Yehova ‘Wansendelaña Chitelu Chami Ifuku niIfuku’

Maretha du Raan

Hela chakwila kukala kunukweti kwayikatu yami yavulumukaña chakukasumwisha yinammweshi kalula, Tata yami wamwiwulu nankwashi chikupu mukuhanda kwami. Kubadika hadi yaaka 20 yinahituhu, nawanaña muzañalu wabadika mukumukalakela Yehova mudimu wawupayiniya.

Nasemukili mu 1956 nawa nadiña nachikatu chaspina bifida. Chineli mujila wamumwoñololu washinkikileña chikupu wanyi, nyijila yinakisiki chakwila yinanleñeli nikañanyeña kwenda chiwahi nawa chinaleteshi yikatu yikwawu yakala chikupu.

Henohu kanda nisemuki, amishonali adisumbula aYinsahu jaYehova atachikili kudiza Bayibolu nawanvwali jami. Hampinji yinadiña kansi, mumbaka yaUsakos muNamibia munashakamineña mwadiña hohu akwakushimwina antesha. Dichi, nsañu yakudiza hakupompa kwachipompelu twadiña nakuyidiza hamu nachisaka. Chinashikijili yaaka yitanu nayiyedi yakusemuka, anladikili kuladika kwatenañawu nawu urostomy, kuladika kwanlokweluwu hamujimba wami kulonda nitwesheña kuta nsonsu. Chinashikijili yaaka 14 yakusemuka, nakatili chinkonya. Hamuloña wakwila shikola yeneni yadiña kwakulehi nawa ami nakeñekeleña anvwali jami añakameneña chiwahi, nakañenyi kumanisha shikola.

Hela chochu, nafuukwiluhu kukolesha wuspiritu wami. Twadiña tudana nyikanda yayivulu mwidimi detu daAfrikaans. Dichi nadizili kutaña Chizungu kulonda nitañeña nyikanda yetu yayivulu. Nekalili mukwakushimwina waWanta nawa napapatisheweli chinashikijili yaaka 19. Hayaaka yiwana yahiñiluhu, nahitili muyikatu yayivulu nawa naneñeli chikupu. Hela chochu, mumbaka yanyanya munashakamineña, kuchiina antu kwankañesheli kushimwinaña neyena mumudimu wakushimwina.

Hampinji yinadiña muyaaka yamuma 20, twabuukili kufuma kuNamibia nakuya kuSouth Africa, nawa diyadiña mpinji yatachiki kudikunda hamu nachipompelu. Chawahili nankashi! Hela chochu, anladikili cheñi, haniyi mpinji anladikili kuladika kwatenañawu nawu colostomy.

Chimwahitili mpinji natiyili nkoñi wañinza nakuhosha hamudimu wawupayiniya. Mazu ahosheliyi anshikili hamuchima. Nelukili nami hamuloña wayikatu yami hinukutwesha kuzata mudimu wawupayiniyaku, ilaña namweni Yehova chankwashiliyi mukukala kwejima. Dichi nasonekesheli mudimu wawupayiniya wampinji yejima. Hela chochu, hamuloña wayikatu yami, aeluda ajinokeleña hakuñiteja kutachika iwu mudimu.

Hela chochu, nafuukwiluhu kuzata chikupu mudimu wakushimwina Wanta. Hamuloña wawukwashu wawamama niantu amakwawu, mutukweji tutanu nakamu nazatili maora azatañawu apayiniya mumudimu wamwiha. Chamwekesheli mpwila yami yakukeña kuzata wupayiniya nikumwekesha nawu yikatu yami hiyadi kunkañeshaku. Nasonekesheli cheñi, nawa haniyi mpinji añitejeli kuzata mudimu wawupayiniya. Dichi haSeptember 1, 1988, natachikili kuzata wupayiniya wampinji yejima.

Hakwikala payiniya, namonaña Yehova chankwashañayi mpinji yejima. Kudizisha antu amaha chalala chatela nitoñojokeña hakukala kwami kunankiñi nankashi, kunankoleshi nawa kunankwashi nipami kuspiritu. Nawani muzañalu weneni mukukwasha antu amavulu adihani nikupapatishewa.

Nichidi kuyekela nayikatu yami. Ilaña Yehova ‘wansendelaña chitelu chami ifuku niifuku.’ (Mas. 68:19) Wankoñelaña yuma yayivulu yabadika hakunkwasha hohu numikeña; ilaña wankwashaña kulonda nitwalekuhu kudiluñisha wumi.