Dishinshikenu Kulonda Mwiluki Chimwatela Kwikala

‘Mwatela kwikala nayililu yakujila nakwakama Nzambi.’—2 PET. 3:11.

MUKWAKULA NENUDI?

Hakwila twikali nawuselewa waNzambi, twatela kwikala nayililu yamuchidinyi?

Indi Satana wadimbaña ñahi antu?

Yumanyi yimwatela kwila hakwila mukiñi wubwambu wenu naYehova?

1, 2. Hakwila twikali nawuselewa waNzambi ‘twatela kwikala nayililu yamuchidinyi’?

 ANTU amavulu akeñaña kwiluka chayimonañawu kudi akwawu. Hakwikala akwaKristu, komana ninetu hitwatela kukeña kwiluka Yehova chatumonañayuku? Muloña yena diyi Muntu wabadika mukuleña kwejima, nawa kudi yena dikwekala “kaseloki kawumi.”—Mas. 36:9.

² Kapostolu Petulu hampinji yakonkomweneneñayi ‘hachitwatela kwikala’ kwesekeja nachatumonañayi Yehova, watukolesha ‘kwikala nayililu yakujila nakwakama Nzambi.’ (Tañenu 2 Petulu 3:11.) Hakwila twikali nawuselewa waNzambi, ‘yililu yetu’ yatela kwikala yakujila, dikwila nawu kwikala akadi majilu muyililu, muyitoñojoka nikuspiritu. Kubombelahu, twatela ‘kumwakama Nzambi’ nakalemesha nikwikala ashinshika chikupu kudi yena. Hakwila twikali nawuselewa windi, bayi neyi chabombelamu hohu yililu yetuku, ilaña niwuntu wetu wamukachi. Chineli Yehova diyi “wesekaña muchima,” welukaña neyi yililu yetu yidi yakujila nawa neyi twadihana chikupu kudi yena hela nehi.—1 Kushi. 29:17.

3. Kutalisha hawubwambu wetu naNzambi, twatela kudihula malwihwinyi?

³ Satana Diyabolu hakeñaña nindi twikali nawuselewa waNzambuku. Mwamweni, wazataña hakumina ñovu yindi yejima kulonda yatuleñeli tuluwañeshi wubwambu wetu naYehova. Satana wanyakalaña kuzatisha kutwamba nikudimbana kulonda yatufumishi kudi Nzambi wutwadifukulañaku. (Yow. 8:44; 2 Kor. 11:13-15) Dichi, twatela kudihula netu: ‘Indi Satana wadimbaña ñahi antu? Nateli kwila ñahi hakwila nikiñi wubwambu wami naYehova?’

 INDI SATANA WADIMBAÑA ÑAHI ANTU?

4. Hakwila yaluwañeshi wubwambu wetu naNzambi, Satana wafwilaña kuluwañesha chumanyi, nawa muloñadi?

⁴ Kambanji Yakoba wasonekeli nindi: “Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi; nshidi chiyikukula hiyikuvwala kufwa.” (Yak. 1:14, 15) Hakufwila kuluwañesha wubwambu wetu naNzambi, Satana wakeñaña kuluwañesha muchima wetu, nsulu yayuma yitwafwilaña.

5, 6. (a) Indi Satana wafwilaña ñahi kuluwañesha muchima wetu? (b) Yumanyi yekoku yazatishañayi Satana kulonda yakokoli yuma yitwafwilaña munyichima yetu, nawa yumiyi weluka ñahi chakuyizatisha chachiwahi?

⁵ Indi Satana wafwilaña ñahi kuluwañesha muchima wetu? Bayibolu yahosha nawu: “Mpata yamunu mwishina yashakamaña mudi owu watama.” (1 Yow. 5:19) Yitwa yaSatana yabombelamu ‘yuma yamunu mwishina.’ (Tañenu 1 Yowanu 2:15, 16.) Hadi yaaka yayivulu yinahituhu, Diyabolu wadiza chikupu hayuma yamukaayi. Chineli tunakushakama mukanu kaayi, twatela kudikiña kutufuta twindi.—Yow. 17:15.

⁶ Satana wazatishaña jinjila jatela kukokola yuma yafwilaña muchima. Kapostolu Yowanu watena yuma yekoku yisatu yazatishañayi Satana: (1) “kufwila kwachisemwa chaheseki,” (2) “kufwila kwamesu,” ni (3) “kudisamba kwamukunkulwayi kwawumi wunu.” Satana wazatishili yumiyi hakumweseka Yesu mwisaña. Chineli Satana nazatishi tufuta twenitu hadi yaaka yayivulu, watuzatishaña chiwahi makonu nawa weluka kafuta katela kuzatishayi hadi muntu wudi wejima. Henohu kanda tushinshika hayuma yitwatela kuzatisha kulonda tudikiñi, tusambilenu kushinshika chazatishiliyi chiwahi Diyabolu yuma yekoku hadi Evu ilaña yabulili kuzatika hadi Mwana kaNzambi.

“KUFWILA KWACHISEMWA CHAHESEKI”

7. Indi Satana wazatishili ñahi “kufwila kwachisemwa chaheseki” hakumweseka Evu?

⁷ Antu akeñekaña yakudya hakwila atwalekuhu kuhanda. Nleñi waleñeli iseki kulonda disoñeña yakudya yayivulu chikupu. Satana nateli kuzatisha chipepa chetu chayakudya kulonda yatweseki twili chuma chatela kumuneñesha Nzambi. Shinshikenu cheliliyi mwenimu kudi Evu. (Tañenu Kutachika 3:1-6.) Satana wamulejeli Evu nindi nateli kudya mukabu ‘wakumutondu wakwiluka nachu yayiwahi nayatama’ chakadi kufwa, nakuhosha nindi hefuku dakadyayi kumutondu weniwu wakekala neyi Nzambi. (Kutach. 2:9) Dichi Diyabolu watalishili mukwila nindi Evu hakeñekeleña kumwovwahila Nzambuku hakwila yatwalekuhu kuhanda. Iku kwadiña hikutwamba kwakweni. Hanyima yakwila Diyabolu natumbi dehi yitoñojoka yeniyi mudi Evu, Evu wateleleli kutondahu chuma chimu:  Wateleleli kukaana yitoñojoka yeniyi hela kutwalekahu kutoñojokahu, nakwiteja chipepa chakudya mukabu chisweji. Hela chakwila wadi kudya kumutondu wudi wejima, wafuukwiluhu kutwalekahu kutoñojoka hamutondu wadiña hakachi ketempa. Chafuminumu wadiili mukabu. Satana wamuleñeleli yekali namuchima wakufwila chuma chamukaanishiluwu kudi Nleñi yindi.

8. Indi Satana wesekeli ñahi kumweseka Yesu kuhitila mukuzatisha “kufwila kwachisemwa chaheseki,” nawa muloñadi iku kweseka chikwabulilili kuzatika?

⁸ Satana wazatishili njila yoyimu hampinji yamwesekeliyi Yesu mwisaña. Hanyima yakwila Yesu najiñi dehi nanzala hadi mafuku 40, mwaana niwufuku, Satana wesekeli kumweseka kuhitila mukuzatisha chipepa chayakudya. Satana wahosheli nindi, “Neyi wuMwana kaNzambi, hoshaku ilolidi dibalumuki dinkendi.” (Luka 4:1-3) Yesu wateleleli kutondahu chuma chimu: Wadi kutondahu kubula kuzatisha ñovu jindi muchihayamisha kulonda yamanishi nzala yayakudya, hela wadi kutondahu kuzatisha ñovu jindi. Yesu welukili nindi hateleleli kuzatisha ñovu jindi munjila yatamaku. Hela chakwila wadiña nanzala, kumanisha nzala yindi hikwadiña kwalema kubadika kutwalekahu kwikala nawubwambu naYehovaku. Yesu wamwakwili nindi, “Anasoneki nawu, Muntu hakuhanda namankendi hohuku, chiña namazu ejima akufuma mukanwa kaNzambi.”—Matewu 4:4.

“KUFWILA KWAMESU”

9. Indi mazu akwila nawu “kufwila kwamesu” atalisha mudihi, nawa Satana wakwizatishili ñahi hakumweseka Evu?

⁹ Yowanu wateneni cheñi “kufwila kwamesu” nindi hikoku. Awa mazu atalisha mukwila nawu muntu nateli kufwila chuma kuhitila mukuchimona namesu. Neyi chichadiña kudi Evu, Satana wazatishili iku kufwila kuhitila mukumudimba nindi: ‘Mesu eyi akatona.’ Evu chaswejeliyi kutala haniwu mukabu, chipepa chakudya iwu mukabu chaswejeleluku chikupu. Evu wamweni nindi mutondu ‘wawuwahi kuwutala.’

10. Indi Satana wazatishili ñahi “kufwila kwamesu” hakumweseka Yesu, nawa Yesu waakwili nindidi?

¹⁰ Indi Yesu? Satana ‘wamulejeli mawanta amunu mwishina ejima yena mpinji oyu. Diyabolu hakumwila nindi, Nukukwinka mawantawa ejima nikulema kwawu.’ (Luka 4:5, 6) Bayi neyi yuma yamweniyi Yesu yadiña mawanta ejima ahamasekuku, ilaña wamweni chimwenu chakulema kwamawantawa. Satana watela watoñojokeli nindi Yesu wukuhuñumuka nayuma yamweniyi. Chakadi nikutiya nsonyi, Satana wahosheli nindi: ‘Neyi wukudifukula kudami, ejima akwikala eyi.’ (Luka 4:7) Yesu hakeñeleña kwikala neyi chakeñeleñayi Satana nindi yekaluku. Wamwakwili hohenohu. Wahosheli nindi: “Anasoneki nawu, Kadifukulaña kudi Yehova Nzambi yeyi, diyi wakakalakelaña kanka windi hohu.”—Luka 4:8.

 “KUDISAMBA KWAMUKUNKULWAYI KWAWUMI WUNU”

11. Indi Evu amudimbili ñahi kudi Satana?

¹¹ Hakutena yuma yamunu mwishina, Yowanu wateneni “kudisamba kwamukunkulwayi kwawumi wunu.” Hampinji hikwadiña hohu Adama niEvu hanu hamaseki, chakadi nikujina hiyadiña ‘nakudisamba kwamukunkulwayi kwawumi wawu’ kudi antu amakwawuku. Ilaña adinkeleña wanta. Hakumweseka Evu, Satana watalishili mukwila nindi Nzambi wamuswekeleña yuma yayiwahi. Diyabolu wamulejeli nindi ifuku diwakadya ‘kumutondu wakwiluka nachu niyayiwahi niyatama,’ wakekala ‘neyi chadiyi Nzambi, wakeluka niyayiwahi niyatama.’ (Kutach. 2:17; 3:5) Dichi, Satana wakeñeleña Evu yatoñojoki nindi nateli kudilila yuma yomweni chakadi Yehova. Kudinka wanta dikwamuleñeleli yeteji iku kutwamba. Wadiili mukabu wamukaanishiluwu, nakukuhwelela nindi hakafwaku. Watoñojokeli mwaluwa chikupu.

12. Njilanyi yikwawu yazatishiliyi Satana hakufwila kumweseka Yesu, nawa Yesu waakwili nindidi?

¹² Kwambukaku naEvu, Yesu watwimikilili chakutalilahu chachiwahi chakudizoza. Satana wesekeli kumweseka Yesu munjila yikwawu, ilaña Yesu wakaanini kwila chuma chadi kutiyisha antu amakwawu kuwaha nikumweseka Nzambi. Kwila mwenimu chadi kwikala hikudinka wanta. Ilaña, Yesu waakwili hatooka nawa chakadi nikuhita mumbadi nindi: “Aneli nawu, Bayi wakamweseka Yehova Nzambi yeyuku.”—Tañenu Luka 4:9-12.

TUNATELI KUKIÑA ÑAHI WUBWAMBU WETU NAYEHOVA?

13, 14. Lumbululenu chazatishañayi Satana tufuta tukwawu makonu.

¹³ Makonu, Satana wazatishaña tufuta twadifwana natwazatishiliyi kudi Evu niYesu. Wazatishaña “kufwila kwachisemwa chaheseki” hakweseka antu kwila yuma yatama hela kudya nikunwa chikupu. Kuhitila munyevulu yanzekesi, sweje-e haIntaneti, nateli kulawula muntu wunabuli kusoñama kuhitila mukuzatisha “kufwila kwamesu.” Nawa wazatishaña kufwila ‘kwakudisamba kwamukunkulwayi kwawumi wunu’ kulonda yahuñumuni antu adinkeña wanta nikwikala nañovu, kuya mpuhu nikwikala namaheta amavulu.

¹⁴ “Yuma yamunu mwishina” yidi neyi ndisha yazatishañayi chibinda chanshi. Yekala nekoku chikupu, ilaña kundisha yejima kwekalaña ilowa. Satana wazatishaña yuma yamonañawu antu nawu yayiwahi hakuyileñela  eli yuma yambukaku nanshimbi jaNzambi. Hela chochu, tufuta twamuchidiwu twaluwañeshaña nyichima yetu. Satana wakeñaña tukuhweleli netu kudakamena kumujimba nikwikala nachihandilu chachiwahi kwalema nankashi kubadika kwila mwaya muchima waNzambi. Komana tufuta twamuchidiwu tukuzatika kudi etu?

15. Tunateli kumwimbujola ñahi Yesu hakukaana kweseka kwaSatana?

¹⁵ Hela chakwila Evu amudimbili kudi Satana, Yesu wakaanini chikupu. Mpinji yejima waakwileña kuhitila mukuzatisha Nsona, nindi: “Anasoneki nawu” hela nindi “Aneli nawu.” Neyi tudizaña Bayibolu mpinji yejima, tukwiluka chiwahi Nsona nawa twakatwesha kwanuka mavasi anateli kutukwasha neyi tunaholokeli mukweseka. (Mas. 1:1, 2) Kwanukaña yakutalilahu yamuBayibolu yawantu ashinshika amwovwahilili Nzambi kukutukwasha kuyimbujola. (Rom. 15:4) Kumulemesha Yehova chikupu, kukeña yuma yakeñayi nikuhela yuma yahelayi kukutwikiña.—Mas. 97:10.

16, 17. Indi kutoñojoka chikupu hansañu yamuBayibolu kunateli kutuleñela twikali antu amuchidinyi?

¹⁶ Bayibolu yatukoleshaña kutoñojoka chikupu hansañu yamuBayibolu kulonda twikali antu awumbawu nayitoñojoka yaNzambi, bayi yamukaayuku. Hakukonkomwena hayuma yitwatoñojokaña yitwatela kuyuula, Pawulu wahosheli nindi: ‘Tunakufumba yitoñojoka, niyuma yejima yadimika kwiwulu yadikañaña nakubula kumwiluka Nzambi; kulonda tutwali yitoñojoka yejima muwuduñu wakwovwahila Kristu.’ (2 Kor. 10:5) Yitoñojoka yetu yikweti ñovu chikupu kutalisha hawuntu wetu, dichi twatela ‘kutwalekahu kutoñojoka’ hayuma yakukolesha.—Fwi. 4:8.

¹⁷ Hitunateli kwikala ajila neyi chakwila tunakutoñojoka nikufwila yuma yatama. Twatela kumukeña Yehova ‘namuchima wutooka.’ (1 Tim. 1:5) Ilaña muchima wadimbana chikupu nawa hitunateli kwiluka ‘yuma yamunu mwishina’ chiyinakutuluwañesha chikupuku. (Yere. 17:9) Dichi chalema nankashi kulondela kufumba kwaPawulu kwakwila nawu: “Desekenu ntahi, mutali neyi mudi mukwitiya kwakukuhwelela; dishinshikenu.” Hampinji yitunakudiza Bayibolu twatela kudihula netu, ‘Komana yitoñojoka yami niyuma yinafwilaña yamuzañaleshaña Nzambi?—2 Kor. 13:5.

18, 19. Muloñadi chitwatela kufuukwilahu kwikala antu anakukeñayi Yehova nindi twikali?

¹⁸ Chuma chikwawu chatukwashaña kukaana ‘yuma yamunu mwishina’ hikutoñojoka hamazu aYowanu onenewa akwila nawu: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yow. 2:17) Kaayi kaSatana kanakumwekana neyi kwiji kalala nawa kakatwalekahu haya nyaka. Hela chochu, ifuku dimu kakakuma. Kwosi chuma chamukaayi kaSatana chakatwalekahu haya nyakaku. Kwanukaña ichi chikuma chikutukwasha kubula kudimbewa natufuta twaDiyabolu.

¹⁹ Kapostolu Petulu watukoleshaña kwikala antu akweti wuselewa waNzambi hampinji ‘yitunakutalila nakukeña nankashi chakenza ifuku daNzambi dakasuñunuka mawulu hakabutukawu kesi, dakasuñunuka yuma yejima neyena dakesi.’ (2 Pet. 3:12) Idi ifuku katataka dishiki, nawa Yehova wukujilumuna chibalu chejima chakaayi kaSatana. Satana wukutwalekahu kuzatisha ‘yuma yamunu mwishina’ hakutweseka neyi cheliliyi kudi Evu niYesu, sampu iyi mpinji yinashiki. Bayi twikala neyi Evu nakufwila yuma yakudizañalesha etu awenuku. Neyi twila mwenimu chikumwekana neyi tunakumwiteja Satana kwikala nzambi yetu. Twatela kwikala neyi Yesu nakukaana tufuta twamuchidiwu, hichidi namuloña wekoku datufuta twenituku. Dichi wejima wetu tufuukulenuhu kwikala antu anakukeñayi Yehova nindi twikali.

[Malwihu aKuzatisha haKudiza]

[Mwevulu wudi hefu 24]

Satana wazatishili “Kufwila kwachisemwa chaheseki” hakumudimba Evu (Talenu parakalafu 7)

[Mwevulu wudi hefu 25]

Yesu hetejeli chuma chidi chejima chimuluwañeshuku (Talenu parakalafu 8)

[Nyevulu yidi hefu 26]

Nshimbinyi jamuNsona jimwatela kwanuka neyi mudi muniku kukala? (Talenu maparakalafu 13, 14)