Tuditoñojokenu Nikudikolesha Wumu Namukwawu

“Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi.”—HEB. 10:24.

MUKWAKULA NENUDI?

Indi ‘kuditoñojoka muntu himuntu’ kwatalisha mudihi?

Tunateli ‘kudisañumuna ñahi kukeñañana nikwila nyidimu yayiwahi’?

Tunateli ‘kudikolesha ñahi wumu namukwawu’?

1, 2. Chumanyi chayikwashili aYinsahu jaYehova 230 kupuluka hakumana kwaNjita Yakaayi Yamuchiyedi?

 CHIYUULU chawaNazi chichamanini hakumana kwaNjita Yakaayi Yamuchiyedi, ahanini lushimbi lwakujilumuna antu amavulu ashalili muyilombu yakuyandishila. Atuyili amuchilombu chakuyandishila chakuSachsenhausen ateleleli kuyitwala kuchikumu chakaluñalwiji kulonda ayikandamishi mumbopolu nakuyijimika hakaluñalwiji.

² Atuyili 33,000 adiña muchilombu chakuyandishila chamuSachsenhausen ateleleli kwenda makilomita 250 kuya kuLübeck, musumba wamuGermany wekala kuchikumu chakaluñalwiji. Hakachi kawu hadiña aYinsahu jaYehova 230 afumini kumatuña atanu nadimu, alejeluwu kwendela hamu nawakwawu. Wejima wawu azeyeli hamuloña wanzala niyikatu. Indi amana kwetu apulukili ñahi hanilu lwendu? Wumu hakachi kawu wahosheli nindi: “Twatwalekeluhu kudikolesha wumu namukwawu netu tutwalekuhu nakwenda.” Hamuloña wakuyinka ñovu “jabadika nankashi” kudi Nzambi nikudikeña wumu namukwawu kwayileñeleli apuluki muniku kukala.—2 Kor. 4:7.

3. Muloñadi chitwatela kudikoleshela wumu namukwawu?

³ Makonu, hitudi halwendu lwamuchidiwuku, ilaña twamonaña kukala kwakuvulu. Hanyima yakutachika kwaWanta waNzambi mu 1914, Satana amunatili mwiwulu nakumuhembela hamaseki, nawa “wudi nandombu yayeni, chanelukiyi nindi kunashali dehi mpinji yindi yantesha hohu.” (Chim. 12:7-9, 12) Chineli dinu ituña dinakuswila kwakwihi naAmagedoni, Satana nakuzatisha kweseka niikakeja kulonda yatuzeyeshi kuspiritu. Kubombela hayumiyi, twamonaña makabi ifuku niifuku muchihandilu chetu. (Yoba 14:1; Mukwa. 2:23) Mpinji yikwawu makabi itwahitañamu neyi aswejelaku anateli kuleñela tusweji  kuzeya chakwila ñovu yidi yejima yitukwikala nayu muyitoñojoka nikuspiritu hiyinatweshi kutukwasha tuumiki nachineñuku. Shinshikenu hachakutalilahu chamana kwetu wunakwashi antu amavulu kuspiritu hadi yaaka yayivulu. Chelili nashinakaji dehi, yena niñodindi aholokeleli mukankati, nawa watachikili kuneña nankashi. Kufwana iwu mana kwetu, wonsu wetu twakeñaña “ñovu jabadika nankashi” kufuma kudi Yehova nikudikolesha wumu namukwawu.

4. Hakwila tukoleshi amakwawu, kufumbanyi kwakapostolu Pawulu kutwatela kulondela?

⁴ Hakwila twikali akwakukolesha akwetu, twatela kulondela chikupu kukonkomwena kwakapostolu Pawulu kwakolesheliyi akwaKristu aHeberu. Wahosheli nindi: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.” (Heb. 10:24, 25) Tunateli kuzatisha ñahi kufumba kudi munawa mazu?

“TUDITOÑOJOKENU MUNTU HIMUNTU”

5. Indi ‘kuditoñojoka muntu himuntu’ kwatalisha mudihi, nawa hakwila mwenimu chakeñekaña kwiladi?

⁵ ‘Kuditoñojoka muntu himuntu’ kwatalisha mukwila nawu “kwiluka kukankila kwawantu amakwawu, kutoñojoka hadi wena.” Komana tunateli kwiluka chikupu kukankila kwawakwetu neyi tuyimushaña hohu mulufuchi Hetala daWanta hela tuhanjekaña nawu hayuma yabula kulema? Inehi. Hela chochu, twatela kwiluka mwakukumina, kulonda ‘tudowi’ nakubula ‘kwikala atuvuba.’ (1 Tesa. 4:11; 1 Tim. 5:13) Dichi, neyi tunakukeña kukolesha amana kwetu, twatela tuyiluki chikupu, kwiluka chihandilu chawu, yililu yawu, wuspiritu wawu, hiyakolela, nikuzeya-zeya kwawu. Atela atumoneña nawu tudi amabwambu jawu nawa atela kwiluka nawu twayikeña. Chumichi chakeñekaña kwikala nampinji yakuhanjeka nawu, bayi hohu hampinji yikwetuwu kukala nawa ananeñuku, ilaña nihampinji jikwawu.—Rom. 12:13.

6. Chumanyi chikukwasha eluda ‘kutoñojoka’ hadi antu amwinkawu kuhemba?

⁶ Akulumpi muchipompelu ayikonkomwena ‘kubiña nyikoku yaNzambi yayinkawu kuhemba,’ nawa atela kwila mwenimu mukudikeñela. (1 Pet. 5:1-3) Anatweshi kuzata ñahi chiwahi mudimu wakubiña neyi anyikoku ayinkawu kuhemba ayiluka wanyi? (Tañenu Yishimu 27:23.) Neyi aeluda ekala akasunuka nawakwawu akwakwitiya nikudiluñisha kuhanjeka nawu, anyikoku anateli kulomba wukwashu kudi wena neyi adi mukukankila. Amana kwetu niahela niwena akwikala akasunuka hakushimuna chinakutoñojokawu niyuma yinakwakamawu, ichi chikuleñela aeluda ‘kutoñojoka’ hadi antu ayinkawu kuhemba nikuyikwasha.

7. Yumanyi yitwatela kwanuka neyi ananeñi ‘anakutuboka’?

⁷ Hampinji yalejeleñayi chipompelu chamuTesalonika, Pawulu wahosheli nindi: “Koleshenu akwakuzeya.” (Tañenu 1 Atesalonika 5:14.) “Akweti woma” azeya, chochimu niantu aneña. Yishimu 24:10 yahosha nawu: ‘Neyi wakazeya hefuku dakala ñovu jeyi jakakeha.’ Muntu wunaneñi chikupu nateli kutachika kuhosha mazu ‘akutuboka.’ (Yoba 6:2, 3) Neyi ‘hitukutoñojoka’ hadi antu amuchidawa, twatela kwanukaña netu yuma yahoshañawu hiyinateli kumwekesha chekalawu mumuchima wawuku. Rachelle, wadiña namama yindi waneñeli chikupu, welukili chumichi kuhitila muyuma yamumwekeneni. Rachelle wahosheli nindi: “Kakavulu Amama adiña nakuhosha yuma yakukatisha kumuchima. Nawa haniyi mpinji nesekeleña kwanuka yililu yekala nawaMama yayiwahi yidi neyi kukeña, luwi, nichisambu. Nelukili nami antu ananeñi ahoshaña yuma yayivulu yabulaña kufuma kumuchima wawu.  Chuma chatama chatela kubula kwilayi muntu hikumufuntishila katama nakatama.” Mukanda waYishimu 19:11 wahoshaña nawu: “Kutoñojoka kashinshi kwatoñojokañayi muntu kwamulabishaña kuzuwa; kulema kwindi yowu kudiwula mwanavulumuni mukwawu.”

8. Hinyi wutwatela ‘kukoleshela’ kukeña nawa muloñadi?

⁸ Tunateli ‘kutoñojokelaku’ ñahi muntu wudi namuchima wunachikeki hamuloña wansonyi nichineñi chinakutiyayi hamuloña wayiluwa yakoñeliyi kumpinji yakunyima, hela chakwila wadanakeneni? Kutalisha hadi muntu wabalumukili mumuchima muKorinda, Pawulu wasonekeli nindi: “Balumukenu mumwanakeni nikumukundeja, kuchina muntu wudi ochu kuchikika nehuñu odu danamoniyi. Dichi nayilembeleli nami mukoleshelenu kukeña kwenu.” (2 Kor. 2:7, 8) Izu dakwila nawu “mukoleshelenu” datalisha mukumumwekeshela kukeña. Hitwatela kutoñojoka hohu netu muntu nateli kwiluka nindi twamukeña nawa twamwakamenañaku. Watela kumona kukeña kwetu kuhitila muyililu nimuyuma yitwelaña.

“TUSAÑUMUNI AKWETU KUKEÑAÑANA NAKWILA NYIDIMU YAYIWAHI”

9. Indi ‘kusañumuna akwetu kukeñañana nakwila nyidimu yayiwahi’ kwatalisha mudihi?

⁹ Pawulu wasonekeli nindi: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi.” Twatela kusañumuna akwetu akwakwitiya kulonda amwekesheña kukeña nikuzata nyidimu yayiwahi. Neyi kesi hikakukeña kujima, twasonselañaku kulonda katwalekuhu kubidima. (2 Tim. 1:6) Munjila yoyimu, tunateli kusañumuna amana kwetu munjila yayiwahi kulonda amwekeshi chamukeñawu Nzambi niantuñi nawu. Kuhameka munjila yayiwahi kwalema hakusañumuna amakwawu kulonda azateña nyidimu yayiwahi.

10, 11. (a) Hinyi hakachi ketu wakeñekaña kumuhameka? (b) Lumbululenu kuhameka chikunateli kukwasha muntu ‘wunavulumuni.’

¹⁰ Wonsu wetu twakeñaña kutuhameka, chili tunaneñi hela nehi. Eluda wumu wasonekeli nindi: “Atata kanda anhamekeñahu dehi. Dichi chinakulileña hinadimweneña kulemaku.  . . . Hela tuhu nashikiji dehi yaaka 50 yakusemuka, natiyaña kuwaha neyi amabwambu jami ahameka nawu inakuzata chiwahi mudimu wawueluda. . . . Yuma yinahitilumu yanleñela kwiluka nami chalema kukolesha amakwawu nawa hakukolesha amakwawu hinakwataña nikumatahuku.” Kuhameka kunateli kusañumuna ejima—kubombelahu apayiniya ampinji yejima, atushinakaji niantu anateli kuneña.—Rom. 12:10.

¹¹ Neyi aeluda anakukeña kukwasha muntu wunakoñi chiluwa, kumuhameka hayuma yayiwahi yeliliyi kunyima kunateli kumukwasha kuhimpa yitoñojoka yindi nikutachika kwila mwaloña. (Ŋal. 6:1) Ichi chamwekeni kudi muhela wejina daMiriam. Wasonekeli nindi: “Nahitili muyuma yakala muchihandilu chami hampinji yayihañiluwu amabwambu jami muchipompelu, mpinji yoyimu atata akatili chikatu chakuwoñu. Naneñeli chikupu. Hakwila nami nimashi chineñi, natachikili kuhema neyala wakwituña.” Ichi chamuleñeleli yatiyeña nindi Yehova hatela kumukeñaku, nawa watachikili kutoñojoka nindi yafumi muchalala. Eluda chamwanukishiliyi hanyidimu yayiwahi yakalakeleñayi nakashinshi kunyima, iwu muhela watiyili kuwaha chikupu. Wayinkeli aeluda mpinji yakumukolesha nawu Yehova wamukeña. Chafuminumu, watachikili cheñi kumukeña Yehova. Walekeli kwenda namuntu wabula kwitiya nawa watwalekeluhu kumukalakela Yehova.

12. Tunateli kuhosha netudi kutalisha hakuzatisha mazu akutiyisha nsonyi, kuhoshola hela kutiyisha chikela hakukolesha amakwawu?

¹² Kumutiyisha muntu nsonyi kuhitila mukumwesekeja nawantu amakwawu, kumuhoshola hamuloña wakubula kulondela nshimbi jitwemika hela kumuleñela yatiyeña chikela hamuloña wakubula kuzata nañovu, kunateli kumuleñela yatachika kuzata nañovu, ilaña hanateli kutwalekahuku. Munjila yikwawu, kumuhameka mukwetu mukwakwitiya nikumusañumuna yatachiki kumukeña Nzambi kunateli kumukwasha chikupu.—Tañenu Afwilipi 2:1-4.

‘DIKOLESHENU WUMU NAMUKWAWU’

13. Kukolesha amakwawu kwabombelamu yumanyi? (Talenu mwevulu wakutachikilahu.)

¹³ Twatela ‘kusweja kudikolesha wumu namukwawu nanichi chituneluki netu ifuku odu hidikwinza nakuswila kwakwihi.’ Kukolesha amakwawu kwabombelamu kuyisañumuna kulonda atwalekuhu kuyilaku hambidi mukumukalakela Nzambi. Neyi chochitunateli kufwanisha kusañumuna kukeñañana nakwila nanyidimu yayiwahi nakusonsela kesi kanakukeña kujima, kukolesha amakwawu nikwena tunateli kukwifwanisha nakusha nsonsu hakesi kulonda katwalekuhu kubutuka hela kubidima. Kukolesha amakwawu kwabombelamu kukolesha nikukundeja antu ananeñi. Neyi atwinka mudimu wakukolesha muntu wamuchidiwu, twatela kuhosha nindi munjila yayiwahi nawa mukwovwaha. (Yish. 12:18) Hela chochu, twatela kwikala ‘anyakala kutiya’ nawa ‘alaba hakuhosha.’ (Yak. 1:19) Neyi tutiyilila nawushona, tunateli kwiluka yuma yinakuneñesha mukwetu mukwaKristu nikumuleja yuma yinateli kumukwasha yomiki kukala kunakumonayi.

14. Indi mana kwetu wumu wazeyeli amukwashili ñahi?

 ¹⁴ Tiyenu eluda wumu wukweti wushona chakwashiliyi mana kwetu wazeyeli hadi yaaka yayivulu. Eluda chatiyiliyi chahosheleñayi mana kwetu, welukili nindi mana kwetu wachidiña wamukeña chikupu Yehova. Wadizileña Kaposhi Kakutalila kejima kedikileña nawa wazatileña nañovu kulonda yawanikeña kukupompa mpinji yejima. Hela chochu, yililu yamwekesheleña antu amakwawu muchipompelu yamuneñesheleña nawa watiyileña kutama. Dichi eluda wawundili nakutiyilila chakadi kumufwisha namuloña nawa wamwekesheli kukeña kudi mana kwetu nichisaka chindi. Mukuhita kwampinji, mana kwetu welukili nindi wadiña nakwiteja yuma yatama yamweniyi kunyima yimukañesheña kumukalakela Nzambi wakeñeliyi. Eluda wamulejeli mana kwetu nindi akazatili hamu mumudimu wakushimwina. Hamuloña wakumukwasha kudi eluda, mana kwetu watachikili kuzata chikupu mudimu wakushimwina nawa chimwahitili mpinji washikiluhu cheñi kukalakala neyi eluda.

15. Chumanyi chitunateli kudizila kudi Yehova kutalisha hakukolesha antu ananeñi?

¹⁵ Muntu wazeya hanateli kukola hohenohu hela kutambwila wukwashu wetu swayi-swayuku. Twatela kutwalekahu kumukwasha. Pawulu wahosheli nindi: “Koleshenu akwakuzeya, ilukenu dakudiwunjika nawantu ejima.” (1 Tesa. 5:14) Chatela tuleki swayi kukwasha azeya, twatela kutwalekahu kuyikolesha nikuyikwasha. Kumpinji yakunyima, Yehova wadiwunjikili nawambuñindi azeyeli hampinji yimu. Chakutalilahu, Nzambi wamutiyilili luwi Elija, nakumutoñojokelaku chatiyileñayi. Yehova wamwinkeli iwu kaprofwetu yuma yakeñekeleña hakwila yatwalekuhu kuzata mudimu windi. (1 Anya. 19:1-18) Yehova wamwanakeneni Davidi hamuloña wakwila wabalumukili mumuchima chikupu. (Mas. 51:7, 17) Nzambi wakwashili cheñi nsoneki waMasamu 73, wakeñeleña kuleka Kumukalakela. (Mas. 73:13, 16, 17) Yehova watutiyilaña luwi niwushona, sweje-e neyi tunaneñi nikuzeya. (Kwid. 34:6) Wushona windi “Wabalumukaña kwawu wawiha,” nawa hiwamba ‘kakumaku.’ (Mukeŋa 3:22, 23) Yehova wakeñaña nindi tulondeleña chakutalilahu chindi nikwakamena chiwahi antu ananeñi.

DIKOLESHENU WUMU NAMUKWAWU KULONDA MUTWALEKUHU KWENDA MUNJILA YAYA KUWUMI

16, 17. Chumanyi chitwatela kufwila kwila chineli kukuma kwakanu kaayi kunaswili mukamwihi, nawa muloñadi?

¹⁶ Hakachi kawatuyili 33,000 afumini muchilombu chakuyandishila chakuSachsenhausen, antu amavulu afwili. Hela chochu, aYinsahu jaYehova ejima 230 afumini munichi chilombu apulukili. Kudikolesha nikudikwasha wumu namukwawu kwayikwashili chikupu hakwila apuluki muyina yizumba.

¹⁷ Makonu, tunakwenda ‘munjila yaya kuwumi.’ (Mat. 7:14) Katataka, akwakudifukula aYehova ejima keña endeli hamu nakwiñila mwituña dadiha mwakekala kuloña. (2 Pet. 3:13) Tufwilenu kudikwasha wumu namukwawu hampinji yitunakwenda munjila yaya kuwumi wahaya nyaka.

[Malwihu aKuzatisha haKudiza]

[Mwevulu wudi hefu 20]

Zatilenu hamu nawakwenu mumudimu wamwiha

[Mwevulu wudi hefu 20]

Disañumunenu kukeñañana nikwila nyidimu yayiwahi

[Mwevulu wudi hefu 21]

Diluñishenu kudikunda kwakuwahi

[Mwevulu wudi hefu 22]

Tiyililenu nakanañachima kudi muntu wunakukeña kumukolesha (Talenu maparakalafu 14, 15)