpinji yakala, aIsarela atachikili kumutobela Yehova. Chumanyi chaletesheli amwekeshi kubula chikuhwelelu? Atiyili woma hamuloña wamujimbu wakutiyisha woma washimwinuwu akwakwendesha ituña amakwawu atuminuwu. (Kuch. 14:1-4) Chumanyi chafuminumu? Ikiñu dejima hiyaditejeli kwiñila ‘mwituña dadiwahuku.’ (Kuhit. 1:34, 35) Komana ninetu mpinji yikwawu tunateli kwiteja nhoshelu yatama yawantu amakwawu yizeyeshi chikuhwelelu chetu nikutuleñela tutachiki kumutobela Yehova hayuma yatukoñelañayi?

8. Yumanyi yaleñeleli antu jaNzambi mumafuku aIsaya atachiki kumutwika Yehova muloña hakukala kwamweneñawu?

⁸ Makabi nikukala anateli kutuneñesha. (Tañenu Isaya 8:21, 22.) Mumafuku aIsaya, munza wawaYudeya wadiña mukukala kweneni. Awunyeñumukili kudi ayilumbu. Yakudya yakeheli. Antu amavulu adiña nanzala. Sweje-e dinu, kwadiña nzala yakuspiritu. (Amosa 8:11) Hela chochu, chatela amulombi Yehova yayikwashi nakukala kwamweneñawu, wena atachikili ‘kushiña’ mwanta wawu niNzambi yawu. Eñañi, amutwikili Yehova muloña hakukala kwamweneñawu. Neyi tuholokela mumakabi hela neyi tumona kukala, komana tunateli kuhosha mumuchima wetu netu, ‘Indi Yehova wadiña kudihi hampinji yinakeñaña nami yankwashi?’

9. Muloñadi aIsarela amumafuku aEzekeli chatachikililuwu kwikala nayitoñojoka yatama?

⁹ Hitwelukaña wunsahu wejimaku. Hamuloña wakubula kwiluka wunsahu wejimaku, aIsarela amumafuku aEzekeli atoñojokeli nawu mwelañayi Yehova “himwesekanaku.” (Ezek. 18:29) Elili neyi kwiji adiña nañovu yakumusompesha Nzambi nikufuukulahu neyi kwiji wakoñeleña yuma munjila yaloña, hela chakwila hiyelukili yuma yejima yaleñeleli yakoñi mwenimuku. Komana ninetu tunateli kukoña chiluwa chochimu? MuBayibolu mwekala nsañu  yitunateli kukañanya kutiyisha. Hadaha tuneluki wanyi chinaleteshi yuma yinakutumwekena muchihandilu chetu. Tunateli kutachika kutoñojoka mumuchima wetu netu njila jaYehova jatama nawa ‘hijesekanaku.’—Yoba 35:2.

10. Muntu nateli kulondela ñahi chakutalilahu chatama chaAdama?

¹⁰ Twatwikaña antu acheñi nyiloña hanshidi yetu niyiluwa yitwakoñaña. Kufuma tuhu hakutachika kwakuhanda kwawantu, Adama wamutwikili Nzambi muloña hanshidi jindi jakoñeliyi. (Kutach. 3:12) Hela chakwila Adama wafumpili nshimbi jaNzambi mumushikila nawa welukili yuma yatama yikafumamu, wamutwikili Yehova muloña. Munjila yikwawu, wahosheli nindi Yehova wamwinkeli mumbanda watama. Kufuma tuhu yina mpinji, antu amakwawu alondela chakutalilahu chaAdama chakumutwika Nzambi muloña hayiluwa yawu yakoñañawu. Twatela kudihula netu, ‘Komana natela kuneña chikupu nikuhila hayiluwa yami yinakoñaña nakutachika kutoñojoka nami nshimbi jaYehova jasweja kukala?’

11. Chumanyi chitunateli kudizilaku kudi Yona?

¹¹ Twatachikaña kusweja kusha maana hadi etu aweni. Kaprofwetu Yona watiyili kutama Yehova chatiyililiyi luwi akwaNineva. (Yona 4:1-3) Muloñadi? Wachinineña nindi antu akutoñojoka nawu wadiña kaprofwetu wakutwamba muloña musumba hiyawujilumwinuku chelili yashimuni nindi akawujilumuna. Yona waswejeli kusha maana hadi yomweni kubadika kuyitiyila wushona akwaNineva abalumukili munyichima yawu. Komana ninetu tunateli kusha maana hadi etu aweni chakwila tumuhilila Yehova hakubula kuleta swayi kukuma? Indi neyi chakwila twatachikili dehi kushimwina netu ifuku daYehova didi kwakwihi, komana tunateli kutachika kumuhilila Yehova neyi antu atachika kutuseha?—2 Pet. 3:3, 4, 9.

CHITWATELA KUTONDOLWELA CHAAKU ‘CHAKUMUHILILA YEHOVA’

12, 13. Neyi tutachika kujinoka nyidimu yaYehova munyichima yetu, chumanyi chitwatela kwanuka?

¹² Tunateli kwila ñahi neyi muchima wetu wabula kuwanina wutachika kujinoka nyidimu yaYehova yikwawu? Anukenu nenu chatama kwila mwenimu. Yishimu 19:3 yatwanukishaña nawu hamuloña wakubula kwiluka, tunateli kumutwika  Yehova muloña hakukala kutwaletaña etu aweni. Dichi tushinshikenu hayuma yitanu yikutukwasha kulonda tubuleña kumuhilila Yehova.

¹³ Bayi mudiwula wubwambu wenu naYehovaku. Tunateli kutondolwela chaaku chatama chakumuhililaña Nzambi neyi tutwalekahu kwikala nawubwambu wawuwahi nayena. (Tañenu Yishimu 3:5, 6.) Twatela kumukuhwelela Yehova. Twatela cheñi kutondolwela kudimonaña netu tukweti maana hela kusweja kusha maana hadi etu aweni. (Yish. 3:7; Mukwa. 7:16) Neyi twikala nayitoñojoka yamuchidiwu hitunateli kumutwika Yehova muloña neyi yuma yatama yimwekana.

14, 15. Yumanyi yinateli kutukwasha kulonda tubuleña kuluwankana nanhoshelu yatama yawantu amakwawu?

¹⁴ Bayi mwiteja nhoshelu yatama yiyiluwañeshuku. A Isarela amumafuku aMosi amweni yuma yayivulu yateleli yiyileñeli amukuhweleli nawu Yehova wakayiñija Mwituña daChikaninu. (Mas. 78:43-53) Ilaña chatiyiluwu mujimbu wakuyitiyisha woma washimwinuwu akakwendesha ituña abulili kashinshi, akañenyi ‘kwanuka hela chikasa chindi.’ (Mas. 78:42) Neyi tutoñojokaña hanyidimu yaYehova, nikwanukaña yuma yayiwahi yatukoñelayi, tunateli kukolesha wubwambu wetu nayena. Chikufumamu, hitukwiteja yitoñojoka yatama yitwambuli kudi Yehovaku.—Mas. 77:11, 12.

¹⁵ Indi neyi twikala nayitoñojoka yaheña hadi akwetu akwakwitiya? Neyi twikala nayitoñojoka yamuchidiwu, wubwambu wetu naYehova hiwunateli kukolaku. (1 Yow. 4:20) Chakutalilahu hampinji yamutondeluwu Aroni kwikala kapristu muneni, aIsarela atachikili kutoba hachumichi. Ilaña kudi Yehova chadiña neyi kwiji adiña nakumutobela yena. (Kuch. 17:10) Munjila yoyimu, neyi chakwila tutachika kutoba hadi antu anakuzatishayi Yehova kulombola kuloñesha kwindi kwahamaseki, dikwila nawu tukumutobelaña Yehova.—Heb. 13:7, 17.

16, 17. Chumanyi chitwatela kwanuka neyi tunaholokeli mumakabi?

¹⁶ Anukenu nenu Yehova hidiyi wakojejaña kukala kutwamonañaku. Hela chakwila aIsarela amumafuku Isaya amufutaleleli Yehova, wakeñeleña kuyikwasha cheñi. (Isa. 1:16-19) Hichidi namuloña nakukala kutunateli kumona, chatukundejaña hakwiluka netu Yehova watwakamenaña nawa wakeñaña kutukwasha. (1 Pet. 5:7) Kubombelahu, watukana nindi wakatwinka ñovu kulonda tukatwalekuhu kwikala ashinshika kudi yena.—1 Kor. 10:13.

¹⁷ Neyi chakwila tunakukabakana hamuloña wakutuheñeshela wuñanji, neyi chamweniyi Yoba muntu wadiña washinshika, twatela kwanuka netu Yehova hidiyi wunakukojeja makabi itunakumonaku. Yehova wahela kuheñesha wuñanji; wakeña kuloña. (Mas. 33:5) Kufwana ibwambu daYoba Elihu, twitejenu netu: “Nzambi kwila chatama kwakulehi! Chinaweji kwila yakuheña kwakulehi!” (Yoba 34:10) Yehova hidiyi wakojejaña makabi itwamonañaku, ilaña watwinkaña “yuma yayiwahi yahanañawu yejima, niyamukunkulu yalala yejima.”—Yak. 1:13, 17.

18, 19. Muloñadi chitwatelela kumukuhwelela chikupu Yehova? Lumbululenu.

¹⁸ Bayi mumujinokaña Yehovaku. Nzambi waloña, nawa yitoñojoka yindi yabadika yitoñojoka yetu. (Isa. 55:8, 9) Dichi kudizoza nikwiluka mwakukumina kwatela kutukwasha twitejeña netu hitwelukaña yuma yejimaku. (Rom. 9:20) Kakavulu hitwelukaña wunsahu wejima hayuma yinakumwekanaku. Chakadi nikujina, mweluka mwatalisha ichi chishimu chakwila nawu: “Muntu wasambilaña kuholokela mukwawu diyi wamwekanaña neyi waloña, ilaña mukwawu wukwinza nakumusandujola.”—Yish. 18:17.

¹⁹ Neyi tukweti ibwambu detu itwakuhwelela wuneli chuma chitunabuli kwiluka hakusambila hela chitunateli kutoñojoka netu hichinateleluku, komana tukushikena dakumutwika muloña netu nakoñi chuma chatama? Ntahindi  tukusambila kujinoka, sweje-e neyi tunashakami nindi hadi yaaka yayivulu? Neyi chakwila amabwambu jetu abula kuwanina twayikuhwelelaña munjila yayiwahi yamuchidiwu, komana Tata yetu waMwiwulu twatela kumukuhwelela chikupu, muloña yena njila jindi niyitoñojoka yindi yabadika chikupu yitoñojoka yetu!

20, 21. Muloñadi chitwatela kubula kumutwikila Yehova muloña hamakabi itwamonaña?

²⁰ Ilukenu wumwatela kutwika muloña. Muloñadi chitwatela kwilila mwenimu? Muloña makabi amakwawu yetu twayikojejaña. Neyi yetu tunayikojeji, twatela kwiteja. (Ŋal. 6:7) Bayi mweseka kumutwika Yehova muloña hamakabi imukumonaku. Muloñadi? Talenu ichi chakutalilahu: Motoka yinateli kwikala nañovu yakutemuka chikupu. Fwikijenu ñendeshi nasweji kutemwisha chikupu nakubadika hachipimu hatela kukuminayi neyi nakuhita hakondamina mukwakwa chikupu, nawa motoka yalumuka. Komana twatela kutwika muloña atuñili wuna motoka? Inehi, hitunateli kuyitwika muloñaku. Munjila yoyimu, Yehova watuleñeli nawuswa wakufuukulahu etu aweni. Ilaña watwinka cheñi nshimbi jitwatela kulondela hakufuukulahu chachiwahi. Dichi muloñadi wutwatela kumutwikila Nleñi yetu muloña hayiluwa yetu?

²¹ Hela chochu, bayi neyi kukala kwejima kwenzaña hamuloña wayiluwa yetu niyililu yatamaku. Yuma yikwawu yamwekanaña hamuloña ‘wampinji nakululakana.’ (Mukwa. 9:11) Sweje-e dinu, twatela kwiluka netu Satana Diyabolu diyi wakojejaña yuma yatama yidi mukaayi kejima. (1 Yow. 5:19; Chim. 12:9) Diyi chilumbu—bayi Yehovaku!—1 Pet. 5:8.

LEMESHENU CHIKUPU WUBWAMBU WENU WAWUWAHI NAYEHOVA

22, 23. Yumanyi yitwatela kwanuka neyi tunaneñi hamuloña wamakabi etu?

²² Neyi munakuhita mumakabi nikukala, anukenu chakutalilahu cha Yoshuwa niKalebi. Kwambukaku nawakwakwendesha ituña ikumi, awa mayala ayedi ashinshika ashimwini chileji chachiwahi. (Kuch. 14:6-9) Amwekesheli nawu amukuhweleleli Yehova. Hela chochu, alulutili mwisaña hadi yaaka 40 hamu nawakwawu aIsarela. Komana Yoshuwa naKalebi atobeli hela kuhila, nakutoñojoka nawu ayilili katama? Inehi. Amukuhweleleli Yehova. Komana ayikiswilili? Chakadi nikujina! Ikiñu dejima dafwilili mwisaña, ilaña awa mayala ejima ayedi eñilili Mwituña daChikaninu. (Kuch. 14:30) Chochimu, twakatambwila nkisu yaYehova neyi tubula ‘kuzeya’ hakwila mwaya muchima windi.—Ŋal. 6:9; Heb. 6:10.

²³ Yumanyi yimwatela kwila neyi munaneñi hamuloña wamakabi, yiluwa yawantu amakwawu hela yiluwa yenu? Shinshikenu hayililu yayiwahi yaYehova. Fwikijenu hakuchiñeja kwayinkayi Yehova. Dihulenu nenu, Chihandilu chami chadikwikala ñahi chakadi kwikala nawubwambu naYehova? Twalekenuhu kukundama kwakwihi naYehova nawa bayi mwiteja muchima wenu wumuhilileñaku.

[Malwihu aKuzatisha haKudiza]

[Mwevulu wudi hefu 12]

Kutiyilila kunhoshelu yatama kunateli kuyiluwañesha (Talenu parakalafu 7)

[Mwevulu wudi hefu 14]

Yoshuwa niKalebi ayikiswilili hamuloña wakumukuhwelela Yehova (Talenu parakalafu 22)