Mwanta Watiyili Kuwaha
KUFUMA MUNKALAÑA JETU
Mwanta Watiyili Kuwaha
CHUMICHI chamwekeni muAugust 1936. Chamwekeneni kuChipañu chaMwanta muSwaziland hela mukala. Robert niGeorge Nisbet afumini hohu hakuvumisha mpanji yamazu akukwata yaMana Kwetu J. F. Rutherford muchisanji chamumotoka. Mwanta Sobhuza II watiyili kuwaha. George washimwini nindi: “Twatiyili nsonyi nankashi muloña mwanta wakeñeleña kulanda ichi chisanji, malekodi, nilawudi sipika yakutiyakeshelamu nsañu yaWanta.”
Robert wahosheli nakudanakena nindi iyi yuma yakulandisha wanyi. Muloñadi? Muloña iyi yisanji yamuntu wacheñi. Mwanta wakeñeleña kwiluka mwini yuma.
Robert wakwili nindi, “Yuma yejimiyi yaMwanta wacheñi.” Kuhiñahu Sobhuza wakeñeleña kwiluka Mwanta yeniwu. Robert wahosheli nindi, “Diyi Yesu Kristu, Mwanta waWanta waNzambi.”
Sobhuza wetejeli nakalemesha kakeni nindi, “HiMwanta Muneni. Hinakukeña kusenda yuma yinduku.”
Robert wasonekeli nindi: ‘Nahayamini chikupu hakudikehesha kwaMwanta Muneni, Mwanta Sobhuza. Wahosheleña chiwahi Chizungu chakadi kudinyamuna hela kuditiya nawa wahosheleña chakadi kuhita mumbadi nawa wadiña wakasunuka. Nahanjekeli nindi mukasanji kindi hadi jiminiti 45, hampinji yavumishileñayi George tumina hanzi.
Robert watwalekeluhu nindi, ‘hefuku denidi namelela, twayili haThe Swazi National School hitwadiluñishili yuma yayiwahi chikupu yamwekeni. Twashimwinini kudi mukulumpi washikola, nawa watiyilili nakanañachima. Chitwahosheli netu tudi nekina ditunakukeña kuvumisha nawa tunakukeña shikola yejima atiyililuku, watiyili kuwaha chikupu chakwila watambikili akashikola akushika kunkulakaji yimu nakuyileja ashakami hamatahu kulonda atiyilili kuchisanji. Atulejeli nawu hashikola yeneni akwenzi ayidizishileña nyidimu yawundimi, kudima matempa, kusoñasoña, kutuña matala, kudiza Chizungu nimakumi, awambanda ayidizishileña chakwakamena ayeji, nyidimu yahetala ninyidimu yikwawu.’ Nkaka yaMwanta Muneni wamumbanda diyi watachikili iyi shikola. *
Kukutachika kwa 1933, Mwanta Sobhuza watiyilili namuzañalu kudi apayiniya endeleli Chipañu chindi. Hampinji yimu, wapompesheli atupasu twindi akushika kunkulakaji yimu kulonda atiyilili kuNsañu yaWanta yamazu akukwata. Wasonekesheli kulonda yatambwileña magazini etu nawa wetejeli nyikanda yetu. Chimwahitili mpinji yantesha, Mwanta wekalili nalayibulali yanyikanda yateokalatiki. Kubombelahu cheñi, watwalekeluhu kuhemba nyikanda yejima hela chakwila nfulumendi yachiyuulu chawaBritain yakaanishili kuzatisha nyikanda yetu hampinji hikwadiña njita yakaayi yamuchiyedi.
Mwanta Sobhuza II watwalekeluhu kwiteja aYinsahu kumwendela kuChipañu chindi kuLobamba, nawa watambikileña akulumpi jansakililu kwinza nakutiyilila kumpanji jaBayibolu. Chinsahu wejina daHelvie Mashazi wamunidi iluña hampinji yahanjekeleñayi haNsona yaMatewu kapetulu 23, izanvu dawakulumpi ansakililu anyamokeli nakuzuwa chikupu nakumukanjikija nawu yashakami hamaseki. Ilaña Mwanta wayikaanishili nawa wamulejeli Mana Kwetu Mashazi yatwalekuhu. Kubombelahu cheñi, Mwanta walejeli izaza nindi asonekeña mavasi amuBayibolu akutenañawu mumpanji.
Hanyima yakutiyilila kumpanji yahaniniyi mana kwetu payiniya hampinji yimu, akulumpi jansakililu awana adiñahu abalumwini nkola jawu jakuyikovwelu nakubidika nawu: “Ichi dinu hitudi akulumpi jansakililu cheñuku, ilaña tudi aYinsahu jaYehova.” Kufumahu amwihwili payiniya neyi chakwila wadiña nanyikanda neyi yadiña naMwanta Muneni.
Kufuma muyaaka yamuma 1930 kushika nimuchaaka chafwiliyi mu 1982, Mwanta Muneni walemesheli chikupu aYinsahu jaYehova nawa hetejeli nindi ayiyandisheña hamuloña wakubula kulondela tushidikilu twawaSwazi. Dichi, aYinsahu adiña nakumusakilila nankashi nawa chafwiliyi amudilili chikupu.
Kukutachika kwachaaka cha 2013, muSwaziland mwadiña akwakushimwina aWanta akubadika ha 3,000. Chineli munidi ituña mudi antu akubadika hachihita chimu, dikwila nawu mukwakushimwina wumu munidi ituña watela kushimwina antu 384. Apayiniya akubadika ha 260 adiña nakudikita chikupu muyipompelu 90, nawa antu akushika ku 7,496 enjili kuChanukishu mu 2012. Chakadi nikujina, munidi ituña akwakushimwina akutwalekahu nakuvulilaku. Mwamweni, chikuku chakola achalili kumafuku akutachika hendeleluwu ituña daSwaziland muma 1930.—Kufuma munkalaña jetu muSouth Africa.
[Tumazu twaheshina]
^ The Golden Age, June 30, 1937, ifu 629.
[Mwevulu wudi hefu 31]
Mwevulu waMwanta Sobhuza II wakwatiluwu kudi Robert Nisbet mu 1936 nakuwutemesha kuWatch Tower Society
[Mwevulu wudi hefu 32]
(Hewulu) Kadizi wahashikola yeneni wenjili nakutiyilila kumpanji yawantu amavulu muSwaziland mu 1936
[Mwevulu wudi hefu 32]
(Kuchidiilu) George Nisbet namotoka yindi yadiña nachisanji
You May Also Like
KAPOSHI KAKUTALILA—KAKUDIZAMU
Mbutu yaWanta Chayikuwiliwu Katachi muPortugal
Kukalanyi kwashindiliwu akwakushimwina aWanta akusambila muPortuga?
KAPOSHI KAKUTALILA—KAKUDIZAMU
Mpanji yawantu amavulu yinashikiji nsañu yayiwahi muIreland mwejima
Chumanyi chaletesheli C. T. Russell yahoshi nindi iluña “dadiwahi nawa dinashiki hakudimuna”?
KAPOSHI KAKUTALILA—KAKUDIZAMU
“Tunakutalila Chikupu Kupompa Kukwawu”
Chumanyi chaletesheli iku kupompa kwampompeliwu hohu kudi antu 150, akwiluki kudi antu ejima?
KAPOSHI KAKUTALILA—KAKUDIZAMU
“Twatiyili Iyena niKukeña Kwakufuma Hanyichima Kubadika Kunyima”
Atudizi aBayibolu elili ñahi chayikolesheliwu ‘kutiyakesha Mwanta niwanta windi’ hanyima yakupompa mu1922?
KAPOSHI KAKUTALILA—KAKUDIZAMU
“Kwosi Njila Yatama Hela Yayilehi”
Muyaaka yamuma 1920 nakushika kumatachikilu amuma 1930, apayiniya amwekesheli mpwila yakushimwina nsañu yayiwahi yaWanta waNzambi munyikala yamuAustralia.
KAPOSHI KAKUTALILA—KAKUDIZAMU
“ Akwakushimwina aWanta muBritain—Tonenu!!”
Hadi yaaka 10 akwakushimwina aWanta anavuli chikupu muBritain! Yuma yahimpikili?
