Elisha Wamweni Makalu Akesi—Komana Ninenu Mwayimonaña?

Mwanta wakuSiriya wakeñeleña kaprofwetu waNzambi Elisha nawa wamulondeleli kumusumba waDotani wadiña hampidi wakuchikiluwu nambañu. Nyuuli wawaSiriya watemesheli atuwalu, makalu anjita nimashidika kuya kuDotani. Chikwachileña mashidika adiña akuchika dehi musumba.—2 Anya. 6:13, 14.

Ñamba yaElisha chahindukiliyi budidi nakwidika hanji, wamweni antu enjili nakukwata kaprofwetu. Ñamba wakalukili nindi: “Yayo! Eyi mwanta wami, Tukwila ñahi?” Elisha wahosheli nindi: “Bayi wutiya womaku. Awa tudi nawu etu, anabadiki awa adi nawena.” Kuhiñahu kaprofwetu walombeli nindi: “Eyi Yehova, amutoneshi mwani, mesu, indi amoni.” Nsañu yatwalekahu nawu: “Yehova hakutonesha mesu anowu mukwenzi, wamweni komana mpidi yinenzali kwanatuwalu namakalu akesi anamunyeñumuki Elisha kwi-ndo.” (2 Anya. 6:15-17) Yumanyi yitwatela kudizila kunichi chuma niyuma yikwawu yamwekeni muchihandilu chaElisha?

Elisha hatiyili womaku hampinji yamulukukiluwu kudi aSiriya muloña wamukuhweleleli Yehova nawa wadimweneni namesu kapu chamukiñiluwu kudi Nzambi. Makonu hitwamonaña yihayamishaku, ilaña tweluka chikupu netu Yehova wakiñaña antu jindi hamu neyi izanvu. Ninetu nawa chidi neyi atunyeñumuka kudi tuwalu nimakalu akesi. Neyi ‘tuyimonaña’ namesu etu achikuhwelelu nawa mpinji yejima tushindamenaña hadi Nzambi, ‘twakashakamaña chakadi kutiya woma’ nawa Yehova wakatukiswila. (Mas. 4:8) Tushinshikenu chitwatela kuhetela muyuma yikwawu yamwekeni muchihandilu chaElisha.

ELISHA HAKUTACHIKA KUMUKALAKELA ELIJA

Hampinji yimu, Elisha wadiña nakudima mwiha, dichi kaprofwetu Elija wenjili kudi yena nawa wamumbilili ihina dindi. Elisha welukili mwatalishili chumichi. Watelekeli chawija nakushalisha atata yindi niamama yindi, kufumahu wayili nakutachika kumukalakela Elija. (1 Anya. 19:16, 19-21) Hamuloña wakwila Elisha wadihanini kumukalakela Nzambi hakuminini ñovu jindi, wekalili chitwa muchikasa chaYehova nawa nkumininaku wekalili kaprofwetu wahiñili hadi Elija.

Elisha wamukalakeleli Elija hadi yaaka yitanu nachimu.  Haniyi mpinji, Elisha diyi wadiña ‘nakwichilila meji kumakasa aElija.’ (2 Anya. 3:11) Hayina mpinji, antu adiileña yakudya namakasa, chakadi kuzatisha mafoloku, mpoku hela yozelu yikwawu yakudiisha nachu. Hanyima yakudya, ñamba wamwichilileña nkaka yindi menji kumakasa kulonda yesuki. Dichi, nyidimu yikwawu yazatileñayi Elisha yamwekeneña neyi yalema wanyi. Hela chochu, Elisha wamweneña mudimu wakwikala kalama kaElija nindi hikukooleka chikupu.

Makonu, akwaKristu amavulu niwena azataña nyidimu yashiyashana yamumudimu wampinji yejima. Muloñadi? Muloña amukuhwelela Yehova nawa akeñaña kumukalakela hakumina ñovu jawu. Chakutalilahu, amakwawu afumaña kumatala nakuya nakuzatila haBeteli hela kwiluña kudi mudimu wakutuña. Anateli kuzata nyidimu yamonañawu antu amavulu nawu yalema wanyi. Kwosi mukwaKristu watela kutoñojoka nindi iwu mudimu walema wanyi, muloña Yehova wawulemesha chikupu.—Heb. 6:10.

ELISHA WATWALEKELUHU NAMUDIMU WAMWINKELUWU

Henohu Nzambi kanda ‘yamutwali Elija mwiwulu muchinjimbi,’ wamutemesheli kufuma kuGiligali nakuya kuBeteli. Elija wafuukwiluhu nindi mulunda nindi yashali, ilaña Elisha wamwakwili nindi: “Hinukukushiyaku.” Chatwalekeluhu nalwendu, Elija wamulejeli Elisha cheñi kapampa kayedi nindi yashali ilaña wakaanini. (2 Anya. 2:1-6) Neyi Luti chamukakeleliyi Nyawomi, Elisha niyena wamukakeleli Elija. (Luti 1:8, 16, 17) Muloñadi? Chakadi nikujina, hamuloña wakwila Elisha walemesheli nankashi mudimu wamwinkeluwu kudi Nzambi wakumukalakela Elija.

Elisha watwimikila chakutalilahu chachiwahi. Neyi atwinka mudimu mukuloñesha kwaNzambi, tukuwulemesha chikupu neyi chakwila mpinji yejima twanukaña netu tunakukalakela Yehova. Kwosi kukooleka kwabadika hakumukalakela Yehovaku.—Mas. 65:4; 84:10.

“LOMBAKU CHIWUKUKEÑA NIKWILILI”

Chadiña nakwendawu awa amayala ayedi, Elija wamulejeli Elisha nindi: “Lombaku chiwukukeña nikwilili hohanu hinichidi kanda anfumishi kudeyi.” Neyi chochalombeliyi Solomoni yuma yakuspiritu kuyaaka yakunyima, Elisha niyena dichalombeliyi. Walombeli nindi ‘yekali namaseka ayedi aspiritu yaElija.’ (1 Anya. 3:5, 9; 2 Anya. 2:9) MuIsarela, iyala neyi yavwala mwana wawedi weyala, watambwilileña maseka ayedi awuswana. (Kuhit. 21:15-17) Dichi, Elisha walombeleña kulonda yekali nswana yaElija hela kuswana chifulu chaElija chawukaprofwetu. Kubombelahu, Elisha wakeñeleña kwikala wahamuka neyi Elija, ‘wamutiyilili Yehova mukawu nankashi.’—1 Anya. 19:13, 14.

Indi Elija waakwili ñahi kulomba kwañamba yindi? Kaprofwetu wamwakwili nindi: “Wunalombi chuma chakala; hela chochu neyi wakanmona hiyakanfumishawu kudeyi chumochu wakachimona; neyi nehi hiwakachimonaku.” (2 Anya. 2:10) Ñakwilu yaElija yatalishili muyuma yiyedi yalema. Chatachi, Nzambi diyi hohu wadi kufuukulahu neyi chakwila Elisha wadi kutambwila yuma yalombeliyi. Chamuchiyedi, Elisha wadi kutambwila chuma chalombeliyi neyi yatwalekahu kwikala naElija hela chakwila kumwekana yuma yakala hela nehi.

YUMA YAMWENIYI ELISHA

Komana Nzambi wamwinkeli Elisha yuma yalombeliyi? Bayibolu yahosha nawu: “Cheliluwu iku adi nakuya nakuhanjika, kukasumuka ikalu dakesi nituwalu twakesi hitukuyambula, iwu iku, iwu iku; Elija hakuya mwiwulu muchinjimbi. Elisha wachimweni.” * Ichi dichaakwiliyi Yehova kulomba kwaElisha. Elisha wamumweni Elija anakumufumisha kudi yena, watambwilili maseka ayedi aspiritu yaElija, nawa wekalili kaprofwetu waNzambi wasinsili mudi yena.—2 Anya. 2:11-14.

Elisha wanoneli ihina daholokeli kumujimba waElisha yovwala nikuvwala. Idi ihina damumwekesheli Elisha nawu nekali dehi kaprofwetu kaNzambi. Wunsahu wukwawu wamwekesheli nawu amutondeli kwikala kaprofwetu wamwekeni hampinji yakoñeliyi chihayamisha hambwiliyi menji hakachi amuKaloña kaYodana.

Chakadi nikujina, chuma chamweniyi Elisha hampinji yayiliyi Elija muchinjimbi chamushikili hamuchima chikupu. Muloña antu hiyamonaña makalu anjita akesi niatuwalu akesi ifuku niifukuku. Iyi yuma yamwekesheli wunsahu wukwawu wakwila nawu Yehova waakwili kulomba kwaElisha. Neyi Yehova naakuli kulomba kwetu, hitwamonaña yimwenu yamakalu anjita akesi niatuwalu akesuku. Ilaña twelukaña netu Nzambi wazatishaña ñovu jabadika kulonda yeli mwaya muchima windi. Nawa neyi tumona netu Yehova  nakukiswila kuloñesha kwindi kwahamaseki, dikwila nawu ‘tunakumona’ ikalu dindi damwiwulu dinakwenda.—Ezek. 10:9-13.

Elisha wamweni yuma yayivulu yamuleñeleli yakuhweleli nindi Yehova wukweti ñovu chikupu. Kuhosha hohu chalala, spiritu yaNzambi yamukwashili kaprofwetu kukoña yihayamisha 16, yabadikili kapampa kayedi hayihayamisha yakoñeliyi Elija. * Kapampa kamuchiyedi hamweniyi Elisha atuwalu nimakalu akesi, yadiña himpinji hikwadiña kukala mumusumba waDotani kunatenuwu kukutachika kwachinu chibaaba.

ELISHA WAMUKUHWELELELI YEHOVA

Hela chakwila ayinyeñumukili kudi ayilumbu haDotani, Elisha hatiyili womaku. Muloñadi? Muloña wamukuhweleleli Yehova chikupu. Anetu nawa twatela kwikala nachikuhwelelu chakola chamuchidiwu. Dichi, twatela kulomba spiritu yajila yaNzambi kulonda yitukwashi twikali nachikuhwelelu ninyikabu yikwawu yamukabu waspiritu.—Luka 11:13; Ŋal. 5:22, 23.

Cheñi, chuma chamwekeni haDotani chamuleñeleli Elisha yamukuhweleli chikupu Yehova nimazaza indi awañelu abulaña kumwekana. Nzambi watemesheli añelu kulonda akuchiki musumba nikumukiña kudi ayilumbu. Nzambi wamupulwishili Elisha niñamba yindi muchihayamisha kuhitila mukuputisha mesu awayilumbu jawu. (2 Anya. 6:17-23) Hayina mpinji yakala, nimpinji jikwawu, Elisha wamukuhweleleli Yehova namuchima wejima.

Kufwana Elisha, tumukuhwelelenu Yehova Nzambi. (Yish. 3:5, 6) Neyi twila mwenimu, ‘Nzambi wakatutiyila luwi nikutukiswila.’ (Mas. 67:1) Mwamweni, hiyatwinyeñumuka kudi makalu niatuwalu akesuku. Hela chochu, Yehova wakakiña antu jindi hampinji ‘yalukadi lwasweja’ lunakwinza. (Mat. 24:21; Chim. 7:9, 14) Sampu yina mpinji yinashiki dehi, twanukeña netu “Nzambi diyi chiswamu chetu chakubatamina.”—Mas. 62:8.

[Tumazu twaheshina]

[Chikasha chidi hefu 30]

NYILOÑA YIKWAWU YITUNAYIÑA KATATAKA

243 Kuvula kwanyiloña yinayiñuwu aYinsahu jaYehova muyota yamaneni mukaayi kejima

France—$8.2 Miliyoni Mali Afuntishiluwu

Kuvula (kwamali akuUnited States) ayifuntishililuwu aYinsahu jaYehova haDecember 11, 2012, kudi nfulumendi yakuFrance hanyima yakunyika namuloña hadi yaaka 15

Greece—Chota chaNfulumendi

HaNovember 2, 2012, Chota chaNfulumendi chetejeli nawu aYinsahu jaYehova, nsakililu yelukawu mukaayi kejima, atela kwikala namatala akudifukwilamu

20 Nyiloña yinayiñuwu muchota chaEuropean Court of Human Rights kufuma muApril 2000

South Korea: Chahakwili—U.N. Human Rights Committee

HaOctober 25, 2012 - ituña daSouth Korea adilejeli kufweta aYinsahu jaYehova akushika ku 388 hamuloña wakuyikabisha chakaaninuwu kwiñilawu wushidika